બૃહત્પારાશરહોરાશાસ્ત્રમ્ · અધ્યાય 82

અથ તિલાદિલાંછનફલાધ્યાયઃ

અથાઽહં દેહજાતાનાં લાંછનાનાં ફલં બ્રુવે ।
આવર્તાનાં તિલાનાં ચ મશકાનાં વિશેષતઃ

અઙ્ગનાનાં ચ વામાંગે દક્ષિણાઙ્ગે નૃણાં શુભમ્ ।
રક્તાભં તિલકાભં વા લોમ્નાં ચક્રમથાપિ વા

તિલાદિલાંછનં સ્ત્રીણાં હૃદિ સૌભાગ્યસૂચકમ્ ।
યસ્યા દક્ષિણવક્ષોજે રક્તે તિલકલાંછને

સા સન્તતિતતિં સૂતે સુખસૌભાગ્યસંયુતામ્ ।
રક્તાભં તિલકં યસ્યાઃ સ્ત્રિયા વામે સ્તને ભવેત્

એક એવ સુતસ્તસ્યા ભવતીત વિદો વિદુઃ ।
પુત્રીપુત્રયુતા જ્ઞેયા તિલકે દક્ષિણે સ્તને

ભ્રુવોર્મધ્યે લલાટે વા લાંછનં રાજસૂચકમ્ ।
કપોલે મશકો રક્તો નિત્યં મિષ્ઠાન્નદાયકં

ભગસ્ય દક્ષિણે ભાગે લાંછનં યદિ યોષિતઃ ।
સા હિ પૃથ્વીપતેઃ પત્ની સૂતે વા ભૂપતિં સુતમ્

નાસાગ્રે લાઞ્છને રક્તં રાજપત્ન્યાઃ પ્રજાયતે ।
કૃષ્ણવર્ણં તુ યસ્યાઃ સા પુંશ્ચલિ વિધવાઽથ વા

નાભેરધો નૃણાં સ્ત્રીણાં લાઞ્છનં ચ શુભપ્રદમ્ ।
કર્ણે ગણ્ડે કરે વાઽપિ કણ્ઠે વાઽપ્યથ લાઞ્છનં

પ્રાગ્ગર્ભે પુત્રદં જ્ઞેયં સુખસૌભાગ્યદં તથા ।
તિલાદિ લાઞ્છનં વિપ્ર ગુલ્ફગેશે ચ દુઃખદમ્

ત્રિશૂલાકૃતિ ચિહ્ન ચ લલાટે યદિ જાયતે ।
નારી રાજપ્રિયા જ્ઞેયા ભૂપતિશ્ચ નરો ભવેત્

લોમ્નાં પ્રદક્ષિણાવર્તો હૃદિ નાભૌ કરે શ્રુતૌ ।
દક્ષપૃષ્ઠે શુભો વસ્તૌ વામાવર્તોઽશુભપ્રદઃ

કટ્યાં ગુહ્યેઽથવાઽવર્તો સ્ત્રીણાં દૌર્ભાગ્યસૂચકઃ ।
ઉદરે હન્તિ ભર્તારં મધ્યપૃષ્ઠે ચ પુંશ્ચલી

કણ્ઠે લલાટે સીમન્તે મધ્યભાગે ચ મૂર્ધનિ ।
આવર્તો ન શુભઃ સ્ત્રીણાં પુસાં વાઽપિ દ્વિજોત્તમ

સુલક્ષણા સુચરિતા અપિ મન્દાયુષં પતિમ્ ।
દીર્ઘાયુષં પ્રકુર્વન્તિ પ્રમદાશ્ચ મુદાસ્પદમ્