બૃહત્પારાશરહોરાશાસ્ત્રમ્ · અધ્યાય 57

અથ શન્યન્તર્દશાફલાધ્યાયઃ

મૂલત્રિકોણે સ્વર્ક્ષે વા તુલાયામુચ્ચગેઽપિ વા ।
કેન્દ્રત્રિકોણલાભે વા રાજયોગાદિસંયુતે

રાજ્યલાભો મહત્સૌખ્યં દારપુત્રાદિવર્ધનમ્ ।
વાહનત્રયસંયુક્તં ગજાશ્વામ્બરસઙ્કુલમ્

મહારાજપ્રસાદેન સેનાપત્યાદિલાભકૃત્ ।
ચતુષ્પાજ્જીવલાભઃ સ્યાદ્ગ્રામભૂમ્યાદિલાભકૃત્

તથાઽષ્ટમે વ્યયે મન્દે નીચે વા પાપસંયુતે ।
તદ્ભુક્ત્યાદૌ રાજભીતિર્વિષશસ્ત્રાદિપીડનમ્

રક્તસ્ત્રાવો ગુલ્મરોગો હ્યતિમારાદિપીડનમ્ ।
મધ્યે ચૌરાદિ ભીતિશ્ચ દેશત્યાગો મનોરુજઃ

અન્તે શુભકરી ચૈવ શનેરન્તર્દશા દ્વિજ ।
દ્વિતીયદ્યૂનનાથે તુ હ્યપમૃત્યુર્ભવિષ્યતિ

તદ્દોષપરિહારાર્થં મ્ર્ટ્યુઞ્જયજપં ચરેત્ ।
તતઃ શાન્તિમવાપ્નોતિ શઙ્કરસ્ય પ્રસાદતઃ

મન્દસ્યાન્તર્ગતે સૌમ્યે ત્રિકોણે કેન્દ્રગેઽપિ વા ।
સમ્માનં ચ યશઃ કીર્તિં વિદ્યાલાભં ધનાગમમ્

સ્વદેશે સુખમાપ્નોતિ વાહનાદિફલૈર્યુતમ્ ।
યજ્ઞાદિકર્મસિદ્ધિશ્ચ રાજયોગાદિસમ્ભવમ્

દેહસૌખ્યં હૃદુત્સાહં ગૃહે કલ્યાણસમ્ભવમ્ ।
સેતુસ્નાનફલાવાપ્તિસ્તીર્થયાત્રાદિકર્મણા

વાણિજ્યાદ્ધનલાભશ્ચ પુરાણશ્રવણાદિકમ્ ।
અન્નદાનફલં ચૈવ નિત્યં મિષ્ઠાન્નભોજનમ્

ષષ્ઠાષ્ટમવ્યયે સૌમ્યે નીચે વાસ્તંગતે સતિ ।
રવ્યારફણિસંયુક્તે દાયેશાદ્વા તથૈવ ચ

નૃપાભિષેકમર્થાપ્તિર્દેશગ્રામાધિપત્યતા ।
ફલમીદૃશમાદૌ તુ મધ્યાન્તે રોગપીડનમ્

નષ્ટાનિ સર્વકાર્યાણિ વ્યાકુલત્વં મહદ્ભયમ્ ।
દ્વિતીયસપ્તમાધિશે દેહબાધા ભવિષ્યતિ

તદ્દોષપરિહારાર્થં વિષ્ણુસાહસ્રકં જપેત્ ।
અન્નદાનં પ્રકુર્વીત સર્વસમ્પત્પ્રદાયકમ્

મન્દસ્યાન્તર્ગતે કેતૌ શુભદૃષ્ટિયુતેક્ષિતે ।
સ્વોચ્ચે વા શુભરાશિસ્થે યોગકારકસંયુતે

કેન્દ્રકોણગતે વાપિ સ્થાનભ્રંશો મહદ્ભયમ્ ।
દરિદ્રબન્ધનં ભીતિઃ પુત્રદારાદિનાશનમ્

સ્વપ્રભોશ્ચ મહાકષ્ટં વિદેશગમનં તથા ।
લગ્નાધિપેન સંયુક્તે આદૌ સૌખ્યં ધનાગમઃ

ગઙ્ગાદિસર્વતીર્ભેષુ સ્નાનં દૈવતદર્શનમ્ ।
દાયેશાત્કેન્દ્રકોણે વા તૃતીયભવરાશિગે

સમર્થો ધર્મબુદ્ધિશ્ચ સૌખ્યં નૃપસમાગમઃ ।
તથાઽષ્ટમે વ્યયે કેતૌ દાયેશાદ્વા તથૈવ ચ

અપમૃત્યુભયં ચૈવ કુત્સિતાન્નસ્ય ભોજનમ્ ।
શીતજ્વરાતિસારશ્ચ વ્રણચૌરાદિપીડનમ્

દારપુત્રવિયોગશ્ચ સંસારે ભવતિ ધ્રુવમ્ ।
દ્વિતિયદ્યૂનરાશિસ્થે દેહ પીડા ભવિષ્યતિ

છાગદાનં પ્રકુર્વીત હ્યપમૃત્યુનિવારણમ્ ।
કેતુગ્રહપ્રસાદેન સુખશાન્તિમવાપ્નુયાત્

મન્દસ્યાન્તર્ગતે શુક્રે સ્વોચ્ચે સ્વક્ષેત્રગેઽપિ વા ।
કેન્દ્રે વા શુભસંયુક્તે ત્રિઓકોણે લાભગેઽપિ વા

દારપુત્રધનપ્રાપ્તિર્દેહારોગ્યં મહોત્સવઃ ।
ગૃહે કલ્યાણ્સમ્પત્તિ રાજ્યલાભં મહત્સુખમ્

મહારાજપ્રસાદેન હીષ્ટસિદ્ધિઃ સુખાવહા ।
સ્સમ્માનં પ્રભુસમ્માનં પ્રિયવસ્ત્રાદિલાભકૃત્

દ્વિપાન્તરાદ્વસ્ત્રલાભઃ શ્વેતાશ્વો મહિષી તથા ।
ગુરુચારવશાદ્ભાગ્યં સૌખ્યં ચ ધનસમ્પદઃ

શનિચારાન્મનુષ્યોઽસૌ યોગમાપ્નોત્યસંશયમ્ ।
શત્રુનીચાસ્તગે શુક્રે ષષ્ઠાષ્ટમવ્યયરાશિગે

દારનાશો મનઃક્લેશઃ સ્થાનનાશો મનોરુજઃ ।
દારાનાં સ્વજનક્લેશઃ સન્તાપો જનવિગ્રહઃ

દાયેશાદ્ભાગ્યગે ચૈવ કેન્દ્રે વા લાભસંયુતે ।
રાજપ્રીતિકરં ચૈવ મનોઽભીષ્ટપ્રદાયકમ્

દાનધર્મદયાયુક્તં તીર્થયાત્રાદિકં ફલમ્ ।
સાસ્ર્તાર્થકાવ્યરચનાં વેદાન્તશ્રવણાદિકમ્

દારપુત્રાદિસૌખ્યં ચ લભતે નાઽત્ર સંશયઃ ।
દાયેશાદ્વ્યયગે શુક્રે ષષ્ઠે વા હ્યષ્ટમેઽપિ વા

નેત્રપીડા જ્વરભયં સ્વકુલાચારવર્જિતઃ ।
કપોલે દન્તશૂલાદિ હૃદિ ગુહ્યે ચ પીડનમ્

જલભીતિર્મનસ્તાપો વૃક્ષાત્પતનસમ્ભવઃ ।
રાજદ્વારે જનદ્વેષઃ સોધરેણ વિરોધનમ્

દ્વિતીયસપ્તમાધીશે આત્મક્લેશો ભવિષ્યતિ ।
તદ્દોષપરિહારાર્થં દુર્ગાદેવીજપં ચરેત્

શ્વેતાં ગાં મહિષીં દદ્યાદાયુરારોગ્યવૃદ્ધિદામ્ ।
જગદમ્બાપ્રસાદેન તતઃ સુખમવાપ્નુયાત્

મન્દસ્યાન્તર્ગતે સૂર્યે સ્વોચ્ચે સ્વક્ષેત્રગેઽપિ વા ।
ભાગ્યાધિપેન સંયુક્તે કેન્દ્રલાભત્રિકોણગે

શુભદૃષ્ટિયુતે વાપિ સ્વપ્રભોશ્ચ મહત્સુખમ્ ।
ગૃહે કલ્યાણસમ્પત્તિઃ પુત્રાદિસુખવર્દ્ધનમ્

વાહનામ્બરપશ્વાદિગોક્ષીરૈસ્સંકુલં ગૃહમ્ ।
લગ્નાષ્ટમવ્યયે સૂર્યે દાયેશાદ્વા તથૈવ ચ

હૃદ્રોગો માનહાનિશ્ચ સ્થાનભ્રંશો મનોરુજા ।
ઇષ્ટ્બન્ધુવિયોગશ્ચ ઉદ્યોગસ્ય વિનાશનમ્

તાપજ્વરાદિપીડા ચ વ્યાકુલત્વં ભયં તથા ।
આત્મસમ્બન્ધિમરણમિષ્ટવસ્તુવિયોગકૃત્

દ્વિતીયદ્યૂનનાથે તુ દેહબાધા ભવિષ્યતિ ।
તદ્દોષપરિહારાર્થં સૂર્યપૂજાં ચ કારયેત્

મન્દસ્યાન્તર્ગતે ચન્દ્રે જીવદૃષ્ટિસમન્વિતે ।
સ્વોચ્ચે સ્વક્ષેત્રકેન્દ્રસ્થે ત્રિકોણે લાભગેઽપિ વા

પૂર્ણે શુભગ્રહૈર્યુક્તે રાજપ્રીતિસમાગમઃ ।
મહારાજપ્રસાદેન વાહનામ્બરભૂષણમ્

સૌભાગ્યં સુખવૃદ્ધિં ચ ભૃત્યાનાં પરિપાલનમ્ ।
પિતૃમાતૃકુલે સૌખ્યં પશુવૃદ્ધિઃ સુખાવહા

ક્ષીણે વા પાપસંયુક્તે પાપદૃષ્ટે વા નીચગે ।
ક્રૂરાંશકગતે વાપિ ક્રૂરક્ષેત્રગતેઽપિ વા

જાતકસ્ય મહત્કષ્ટં રાજકોપો ધનક્ષયઃ ।
પિતૃમાતૃવિયોગશ્ચ પુત્રીપુત્રાદિરોગકૃત્

વ્યવસાયાત્ફલં નેષ્ટં નાનામાર્ગે ધનવ્યયઃ ।
અકાલે ભોજનં ચૈવ મૌષધસ્ય ચ ભક્ષણમ્

ફલમેતદ્વિજાનીયાદાદૌ સૌખ્યં ધનાગમઃ ।
દાયેશાત્કેન્દ્રરાશિસ્થે ત્રિકોણે લાભગેઽપિ વા

વાહનામ્બરપશ્વાદિભ્રાતૃવૃદ્ધિઃ સુખાવહા ।
પિતૃમાતૃસુખાવાપ્તિઃ સ્ત્રીસૌખ્યં ચ ધનાગમઃ

મિત્રપ્રભુવશાદિષ્ટં સર્વસૌખ્યં શુભાવહમ્ ।
દાયેશાદ્દ્વાદશ ભાવે રન્ધ્રે વા બલવર્જિતે

શયનં રોગમાલસ્યં સ્થાનભ્રષ્ટં સુખાપહમ્ ।
શત્રુવૃદ્ધિવિરોધં ચ બન્ધુદ્વેષમવાપ્નુયાત્

દ્વિતીયદ્યૂનનાથે તુ દેહાલસ્ય ભવિષ્યતિ ।
તદ્દોષશમનાર્થં ચ તિલહોમાદિકં ચરેત્

ગુડં ઘૃતં ચ દધ્નાક્તં તણ્ડુલં ચ યથાવિધિ ।
શ્વેતાં ગાં મહિષીં દદ્યાદાયુરારોગ્યવૃદ્ધયે

મન્દસ્યાન્તર્ગતે ભૌમે કેન્દ્રલાભત્રિકોણગે ।
તુઙ્ગે સ્વક્ષેત્રગે વાપિ દશાધિપસમન્વિતે

લગ્નાધિપેન સંયુક્તે આદૌ સૌખ્યં ધનાગમઃ ।
રાજપ્રીતિકરં સૌખ્યં વાહનામ્બરભૂષણમ્

સેનાપત્યં નૃપપ્રીતિઃ કૃષિગોધાન્યસમ્પદઃ ।
નૂતનસ્થાનનિર્માણં ભ્રાતૃવર્ગેષ્ટસૌખ્યકૃત્

નીચે ચાસ્તઙ્ગતે ભૌમે લગ્નાદષ્ટવ્યયસ્થિતે ।
પાપદૃષ્ટિયુતે વાપિ ધનહાનિર્ભવિષ્યતિ

ચૌરાહિવ્રણશસ્ત્રાદિગ્રન્થિરોગાદિપીડનમ્ ।
ભ્રાતૃપિત્રાદિપીડા ચ દાયાદજનવિગ્રહઃ

ચતુષ્પાજ્જીવહાનિશ્ચ કુત્સિતાન્નસ્ય ભોજનમ્ ।
વિદેશગમનં ચૈવ નાનમાર્ગે ધનવ્યયઃ

અષ્ટમદ્યૂનનાથે તુ દ્વિતીયસ્થેઽથ વા યદિ ।
અપમૃત્યુભયં ચૈવ નાનાકષ્ટં પરાભવઃ

તદ્દોષપરિહારાર્થં શાન્તિહોમં ચ કારયેત્ ।
વૃષદાનં પ્રકુર્વીત સર્વારિષ્ટનિવારણમ્

મન્દસ્યાન્તર્ગતે રાહૌ કલહશ્ચ મનોવ્યથા ।
દેહપીડા મનસ્તાપઃ પુત્રદ્વેષો રુજોભયમ્

અર્થવ્યયો રાજભયં સ્વજનાદિવિરોધિતા ।
વિદેશગમનં ચૈવ ગૃહક્ષેત્રાદિનાશનમ્

લગ્નાધિપેન સંયુક્તે યોગકારકસંયુતે ।
સ્વોચ્ચે સ્વક્ષેત્રગે કેન્દ્રે દાયેશાલ્લાભરાશિગે

આદૌ સૌખ્યં ધનાવાપ્તિં ગૃહક્ષેત્રાદિસમ્પદમ્ ।
દેવબ્રાહ્મણભક્તિં ચ તીર્થયાત્રાદિકં લભેત્

ચતુષ્પાજ્જીવલાભઃ સ્યાદ્ગૃહે કલ્યાણ્વર્દ્ધનમ્ ।
મધ્યે તુ રાજભીતિશ્ચ પુત્રમિત્રવિરોધનમ્

મેષે કન્યાગતે વાપિ કુલીરે વૃષભે તથા ।
મીનકોદણ્ડસિંહેષુ ગજાન્તૈશ્વર્યમાદિશેત્

રાજસમ્મનભૂષાપ્તિં મૃદુલાભરસૌખ્યકૃત્ ।
દ્વિસપ્તમાધિપૈર્યુક્તે દેહબાધા ભવિષ્યતિ

મૃત્યુઞ્જયં પ્રકુર્વીત છાગદાનં ચ કારયેત્ ।
વૃષદાનં પ્રકુર્વીત સર્વસમ્પત્સુખાવહમ્

મન્દસ્યાન્તર્ગતે જીવે કેન્દ્રે લાભત્રિકોણગે ।
લગ્નાધિપેન સંયુક્તે સ્વોચ્ચે સ્વક્ષેત્રગેઽપિ વા

સર્વકાર્યાર્થસિદ્ધિઃ સ્યાચ્છોભનં ભવતિ ધ્રુવમ્ ।
મહારાજપ્રસાદેન ધનવાહનભૂષણમ્

સન્માનં પ્રભુસમ્માનં પ્રિયવસ્ત્રાર્થલાભકૃત્ ।
દેવતાગુરુભક્તિશ્ચ વિદ્વજ્જનસમાગમઃ

દારપુત્રાદિલાભશ્ચ પુત્રકલ્યાણવૈભવમ્ ।
ષષ્ઠાષ્ટમવ્યયે જીવે નીચે વા પાપસંયુતે

નિજસમ્બન્ધિમરણં ધનધાન્યવિનાશનમ્ ।
રાજસ્થાને જનદ્વેષઃ કર્યહાનિર્ભવિષ્યતિ

વિદેશગમનં ચૈવ કુષ્ઠરોગાદિસમ્ભવઃ ।
દાયેશાત્કેન્દ્રકોણે વા ધને વા લાભગેઽપિ વા

વિભવં દારસૌભાગ્યં રાજશ્રીધનસમ્પદઃ ।
ભોજનામ્બરસૌખ્યં ચ દાનધર્માદિકં ભવેત્

બ્રહ્મપ્ર્તિષ્ઠાસિદ્ધિશ્ચ ક્રતુકર્મફલં તથા ।
અન્નદાનં મહાકીર્તિર્વેદાન્તશ્રવણાદિકમ્

દાયેશાત્ષષ્ઠરન્ધ્રે વા વ્યયે વા બલવર્જિતે ।
બન્ધુદ્વેષો મનોદુઃખં કલહઃ પદવિચ્યુતિ

કુભોજનં કર્મહાની રાજદણ્ડાદ્ધનવ્યય ।
કારાગૃહપ્રવેશશ્ચ પુત્રદારાદિપીડનમ્

દ્વિતીયદ્યૂનનાથે તુ દેહવાધા મનોરુજઃ ।
આત્મસમ્બન્ધમરણં ભવિષ્યતિ ન સંશયઃ

તદ્દોષપરિહારાર્થં શિવસાહસ્રકં જપેત્ ।
સ્વર્ણદાનં પ્ર્કુર્વીત હ્યારોગ્યં ભવતિ ધ્રુવમ્