બૃહત્કથાશ્લોકસંગ્રહ · અધ્યાય 25

તત્ર નન્દાદિભિર્ મિત્રૈર્ આરાધનવિશારદૈઃ
અકૃત્રિમસુહૃદ્ભાવૈઃ સ.ગતઃ સુખમ્ આસિષિ ॥

એકદાહારવેલાયાં દૃશ્યતે સ્મ ન ગોમુખઃ
અથ નીતમ્ અનાહારૈર્ અસ્માભિર્ અપિ તદ્ દિનમ્ ॥

અસૌ તુ સાયમ્ આગત્ય નાતિસ્વાભાવિકાકૃતિઃ
તદ્ અનાથમતોદ્વિગ્નં માં વિનીતવદ્ ઉક્તવાન્ ॥

રાજમાર્ગે મયા દૃષ્ટઃ પૌરસંઘાતસંકટે
ભૃત્યો હરિશિખસ્યૈવ લોકેનાન્તરિતઃ સ ચ ॥

તદ્ગવેષયમાણેન મયાદ્ય ગમિતં દિનમ્
કાર્યે હિ ગુરુણિ વ્યગ્રં જિઘત્સાપિ ન બાધતે ॥

સ ચાવશ્યં મયાન્વેષ્યઃ સુહૃદ્વાર્ત્તોપલબ્ધયે
તસ્માન્ મા મામ્ અપશ્યન્તઃ કૃધ્વં દુઃખાસિકામ્ ઇતિ ॥

મયા ચાયમ્ અનુજ્ઞાતઃ ક્ષિપ્તસપ્તાષ્ટવાસરઃ
મદમન્થરસંચારો બહુજલ્પન્ન્ ઉપાગમત્ ॥

અથૈનમ્ અહમ્ આલોક્ય ક્રોધક્ષોભિતમાનસઃ
સ્થિત્વા ક્ષણમ્ અનાલાપઃ પરુષાલાપમ્ અબ્રવમ્ ॥

ઈદૃશસ્ તાદૃશઃ પ્રાજ્ઞઃ પ્રેક્ષાકારી ચ ગોમુખઃ
ઇતિ પઙ્ગોસ્ તુરંગસ્ય કૃતા ગરુડવેગતા ॥

પૂર્વં બ્રાહ્મણમ્ આખ્યાય સમસ્તાયાઃ પુરઃ પુરઃ
અધુના મધુના મત્તઃ કથં પશ્યસિ મામ્ ઇતિ ॥

અથ મામ્ અયમ્ આહ સ્મ ન મદઃ પારમાર્થિકઃ
સદોષં તુ વચો વક્તું મયાયં કૃત્રિમઃ કૃતઃ ॥

મત્તસ્ય કિલ વાગ્દોષાઃ પારુષ્યાનૃતતાદયઃ
દૂષયન્તિ ન વક્તારમ્ અતો ઽયં કૃત્રિમો મદઃ ॥

તતસ્ તમ્ ઉક્તવાન્ અસ્મિ સંભાવિતગુણસ્ય તે
મદપ્રચ્છાદનોપાયઃ કિં ન્વ્ અદોષો ઽપિ વિદ્યતે ॥

અથાનેનોક્તમ્ અસ્તીતિ કથમ્ ઇત્ય્ ઉદિતે મયા
અયમ્ આરભતાખ્યાતું લજ્જામન્થરિતાક્ષરમ્ ॥

શ્રૂયતામ્ ઋષિદત્તા મે યત્ર નેત્રપથં ગતા
આરભ્ય દિવસાત્ તસ્માચ્ ચેતોવિષયતામ્ ઇતિ ॥

નિરવગ્રહતાં બુદ્ધ્વા ચિત્તસ્યાથ મમાભવત્
કસ્માદ્ અવિષયે ચક્ષુશ્ ચેતસા મે પ્રસારિતમ્ ॥

જ્ઞાતધર્માર્થશાસ્ત્રત્વાત્ સ્થાનાત્ સાધુસભાસુ ચ
રાગાધીનં ન મે ચક્ષુઃ પ્રવૃત્તં ગણિકાસ્વ્ અપિ ॥

નૂનમ્ એષા પરિગ્રાહ્યા મમ પ્રવ્રજિતા યતઃ
સંકલ્પેન મમૈતસ્યાં દુર્દાન્તતુરગો ઽયતઃ ॥

તસ્માદ્ અસ્યામ્ અનિષ્ટસ્ય સંકલ્પસ્ય નિબન્ધનમ્
જિજ્ઞાસ્યે તાવદ્ ઇત્ય્ એનામ્ અગચ્છં દ્રષ્ટુમ્ અન્વ્ અહમ્ ॥

નાનાકારૈર્ વિનોદૈશ્ ચ દેશાન્તરકથાદિભિઃ
દ્વિત્રૈર્ એવ દિનૈસ્ તસ્યા વિશ્વાસમ્ ઉદપાદયમ્ ॥

એકદા પ્રસ્તુતાલાપઃ પૃષ્ટો ઽહમ્ ઋષિદત્તયા
કે કે દેશાસ્ ત્વયા દૃષ્ટાઃ ક્રામતા પૃથિવીમ્ ઇતિ ॥

સમૃદ્ધિઃ સશરીરેવ કૌશામ્બી યત્ર પત્તનમ્
વત્સદેશઃ સ દૃષ્ટઃ પ્રાઙ્ મમેતિ કથિતે મયા ॥

તયોક્તમ્ અલમ્ આલાપૈર્ અપરૈસ્ તવ દુર્ભગૈઃ
ક્રિયતાં વત્સકૌશામ્બી સંબન્ધૈવ પુનઃ કથા ॥

અથ જાનાસિ કૌશામ્બ્યાય્મ્ આકારજિતમન્મથમ્
ગોમુખં નામ નિષ્ણાતં સવિદ્યાસુ કલાસ્વ્ ઇતિ ॥

અથાચિન્તયમ્ આત્માનમ્ એતસ્યૈ કથયામિ કિમ્
અથ વા ધિગ્ અધીરં મામ્ એવં તાવદ્ ભવત્વ્ ઇતિ ॥

તતો ઽહમ્ ઉક્તવાન્ આર્યે જાનાસીતિ કિમ્ ઉચ્યતે
આત્માનં કો ન જાનાતિ સ હિ મે પરમઃ સુહૃત્ ॥

અથ વા ન વિશેષો ઽસ્તિ સૂક્ષ્મો ઽપિ મમ ગોમુખાત્
તેન માં પશ્યતા વ્યક્તં દૃષ્ટો ભવતિ ગોમુખઃ ॥

અથાસૌ લોચનાન્તેન બાષ્પસ્તિમિતપક્ષ્મણા
સાનુરાગેવ દૃષ્ટ્વા માં ચિરં મન્થરમ્ અબ્રવીત્ ॥

ગોમુખઃ કિલ રૂપેણ કલાકૌશલચારિણા
વત્સરાજસુતં મુક્ત્વા નાન્યેન સદૃશઃ ક્ષિતૌ ॥

યદિ ચાસૌ ત્વદાકારસ્ ત્વત્કલાજાલપેશલઃ
વિદ્યાધરકુમારેણ ગોમુખઃ સદૃશસ્ તતઃ ॥

યસ્ ત્વદાકારવિજ્ઞાનઃ સર્વથા પુણ્યવાન્ અસૌ
ગન્ધશૈલો ઽપિ હિ શ્લાઘ્યસ્ તુલ્યમાનઃ સુમેરુણા ॥

ઇત્ય્ ઉક્ત્વા ચીવરાન્તેન મુખમ્ આવૃત્ય નીચકૈઃ
અસૌ રોદિતુમ્ આરબ્ધા સોત્કમસ્તનમણ્ડલા ॥

ઋષિદત્તામ્ અથાવોચમ્ આર્યે કિં કારણં ત્વયા
રુદ્યતે મૃતપત્યેવ ગોમુખશ્રવણાદ્ ઇતિ ॥

તયોક્તં શ્રૂયતામ્ અસ્તિ વિદ્વાન્ રાજગૃહે વણિક્
પદ્મો નામ ધનં યસ્ય પદ્મસ્યેવ મહાનિધેઃ ॥

કુટુમ્બાચારચતુરે પ્રિયે પત્યુઃ પતિવ્રતે
સુમના મહદિન્ના ચ તસ્ય ભાર્યે બભૂવતુઃ ॥

તયોર્ અભવતાં પુત્રૌ માતૃનામસનામકૌ
પુત્રાભ્યાં દયિતે પિત્રોસ્ તથા દુહિતરાવ્ અપિ ॥

તત્ર યા સુમના નામ તસ્યાઃ સુમનસઃ સુતા
નગર્યાં પરિણીતાત્ર શ્રેષ્ઠિના કાલિયેન સા ॥

દુહિતા મહદિન્નાયા યા ચ માતુઃ સનામિકા
ચેદિવત્સેશમિત્રેણ પરિણીતર્1ષભેણ સા ॥

ઋષભાન્ મહદિન્નાયામ્ ઉત્પન્નઃ કિલ ગોમુખઃ
ન કુતશ્ચિન્ ન કસ્યાંચિત્ કશ્ચિજ્ જગતિ યાદૃશઃ ॥

અહં તુ મહદિન્નસ્ય તનયા ગુણશાલિનઃ
હિમાદ્રેર્ અપિ નિયાન્તિ સરિતઃ ક્ષારવારયઃ ॥

સાહં બાલૈવ ગુરુભિર્ ગોમુખાય પ્રતિશ્રુતા
કં હિ નામ ન ગચ્છન્તિ કન્યાપિત્રોર્ મનોરથાઃ ॥

કાલે ક્વચિદ્ અતીતે તુ તં ગુણૈર્ જનવલ્લભમ્
હિમકાલ ઇવાસાધુઃ કાલઃ પદ્મમ્ અનાશયત્ ॥

તત્કુટુમ્બં તતસ્ તેન ધારકેન વિના કૃતમ્
ઉન્મૂલિતદૃઢસ્તમ્ભ મન્દિરાવસ્થાં ગતમ્ ॥

વારાણસ્યાં તતઃ પિત્રા સ્વસુઃ સુમનસો ગૃહે
સ્થાપિતાહં પિતૃષ્વસ્રા દુહિતેવ ચ લાલિતા ॥

સંતતાદ્યૈઃ ક્રમેણાથ જ્વરૈઃ પઞ્ચભિર્ અપ્ય્ અહમ્
પીડ્યમાના બભૂવાન્ધા પ્રત્યાખ્યાતા ચિકિત્સકૈઃ ॥

અત્ર ચાગાધજૈનેન્દ્ર શાસ્ત્રસાગરપારગા
અસીચ્ છ્રુતધરા નામ શ્રમણા કરુણાવતી ॥

એતં વાચા સમાનીય મન્ત્રાગદવિશારદા
મામ્ અસાવ્ અચિરેણૈવ તસ્માદ્ વ્યાધેર્ અમોચયત્ ॥

સ્વસ્થાવસ્થાં ચ માં દૃષ્ટ્વા સુમના ગૃહમ્ આનયત્
અથ ક્રોધાદ્ ઇવાગૃહ્ણાત્ સૈવ જ્વરપરંપરા ॥

તતઃ શ્રુતધારાયૈ મામ્ અર્પયત્ સુમનાઃ પુનઃ
સ ચ યાતઃ પુનર્ વ્યાધિર્ મન્ત્રાગદભયાદ્ ઇવ ॥

શ્રવણામ્ અવદદ્ દૈન્યાદ્ દુર્મનાઃ સુમનાસ્ તતઃ
પ્રવ્રજ્યાગ્રાહણેનેયં બાલિકા જીવ્યતામ્ ઇતિ ॥

તથા ચાગ્રાહયત્ સા મામ્ અર્હત્પ્રવચનં યથા
સકલઃ શ્રમનાસંઘઃ સિષ્યતામ્ અગમન્ મમ ॥

કેવલજ્ઞાનદીપેન દૃષ્ટ્વા સંસારફલ્ગુતામ્
નિર્વાણસ્ય ચ સારત્વં નિષ્ઠાં શ્રુતધરાગમત્ ॥

નિર્વૃત્તાયાં તતસ્ તસ્યાં સંહત્ય શ્રમણાગણઃ
ગણનીમ્ અકરોદ્ અસ્મિન્ વિહારે મામ્ અનિચ્છતીમ્ ॥

ધ્યાનં યદ્ યત્ સમાપદ્ય દેવતાલમ્બનં નિશિ
બલાદ્ આલમ્બનં તત્ર ગોમુખઃ સંનિધીયતે ॥

યદા યદા ચ ગોશબ્દમ્ અધીયાના વદામ્ય્ અહમ્
મુખોત્તરપદસ્ તત્ર જાયતે સ તદા તદા ॥

જલ્પન્તી મુખશબ્દં ચ પ્રયુઞ્જે યદિ કેવલમ્
ગોશબ્દપૂર્વપદતાં બલાત્ તત્રોપગચ્છતિ ॥

ગોમુખેન પરામૃષ્ટં શ્લાઘનીયં તૃણાદ્ય્ અપિ
ઇતિ ચિન્તાપરાધીના મહાન્તં કાલમ્ અક્ષિપમ્ ॥

તાવચ્ ચ ન મયા ત્યક્તા પ્રત્યાશા ગોમુખાશ્રયા
આગતા યાવદ્ અન્યૈવ વાર્ત્તા દત્તનિરાશતા ॥

ચમ્પાસ્થસ્ય પ્રભોર્ મૂલં પ્રસ્થિતઃ સબલઃ કિલ
ગોમુખઃ સસુહૃદ્વર્ગઃ પુલિન્દૈર્ અન્તરે હતઃ ॥

યચ્ ચાસ્મિ ન મૃતા સદ્યઃ શ્રુત્વા ગોમુખવૈશસમ્
વિચારણસમર્થાયાઃ પ્રજ્ઞાયાઃ સા સમર્થતા ॥

આસીચ્ ચ મમ જીવન્તી જીવિતસ્ય મહત્ ફલમ્
રમ્યામ્ આકર્ણયિષ્યામિ ગોમુખસ્ય કથામ્ ઇતિ ॥

અપિ ચાપરમ્ અપ્ય્ અસ્તિ જીવિતાલમ્બનં મમ
હતઃ પ્રવાદમાત્રેણ ગોમુખઃ શબરૈર્ ઇતિ ॥

તેન ગોમુખસંબન્ધામ્ આકર્ણ્ય રુદિતં મયા
અમૃતાભ્યધિકત્વે ઽપિ દુઃખહેતું કથામ્ ઇતિ ॥

મમ ત્વ્ આસીદ્ યથાહેયં સર્વં તદ્ ઉપપદ્યતે
યુષ્મદ્દાસાઃ કથં કુર્યુઃ પાપસંકલ્પમ્ અન્યથા ॥

સ્વૈર્ ઇયં ગુરુભિર્ દત્તા મદીયૈર્ અપિ યાર્થિતા
કુમારી સાનુરાગા ચ તસ્માન્ ન ત્યાગમ્ અર્હતિ ॥

ઇત્યાદિ બહુ નિર્ધાર્ય તત્સ્વીકરણકારણમ્
અદુષ્ટં ગ્રહણોપાયમ્ અહમ્ એતં પ્રયુક્તવાન્ ॥

સ્વાદુના પિણ્ડપાતેન વન્દનેન ચિકિત્સયા
મર્દનાભ્યઞ્જનાદ્યૈશ્ ચ લઘુ સંઘમ્ અતોષયમ્ ॥

વ્યગ્રેણ ચાત્ર વૃત્તાન્તે દત્તં વઃ કૃતકોત્તરમ્
મિત્રવાર્તાવિદાવ્યગ્રં પ્રતીક્ષધ્વં ન મામ્ ઇતિ ॥

ઋષિદત્તામ્ અથાવોચં સ્વશિલ્પે લબ્ધકૌશલાઃ
શ્રાવકૈઃ સંનિધાર્યન્તામ્ અન્નસંસ્કારકારકાઃ ॥

અર્હતામ્ અર્હણં કૃત્વા ગન્ધવાસસ્રગાદિભિઃ
ઋષિભ્યઃ શ્રમણાભ્યશ્ ચ દાતુમ્ ઇચ્છામિ ભોજનમ્ ॥

મિથ્યાદૃષ્ટિસહસ્રાણિ ભોજયિત્વા યદ્ અર્જ્યતે
તદ્ એકમ્ અર્હતં ભક્ત્યા સદ્યઃ પાપં પ્રમાર્જ્યતે ॥

તેન સન્તીહ યાવન્તઃ પ્રિયસર્વજ્ઞશાસનાઃ
સશ્રાવકગણાન્ આર્યાંસ્ તાંસ્ તદ્ આમન્ત્ર્યતામ્ ઇતિ ॥

સર્વથા સાધિતઃ સૂદૈર્ આહારઃ સ તથા યથા
જિતજિહ્વૈર્ અપિ પ્રીતં જિનશાસનપારગૈઃ ॥

અથાહમ્ ઋષિદત્તાયાઃ પુરઃ સકૃતકજ્વરઃ
પતિતસ્ તુઙ્ગરોમાઞ્ચઃ સવેપથુવિજૃમ્ભકઃ ॥

તાદૃશી ચ મયા વ્યક્તા જ્વરિતાનુકૃતિઃ કૃતા
દુષ્કરઃ પરિતાપો ઽપિ યથા સંભાવિતસ્ તયા ॥

કિમ્ એતદ્ ઇતિ ચાપૃચ્છત્ સા મામ્ ઉજ્જ્વલસંભ્રમા
દન્તકૂજિતસંભિન્નં મયાપ્ય્ એતન્ નિવેદિતમ્ ॥

ષડ્રાત્રાભક્ષણક્ષામો ગૃહીતો વાતહેતુના
જ્વરેણાનુભવામ્ય્ એતામ્ અવસ્થામ્ ઈદૃશીમ્ ઇતિ ॥

તતઃ સ્વસ્વપનાવાસે શ્રમણાગણસંકુલે
મામ્ અસૌ કરુણાવિષ્ટા સંવાહિતવતી ચિરમ્ ॥

અથ સંઘટ્ટયન્ દન્તાન્ ઉક્તવાન્ અસ્મિ તાં શનૈઃ
મહાજનવિવિક્તો ઽયમ્ આવાસઃ ક્રિયતામ્ ઇતિ ॥

ઋષિદત્તાકૃતાનુજ્ઞાસ્ તાશ્ ચ પ્રવ્રજિતા ગતાઃ
તદભિપ્રાયજિજ્ઞાસુર્ અથ તામ્ ઇદમ્ અબ્રવમ્ ॥

આર્યે વિરુધ્યતે સ્ત્રીણાં પિતૃભ્રાતૃસુતૈર્ અપિ
વ્રતસ્થાનાં વિશેષેણ સ્થાતું સહ રહશ્ ચિરમ્ ॥

અહં ચ કિતવઃ પાન્થઃ સંભાવ્યાવિનયાક્ર્ટિઃ
પૃથગ્જના જનાશ્ ચૈતે તેન નિર્ગમ્યતામ્ ઇતિ ॥

તયોક્તં ક્ષણમ્ અપ્ય્ એકમ્ અશક્તા સ્વસ્થમ્ અપ્ય્ અહમ્
મુક્ત્વા ત્વાં સ્થાતુમ્ અન્યત્ર કિં પુનઃ સંતતજ્વરમ્ ॥

સંભાવનાપિ રમ્યૈવ માદૃશ્યાસ્ ત્વાદૃશા સહ
શ્લાઘ્યા કિંશુકશાખાપિ વસન્તસહચારિણી ॥

ધન્યો જ્વરો ઽપિ યેનેદં ત્વદઙ્ગમ્ ઉપયુજ્યતે
કાલકૂટમ્ અપિ શ્લાઘ્યં લીઢશંકરકંધરમ્ ॥

એવમાદિ બ્રુવાણૈવ પ્રખલીકૃતસાધુના
સા મહાગ્રહચણ્ડેન ગૃહીતા ભાવજન્મના ॥

મમ ત્વ્ આસીદ્ ઇયં ચિન્તા સત્યમ્ આહુશ્ ચિકિત્સકાઃ
સર્વે સંક્રામિણો રોગાઃ સ્પૃશતાં પ્રાણિનામ્ ઇતિ ॥

મદીયઃ કૃત્રિમો ઽપ્ય્ એનં યત્ર સંક્રામતિ જ્વરઃ
કથં નામ ન સંક્રમેત્ તત્ર યઃ પરમાર્થિકઃ ॥

તથા હિ સ્વેદરોમાન્ચ બાષ્પકમ્પવિજૃમ્ભિકા
જ્વરસ્ય પરિવારો ઽયમ્ અઙ્ગમ્ અસ્યાઃ પ્રબાધતે ॥

સર્વથા સ્મરશાસ્ત્રેષુ યદ્ ઇઙ્ગિતમ્ ઉદાહૃતમ્
લાવણ્યમ્ ઇવ ગાત્રેષુ તદ્ અસ્યાઃ પ્રાસ્ફુરત્ સ્ફુટમ્ ॥

તતસ્ તામ્ ઉક્તવાન્ અસ્મિ ધિક્ ત્વાં નિષ્કરુણાશયામ્
શીતજ્વરાર્તમ્ અઙ્ગૈર્ યા ન પીડયસિ મામ્ ઇતિ ॥

અથાશ્લિષ્યં તથા સા માં નાદૃશ્યત યથા પૃથક્
વિરલેવારુણાલોકં નિશાન્તશશિચન્દ્રિકા ॥

તતસ્ તાવ્ આવયોશ્ ચણ્ડૌ તથાશ્લેષચિકિત્સયા
અપાયાતાં મુહૂર્તેન કૃત્રિમાકૃત્રિમૌ જ્વરૌ ॥

યાતાયામ્ અથ યામિન્યાં બુદ્ધ્વા વૃત્તાન્તમ્ ઈદૃશમ્
સંઘઃ સંહત્ય તાં સ્વસ્માન્ નિવાસાન્ નિરવાસયત્ ॥

અથ પ્રવહણારૂઢામ્ ઋષિદત્તાં મયા સહ
અનયન્ મુદિતઃ શ્રેષ્ઠી ગૃહં મઙ્ગલસંકુલમ્ ॥

તત્રાવયોઃ સસુમનાઃ સુમનાઃ પ્રિયદર્શનઃ
પ્રીતનાગરકાનીકં કરગ્રહમ્ અકારયત્ ॥

તદ્ એવમ્ ઋષિદત્તા વઃ સંવૃત્તા પરિચારિકા
અથ વા કિં વિકલ્પેન સ્વયમ્ આલોક્યતામ્ ઇતિ ॥

તથાપિ કથિતં તેન નૈવ સંશયમ્ અત્યજમ્
દુઃશ્રદ્ધાનં હિ સહસા કાકતાલીયમ્ ઈદૃશમ્ ॥

માલાલંકારવસ્ત્રાદિ ગૃહોપકરણાનિ ચ
પ્રસ્થાપ્ય પ્રાક્ તદાર્હાણિ તાં દિદૃક્ષુસ્ તતો ઽગમમ્ ॥

તત્ર ચાસૌ મયા દૃષ્ટા ચિત્રાંશુકવિભૂષણા
નાનાપુષ્પાં હસન્તીવ વસન્તોપવનશ્રિયમ્ ॥

પ્રતિમાઃ કાષ્ઠમય્યો ઽપિ શોભન્તે ભૂષિતાસ્ તથા
લજ્જિતાસુરકન્યાસુ તાદૃશીષુ તુ કા કથા ॥

પ્રવ્રજ્યાયાં પુનર્ યસ્યાઃ કાન્તિર્ યાસીદ્ અકૃત્રિમા
દુર્લભાણિ ક્વચિત્ તસ્યા વાચકાન્ય્ અક્ષરાણ્ય્ અપિ ॥

આસીચ્ ચ મમ દુઃશ્લિષ્ટં કાન્તરૂપવિરૂપયોઃ
અલંકારકલાપસ્ય ગુરુસારસ્ય ધારણમ્ ॥

અલંકારાવૃતા તાવત્ કાન્તરૂપસ્ય ચારુતા
ન શક્યા સર્વથા દ્રષ્ટું જનૈર્ લોલેક્ષણૈર્ અપિ ॥

વિરૂપસ્ય તુ વૈરૂપ્યં યત્ પ્રચ્છાદનમ્ અર્હતિ
પ્રકાશયતિ તલ્ લોકે પટુમણ્ડનડિણ્ડિમઃ ॥

અથાધિષ્ઠિતપર્યઙ્કમ્ ઋષિદત્તોપગમ્ય મામ્
અવન્દત પ્રહૃષ્ટાપિ પ્રવ્રજ્યાત્યાગલજ્જિતા ॥

તતસ્ તામ્ ઉક્તવાન્ અસ્મિ સખ્યાઃ કિં કાર્યમ્ આશિષા
સરાગૈવ સતી યા ત્વં વીતરાગગતિં ગતા ॥

મોક્ષઃ કારુણિકૈર્ ઉક્તઃ સિદ્ધૈર્ દુઃખક્ષયઃ કિલ
ક્ષીણદુઃસહદુઃખત્વાન્ મોક્ષં પ્રાપ્તાસિ સર્વથા ॥

સર્વથા સુભગતામહોદ્ધતઃ કિંકરો ભવતુ ગોમુખસ્ તવ
યો,સિતો હિ જિતદૃષ્ટભર્તૃકાસ્ તોષયન્તિ જનનીસખીજનમ્ ॥