બ્રહ્મવૈવર્ત પુરાણ · અધ્યાય 4.43

નારાયણ ઉવાચ ॥
અથ દુર્ગાં મહાદેવસ્સતીમૂર્તિં મનોહરામ્ ॥
અમ્લાનપદ્મવક્ત્રાં તાં શયાનાં જાહ્નવીતટે

દધતીમક્ષમાલાં ચ પ્રતપ્તકાઞ્ચનપ્રભામ્ ॥
તેજસા પ્રજ્વલન્તીં ચ દધાનાં શુક્લવાસસમ્

દૃષ્ટ્વા સતીશરીરં ચ પ્રદગ્ધો વિરહાગ્નિના ॥
તત્ત્વરાશિર્મૂર્તિમાંશ્ચ મૂર્ચ્છાં પ્રાપ તથાપિ ચ

કલત્રશોકો બલવાન્સ્વાત્મારામં પરાત્પરમ્ ॥
બાધતે વેદબીજં તં યોગીન્દ્રાણાં ગુરોર્ગુરુમ્

ક્ષણેન ચેતનાં પ્રાપ્ય તામુવાચ ત્રિલોચનઃ ॥
નિરીક્ષ્ય વદનામ્ભોજં સ્થાણુઃ સ્થાણુરિવાપરઃ

સાશ્રુનેત્રોઽતિદીનશ્ચ દીનાનાં શરણપ્રદઃ ॥
દીનદૈન્યાપહારી ચ વિલલાપ પરં વચઃ

શંકર ઉવાચ ॥
ઉત્તિષ્ઠોત્તિષ્ઠ સુભગે સતિ પ્રાણેશ્વરિ પ્રિયે ॥
શઙ્કરોઽહં તવ સ્વામી પશ્ય માં નિકટાગતમ્

શિવં શિવપ્રદં સર્વસંપદ્રૂપં ચ સિદ્ધિદમ્ ॥
સર્વાત્માનં ચ સર્વેશં શવતુલ્યં ત્વયા વિના

શક્તોઽહં ચ ત્વયા સાર્દ્ધં સર્વશક્તિસ્વરૂપયા ॥
શક્તિહીનઃ શવસમો નિશ્ચેષ્ટઃ સર્વકર્મસુ

યશ્ચ શક્તિં ન જાનાતિ જ્ઞાનહીનશ્ચ નિન્દતિ ॥
તં ત્યક્તુમુચિતં વિજ્ઞે કથં માં ત્યજસિ પ્રિયે

સ્વયં બ્રહ્મા સ્વયં વિષ્ણુઃ સાધ્યભૂતા વયં તવ ॥
સસ્મિતં સકટાક્ષં ચ વદ કિંચિત્સુધોપમમ્

મધુરાભાસદૃષ્ટ્યા ચ માં દગ્ધં સેચનં કુરુ ॥
માં દૃષ્ટ્વા દૂરતઃ શીઘ્રં સ્નિગ્ધં વદસિ સસ્મિતમ્

કથમદ્યાપિ રુષ્ટેવ વિલપન્તં ન ભાષસે ॥
પ્રાણાધિકે સમુત્તિષ્ઠ રુદંતં માં ન પશ્યસિ

પરિત્યજ્ય ચ નઃ પ્રાણાન્ગન્તું નાર્હસિ સુન્દરિ ॥
જગદમ્બે સમુત્તિષ્ઠ પ્રાણાધારે પરાત્પરે

પતિવ્રતે સમુત્તિષ્ઠ કથં માં નાદ્ય સેવસે ॥
કથં કરોષિ વિજ્ઞાય વ્રતભઙ્ગં શ્રુતિપ્રસૂઃ

ઇત્યુક્ત્વા મૃતદેહં ચ પ્રિયાયા વિરહાતુરઃ ॥
નિધાયોરસિ સંશ્લિષ્ય ચુચુમ્બ ચ પુનઃપુનઃ

અધરે ચાધરં દત્ત્વા વક્ષો વક્ષસિ શઙ્કરઃ ॥
પુનઃપુનઃ સમાશ્લિષ્ય પુનર્મૂર્ચ્છામવાપ સઃ

પુનઃ સ ચેતનાં પ્રાપ્ય વેગાદુત્થાય શોકતઃ ॥
દુદ્રાવ ચ યથોન્મત્તો જ્ઞાનિનાં ચ ગુરોર્ગુરુઃ

સપ્તદ્વીપસપ્તસિન્ધું લોકાલોકં ચ કાઞ્ચનમ્ ॥
બભ્રામ ભ્રાન્તવજ્જ્ઞાની સતીં કૃત્વા સ્વવક્ષસિ

શતશૃઙ્ગગિરેઃ પાર્શ્વે જમ્બુદ્વીપે ચ ભારતે॥
સુનિર્જનેઽક્ષયવટે ગઙ્ગાતીરે સરિત્તટે

રુરોદોચ્ચૈઃ સ્વયં કૃત્વા સતિ સાધ્વીત્યુદીર્ય ચ ॥
ત્રિનેત્રનેત્રનીરેણ સંબભૂવ સરોવરમ્

તન્નેત્રં ચ સરો નામ મુનીનાં તપસઃ સ્થલમ્ ॥
યોજનદ્વયવિસ્તીર્ણં પુણ્યતીર્થં મનોહરમ્

યત્ર સ્નાત્વા પુનર્જન્મ નરાણાં ન ભવેદ્ગિરે ॥
શતજન્મકૃતં પાપં સ્નાનમાત્રેણ નશ્યતિ

ત્યક્ત્વા તાં માનવીં મૂર્તિં નરા યાન્તિ હરેઃ પદમ્ ॥
સ તત્ર રોદનં ત્યક્ત્વા પુનર્બભ્રામ મેદિનીમ્

પૂર્ણમબ્દં મહાયોગી વિરહાતુરમાનસઃ ॥
સતીગલિતપ્રત્યઙ્ગૈરંગૈશ્ચ પર્વતેશ્વર

બભૂવ સિદ્ધપીઠાનાં સમૂહો વાઞ્છિતપ્રદઃ ॥
શેષાઙ્ગાનાં મહાદેવઃ સંસ્કારં વૈ વિધાય ચ

અસ્થિમાલાં વિનિર્માય ચકાર કણ્ઠભૂષણમ્ ॥
નિત્યં તદ્ભસ્મ ભક્ત્યા ચ ચકાર ગાત્રલેપનમ્

સતિ પ્રાણેશ્વરીત્યુક્ત્વા પુનર્મૂર્ચ્છામવાપ સઃ ॥
વિસસ્માર બ્રહ્મ પરમાત્માનમાત્મસંભવઃ

સ્વાત્મારામઃ પૂર્ણકામો નિશ્ચેષ્ટો વિરહજ્વરાત્ ॥
તં શયાનં ગિરિવરસ્યાભ્યાશે વટમૂલકે

દૃષ્ટ્વા દેવાઃ સમાજગ્મુર્વિસ્મિતાઃ શિવસન્નિધિમ્ ॥
નારાયણશ્ચ ભગવાનીશ્વરઃ સહ પાર્ષદૈઃ

રત્નયાનેનાજગામ પદ્માર્ચિતપદામ્બુજઃ॥
રત્નાલંકાર શોભાઢ્યઃ પીતવાસાશ્ચતુર્ભુજઃ

ઈષદ્ધાસ્યપ્રસન્નાસ્યો વનમાલાવિભૂષિતઃ ॥
બ્રહ્મા શેષશ્ચ ધર્મશ્ચ સુરાઃ સર્વે મહર્ષયઃ

સમૂષુરીશસદસિ લક્ષ્મીકાન્ત પ્રણમ્ય તે ॥
શ્રીહરિઃ શઙ્કરમહો કૃત્વા વક્ષસિ મૂર્ચ્છિતમ્ ॥
રુદન્તં બોધયામાસ જ્ઞાનીશો જ્ઞાનિનાં ગુરુમ્

શ્રીભગવાનુવાચ ॥
સ્વાત્મારામ નિબોધેદં મદીયં વચનં શૃણુ

હિતમધ્યાત્મસારં ચ દુઃખશોકનિકૃન્તનમ્ ॥
સર્વાધ્યાત્મવિદ્યમાનબીજં જ્ઞાનનિધિં વિધિમ્

તથાપિ બોધયામિ ત્વાં સર્વજ્ઞં વેધસો વિધિમ્ ॥
બુધં બોધયિતું શક્તોઽબુધોઽપિ પ્રાણસંકટે

વ્યવહારોઽસ્તિ લોકેષુ સર્વઃ સર્વપરસ્પરમ્ ॥
માયાશ્રિતા ગુણાઃ સર્વે હેતવઃ સુખદુઃખયોઃ ॥.

વિષ્ણુમાયા બલવતી ગુણયુક્તં પ્રબાધતે ॥
દુઃખં શોકં ભયં શંભો દુર્દિને ભવતીશ્વર

તત્રાતીતે કુતસ્તાનિ સુદિને ચ સમાગતે ॥
હર્ષ ઐશ્વર્યદર્પશ્ચ સંતતં તત્ર વર્દ્ધતે

સર્વાણ્યેતાનિ ગણ્યન્તે સ્વપ્નાનીવ વિપશ્ચિતઃ ॥
જ્ઞાનં લભ મહાદેવ જ્ઞાનબીજ સનાતન

ચેતનાં કુરુ ભદ્રં તે સતીં પ્રાપ્સ્યસિ નિશ્ચિતમ્ ॥
તત્તોયં શીતતા નિત્યં નાગ્નિં મુઞ્ચતિ દાહિકા

તેજઃ સૂર્યં મહીં ગન્ધો તથા ત્વાં ચ સતી શિવ ॥
શૈલેત્યેવં સમાકર્ણ્ય હરિં કિંચિદુવાચ હ

નેત્રાણ્યુન્મીલનં કૃત્વા ત્રિનેત્રઃ શ્રૂયતામિતિ ॥
ત્રિનેત્ર ઉવાચ ॥
કસ્ત્વં તેજઃસ્વરૂપોઽસિ ક ઇમે તવ સન્નિધૌ

કિન્નામ ભવતશ્ચૈષાં કાનિ નામાનિ કા સતી ॥
કોઽહં કો મે ભવાન્બ્રૂતે કિંકરાઃ કુત આગતાઃ

ક્વ યાસ્યસિ ક્વ યાસ્યામિ ક્વ ગચ્છન્ત ઇમે વદ॥
હરિરિત્યેવમાકર્ણ્ય રુરોદ સગણો ગિરે

નેત્રનીરૈસ્ત્રિનેત્રં તં રુદન્તં પ્રસિષેચ સઃ ॥
હરિત્રિનેત્રયોર્નેત્રનીરપાતેન તત્ર વૈ

બભૂવ સરસાં શ્રેષ્ઠં તીર્થં ભુવનપાવનમ્ ॥
ભારતેઽસ્તગિરેઃ પશ્ચાત્તત્રાક્ષયવટાંતિકે

સ્થલં બભૂવ તપસાં મુક્તિબીજં તપસ્વિનામ્ ॥
અથોવાચ પુનઃ શીઘ્રમાધ્યાત્મં ચ હરં હરિઃ

શૃણ્વતાં સર્વદેવાનાં મુનીનામૂર્ધ્વરેતસામ્ ॥
શ્રીભગવાનુવાચ ॥
શૃણુ શંકર વક્ષ્યામિ જ્ઞાનાનંદ સનાતન

જ્ઞાનં જ્ઞાનનિધે શોકાદ્વિસ્મૃતોઽસિ પરાત્પર ॥
સુદિનં દુર્દિનં શશ્વદ્ભવત્યેવ ભવે ભવે

સર્વેષાં પ્રાકૃતાનાં ચ તે બીજે સુખદુઃખયોઃ॥
સુખાદ્ભવતિ હર્ષશ્ચ દર્પઃ શૌર્યપ્રમત્તતા

રાગ ઐશ્વર્યકામશ્ચ વિદ્વેષશ્ચ નિરન્તરમ્ ॥
દુઃખાચ્છોકાત્સમુદ્વેગાદ્ભયં નિત્યં પ્રવર્તતે

હતાન્યેતાનિ સર્વાણિ હતે બીજે મહેશ્વર ॥
સુદિનં દુર્દિનં ચૈવ સર્વકર્મોદ્ભવં ભવ

તત્કર્મ તપસા સાધ્યં કર્મણા ચ શુભાશુભમ્ ॥
તપઃ સ્વભાવસાધ્યં ચ સ્વભાવોઽભ્યાસતો ભવેત્

સંસર્ગસાધ્યો ઽધ્યાસશ્ચ સંસર્ગઃ પુણ્યતો ભવેત્॥
પુણ્યબીજં મનશ્ચૈવ પાપબીજં ચ ચંચલમ્

મનઃ શંભો મમાંશશ્ચ સર્વેંદ્રિયપુરઃસરમ્॥
સર્વેષાં જનકોઽહં ચ ચિત્ત્વં બ્રહ્મા પતિસ્ત્વયમ્

બ્રહ્રૈકં મૂર્તિભેદસ્તુ ગુણભેદેન સંતતમ્ ॥
તદ્બ્રહ્મ વિવિધં વસ્તુ સગુણં નિર્ગુણં શિવ

માયાશ્રિતો યઃ સગુણો માયાઽતીતશ્ચ નિર્ગુણઃ ॥
સ્વેચ્છામયશ્ચ ભગવાનિચ્છયા વિકરોતિ ચ

ઇચ્છાશક્તિશ્ચ પ્રકૃતિર્નિત્યા સર્વપ્રસૂઃ સદા ॥
કેચિદેકં વદંત્યેવ બ્રહ્મજ્યોતિઃ સનાતનમ્

કેચિદ્વદન્તિ દ્વિવિધં બ્રહ્મ પ્રકૃતિપૂર્વકમ્ ॥
શૃણુ યે ચ વદન્ત્યેકં માયાપુરુષયોઃ પરમ્

તસ્માદ્ભવતિ તૌ દ્વૌ ચ તદ્બ્રહ્મ સર્વકારણમ્ ॥
અથ ચૈકં પરં બ્રહ્મ દ્વિવિધં ભવતીચ્છયા ॥

ઇચ્છાશક્તિશ્ચ પ્રકૃતિઃ સર્વશક્તિપ્રસૂઃ .સદા ॥
તત્રાશક્તશ્ચ સગુણઃ સર્વાધારઃ સનાતનઃ

સર્વેશ્વરઃ સર્વસાક્ષી સર્વત્રાસ્તિ ફલપ્રદઃ ॥
શરીરં દ્વિવિધં શંભો નિત્યં પ્રાકૃતમેવ ચ

નિત્યં વિનાશરહિતં નશ્વરં પ્રાકૃતં સદા ॥
અહં ત્વં ચાપિ ભગવાન્નાવયોર્નિત્યવિગ્રહઃ

આવયોરંશભૂતા યે પ્રાકૃતા નષ્ટવિગ્રહાઃ ॥
રુદ્રાદયસ્ત્વદંશાશ્ચ મદંશા વિષ્ણુરૂપિણઃ

મમાપ્યેવં દ્વિધા રૂપં દ્વિભુજં ચ ચતુર્ભુજમ્॥
ચતુર્ભુજોઽહં વૈકુણ્ઠે પદ્મયા પાર્ષદૈઃ સહ

ગોલોકે દ્વિભુજોઽહં ચ ગોપીભિઃ સહ રાધયા ॥
દ્વિવિધં યે વદન્ત્યેવં દ્વૌ પ્રધાનૌ તુ તન્મતે

પુરુષશ્ચ સદા નિત્યો નિત્યા પ્રકૃતિરીશ્વરી ॥
સદા તૌ દ્વૌ ચ સંશ્લિષ્ટૌ સર્વેષાં પિતરૌ શિવ

સશરીરૌ નિઃશરીરૌ સ્વેચ્છયા સર્વરૂપિણૌ ॥
પ્રાધાન્યં ચ યથા પુંસઃ પ્રકૃતેશ્ચ સદા તથા

સતીમિચ્છસિ ચેચ્છમ્ભો પ્રકૃતેઃ સ્તવનં કુરુ ॥
યત્સ્તોત્રં ચ ત્વયા દત્તં પુરા દુર્વાસસે મુદા

તદ્દિવ્યં કણ્વશાખોક્તં ભજ તેન જગત્પ્રસૂમ્ ॥
શોકનાશો ભવતુ તે શિવં શિવ મમાશિષા

દૂરં વિપ્લવહેતુશ્ચ યાતુ સ્ત્રીવિરહજ્વરઃ ॥
ઇત્યેવમુક્ત્વા લક્ષ્મીશો વિરરામ ગિરીશ્વરમ્

સ્તવનં કર્તુમારેભે પ્રકૃતેશ્ચ મહેશ્વરઃ ॥
સ્નાત્વા નત્વા ચ શ્રીકૃષ્ણં બ્રહ્માણં ભક્તિસંયુતઃ॥
પુટાઞ્જલિયુતો ભૂત્વા પુલકાઞ્ચિતવિગ્રહઃ

મહેશ્વર ઉવાચ ॥
ઓં નમઃ પ્રકૃત્યૈ મન્ત્રઃ ॥
બ્રાહ્મિ બ્રહ્મસ્વરૂપે ત્વં માં પ્રસીદ સનાતનિ ॥
પરમાત્મસ્વરૂપે ચ પરમાનન્દરૂપિણિ

ભદ્રે ભદ્રપ્રદે દુર્ગે દુર્ગઘ્ને દુર્ગનાશિનિ ॥
પોતસ્વરૂપે જીર્ણે ત્વં માં પ્રસીદ ભવાર્ણવે ॥

સર્વસ્વરૂપે સર્વેશિ સર્વબીજસ્વરૂપિણિ ॥
સર્વાધારે સર્વવિદ્યે માં પ્રસીદ જયપ્રદે

સર્વમઙ્ગલરૂપે ચ સર્વમઙ્ગલદાયિનિ ॥
સમસ્તમઙ્ગલાધારે પ્રસીદ સર્વમઙ્ગલે

નિદ્રે તન્દ્રે ક્ષમે શ્રદ્ધે તુષ્ટિપુષ્ટિસ્વરૂપિણિ ॥
લજ્જે મેધે બુદ્ધિરૂપે પ્રસીદ ભક્તવત્સલે

વેદસ્વરૂપે વેદાનાં કારણે વેદદાયિનિ ॥
સર્વવેદાઙ્ગરૂપે ચ વેદમાતઃ પ્રસીદ મે

દયે જયે મહામાયે પ્રસીદ જગદમ્બિકે ॥
ક્ષાન્તે શાન્તે ચ સર્વાન્તે ક્ષુત્પિપાસાસ્વરૂપિણિ

લક્ષ્મીર્નારાયણક્રોડે સ્રષ્ટુર્વક્ષસિ ભારતિ ॥
મમ ક્રોડે મહામાયે વિષ્ણુમાયે પ્રસીદ મે

કલાકાષ્ઠાસ્વરૂપે ચ દિવારાત્રિસ્વરૂપિણિ ॥
પરિણામપ્રદે દેવિ પ્રસીદ દીનવત્સલે

કારણે સર્વશક્તીનાં કૃષ્ણસ્યોરસિ રાધિકે ॥
કૃષ્ણપ્રાણાધિકે ભદ્રે પ્રસીદ કૃષ્ણપૂજિતે

યશઃસ્વરૂપે યશસાં કારણે ચ યશઃપ્રદે ॥
સર્વદેવીસ્વરૂપે ચ નારીરૂપવિધાયિનિ

સમસ્તકામિનીરૂપે કલાંશેન પ્રસીદ મે ॥
સર્વસંપત્સ્વરૂપે ચ સર્વસંપત્પ્રદે શુભે

પ્રસીદ પરમાનન્દે કારણે સર્વસંપદામ્ ॥
યશસ્વિનાં પૂજિતે ચ પ્રસીદ યશસાં નિધે

આધારે સર્વજગતાં રત્નાધારે વસુન્ધરે ॥
ચરાચરસ્વરૂપે ચ પ્રસીદ મમ મા ચિરમ્ । ૮૭ ॥
યોગસ્વરૂપે યોગીશે યોગદે યોગકારણે ॥
યોગાધિષ્ઠાત્રિ દેવીશે પ્રસીદ સિદ્ધયોગિનિ

સર્વસિદ્ધિસ્વરૂપે ચ સર્વસિદ્ધિપ્રદાયિનિ ॥
કારણે સર્વ સિદ્ધીનાં સિદ્ધેશ્વરિ પ્રસીદ મે

વ્યાખ્યાનં સર્વશાસ્ત્રાણાં મતભેદે મહેશ્વરિ ॥
જ્ઞાને યદુક્તં તત્સર્વં ક્ષમસ્વ પરમેશ્વરિ

કેચિદ્વદન્તિ પ્રકૃતેઃ પ્રાધાન્યં પુરુષસ્ય ચ ॥
કેચિત્તત્ર મતદ્વૈધે વ્યાખ્યાભેદં વિદુર્બુધાઃ

મહાવિષ્ણોર્નાભિદેશે સ્થિતં તં કમલોદ્ભવમ્ ॥
મધુકૈટભૌ મહાદૈત્યૌ લીલયા હંતુમુદ્યતૌ

દૃષ્ટ્વા સ્તુતિં પ્રકુર્વન્તં બ્રહ્માણં રક્ષિતું પુરા ॥
બોધયામાસ ગોવિન્દં વિનાશહેતવે તયોઃ

નારાયણસ્ત્વદ્ભક્ત્યા ચ જઘાન તૌ મહાસુરૌ ॥
સર્વેશ્વરસ્ત્વયા સાર્દ્ધમનીશોઽયં ત્વયા વિના

પુરા ત્રિપુરસંગ્રામે ગગનાત્પતિતે મયિ ॥
ત્વયા ચ વિષ્ણુના સાર્દ્ધં રક્ષિતોઽહં સુરેશ્વરિ

અધુના રક્ષ મામીશે પ્રદગ્ધં વિરહાગ્નિના॥
સ્વાત્મદર્શનપુણ્યેન ક્રીણીહિ પરમેશ્વરિ

ઇત્યુક્ત્વા વિરતઃ શંભુર્દદર્શ ગગનસ્થિતામ્ ॥
રત્નસારરથસ્થાં તાં દેવીં શતભુજાં મુદા

તપ્તકાઞ્ચનવર્ણાભાં રત્નાભરણભૂષિતામ્ ॥
ઈષદ્ધાસ્યપ્રસન્નાસ્યાં જગતાં માતરં સતીમ્

દૃષ્ટ્વા તાં વિરહાસક્તઃ પુનસ્તુષ્ટાવ સત્વરમ્ ॥
દુઃખં નિવેદયામાસ પ્રરુદન્વિરહોદ્ભવમ્

દર્શયામાસાસ્થિમાલાં સ્વાંગસ્થં ભસ્મભૂષણમ્ ॥
કૃત્વા બહુ પરીહારં તોષયામાસ સુંદરીમ્

નારાયણશ્ચ બ્રહ્મા ચ ધર્મઃ શેષઃ સુરર્ષયઃ ॥
શિવં રક્ષેશ્વરીત્યુક્ત્વા તુષ્ટુવુસ્તે સનાતનીમ્ ।૧॥
બભૂવ પરિતુષ્ટા સા તેષાં સ્તોત્રેણ તત્ક્ષણમ્ ॥
ઉવાચ કૃપયા શંભું પ્રાણેશં પ્રાણવલ્લભા

પ્રકૃતિરુવાચ ॥
સ્થિરો ભવ મહાદેવ પ્રાણાધિક મમ પ્રભો ॥
ભવાનાત્મા ચ યોગીશઃ સ્વામી જન્મનિ જન્મનિ

અહં શૈલેન્દ્રકામિન્યાં લબ્ધ્વા જન્મ મહેશ્વર ॥
તવ પત્ની ભવિષ્યામિ મુઞ્ચ ત્વં વિરહજ્વરમ્

ઇત્યુક્ત્વા શિવમાશ્વાસ્ય ચાંતર્ધાનં ચકાર સા ॥
સુરા જગ્મુસ્તમાશ્વાસ્ય લજ્જાનમ્રાત્મકન્ધરમ્

હર્ષાન્તરાત્મા ગિરિશઃ કૈલાસં તુ જગામ હ ॥
નનર્ત સગણસ્તૂર્ણં સંત્યજ્ય વિરહજ્વરમ્

ઇદં શિવકૃતં સ્તોત્રં પ્રકૃત્યા યઃ પઠેન્નરઃ ॥
ન ભવેત્કામિનીભેદસ્તસ્ય જન્મનિ જન્મનિ

ઇહલોકે સુખં ભુક્ત્વા સ યાતિ શિવમન્દિરમ્ ॥
ધર્માર્થકામમોક્ષાંશ્ચ લભતે નાત્ર સંશયઃ

ઇતિ શ્રીબ્રહ્મવૈવર્તે મહાપુરાણે શ્રીકૃષ્ણજન્મખણ્ડે નારાયણનારદસંવાદે શંકરશોકાપનો દનં નામ ત્રિચત્વારિંશોઽધ્યાયઃ