બ્રહ્મવૈવર્ત પુરાણ · અધ્યાય 4.36

॥ શ્રીરાધિકોવાચ ॥ ॥
એતેન નિયમેનૈવ બ્રહ્મા તત્યાજ મોહિનીમ્ ॥
કથં સ કુલટાશાપાદપૂજ્યઃ સંબભૂવ હ

કથં તસ્ય દર્પભઙ્ગં ચકાર કમલાપતિઃ ॥
કથયસ્વ સર્વબીજં સર્વેષામીશ્વરઃ સ્વયમ્

॥
॥ શ્રીનારાયણ ઉવાચ ॥ ॥
રાસેશ્વરીવચઃ શ્રુત્વા પ્રહસ્ય રસિકેશ્વરઃ ॥
નિગૂઢમિતિહાસં ચ તાં વક્તુમુપચક્રમે

॥
॥ શ્રીકૃષ્ણ ઉવાચ ॥ ॥
બ્રહ્મા ચિરં તપસ્તપ્ત્વા મત્તો લબ્ધ્વા વરં વરમ્ ॥
સૃષ્ટિં નાનાવિધાં કૃત્વા વિધાતા સ બભૂવ હ

તપસાં ફલદાતા ચ સર્વેષાં શાસ્તિકૃત્પ્રભુઃ ॥
આત્માનમીશ્વરં જ્ઞાત્વા મહાગર્વો બભૂવ હ

બ્રહ્માણ્ડેષુ ચ સર્વેષુ ગર્વપર્યન્તમુન્નતિઃ ॥
ઇતિ મત્વા બ્રહ્મણશ્ચ દર્પભઙ્ગઃ કૃતો મયા

યેષાં યેષાં ભવેદ્દર્પો બ્રહ્માણ્ડેષુ પરાત્પરઃ ॥
વિજ્ઞાય સર્વં સર્વાત્મા તેષાં શાસ્તાઽહમેવ ચ

પ્રથમે બ્રહ્મણો ગર્વો મયા ચૂર્ણીકૃતઃ શ્રુતઃ ॥
શઙ્કરસ્ય ચ પાર્વત્યાશ્ચન્દ્રસ્ય ચ રવેસ્તથા

વહ્નેર્દુર્વાસસશ્ચૈવ તથા ધન્વન્તરેઃ પ્રિયે॥
ક્રમેણ દર્પભઙ્ગં ચ કથયામિ નિશામય

ક્ષુદ્રાણાં મહતાં ચૈવ યેષાં ગર્વો ભવેત્પ્રિયે ॥
એવંવિધમહં તેષાં ચૂર્ણીભૂતં કરોમિ ચ

॥ શ્રીનારાયણ ઉવાચ ॥ ॥
શ્રીકૃષ્ણસ્ય વચઃ શ્રુત્વા શુષ્કકણ્ઠોષ્ઠતાલુકા ॥
પપ્રચ્છ રાધા યત્નેન સંત્રસ્તા ભયવિહ્વલા

॥ શ્રીરાધિકોવાચ ॥ ॥
કસ્ય કેન પ્રભાવેણ મહાદર્પો બભૂવ હ ॥
ત્વયા કેન પ્રભાવેણ તસ્ય ભઙ્ગઃ કૃતઃ પુરા

કથયસ્વ પ્રાણનાથ સર્વેષાં દર્પભઞ્જન ॥
દર્પદો ભયદઃ પ્રાણદાનૈકકારણેશ્વર

॥ શ્રીકૃષ્ણ ઉવાચ ॥ ॥
યેન ભૂતં ગર્વચૂર્ણં શ્રુતં ત્રિજગતાં વિધેઃ ॥
અન્યેષાં શ્રૂયતાં રાધે વ્યાસેન કથયામિ તે

સ્વયં શિવો મદંશશ્ચ સંહર્તા જગતાં ચ યઃ ॥
તેજસા મત્સમઃ પૂર્ણો જ્ઞાનેન ચ ગુણેન ચ

ધ્યાયન્તિ યોગિનો યં સ યોગીન્દ્રાણાં ગુરોર્ગુરુઃ ॥
જ્ઞાનાનન્દસ્વરૂપોઽયં તસ્યાખ્યાનં શૃણુ પ્રિયે

યુગષષ્ટિસહસ્રાણિ તપસ્તપ્ત્વા દિવાનિશમ્ ॥
ભૂત્વા ચ મત્કલાપૂર્ણો બભૂવ મત્સમો વિભુઃ

તપસા તેજસા શશ્વત્તેજોરાશિર્બભૂવ હ ॥
સૂર્યકોટિપ્રભાવશ્ચ ભક્તાનાં કલ્પપાદપઃ

ધ્યાયંધ્યાયં ચ યોગીન્દ્રાસ્તત્તેજો બહુકાલતઃ ॥
તદન્તરે ચ પશ્યન્તિ સ્વરૂપમતિસુન્દરમ્

શુદ્ધસ્ફટિકસંકાશં પઞ્ચવક્ત્રં ત્રિલોચનમ્ ॥
ત્રિશૂલપટ્ટિશકરં વ્યાઘ્રચર્મામ્બરં વરમ્

જપન્તં સ્વાત્મનાઽઽત્માનં શ્વેતાબ્જબીજમાલયા ॥
ઈષદ્ધાસ્યપ્રસન્નાસ્યં ચન્દ્રચૂડં પરાત્પરમ્

સ્વર્ણાકારં જટાભારં દધતં શિરસા મુદા॥
શાન્તં કાન્તં ત્રિજગતાં ભક્તાનુઽગ્રહકાતરમ્

અથ સ્વમીશ્વરં મત્વા પ્રદાતા સર્વસંપદામ્॥
દદાતિ સર્વં સર્વેભ્યો વાઞ્છિતં કલ્પપાદપઃ

યો યં વાઞ્છતિ તં તસ્મૈ વરં દત્ત્વા વરેશ્વરઃ ॥
બભૂવ ગર્વસંયુક્તઃ સ્વાત્મારામઃ સ્વલીલયા

એકદા ચ વૃકો દૈત્યસ્તપસ્તેપે શિવસ્ય ચ ॥
કેદારે ચ કઠોરેણ વર્ષમેકં દિવાનિશમ્

નિત્યં યાતિ તત્સમીપં કૃપયા ચ કૃપાનિધિઃ ॥
વરં દાતું યથાઽભીષ્ટં ન જગ્રાહાસુરો વરમ્

વર્ષાન્તે શઙ્કરઃ શશ્વત્તસ્થૌ તત્પુરતઃ સ્વયમ્ ॥
વરદો ભક્તિપાશેન ક્ષણં ગન્તું ન સ ક્ષમઃ

સર્વૈશ્વર્યં સર્વસિદ્ધિં ભુક્તિં મુક્તિં હરઃ પદમ્ ॥
દૈત્યઃ કિંચિન્ન ગૃહ્ણાતિ પરિતઃ શૂલપાણિનઃ

ધ્યાયમાનં તત્પદાબ્જં દૃષ્ટ્વા ત્રસ્તો મહેશ્વરઃ ॥
અયાચિતારં નિશ્ચેષ્ટં રુરોદ પ્રેમવિહ્વલઃ

અતીવ રોદનાત્તસ્ય ધ્યાનભઙ્ગો બભૂવ હ ॥
દદર્શ પુરતઃ સાક્ષાદ્દાતારં સર્વસંપદામ્

યન્માયયા વરં વવ્રે દૈત્યેન્દ્રો ભક્તિપૂર્વકમ્ ॥
હસ્તં દધે ચ યન્મૂર્ધ્નિ સ ભસ્મ ભવિતેતિ ચ

ઓમિત્યુક્ત્વા પ્રયાન્તં તં દુદ્રાવ દૈત્યપુંગવઃ॥
મૃત્યુઞ્જયો મૃત્યુભયાદ્દુદ્રાવ ત્રાસવિહ્વલઃ

પપાત ડમરુસ્તસ્ય વ્યાઘ્રચર્મ મનોહરમ્ ॥
દિગમ્બરો દશદિશો ભેજે દાનવભીતયે

ન હન્તિ તં ચ કૃપયા ભક્તં ચ ભક્તવત્સલઃ ॥
દુષ્ટાનુસારં સાધુશ્ચ ન કરોતિ કદાચન

સાધવો ઘ્નન્તિ ઘ્નન્તં ચ ભૃત્યં પુત્રં પ્રિયાં વિના ॥
પ્રબોધિતું ન શક્તશ્ચ સ્વાત્માનં કૃપયા સમમ્

શિવઃ સ્વમૃત્યું મત્વા ચ ભીતશ્ચ નિરહંકૃતઃ ॥
સ્મારંસ્મારં ચ માં ભદ્રે મામેવ શરણં યયૌ

દૃષ્ટ્વા સ્વાશ્રમમાયાન્તં શુષ્કકણ્ઠોષ્ઠતાલુકમ્ ॥
હે હરે રક્ષ રક્ષેતિ જપન્તં ભયવિહ્વલમ્

સંસ્થાપ્ય તત્સમીપે ચ સ દૈત્યો બોધિતો મયા ॥
પૃષ્ટશ્ચ સર્વવૃત્તાન્તમુવાચ માં ક્રમેણ ચ

તદા મમાજ્ઞયા તૂર્ણં વઞ્ચિતો માયયાઽસુરઃ ॥
દત્ત્વા સ્વમૂર્ધ્નિ હસ્તં ચ સદ્યો ભસ્મ બભૂવ હ

તદા સિદ્ધાઃ સુરેન્દ્રાશ્ચ મુનીન્દ્રા મનવો મુદા ॥
તુષ્ટુવુર્માં સુભક્ત્યા ચ લજ્જયા લજ્જિતઃ શિવઃ

બભૂવ ચૂર્ણસ્તદ્ગર્વો જગામ બોધિતો મયા ॥
વરં દદાતિ વરદસ્તતો બોધ્યો હ્યહં શિવઃ

અથ ગર્વાન્વિતો રુદ્રો હન્તું ત્રિપુરમુલ્બણમ્ ॥
મત્વા મનસિ સંહર્તા સર્વેષાં જગતામિતિ

કોઽયં પતઙ્ગવદ્દૈત્ય ઇતિ મત્વા યયૌ રણમ્ ॥
વિહાય શૂલં મદ્દત્તં મદીયકવચં પરમ્

ચિરં બભૂવ સમરં વર્ષમેકં દિવાનિશમ્ ॥
ન કોઽપિ જેતું કં શક્તો દ્વૌ સમૌ સમરે તદા

પૃથિવ્યાં ચરણં કૃત્વા દૈત્યેન્દ્રો માયયા પ્રિયે ॥
અત્યૂર્ધ્વં ચ સમુત્તસ્થૌ પઞ્ચાશત્કોટિયોજનમ્

ઉત્તસ્થૌ શંકરસ્તૂર્ણં હન્તું દૈત્યં જગત્પ્રભુઃ ॥
બભૂવ તત્ર યુદ્ધં ચ માસમેકં નિરાશ્રયે ॥

અસ્ત્રાણિ ચાપં ચિચ્છેદ શઙ્કરસ્યાસુરો બલી ॥
રથં બભઞ્જ દૈત્યેન્દ્રશ્ચાપમસ્ત્રાણિ શઙ્કરાત્

જઘાન મુષ્ટિના રુદ્રો દાનવેન્દ્રં પ્રકોપતઃ ॥
વજ્રમુષ્ટિપ્રહારેણ સદ્યો મૂર્ચ્છામવાપ સઃ

ક્ષણેન ચેતનાં પ્રાપ્ય કોપાદ્દાનવપુંગવઃ ॥
શિવં શયાનમુત્તોલ્ય પાતયામાસ ભૂતલે

સરથે પાતિતે રુદ્રે દેવા દેવર્ષયો ભિયા ॥
તુષ્ટુવુર્માં પરિત્રાહિ કૃષ્ણેત્યુક્ત્વા પુનઃપુનઃ

હરઃ સસ્માર મામેવ નિર્ભયો ભયકારણમ્ ॥
તુષ્ટાવ ભક્ત્યા સ્તોત્રેણ મયા દત્તેન સંકટે

તદાઽહં કલયા શીઘ્રં વૃષરૂપં વિધાય ચ ॥
શયાનં શંકરં ધૃત્વા વિષાણાભ્યામુરુક્રમમ્

દદૌ તસ્મૈ સ્વકવચં સ્વશૂલમરિમર્દનમ્ ॥
પ્રાપ્ય તદ્દાનવસ્થાનમત્યૂર્ધ્વં ચ નિરાશ્રયમ્

મયા દત્તેન શૂલેન જઘાન ત્રિપુરં હરઃ ॥
મામેવ દર્પહન્તારં તુષ્ટાવ વ્રીડિતઃ પુનઃ

સદ્યઃ પપાત દૈત્યેન્દ્રશ્ચૂર્ણીભૂતશ્ચ ભૂતલે ॥
દેવતા મુનયઃ સર્વે તુષ્ટુવુઃ શઙ્કરં મુદા

તત્યાજ શઙકરો દર્પં વિઘ્નબીજં તતો વિભુઃ ॥
જ્ઞાનાનન્દસ્વરૂપશ્ચ નિર્લિપ્તઃ સર્વકર્મસુ

તતોઽહં વૃષરૂપેણ વહામિ તેન તં પ્રિયમ્ ॥
મમ પ્રિયતમો નાસ્તિ ત્રૈલોક્યેષુ શિવાત્પરઃ

મનઃસ્વરૂપો બ્રહ્મા મે જ્ઞાનરૂપો મહેશ્વરઃ ॥
બુદ્ધિર્ભગવતી દુર્ગા મૂલપ્રકૃતિરીશ્વરી

નિદ્રાદયઃ શક્તયો યાસ્તાઃ સર્વાઃ પ્રકૃતેઃ કલાઃ ॥
વાગધિષ્ઠાતૃદેવી યા સા સ્વયં ચ સરસ્વતી

મમ કલ્યાણાધિદેવો હર્ષરૂપો ગણેશ્વરઃ ॥
પરમાર્થઃ સ્વયં ધર્મો મમ ભક્તો હુતાશનઃ

સર્વૈશ્વર્યાધિદેવી મે સર્વગોલોકવાસિનઃ ॥
પ્રાણાધિષ્ઠાતૃદેવી ત્વં સદા પ્રાણાઘિકા મમ

ગોપાઙ્ગનાસ્તવ કલા અત એવ મમ પ્રિયાઃ ॥
મલ્લોમકૂપજા ગોપાઃ સર્વે ગોલોકવાસિનઃ

તેજઃસ્વરૂપઃ સૂર્યશ્ચ પ્રાણા મે વાયવઃ સ્મૃતાઃ ॥
જલાધિદેવો વરુણઃ પૃથિવી મે મલોદ્ભવા

મમ શૂન્યો મહાકાશો મદનો માનસોદ્ભવઃ ॥
ઇન્દ્રાદયઃ સુરાઃ સર્વે મત્કલાંશાંશસંભવાઃ

એતાનિ સૃષ્ટિબીજાનિ મહદાદીનિ ચૈવ હિ ॥
સર્વેષાં બીજરૂપોઽહં સ્વયમાત્મા નિરાશ્રયઃ

જીવો મે પ્રતિબિમ્બશ્ચ કર્મભોગાધિકારકઃ ॥
અહં સાક્ષી નિરીહશ્ચ ન ભોગી સર્વકર્મસુ

ભક્તધ્યાનાર્થદેહોઽયં મમ સ્વેચ્છામયસ્ય ચ ॥
પ્રકૃતિઃ પુરુષોઽહં ચ એક એવ પરાત્પરઃ

ઇત્યેવં કથિતં રાધે શિવદર્પવિમોચનમ્ ॥
સૃષ્ટિબીજં ચ શૃણુ મે પાર્વતીદર્પમોચનમ્

શ્રીનારાયણ ઉવાચ ॥
ઇત્યુક્તવન્તં શ્રીકૃષ્ણં પરમાત્માનમીશ્વરમ્ ॥
પપ્રચ્છ રાધિકા દેવી નિગૂઢમભિવાઞ્છિતમ્

શ્રીરાધિકોવાચ ॥
ભગવન્સર્વતત્ત્વજ્ઞ સર્વબીજ સનાતન ॥
વદ મે વાઞ્છિતં પ્રશ્નં સર્વસંદેહભઞ્જનમ્

સર્વજ્ઞાનાધિદેવશ્ચ શંકરઃ સર્વતત્ત્વવિત્ ॥
મૃત્યુંજયઃ કાલકાલો ભગવાંસ્ત્વત્સમો મહાન્

કથં વિભૂતિગાત્રશ્ચ પઞ્ચવક્ત્રસ્ત્રિલોચનઃ ॥
દિગમ્બરો જટાધારી નાગસંઘાતભૂષણઃ

વૃષેણાટતિ દેવેન્દ્રો વિહાય વરવાહનમ્ ॥
ન બિભર્તિ કથં રત્નસારનિર્માણભૂષણમ્

વહ્નિશુદ્ધાંશુકં ત્યક્ત્વા ધત્તે શાર્દૂલચર્મકમ્ ॥
ધત્તે ધત્તૂરકુસુમં પારિજાતં વિહાય ચ

નાસ્તિ રત્નકિરીટેચ્છા જટાયાં પ્રીતિરુત્તમા ॥
દિવ્યલોકં પરિત્યજ્ય શ્મશાનેષુ સ્પૃહા વિભોઃ

ચન્દનાગુરુકસ્તૂરીસુગંધિકુસુમાનિ ચ ॥
ત્યક્ત્વા સ્પૃહા બિલ્વપત્રે બિલ્વકાષ્ઠાનુલેપને

એતદ્વેદિતુમિચ્છામિ વ્યાસેન કથય પ્રભો ॥
શ્રોતું કૌતૂહલં નાથ વર્દ્ધતે મે મનઃસ્પૃહા

રાધિકાવચનં શ્રુત્વા પ્રહસ્ય મધુસૂદનઃ॥
કથાં કથિતુમારેભે કૃત્વા રાધાં સ્વવક્ષસિ

શ્રીકૃષ્ણ ઉવાચ ॥
યુગષષ્ટિસહસ્રાણિ તપઃ કૃત્વા મહેશ્વરઃ ॥
વિરરામ પૂર્ણતમો ધ્યાત્વા માં મનસા મુદા

એતસ્મિન્નન્તરે માં ચ દદર્શ પુરતઃ સ્થિતમ્ ॥
અતીવ કમનીયાઙ્ગં કિશોરં શ્યામસુન્દરમ્॥ ॥4.36.૮૦.॥
અહોનિર્વચનીયં ચ દૃષ્ટ્વા રૂપમનુત્તમમ્ ॥
ન બભૂવ વિતૃષ્ણશ્ચ લોચનાભ્યાં ત્રિલોચનઃ

પશ્યન્નિમેષરહિત ઇતિ મત્વા સ્વમાનસે ॥
ભક્ત્યુદ્રેકાન્મહાભક્તો રુરોદ પ્રેમવિહ્વલઃ

સહસ્રવદનોઽનન્તો ભાગ્યવાંશ્ચ ચતુર્મુખઃ ॥
બહુભિર્લોચનૈર્દૃષ્ટ્વા તુષ્ટાવ બહુભિર્મુખૈઃ

પશ્યામિ કિં વા કિં સ્તૌમિ સંપ્રાપ્ય નાથમીદૃશમ્ ॥
આસ્યૈકેન લોચનાભ્યાં ચતુર્દ્ધા સ પુનઃ પુનઃ

સ્વ માનસે કુર્વતીદં શંકરે ચ તપસ્વિનિ ॥
તદ્બભૂવ ચતુર્વક્ત્રં પૂર્વેણ સહ પઞ્ચમમ્

એકૈકવક્ત્રં શુશુભે લોચનૈશ્ચ ત્રિભિસ્ત્રિભિઃ।
બભૂવ તેન તન્નામ પઞ્ચવક્ત્રસ્ત્રિલોચનઃ

સ્તવનાદધિકપ્રીતિઃ શિવસ્ય દર્શને મમ ॥
તેનાધિકાનિ તસ્યૈવં બભૂવુર્લોચનાનિ ચ॥

ચક્ષૂંષિ ગુણરૂપાણિ તસ્ય બ્રહ્મસ્વરૂપિણઃ ॥
સત્ત્વં રજસ્તમ ઇતિ તસ્ય હેતું નિશામય

સત્ત્વાંશેન દૃશા શંભુઃ પશ્યન્પાતિ ચ સાત્ત્વિકાન્ ॥
રાજસેન રાજસિકાંસ્તામસેન ચ તામસાન્

ચક્ષુષસ્તામસાત્પશ્ચાલ્લલાટસ્થાદ્ધરસ્ય ચ ॥
સંહારકાલે સંહર્તુરગ્નિરાવિર્ભવેત્ક્રુધા

કોટિતાલપ્રમાણશ્ચ સૂર્યકોટિસમપ્રભઃ ॥
લેલિહાનો દીર્ઘશિખસ્ત્રૈલોક્યં દગ્ધુમીશ્વરઃ

વિભૂતિગાત્રઃ સ વિભુઃ સતીસંસ્કારભસ્મના ॥
ધત્તે તસ્યા અસ્થિમાલાં પ્રેમભાવેન ભસ્મ ચ

સ્વાત્મારામો યદ્યપીશસ્તથાઽપિ પૂર્ણમબ્દકમ્ ॥
સતીશવં ગૃહીત્વા ચ ભ્રામંભ્રામં રુરોદ હ

પ્રત્યઙ્ગં ચાપિ તસ્યાશ્ચ પપાત યત્ર યત્ર હ ॥
સિદ્ધપીઠસ્તત્ર તત્ર બભૂવ મન્ત્રસિદ્ધિકૃત્

તદા શવાવશેષં ચ કૃત્વા વક્ષસિ શંકરઃ ॥
પપાત મૂર્ચ્છિતો ભૂત્વા સિદ્ધિક્ષેત્રે ચ રાધિકે

તદા ગત્વા મહેશં તં કૃત્વા ક્રોડે પ્રબોધ્ય ચ ॥
અદદાં દિવ્યતત્ત્વં ચ તસ્મૈ શોકહરં પરમ્

તદા શિવશ્ચ સંતુષ્ટઃ સ્વં લોકં ચ જગામ હ ॥
મૂર્ત્યન્તરેણ કાલેન તાં સંપ્રાપ પ્રિયાં સતીમ્

દિવ્યસ્રગ્ધારિયોગેન નેચ્છા નિત્યે પરે વિભોઃ ॥
જટાં તપસ્યાકાલીનાં ધત્તેઽદ્યાપિ વિવેકતઃ

ન ચેચ્છા કેશસંસ્કારે સ્વાઙ્ગવેષેણ યોગિનઃ ॥
સમતા ચન્દને પઙ્કે લોષ્ટે રત્ને મણીશ્વરે

ગરુડદ્વેષિણો નાગાઃ શંકરં શરણં યયુઃ ॥
બિભર્તિ કૃપયા સ્વાઙ્ગે તાનેવ શરણાગતાન્

વાહનં વૃષરૂપોઽહમન્યસ્તં વોઢુમક્ષમઃ ॥
ત્રિપુરસ્ય વધે પૂર્વં મત્કલાંશસમુદ્ભવઃ

પારિજાતાદિકં પુષ્પસુગન્ધિ ચન્દનાદિકમ્॥
મયિ સંન્યસ્ય તેષ્વેવં પ્રીતિર્નાસ્તિ કદાચન

ધત્તૂરે તત્સદા પ્રીતિર્બિલ્વપત્રાનુલેપને ॥
ગન્ધહીને સુગન્ધે ચ યોગીષ્ટે વ્યાઘ્રચર્મણિ

દિવ્યલોકે દિવ્યતલ્પે જનતાયાં ન તન્મનઃ॥
શ્મશાનેઽતીવરહસિ ધ્યાયતે મામહર્નિશમ્

આબ્રહ્મસ્તમ્બપર્યન્તં સમં ચ મન્યતે શિવઃ॥
મમાનિર્વચનીયેઽત્ર રૂપે તન્મગ્નમાનસમ્

બ્રહ્મણઃ પતનેનાપિ શૂલપાણેઃ ક્ષણો ભવેત્ ॥
તસ્યાયુષઃ પ્રમાણં ચ નાહં જાનામિ કા શ્રુતિઃ

જ્ઞાનં મૃત્યુંજયઃ શૂલં ધત્તે મત્તેજસા સમમ્ ॥
વિના મયા ન કશ્ચિત્તં શંકરં જેતુમીશ્વરઃ

શંકરઃ પરમાત્મા મે પ્રાણેભ્યોઽપિ પરઃ શિવઃ॥
ત્ર્યમ્બકે મન્મનઃ શશ્વન્ન પ્રિયો મે ભવાત્પરઃ

બ્રહ્માણ્ડનિકરં છન્નં મયા મન્માયયા સદા ॥
સ કમ્પતિ હરં શશ્વન્ન ચ તં મોહિતું ક્ષમઃ

ન સંવસામિ ગોલોકે વૈકુણ્ઠે તવ વક્ષસિ ॥
સદા શિવસ્ય હૃદયે નિબદ્ધઃ પ્રેમપાશતઃ

સ્વરસિદ્ધં સુતાનેન પઞ્ચવક્ત્રેણ શંકરઃ ॥
શશ્વદ્ગાયતિ મદ્ગાથાં તેનાહં તત્સમીપતઃ

સ્રષ્ટું શક્તો હિ નષ્ટું ચ ભ્રૂભઙ્ગલીલયાઽપિ યઃ॥
બ્રહ્માણ્ડનિકરં યોગાન્ન યોગી શંકરાત્પરઃ

દિવ્યજ્ઞાનેન યઃ સ્રષ્ટું નષ્ટું ભ્રૂભઙ્ગલીલયા ॥
મૃત્યું કાલાદિકં ભક્તો ન જ્ઞાની શંકરાત્પરઃ

મમ ભક્તિં ચ દાસ્યં ચ મુક્તિં ચ સર્વસંપદઃ॥
સર્વસિદ્ધિં દાતુમીશો ન દાતા શંકરાત્પરઃ

પઞ્ચવક્ત્રેણ મન્નામ યો હિ ગાયત્યહર્નિશમ્ ॥
મદ્રૂપં ધ્યાયતે શશ્વન્ન ભક્તઃ શંકરાત્પરઃ

અહં સુદર્શનં શંભુસ્તેજસા ચ વયં સમાઃ ॥
બ્રહ્મા સ્રષ્ટા ચ યોગેન નાસ્માભિસ્તેજસા સમઃ

ઇત્યેવં કથિતં સર્વે શંકરસ્ય યશોઽમલમ્ ॥
તથાઽપ્યસ્ય દર્પભઙ્ગં કિં ભૂયઃ શ્રોતુમિચ્છસિ

ઇતિ શ્રીબ્રહ્મવૈવર્તે મહાપુરાણે શ્રીકૃષ્ણજન્મખણ્ડે નારાયણનારદસંવાદે શ્રીકૃષ્ણકૃતશંકરપ્રશંસા નામ ષટ્ત્રિંશોઽધ્યાયઃ