બ્રહ્મવૈવર્ત પુરાણ · અધ્યાય 4.30

॥ નારદ ઉવાચ ॥ ॥
મહામુને રહસ્યં ચ શ્રુતં બ્રહ્મન્કિમદ્ભુતમ્ ॥
મૃતે મુનૌ કિં ચકાર શ્રીકૃષ્ણો ભક્તવત્સલઃ

શ્રીનારાયણ ઉવાચ ॥
દૃષ્ટ્વા મૃતં મુનિં કૃષ્ણઃ સંસ્કારં કર્તુમુદ્યતઃ ॥
કૃત્વા વક્ષસિ તદ્દેહં રુરોદોચ્ચૈર્યથા નરઃ

બાહુભ્યાં ચ સમાશ્લિષ્ય પિપેષોદ્રિક્તમોહતઃ ॥
નિર્ગતં ભસ્મનિકરં શવાદ્વજ્રાંગઘર્ષણાત્

રક્તમાંસાસ્થિહીનં તચ્છરીરં ચ મહાત્મનઃ ॥
ષષ્ટિવર્ષસહસ્રાણિ નિરાહારઃ કૃતો મુને

દગ્ધં લોહિતમાંસાસ્થિ જ્વલતા જઠરાગ્નિના ॥
બાહ્યજ્ઞાનવિહીનસ્ય હરિપાદાબ્જચેતસઃ

ચિતાં ચન્દનકાષ્ઠેન નિર્માય મધુસૂદનઃ ॥
કૃત્વાઽગ્નિકાર્યં તત્રૈવ સ્થાપયામાસ શોકતઃ

દદૌ ચિતાયામગ્નિં ચ કાષ્ઠં દત્ત્વા શવોપરિ ॥
જ્વલિતાયાં ચિતા યાં ચ મૂર્ચ્છામાપ ક્ષણં વિભુઃ

તદ્દેહે ભસ્મસાદ્ભૂતે નેદુર્દુન્દુભયો દિવિ ॥
બભૂવ પુષ્પવૃષ્ટિશ્ચ તત્ક્ષણાદ્ગગનાદહો

એતસ્મિન્નન્તરે તત્ર રત્નસારવિનિર્મિતમ્ ॥
સ્યન્દનં ચ મનોયાયિ વસ્ત્રમાલ્યપરિચ્છદમ્

પાર્ષદપ્રવરૈર્યુક્તં શ્રીકૃષ્ણસદૃશૈર્વરૈઃ ॥
આવિર્બભૂવ ગોલોકાત્સુન્દરં પુરતો હરેઃ

અવરુહ્ય રથાત્તૂર્ણં પાર્ષદપ્રવરા હરેઃ ॥
સર્વે સમાનરૂપાસ્તે પ્રણમ્ય રાધિકેશ્વરૌ ૧૧ ॥
ધૃતવન્તં સૂક્ષ્મદેહં પ્રણમય્ય મુનીશ્વરમ્ ॥
રથે કૃત્વા તુ તં દેહં જમ્મુર્ગોલોકમુત્તમમ્

ગતે મુનીન્દ્રે ગોલોકં વૃન્દાવનવિનોદિની ॥
બભૂવ વિસ્મિતા સાધ્વી પપ્રચ્છ જગદીશ્વરમ્

શ્રીરાધિકોવાચ ॥
કોઽયં નાથ મુનિશ્રેષ્ઠઃ સર્વાવયવવ ક્રિમઃ ॥
અતિખર્વજનાકારસ્તેજીયાનતિકુત્સિતઃ

કથં વા નિર્ગતં ભસ્મ દેહાદસ્ય કિમદ્ભુતમ્ ॥
સાક્ષાદ્વિલીનં યત્તેજ સ્ત્વત્પાદાબ્જેઽનલોપમમ્

રથસ્થઃ પુણ્યવાન્સદ્યો ગોલકં ચ જગામ હ ॥
સ્વાત્મારામસ્ય યદ્ધેતો રોદનં તે બભૂવ હ

ત્વયા કૃતં ચ સત્કારમશ્રુપૂર્ણેન ચક્ષુષા ॥
સર્વં વિવરણં તૂર્ણં સંવ્યસ્ય કથય પ્રભો

રાધિકાવચનં શ્રુત્વા પ્રહસ્ય મધુસૂદનઃ
કથાં કથિતુમારેભે યુગાન્તરગતામપિ

શ્રીકૃષ્ણ ઉવાચ ॥
રહસ્યમષ્ટાવક્રીયં વિખ્યાતં સર્વતઃ પ્રિયે ॥
પશ્ચાચ્છ્રોષ્યસિ કાલેન પ્રસઙ્ગે વિદુષાં મુખાત્

અષ્ટાવક્રો મુનીન્દ્રોઽપિ વિખ્યાતો ભુવનત્રયે ॥
પરિપૂર્ણં યદ્યશસા જન્મના તજ્જગત્ત્રયમ્

કૃષ્ણસ્ય વચનં શ્રુત્વા વિમનસ્કા હરિપ્રિયા ॥
ઉવાચ મધુરં યત્નાચ્છુષ્કકણ્ઠોષ્ઠતાલુકા

રાધિકોવાચ ॥
યત્તૃષાલોર્મનઃ પૂર્ણ ન બભૂવ સુધામ્બુધૌ ॥
સ વિતૃપ્તો ભવતિ કિં ગોષ્પદોદકપાનતઃ

વેદાનાં વેદવક્તૄણાં વિધાતુર્જનકસ્ય ચ ॥
મહાવિષ્ણોરીશ્વરસ્ત્વં કોઽન્યો વક્તાઽસ્તિ ત્વત્પરઃ

રાધિકાવચનં શ્રુત્વા તુષ્ટઃ કૃષ્ણો બભૂવ હ ॥
ઉવાચ ગોપનીયં ચ રહસ્યં પરમાદ્ભુતમ્

શ્રીકૃષ્ણ ઉવાચ ॥
શૃણુ કાન્તે પ્રવક્ષ્યેઽહમિતિહાસં પુરાતનમ્ ॥
શ્રવણાત્કથનાદ્યસ્ય સર્વં પાપં પ્રણશ્યતિ

મહાવિષ્ણોર્નાભિપદ્માદ્બભૂવ જગતાં વિધિઃ ॥
મમાંશસ્ય મત્કલયા જલાકીર્ણે જગત્ત્રયે

પુત્રા બભૂવુશ્ચત્વારો બ્રહ્મણો માનસાત્પુરા ॥
નારાયણપરાઃ સર્વે જ્વલન્તો બ્રહ્મતેજસા

શિશવઃ પઞ્ચવર્ષીયા નગ્ના અજ્ઞાનિનો યથા ॥
બાહ્યજ્ઞાનવિહીનાશ્ચ બ્રહ્મતત્ત્વવિશારદાઃ

સનકશ્ચ સનન્દશ્ચ તૃતીયશ્ચ સનાતનઃ ॥
સનત્કુમારો ભગવાનેતે ચત્વાર એવ ચ

તાનુવાચ જગદ્ધાતા સૃષ્ટિં કુરુત પુત્રકાઃ ॥
તે ન તસ્થુઃ પિતુર્વાક્યે પ્રયયુસ્તપસે મમ

વિધાતા વિમનસ્કશ્ચ તનયેષુ ગતેષુ ચ ॥
પિતુર્દુઃખાય પ્રભવેત્પુત્રશ્ચેદવચસ્કરઃ

જ્ઞાનેન નિર્મમે પુત્રાન્સ્વાઙ્ગેષુ ચ તપોધનાન્ ॥
વેદવેદાઙ્ગવિજ્ઞાંશ્ચ જ્વલતો બ્રહ્મતેજસા

અત્રિઃ પુલસ્ત્યઃ પુલહો મરીચિર્ભૃગુરઙ્ગિરાઃ ॥
ક્રતુર્વસિષ્ઠો વોઢુશ્ચ કપિલશ્ચાસુરિઃ કવિઃ

શઙ્કુઃ શઙ્ખઃ પઞ્ચશિખઃ પ્રચેતાસ્તે તપોધનાઃ ॥
બહુકાલં તપસ્તપ્ત્વા ચક્રુઃ સૃષ્ટિં તદાજ્ઞયા

કલત્રવન્તસ્તે સર્વે સંસારં કર્તુમુ ન્મુખાઃ ॥
બભૂવુઃ પુત્રપૌત્રાશ્ચ સર્વેષાં ચ તપસ્વિનામ્

તદસ્તુ ચ કથા બહ્વી મુનિવંશાનુકીર્તની ॥
ચાર્વી પુણ્યસ્વરૂપા ચ પ્રકૃતં શૃણુ સુન્દરિ

પ્રચેતસઃ સુતઃ શ્રીમાનસિતો મુનિપુઙ્ગવઃ ॥
સકલત્રસ્તપસ્તેપે દિવ્યં વર્ષસહસ્રકમ્

ન બભૂવ સુતસ્તસ્ય પ્રાણાંસ્ત્યક્તું સમુદ્યતઃ ॥
તં સમ્બોદ્ધું બભૂવાથ સત્યા વાગશરીરિણી

કથં ત્યજસિ પ્રાણાંસ્ત્વં ગચ્છ શઙ્કરસન્નિધિમ્ ॥
સિદ્ધં કુરુ ગૃહીત્વા ચ મન્ત્રં શઙ્કરવક્ત્રતઃ

મન્ત્રાધિષ્ઠાતૃદેવીં તે સદ્યઃ સાક્ષાદ્ભવિષ્યતિ ॥
વરેણાભીષ્ટદેવ્યાશ્ચ પુત્રસ્તે ભવિતા ધુવમ્

શ્રુત્વૈતચ્ચરિતં વિપ્રો જગામ શિવસન્નિધિમ્ ॥
યોગિનામપ્યગમ્યં ચ શિવલોકં નિરામયમ્

સકલત્રો યથા યોગી તુષ્ટાવ યોગિનાં ગુરુમ્ ॥
પુટાઞ્જલિયુતો ભૂત્વા ભક્તિનમ્રાત્મકન્ધરઃ

અસિત ઉવાચ ॥
જગદ્ગુરો નમસ્તુભ્યં શિવાય શિવદાય ચ ॥
યોગીન્દ્રાણાં ચ યોગીન્દ્ર ગુરૂણાં ગુરવે નમઃ

મૃત્યોમૃર્ત્યુસ્વરૂપેણ મૃત્યુસંસારખણ્ડન॥
મૃત્યોરીશ મૃત્યુબીજ મૃત્યુઞ્જય નમોઽસ્તુ તે

કાલરૂપં કલયતાં કાલકાલેશ કારણ ॥
કાલાદતીત કાલસ્ય કાલકાલ નમોઽસ્તુ તે

ગુણાતીત ગુણાધાર ગુણબીજ ગુણાત્મક ॥
ગુણીશ ગુણિનાં બીજ ગુણિનાં ગુરવે નમઃ

બ્રહ્મસ્વરૂપ બ્રહ્મજ્ઞ બ્રહ્મભાવે ચ તત્પર ॥
બ્રહ્મબીજસ્વરૂપેણ બ્રહ્મબીજ નમોસ્તુ તે

ઇતિ સ્તુત્વા શિવં નત્વા પુરસ્તસ્થૌ મુનીશ્વરઃ ॥
દીનવત્સાશ્રુનેત્રશ્ચ પુલકાં ચિતવિગ્રહઃ

અસિતેન કૃતં સ્તોત્રં ભક્તિયુક્તશ્ચ યઃ પઠેત્ ॥
વર્ષમેકં હવિષ્યાશી શઙ્કરસ્ય મહાત્મનઃ

સ લભેદ્વૈ ષ્ણવં પુત્રં જ્ઞાનિનં ચિરજીવિનમ્ ॥
ભવેદનાઢ્યો દુઃખી ચ મૂકો ભવતિ પણ્ડિતઃ

અભાર્યો લભતે ભાર્યાં સુશીલાં ચ પતિવ્ર તામ્ ॥
ઇહ લોકે સુખં ભુક્ત્વા યાત્યન્તે શિવસન્નિધિમ્

ઇદં સ્તોત્રં પુરા દત્તં બ્રહ્મણા ચ પ્રચેતસે ॥
પ્રચેતસા સ્વપુત્રાયાસિતાય દત્તમુત્તમમ્

શ્રીકૃષ્ણ ઉવાચ ॥
સમાકર્ણ્ય મુનેઃ સ્તોત્રં ભગવાઞ્છંકરઃ સ્વયમ્ ॥
ઉવાચ બ્રહ્મણઃ પુત્રં સ્વભક્તં ભક્તવ ત્સલઃ

શંકર ઉવાચ ॥
સ્થિરો ભવ મુનિશ્રેષ્ઠ જાનામિ તવ વાઞ્છિતમ્ ॥
પુત્રસ્તે ભવિતા સત્યં મદંશેન ચ મત્સમઃ

દાસ્યામિ મન્ત્રમતુલં સર્વેષાં ચ સુદુર્લભમ્ ॥
ઇત્યુક્ત્વા ચ દદૌ મન્ત્રં તવૈવ ષોડશાક્ષરમ્

સ્તોત્રં પૂજાવિધાનં ચ કવચં પરમાદ્ભુતમ્ ॥
સંસારવિજયં નામ પુરશ્ચરણપૂર્વકમ્

વરં દાતુમિષ્ટદેવી પ્રત્યક્ષા ભવિતેતિ ચ ॥
ઇત્યુક્ત્વા વિરતો રુદ્રઃ સ તં નત્વા જગામ હ

જજાપ પરમં મન્ત્રં સોઽસિતઃ શતવત્સરમ્ ॥
સાક્ષાદ્ભૂત્વા વરસ્તસ્મૈ ત્વયા દત્તઃ પુરા સતિ

પુત્રસ્તે ભવિતા સત્યં મહાજ્ઞાની સુતેતિ ચ ॥
વરં દત્ત્વા ત્વમગમો ગોલોકં મમ સન્નિધિમ્

કાલેન ચ સુતસ્તસ્ય શિવાંશેન બભૂવ હ ॥
બ્રહ્મિષ્ઠો દેવલો નામ્ના કન્દર્પસમસુન્દરઃ

સુયજ્ઞનૃપતેઃ કન્યાં રત્નમાલાવતીં મુદા ॥
તાં સુન્દરીં વિવાહેન જગૃહે સર્વમોહિનીમ્

સ્થાને સ્થાને ચ રહસિ શતવર્ષં તયા સહ ॥
સ રેમે નિપુણઃ શ્રેષ્ઠઃ સ્ત્રીણાં રમણકર્મણિ

કાલાન્તરે સ વિરતો બભૂવ મુનિપુંગવઃ ॥
સુખં સર્વં પરિત્યજ્ય ધર્મિષ્ઠઃ શ્રીહરિં સ્મરન્

ઉત્થાય રાત્રૌ શયનાદ્વિરક્તશ્ચ તપોધનઃ ॥
સ યયૌ તપસે કાન્તે ગન્ધમાદનપર્વતે

નિદ્રાં ત્યક્ત્વા ચ તત્કાન્તા ન દૃષ્ટ્વા સ્વામિનં સતી ॥
વિલલાપ ભૃશં શોકાત્પ્રદગ્ધા વિરહાગ્નિના

ઉત્તિષ્ઠન્તી નિર્વિશન્તી રુરોદોચ્ચૈર્મુહુર્મુહુઃ ॥
તપ્તપાત્રે યથા ધાન્યં બભૂવ તન્મનસ્તદા

આહારં ચ પરિત્યજ્ય પ્રાણાંસ્તત્યાજ સુન્દરી ॥
ચકાર તત્સુતસ્તસ્યાઃ કર્મ નિર્હરણાદિકમ્

તપશ્ચકાર સ મુનિર્ગન્ધમાદનગહ્વરે ॥
દિવ્યં વર્ષસહસ્રં ચ મમ ભક્તો જિતેન્દ્રિયઃ

તં દદર્શ હ દૈવેન રમ્ભા શૃંગારલોલુપા॥
અતીવસુન્દરં શાન્તં કન્દર્પમિવ સુન્દરમ્

સા ચ તં કથયામાસ નિર્જને સમુપસ્થિતા ॥
વિધાય વેષં યત્નેન ત્રૈલોક્યચિત્તમોહિની

રમ્ભોવાચ ॥
નિબોધ સાધો મદ્વાક્યં કામિનીનાં મનોહરમ્ ॥
ત્યક્ત્વા કઠોરં રહસિ ભજ માં સુખદાયિકામ્

ત્વં વરેષુ વરઃ પૃથ્વ્યાં વરારોહા સ્વયંવરા ॥
વિદગ્ધાયા વિદગ્ધસ્ય દુર્લભો નવ સંગમઃ

યજ્ઞં કુર્વન્તિ ભૂપાલા ભારતે સ્વર્ગહેતુકમ્ ॥
સ્વર્ગભોગનિમિત્તં ચ ભોગસારા વયં મુને

સ્તનયોર્યુગ્મમૂર્વોર્મે સુન્દરં મુખપંકજમ્ ॥
હાસ્યભ્રૂભંગસહિતં દૃષ્ટ્વા કો ન લભેત્સુખમ્

સ્ત્રીરસઃ સુખસારશ્ચ મુનીનામભિવાઞ્છિતઃ ॥
રસિકાસુખસંભોગો નિર્જને ચાતિદુર્લભઃ

દેવો વા માનવો વાઽપિ ગન્ધર્વો વાઽથ રાક્ષસઃ ॥
સ્ત્રીસુખેષ્વપ્યવિજ્ઞેયો રમ્ભાયા રતિવઞ્ચિતઃ

રહસ્યુપસ્થિતાં કાન્તાં ન ભજેદ્યો જિતેન્દ્રિયઃ ॥
ગાત્રલોમપ્રમાણાબ્દં કુમ્ભીપાકે વસેદ્ધ્રુવમ્

સત્યં તસ્યાશ્ચ વધભાક્તચ્છાપેન પ્રણશ્યતિ ॥
વિધાતા મોહિનીશાપાદપૂજ્યો ભુવનત્રયે

યેન ત્યક્તોપસ્થિતા તં યથા પશ્યતિ પુંશ્ચલી ॥
સ્વામિપુત્રસ્વબન્ધૂનાં ન તથા ઘાતકં રુષા

પરં પ્રિયં ચ સર્વેષાં જારં જાનાતિ પુંશ્ચલી ॥
યદિ તેન પરિત્યક્તા તં હન્તું સા તુ દક્ષિણા

પુંશ્ચલી હિંસ્રજન્તુભ્યો નવઘાતિભ્ય એવ ચ॥
દુષ્ટા શશ્વદ્દયાહીના દુરન્તા પ્રતિજન્મનિ

ત્યજ ધ્યાનં મુનિશ્રેષ્ઠ ભુંક્ષ્વેદં તપસઃ ફલમ્ ॥
રહસ્યુપસ્થિતાં માં ચ ગૃહીત્વા સુચિરં સુખમ્

સ રમ્ભાવચનં શ્રુત્વા તામુવાચ ભયાકુલઃ ॥
હિતં તથ્યં નીતિસારં પરિણામસુખાવહમ્

દેવલ ઉવાચ ॥
શૃણુ રમ્ભે પ્રવક્ષ્યામિ વેદસારં પરં વચઃ ॥
કુલધર્મોચિતં સત્યં બ્રાહ્મણાનાં તપસ્વિનામ્

ધર્મોઽયં યુક્તકાલે ચ સ્વયોષિતિ રતો દ્વિજઃ ॥
સર્વત્ર પૂજિતઃ શશ્વદિહ લોકે પરત્ર ચ

બ્રાહ્મણઃ ક્ષત્રિયો વૈશ્યો યો રતઃ પરયોષિતિ ॥
યાતિ તસ્યાપૂજિતસ્ય રુષ્ટા લક્ષ્મીર્ગૃહાદપિ

ઇહાતિનિન્દ્યઃ સર્વત્ર નાધિકારી સ્વકર્મસુ ॥
પરત્રૈવાન્ધકૂપે ચ યાવદ્વર્ષશતં વસેત્ ।

ગ્રાહ્યા ચોપસ્થિતા સ્ત્રી ચ ગૃહિણા ન તપસ્વિના ॥
ત્યાગે દોષઃ કામિનીનાં શાપભાક્પાપભાગ્ગૃહી

બ્રહ્મા જગદ્વિધાતાઽપિ ન વિરક્તઃ કલત્રવાન્ ॥
ત્યાગે દોષસ્તત્કદાચિન્નાસ્માકં ત્યક્તયોષિતામ્

સ્વભાર્યાં ચ પરિત્યજ્ય યો ગૃહ્ણાતિ પરસ્ત્રિયમ્ ॥
યશોધનાયુષાં હાનિર્ભવેજ્જીવન્મૃતસ્ય ચ

ભુવિ નાસ્તિ યશો યસ્ય જીવનં તસ્ય નિષ્ફલમ્ ॥
સુસંપદા કિં રાજ્યેન સુખેન ચ તપસ્વિનઃ

નિષ્કામેન ચ વૃદ્ધેન મયા કિં તે પ્રયોજનમ્॥
સુવેષં સુન્દરં માતર્યુવાનં પશ્ય સુન્દરિ

ઇત્યેવં વચનં શ્રુત્વા ચુકોપાપ્સરસાં વરા ॥
ઉવાચ ભૂયો વાક્યં તં ત્રસ્તા પ્રસ્ફુરિતાધરા

રમ્ભોવાચ ॥
ચારુચમ્પકવર્ણાભઃ કન્દર્પસમસુન્દરઃ ॥
તપઃપ્રભાવાત્સશ્રીકઃ સુવેષઃ સંમતઃ સ્ત્રિયાઃ

ત્વયા વિનાઽન્યં કં યામિ કો વાસ્તિ ત્વત્પરઃ પુમાન્॥
પુંશ્ચલી ત્વાં પરિત્યજ્ય કા જીવતિ સ્મરા તુરા

શીઘ્રં માં ભજ વિપ્રેન્દ્ર દગ્ધાં કામાગ્નિના સદા ॥
કામો નશ્યતિ માં ત્વત્તો યથા રમ્ભાં મતંગજઃ

ન ચેચ્છાપં પ્રદાસ્યામિ વદ વેદવિદાં વર ॥
માં વા દારુણશાપં વા સત્વરં ગ્રહણં કુરુ

દગ્ધાઃ પ્રાણા મનોદગ્ધં સ્વાત્મા વા ઇતિ સંતતમ્॥
નવશૃઙ્ગારપીયૂષપાનનિર્વાણતાં વ્રજેત્

સ્વાન્તર્દુઃખેન દુઃખાર્તો યો યં શપતિ નિશ્ચિતમ્॥
તં શાપં ખણ્ડિતું શક્તો ન વિધાતા જગત્પતિઃ

દ્વિજો રમ્ભાવચઃ શ્રુત્વા બભૂવ ધ્યાનતત્પરઃ ॥
નોવાચ કિંચિન્મૌનસ્થઃ સા તં કોપાચ્છશાપ હ

હે વક્રચિત્ત તે વિપ્ર સર્વાવયવવક્રિમમ્ ॥
શરીરમઞ્જનાકારં રૂપયૌવનવર્જિતમ્

અતીવવિકૃતાકારં ત્રિષુ લોકેષુ ગર્હિતમ્ ॥
પુરાતનં તપો નષ્ટં સદ્યો ભવતુ નિશ્ચિતમ્

ઇત્યુક્ત્વા પુંશ્ચલી કામાત્કામલોકં જગામ હ ॥
અચિરેણ મુનીન્દ્રશ્ચ ન દદર્શ હરેઃ પદમ્

પદારવિન્દવિરહાત્સમુદ્વિગ્નો બભૂવ હ॥
સ્વાઙ્ગં ચ દૃષ્ટ્વા વિકૃતં પૂર્વપુણ્યવિવર્જિતમ્

કૃત્વાઽગ્નિકુણ્ડં શોકેન પ્રાણાંસ્ત્યક્તું સમુદ્યતઃ ॥
મયા દૃષ્ટો વરો દત્તો દિવ્યજ્ઞાનેન બોધિતઃ

આશ્વાસશ્ચ કૃતઃ પ્રીત્યા તતઃ શાન્તો બભૂવ હ ॥
અઙ્ગાન્યષ્ટૌ ચ વક્રાણિ દૃષ્ટ્વા તૂર્ણં મહામુનેઃ

અષ્ટાવક્રેતિ તન્નામ કૌતુકેન મયા કૃતમ્ ॥
મદ્વાક્યાન્મલયદ્રોણીમયમાગમ્ય સત્વરઃ

ષષ્ટિ વર્ષસહસ્રાણિ ચકાર પરમં તપઃ ॥
તપોઽવસાને મદ્ભક્તો મયા યુક્તઃ કૃતઃ પ્રિયે

સર્વસ્મિન્પ્રલયે નષ્ટે ન મદ્ભક્તઃ પ્રણશ્યતિ॥
સુચિરેણૈવ તપસા જ્વલતા જઠરાગ્નિના

ત્યક્તાહારસ્યાન્તરં ચ ભસ્મપૂર્ણં તતો મુનેઃ ॥
આગતં મલયદ્રોણીં મુનિહેતોર્મયા પ્રિયે

અષ્ટાવક્રાચ્ચ મદ્ભક્તો ન ભૂતો ન ભવિષ્યતિ ॥
એવંભૂતસ્તપોનિષ્ઠઃ પ્રપૌત્રો બ્રહ્મણો મુનિઃ

નિષ્કલઃ પુંશ્ચલી શાપાદ્બ્રહ્માઽપૂજ્યો યથા પુરા ॥
ઇત્યેવં કથિતં સર્વં રહસ્યં ચ મહાત્મનઃ ॥
સુખદં પુણ્યદં ગૂઢં કિં ભૂયઃ શ્રોતુમિચ્છસિ

ઇતિ શ્રીબ્રહ્મવૈવર્તે મહાપુરાણે શ્રીકૃષ્ણજન્મખણ્ડે નારાયણનારદસંવાદે રાધાપ્રશ્ને ત્રિંશત્તમોઽધ્યાયઃ ॥ ૩૦