બ્રહ્મવૈવર્ત પુરાણ · અધ્યાય 4.3

॥ શ્રીનારાયણ ઉવાચ ॥ ॥
રાધા રતિગૃહં ગત્વા ન દદર્શ હરિં મુને ॥
વિરજાં ચ સરિદૂપાં દૃષ્ટ્વા ગેહં જગામ સા

શ્રીકૃષ્ણો વિરજાં દૃષ્ટ્વા સરિદ્રૂપાં પ્રિયાં સતીમ્ ॥
ઉચ્ચૈ રુરોદ વિરજાતીરે નીરમનોહરે

મમાંતિકં સમાગચ્છ પ્રેયસીનાં પરે વરે ॥
ત્વયા વિનાઽહં સુભગે કથં જીવામિ સુંદરિ

નદ્યધિષ્ઠાત્રિ દેવિ ત્વં ભવ મૂર્તિમતી સતી ॥
મમાશિષા રૂપવતી સુંદરી યોષિતા વરા

પૂર્વરૂપાચ્ચ સૌભાગ્યાદિદાનીં સુભગા ભવ ॥
પુરાતનં શરીરં તે સરિદૂપમભૂત્સતિ

જલાદુત્થાય ચાગચ્છ વિધાય તનુમુત્તમામ્॥
અષ્ટૌ સિદ્ધીર્મયા દત્તાઃ સુરસુંદરિ સત્વરમ્

કૃષ્ણાજ્ઞયા ચ વિરજા વિધાય તનુમુત્તમામ્ ॥
આજગામ હરેરગ્રે સાક્ષાદ્રાધેવ સુંદરી

પીતવસ્ત્રપરીધાના સ્મેરાનનસરોરુહા ॥
પશ્યંતં પ્રાણનાથં ચ પશ્યંતી વક્રચક્ષુષા

નિતંબશ્રોણિભારાર્તા પીનોન્નતપયોધરા ॥
માનિની માનિનીનાં ચ ગજેંદ્રમંદગામિની

સુંદરી સુદરીણાં ચ ધન્યા માન્યા ચ યોષિતામ્ ॥
ચારુચંપકવર્ણાભા પક્વબિંબાધરા વરા

પક્વ દાડિમબીજાભદંતપંક્તિમનોહરા ॥
શરત્પાર્વણચંદ્રાસ્યા ફુલ્લેંદીવરલોચના

કસ્તૂરીબિંદુના સાર્ધં સિંદૂરબિંદુભૂષિતા ॥
ચારુપત્રક શોભાઢ્યા સુચારુકબરીયુતા

રત્નકુંડલગંડસ્થા ભૂષિતા રત્નમાલયા ॥
ગજમૌક્તિકનાસાગ્રા મુક્તાહારવિરાજિતા

રત્નકંકણકેયૂરચારુશંખકરોજ્જ્વલા ॥
કિંકિણીજાલશબ્દાઢ્યા રત્નમંજીરરંજિતા

તાં ચ રૂપવતીં દૃષ્ટ્વા પ્રેમોદ્રેકા જગત્પતિઃ ॥
ચકારાલિંગનં તૂર્ણં ચુચુંબ ચ મુહુર્મુહુઃ

નાનાપ્રકારશૃંગારં વિપરીતાદિકં વિભુઃ ॥
રહસિ પ્રેયસીં પ્રાપ્ય ચકાર ચ પુનઃ પુનઃ

વિરજા સા રજોયુક્તા ધૃત્વા વીર્યમમોઘકમ્ ॥
સદ્યો બભૂવ તત્રૈવ ધન્યા ગર્ભવતી સતી

દધાર ગર્ભમીશસ્ય દિવ્યં વર્ષશતં ચ સા ॥
તતઃ સુષાવ તત્રૈવ પુત્રાન્સપ્ત મનોહરાન્

માતા સા સપ્તપુત્રાણાં શ્રીકૃષ્ણસ્ય પ્રિયા સતી ॥
તસ્થૌ તત્ર સુખાસીના સાર્દ્ધં પુત્રૈશ્ચ સપ્તભિઃ

એકદા હરિણા સાર્દ્ધં વૃંદારણ્યે ચ નિર્જને ॥
વિજહાર પુનઃ સાધ્વી શૃંગારાસક્તમાનસા

એતસ્મિન્નંતરે તત્ર માતુઃ ક્રોડં જગામ હ ॥
કનિષ્ઠપુત્રસ્તસ્યાશ્ચ ભ્રાતૃભિઃ પીડિતો ભિયા

ભીતં સ્વતનયં દૃષ્ટ્વા તત્યાજ તાં કૃપાનિધિઃ ॥
ક્રોડે ચકાર બાલં સા કૃષ્ણો રાધાગૃહં યયૌ

પ્રબોધ્ય બાલં સા સાધ્વી ન દદર્શાંતિકે પ્રિયમ્ ॥
વિલલાપ ભૃશં તત્ર શૃંગારાતૃપ્તમાનસા

શશાપ સ્વસુતં કોપાલ્લવણોદો ભવિષ્યસિ॥
કદાઽપિ તે જલં કેચિન્ન ખાદિષ્યંતિ જીવિનઃ

શશાપ બાલાન્સર્વાંશ્ચ યાંતુ મૂઢા મહીતલમ્ ॥
ગચ્છધ્વં ચ મહીં મૂઢા જંબુદ્વીપં મનોહરમ્

સ્થિતિર્નૈકત્ર યુષ્માકં ભવિષ્યતિ પૃથક્પૃથક્ ॥
દ્વીપે દ્વીપે સ્થિતિં કૃત્વા તિષ્ઠંતુ સુખિનઃ સદા

દ્વીપસ્થાભિર્નદીભિશ્ચ સહ ક્રીડંતુ નિર્જને ॥
કનિષ્ઠો માતૃશાપાચ્ચ લવણોદો બભૂવ હ

કનિષ્ઠઃ કથયામાસ માતૃશાપં ચ બાલકાન્ ॥
આજગ્મુર્દુઃખિતાઃ સર્વે માતૃસ્થાને ચ બાલકાઃ

શ્રુત્વા વિવરણં સર્વે પ્રજગ્મુર્ધરણીતલમ્ ॥
પ્રણમ્ય ચરણં માતુર્ભક્તિનમ્રાત્મમૂર્તયઃ

સપ્તદ્વીપસમુદ્રાશ્ચ સપ્ત તસ્થુર્વિભાગશઃ ॥
કનિષ્ઠાદ્વૃદ્ધપર્યંતં દ્વિગુણં દ્વિગુણં મુને

લવણેક્ષુસુરા સર્પિર્દધિદુગ્ધજલાર્ણવાઃ ॥
એતેષાં ચ જલં પૃથ્વ્યાં સસ્યાર્થં ચ ભવિષ્યતિ

વ્યાપ્તાઃ સમુદ્રાઃ સપ્તૈવ સપ્તદ્વીપાં વસુંધરામ્ ॥
રુરુદુર્બાલકાઃ સર્વે માતૃભ્રાતૃશુચાઽન્વિતાઃ

રુરોદ ચ ભૃશં સાધ્વી પુત્રવિચ્છેદકાતરા ॥
મૂર્ચ્છામવાપ શોકેન પુત્રાણાં ભર્તુરેવ ચ

તાં શોકસાગરે મગ્નાં વિજ્ઞાય રાધિકાપતિઃ ॥
આજગામ પુનસ્તસ્યાઃ સ્મેરાનનસરોરુહઃ

દૃષ્ટ્વા હરિં સા તત્યાજ શોકં રોદનમેવ ચ ॥
આનન્દસાગરે મગ્ના દૃષ્ટ્વા કાંતં બભૂવ હ

ચકાર શ્રીહરિં ક્રોડે વિજહાર સ્મરાતુરા ॥
તાં ચ પુત્ર પરિત્યક્તાં હરિસ્તુષ્ટો બભૂવ હ

વરં તસ્યૈ દદૌ પ્રીત્યા પ્રસન્નવદનેક્ષણઃ ॥
કાંતે નિત્યં તવ સ્થાનમાગમિષ્યામિ નિશ્ચિતમ્

યથા રાધા તત્સમા ત્વં ભવિષ્યસિ પ્રિયા મમ ॥
પુત્રાન્દ્રક્ષ્યસિ નિત્યં ત્વં મદ્વરસ્ય પ્રસાદતઃ

ઇત્યુક્તવંતં શ્રીકૃષ્ણં વસંતં વિરજાંતિકે ॥
દૃષ્ટ્વા રાધાવયસ્યાશ્ચ કથયામાસુરીશ્વરીમ્

શ્રુત્વા રુરોષ સા દેવી સુષ્વાપ ક્રોધમંદિરે ॥
એતસ્મિન્નંતરે કૃષ્ણો જગામ રાધિકાંતિકમ્

સ તસ્થૌ રાધિકાદ્વારે શ્રીદામ્ના સહ નારદ ॥
રાસેશ્વરી હરિં દૃષ્ટ્વા રુષ્ટોવાચ પ્રિયં પુરઃ

મત્તો બહુતરાઃ કાંતા ગોલોકે સંતિ તે હરે ॥
યાહિ તાસાં સન્નિધાનં મયા તે કિં પ્રયોજનમ્

વિરજા પ્રેયસી કાંતા સરિદ્રૂપા બભૂવ હ ॥
દેહં ત્યક્ત્વા મમ ભયાત્તથાઽપિ યાહિ તાં પ્રતિ

તત્તીરે મંદિરં કૃત્વા તિષ્ઠ તિષ્ઠ ચ યાહિ તામ્॥
નદી બભૂવ સા ત્વં ચ નદો ભવિતુમર્હસિ

નદસ્ય નદ્યા સાર્દ્ધં ચ સંગમો ગુણવાન્ભવેત્ ॥
સ્વજાતૌ પરમા પ્રીતિઃ શયને ભોજને સુખાત્

દેવચૂડામણેઃ ક્રીડા નદ્યા સાર્દ્ધમહો બત ॥
મહાજનઃ સ્મેરમુખઃ શ્રુત્વા સદ્યો ભવિષ્યતિ

યે ત્વાં વદંતિ સર્વેશં તે કિં જાનંતિ તત્ત્વતઃ ॥
ભગવાન્સર્વભૂતાત્મા નદીં સંભોક્તુમિચ્છતિ

ઇત્યુક્ત્વા રાધિકા દેવી વિરરામ રુષાઽન્વિતા ॥
નોત્તસ્થૌ ભૂમિશયનાદ્ગોપીલક્ષસમન્વિતા

કાશ્ચિચ્ચામરહસ્તાશ્ચ કાશ્ચિત્સૂક્ષ્માંશુકાંબરાઃ ॥
કાશ્ચિત્તાંબૂલહસ્તાશ્ચ કાશ્ચિન્માલાકરા વરાઃ

વાસિતોદકરાઃ કાશ્ચિત્કાશ્ચિત્પદ્મકરા વરાઃ ॥
કાશ્ચિત્સિંદૂરહસ્તાશ્ચ પાનહસ્તાશ્ચ કાશ્ચન

રત્નાલંકારહસ્તાશ્ચ કાશ્ચિત્કજ્જલવાહિકાઃ ॥
વેણુવીણાકરાઃ કાશ્ચિત્કાશ્ચિત્કંકતિકાકરાઃ

કાશ્ચિદાવીરહસ્તાશ્ચ યંત્રહસ્તાશ્ચ કાશ્ચન ॥
સુગંધિતૈલહસ્તાશ્ચ કાશ્ચન પ્રમદોત્તમાઃ

કરતાલકરાઃ કાશ્ચિદ્ગેંદુહસ્તાશ્ચ કાશ્ચન ॥
કાશ્ચિન્મૃદંગમુરજમુરલીતાનકારિકાઃ

સંગીતનિપુણાઃ કાશ્ચિત્કાશ્ચિન્નર્તનતત્પરાઃ ॥
ક્રીડાવસ્તુકરાઃ કાશ્ચિન્મધુહસ્તાશ્ચ કાશ્ચન

સુધાપાત્રકરાઃ કાશ્ચિદંઘ્રિપીઠકરાઃ પરાઃ ॥
વેષવસ્તુકરાઃ કાશ્ચિત્કાશ્ચિચ્ચરણસેવિકાઃ

પુટાંજલિકરાઃ કાશ્ચિત્કાશ્ચિત્સ્તુતિપરા વરાઃ ॥
એવં કતિવિધાઃ સંતિ રાધિકાપુરતો મુને

બહિર્દેશસ્થિતાઃ કાશ્ચિત્કોટિશઃ કોટિશઃ સદા ॥
કાશ્ચિદ્દ્વારનિયુક્તાશ્ચ વયસ્યા વેત્રધારિકાઃ

કૃષ્ણમભ્યંતરં ગંતું ન દદુર્દ્વારસંસ્થિતાઃ ॥
પુરઃસ્થિતં તં પ્રાણેશં રાધા પુનરુવાચ સા ॥
નાનુરૂપમત્યકથ્યયમયોગ્યમતિકર્કશમ્

॥ રાધિકોવાચ ॥
હે કૃષ્ણ વિરજાકાંત ગચ્છ મત્પુરતો હરે ॥
કથં દુનોષિ માં લોલ રતિચૌરાતિલંપટ

શીઘ્રં પદ્માવતીં ગચ્છ રત્નમાલાં મનોરમામ્ ॥
અથવા વનમાલાં વા રૂપેણાપ્રતિમાં વ્રજ

હે નદીકાંત દેવેશ દેવાનાં ચ ગુરોર્ગુરો ॥
મયા જ્ઞાતોઽસિ ભદ્રં તે ગચ્છ ગચ્છ મમાશ્રમાત્

શશ્વત્તે માનુષાણાં ચ વ્યવહારસ્ય લંપટ ॥
લભતાં માનુષીં યોનિં ગોલોકાદ્વ્રજ ભારતમ્

હે સુશીલે શશિકલે હે પદ્માવતિ માધવિ ॥
નિવાર્યતાં ચ ધૂર્તોઽયં કિંમસ્યાત્ર પ્રયોજનમ્

રાધિકાવચનં શ્રુત્વા તમૂચુર્ગોપિકા હરિમ્ ॥
હિતં તથ્યં ચ વિનયં સારં યત્સમયોચિતમ્

કાશ્ચિદૂચુરિતિ હરે ગચ્છ સ્થાનાંતરં ક્ષણમ્ ॥
રાધાકોપાપનયને હ્યાગમિષ્યામહે વયમ્

કાશ્ચિદૂચુરિતિ પ્રીત્યા ક્ષણં ગચ્છ ગૃહાંતરમ્ ॥
ત્વયૈવ વર્ધિતા રાધા ત્વાં વિના કં ચ વક્ષ્યતિ

કાશ્ચિદૂચુરિતિ પ્રેમ્ણા રાધિકાયાં હરિં મુને ॥
ક્ષણં વૃંદાવનં ગચ્છ માનાપનયનાવધિ

કાશ્ચિદિત્યૂચુરીશં ચ પરિહાસપરં વચઃ ॥
માનાપનયનં ભક્ત્યા માનિન્યાઃ કુરુ કામુક

કાશ્ચનોચુરિતીશં તં યાહિ જાયાંતરં તવ ॥
લોલુપસ્ય કથં નાથ કરિષ્યામો યથોચિતમ્

કાશ્ચનોચુરિતિ હરિં સસ્મિતં પુરતઃ સ્થિતમ્ ॥
ગત્વા સમીપમુત્થાય માનાપનયનં કુરુ

કાશ્ચનોચુરિતિ પ્રાણનાથં ગોપ્યો દુરક્ષરમ્ ॥
કઃ ક્ષમઃ સાંપ્રતં દ્રષ્ટં રાધિકામુખપંકજમ્

કાશ્ચનોચુરિતિ વિભું વ્રજ સ્થાનાંતરં હરે ॥
કોપાપનયને કાલે પુનરાગમનં તવ

કાશ્ચનોચુરિતીદં તં પ્રગલ્ભાઃ પ્રમદોત્તમાઃ ॥
વયં ત્વાં દારયિષ્યામો ન ચેદ્યાહિ ગૃહાંતરમ્

કાશ્ચિન્નિવારયામાસુર્માધવં પ્રમદોત્તમાઃ ॥
સ્મિતવક્ત્રં ચ સર્વેશં સ્વસ્થમક્રોધમીશ્વરમ્

ગોપીર્ભિર્વાર્યમાણે ચ જગત્કારણકારણે ॥
સદ્યશ્ચુકોપ શ્રીદામા હરૌ ગેહાંતરં ગતે

કોપાદુવાચ શ્રીદામા રાધિકાં પરમેશ્વરીમ્ ॥
રક્તપદ્મેક્ષણાં રુષ્ટાં રક્તપંકજલોચનામ્

॥ શ્રીદામોવાચ ॥ ॥
કથં વદસિ માતસ્ત્વં કટુવાક્યં મદીશ્વરમ્ ॥
વિચારણાં વિના દેવિ કરોષિ ભર્ત્સનં વૃથા

બ્રહ્માનંતેશદેવેશં જગત્કારણકારણમ્ ॥
વાણીપદ્માલયામાયાપ્રકૃતીશં ચ નિર્ગુણમ્

સ્વાત્મારામં પૂર્ણકામં કરોષિ ત્વં વિડંબનમ્ ॥
દેવીનાં પ્રવરા ત્વં ચ નિબોધ યસ્ય સેવયા

યસ્ય પાદાર્ચનેનૈવ સર્વેષામીશ્વરી પરા ॥
તન્ન જાનાસિ કલ્યાણિ કિમહં વક્તુમીશ્વરઃ

ભ્રૂભંગલીલયા કૃષ્ણઃ સ્રષ્ટું શક્તશ્ચ ત્વદ્વિધાઃ ॥
કોટિશઃ કોટિશો દેવ્યસ્તં ન જાનાસિ નિર્ગુણમ્

વૈકુંઠે શ્રીહરેરસ્ય ચરણાંબુજમાર્જનમ્ ॥
કરોતિ કેશૈઃ શશ્વચ્છ્રીઃ સેવનં ભક્તિપૂર્વકમ્

સરસ્વતી ચ સ્તવનૈઃ કર્ણપીયૂષસુંદરૈઃ ॥
સતતં સ્તૌતિ યં ભક્ત્યા ન જાનાસિ તમીશ્વરમ્

ભીતા ચ પ્રકૃતિર્માયા સર્વેષાં બીજરૂપિણી ॥
સતતં સ્તૌતિ યં ભક્ત્યા તં ન જાનાસિ માનિનિ

સ્તુવંતિ સતતં વેદા મહિમ્નઃ ષોડશીં કલામ્ ॥
કદાપિ ન વિજાનંતિ તં ન જાનાસિ ભામિનિ

વક્ત્રૈશ્ચતુર્ભિર્યં બ્રહ્મા વેદાનાં જનકો વિભુઃ ॥
સ્તૌતિ સેવાં ચ કુરુતે ચરણાંબુજમીશ્વરિ

શંકરઃ પંચભિર્વક્ત્રૈઃ સ્તૌતિ યં યોગિનાં ગુરુઃ ॥
સાશ્રુપૂર્ણઃ સપુલકઃ સેવતે ચરણાંબુજમ્

શેષઃ સહસ્રવદનૈઃ પરમાત્માનમીશ્વરમ્ ॥
સતતં સ્તૌતિ યં ભક્ત્યા સેવતે ચરણાંબુજમ્

ધર્મઃપાતા ચ સર્વેષાં સાક્ષી ચ જગતાં પતિઃ ॥
ભક્ત્યા ચ ચરણાંભોજં સેવતે સતતં મુદા

શ્વેતદ્વીપનિવાસી યઃ પાતા વિષ્ણુઃ સ્વયં વિભુઃ ॥
તસ્યાંશશ્ચ તથા યં યં ધાર્યતેઽપ્યક્ષરં પરમ્

સુરાસુરમુનીંદ્રાશ્ચ મનવો માનવા બુધાઃ ॥
સેવંતે ન હિ પશ્યંતિ સ્વપ્નેઽપિ ચરણાંબુજમ્

ક્ષિપ્રં રોષં પરિત્યજ્ય ભજ પાદાંબુજં હરેઃ॥
ભ્રૂભંગલીલામાત્રેણ સૃષ્ટિસંહર્તુરેવ ચ

નિમેષમાત્રાદસ્યૈવ બ્રહ્મણઃ પતનં ભવેત્ ॥
યસ્યૈકદિવસેઽપ્યષ્ટાવિંશતીંદ્રાઃ પતંત્યપિ

એવમષ્ટોત્તરશતમાયુર્યસ્ય જગદ્વિધેઃ ॥
ત્વં વા કાઽન્યાશ્ચ વા રાધે મદીશ્વરવશેઽખિલમ્

શ્રીદામ્નો વચનં શ્રુત્વા કેવલં કટુમુજ્જ્વલમ્ ॥
સદ્યશ્ચુકોપ સા બ્રહ્મન્સદ્યઃ પ્રાણેશ્વરી હરેઃ

રાસેશ્વરી બહિર્ગત્વા તમુવાચ હ નિષ્ઠુરમ્ ॥
સ્ફુરદોષ્ઠી મુક્તકેશી રક્તાંભોરુહલોચના

॥
રાધિકોવાચ ॥
રેરે જાલ્મ મહામૂઢ શૃણુ લ૆પટકિંકર ॥
ત્વં ચ જાનાસિ સર્વાર્થં ન જાનામિ ત્વદીશ્વરમ્

ત્વદીશ્વરશ્ચ શ્રીકૃષ્ણો ન હ્યસ્માકં વ્રજાધમ ॥
જાનામિ જનકં સ્તૌષિ સદા નિંદસિ માતરમ્

યથાઽસુરાશ્ચ ત્રિદશા નિત્યં નિંદંતિ સંતતમ્ ॥
તથા નિંદસિ માં મૂઢ તસ્માત્ત્વમસુરો ભવ

ગોપ વ્રજાસુરીં યોનિં ગોલોકાચ્ચ બહિર્ભવ ॥
મયાઽદ્ય શપ્તો મૂઢસ્ત્વં કસ્ત્વાં રક્ષિતુમીશ્વરઃ

રાસેશ્વરી તમિત્યુક્ત્વા સુષ્વાપ વિરરામ ચ ॥
વયસ્યાઃ સેવયામાસુશ્ચામરૈ રત્નમુષ્ટિભિઃ

શ્રુત્વા ચ વચનં તસ્યાઃ કોપેન સ્ફુરિતાધરઃ ॥
શશાપ તાં ચ શ્રીદામા વ્રજ યોનિં ચ માનુષીમ્ ॥
શ્રીદામોવાચ ॥ ॥
માનુષ્યા ઇવ કોપસ્તે તસ્માત્ત્વં માનુષી ભુવિ

ભવિષ્યસિ ન સંદેહો મયા શપ્તા ત્વમંબિકે ॥
છાયયા કલયા વાઽપિ પરશક્ત્યા કલંકિના

મૂઢા રાપાણપત્ની ત્વાં વક્ષ્યતિ જગતીતલે ॥
રાપાણઃ શ્રીહરેરંશો વૈશ્યો વૃંદાવને વને

ભવિષ્યતિ મહાયોગી રાધાશાપેન ગર્ભજઃ ॥
ગોકુલે પ્રાપ્ય તં કૃષ્ણં વિહરિષ્યસિ કાનને

ભવિતા તે વર્ષશતં વિચ્છેદો હરિણા સહ ॥
પુનઃ પ્રાપ્ય તમીશં ચ ગોલોકમાગમિષ્યસિ

તામિત્યુક્ત્વા ચ નત્વા ચ સ જગામ હરેઃ પુરઃ ॥
ગત્વા પ્રણમ્ય શ્રીકૃષ્ણં શાપાખ્યાનમુવાચ હ

આનુપૂર્વ્યાત્તુ તત્સર્વં રુરોદ ચ ભૃશં પુનઃ ॥
ઉવાચ તં રુદંતં ચ ગચ્છધ્વં ધરણીતલમ્

ન જેતા તે ત્રિભુવને હ્યસુરેંદ્રો ભવિષ્યસિ ॥
કાલે શંકરશૂલેન દેહં ત્યક્ત્વા મમાંતિકમ્

આગમિષ્યસિ પંચાશદ્યુગાંતે તુ મમાશિષા ॥
શ્રીકૃષ્ણસ્ય વચઃ શ્રુત્વા તમુવાચ શુચાઽન્વિતઃ

ત્વદ્ભક્તિરહિતં માં ચ કદાચિન્ન કરિષ્યસિ ॥
ઇત્યુક્ત્વા શ્રીહરિં નત્વા જગામ સ્વાશ્રમાદ્બહિઃ

પશ્ચાજ્જગામ સા દેવી રુરોદ ચ પુનઃપુનઃ ॥
ક્વ યાસિ વત્સેત્યુચ્ચાર્ય વિલલાપ ભૃશં સતી

શ્રીદામાઽપિ ચ તાં નત્વા રુરોદ પ્રેમવિહ્વલઃ ॥
સ એવ શંખચૂડશ્ચ બભૂવ તુલસીપતિઃ

ગતે શ્રીદામ્નિ સા દેવી જગામેશ્વરસન્નિધિમ્ ॥
સર્વં નિવેદયામાસ હરિઃ પ્રત્યુત્તરં દદૌ

શોકાતુરાં ચ તાં કૃષ્ણો બોધયામાસ પ્રેયસીમ્ ॥
શંખચૂડશ્ચ કાલેન સંપ્રાપ પુનરીશ્વરમ્

રાધા જગામ ધરણીં વારાહે હરિણા સહ ॥
વૃષભાનુગૃહે જન્મ લલાભ ગોકુલે મુને

ઇત્યેવં કથિતં સર્વં શ્રીકૃષ્ણાખ્યાનમંગલમ્ ॥
સર્વેષાં વાંછિતં સારં કિં ભૂયઃ શ્રોતુમિચ્છસિ

ઇતિ શ્રીબ્રહ્મવૈવર્તે મહાપુરાણે શ્રીકૃષ્ણજન્મખંડે નારાયણનારદસંવાદે સપ્તસમુદ્રજન્મ રાધાશ્રીદામશાપોદ્ભવો નામ તૃતીયોઽધ્યાયઃ