બ્રહ્મવૈવર્ત પુરાણ · અધ્યાય 2.61

નારદ ઉવાચ ॥
તતઃ પરં કિં રહસ્યં બભૂવાસુરદેવયોઃ ॥
શ્રોતુમિચ્છામિ ભગવન્પરં કૌતૂહલં મમ

નારાયણ ઉવાચ ॥
બ્રહ્મા જગામ નિલયં શુક્રસ્ય ચ મહાત્મનઃ ॥
નાનાદૈત્યગણાકીર્ણં રત્નમણ્ડપભૂષિતમ્

પઞ્ચાશત્કોટિભિઃ શિષ્યૈઃ પરીતં બ્રહ્મવાદિભિઃ ॥
સપ્તભિઃ પરિખાભિશ્ચ વેષ્ટિતં દુર્ગમેવ ચ

રક્ષિતં રક્ષકગણૈર્દૈત્યૈશ્ચ શતકોટિભિઃ ॥
પદ્મરાગૈર્વિરચિતૈઃ પ્રાવારૈઃ પરિશોભિતમ્

દદર્શ જગતાં ધાતા સભાયાં ભૃગુનન્દનમ્ ॥
સ્તુતં મુનિગણૈર્દૈત્યૈ રત્નસિંહાસનસ્થિતમ્

જપન્તં પરમં બ્રહ્મ કૃષ્ણમાત્માનમીશ્વરમ્ ॥
કોટિસૂર્ય્યપ્રભં શશ્વજ્જ્વલન્તં બ્રહ્મતેજસા

દૃષ્ટ્વા પૌત્રં પ્રભાયુક્તં વિધાતા હૃષ્ટમાનસઃ ॥
આત્માનં કૃતિનં મેને પુત્રં પૌત્રં ચ નારદ

દૃષ્ટ્વા પિતામહં શુક્રો ધાતારં જગતાં પ્રભુમ્ ॥
ઉત્થાય સહસા ભીતઃ પ્રણનામ કૃતાઞ્જલિઃ

આદાય પૂજયામાસ ચોપચારાંસ્તુ ષોડશ ॥
તુષ્ટાવ પરયા ભક્ત્યા સમ્ભ્રમેણ યથાગમમ્

વિદ્યા મન્ત્રપ્રદાતારં દાતારં સર્વસમ્પદામ્ ॥
સ્વકર્મણાં ચ ફલદં સર્વેષાં વિશ્વતો વરમ્ ।2.61.૧૦॥
શુક્રસ્ય સ્તવનેનૈવ સન્તુષ્ટો જગતાં પતિઃ॥
અવરુહ્ય રથાત્તૂર્ણમવસત્તત્ર સંસદિ

શુક્રેણ શિરસા દત્તરત્નસિંહાસને વરે॥
તેજસા જ્વલિતે રમ્યે નિર્મિતે વિશ્વકર્મણા॥

શુક્રઃ પ્રણમ્ય બ્રહ્માણં કુમારં શકુનં ક્રતુમ્ ॥
વસિષ્ઠં ચ મરીચિં ચ સનન્દં ચ સનાતનમ્

કપિલં વૈ પઞ્ચશિખં વોઢુમંગિરસં મુને ॥
ધર્મં માં ચ નરં ભક્ત્યા પ્રણનામ કૃતાઞ્જલિઃ

પ્રત્યેકં પૂજયામાસ સાદરં ચ યથોચિતમ્ ॥
સિંહાસનેષુ રત્નેષુ વાસયામાસ ધાર્મિકઃ

પ્રહૃષ્ટવદનાઃ સર્વે પ્રણેમુર્દિતિનન્દનાઃ ॥
ઋષિસંઘાશ્ચ ધાતારં તુષ્ટુવુશ્ચ યથાગમમ્

સર્વાન્સંસ્તૂય સ કવિરવોચત્સમ્પુટાઞ્જલિઃ ॥
સાશ્રુનેત્રઃ સપુલકઃ પ્રણતો વિનયાન્વિતઃ

શુક્ર ઉવાચ ॥
અદ્ય મે સફલં જન્મ જીવિતં ચ સુજીવિતમ્ ॥
સ્વયં વિધાતા ભગવાન્સાક્ષાદ્દૃષ્ટઃ સ્વમન્દિરે

સાક્ષાદ્દૃષ્ટાશ્ચ તત્પુત્રા ભગવન્તઃ સનાતનાઃ ॥
તુષ્ટઃ કૃષ્ણોઽથ મામેવં પરમાત્મા પરાત્પરઃ

કૃતાર્થં કર્તુમીશા માં યુષ્માકં સ્વાગતં શિશુમ્ ॥
સ્વાત્મારામેષુ કુશલપ્રશ્નમેવં વિડમ્બનમ્

પવિત્રં કર્તુમીશા માં હેતુરાગમનેઽત્ર વઃ ॥
અપરં બ્રૂથ કિં વાઽપિ શાસ્ત નઃ કરવામિ કિમ્

બ્રહ્મોવાચ ॥
ઉદ્વિગ્નશ્ચિરવિચ્છેદાત્ત્વાં પૌત્રં દ્રષ્ટુમાગતઃ ॥
વિચ્છેદઃ પુત્રપૌત્રાણાં મરણાદતિરિચ્યતે

કુશલં તે મુનિશ્રેષ્ઠ પુત્રયોશ્ચાપિ યોષિતઃ ॥
કુશલં તે સ્વધર્માણાં કામ્યાનાં તપસામપિ

દિને દિનેઽપરિચ્છન્નં શ્રીકૃષ્ણાર્ચનમીપ્સિતમ્ ॥
સ્વ ગુરોઃ સેવનં નિત્યમવિચ્છિન્નં ભવેત્તવ

ગુર્વિષ્ટયોઃ પૂજનં ચ સર્વમઙ્ગલકારણમ્ ॥
પાપાધિરોગશોકઘ્નં પુણ્યહર્ષપ્રદં શુભમ્॥

અભીષ્ટદેવઃ સન્તુષ્ટો ગુરૌ તુષ્ટે નૃણામિહ ॥
ઇષ્ટદેવે ચ સન્તુષ્ટે સન્તુષ્ટાઃ સર્વદેવતાઃ

ગુરુર્વિપ્રઃ સુરો રુષ્ટો યેષાં પાતકિનામિહ ॥
તેષાં ચ કુશલં નાસ્તિ વિઘ્નસ્તસ્ય પદે પદે

તુષ્ટશ્ચ સતતં વત્સ શ્રીકૃષ્ણઃ પ્રકૃતેઃ પરઃ ॥
સર્વાન્તરાત્મા ભગવાંસ્તવ ભક્ત્યા ચ નિર્ગુણઃ

તવ તુષ્ટો ગુરુરહં વિધાતા જગતામપિ ॥
મયિ તુષ્ટે હરિસ્તુષ્ટો હરૌ તુષ્ટે તુ દેવતાઃ

સામ્પ્રતં શૃણુ મે ધીમન્નત્રાગમનકારણમ્ ॥
પ્રેષિતસ્ય સુરાણાં ચ વિશ્વસંહર્તુરેવ ચ

શિવસ્ય ગુરુપુત્રસ્ય સાધ્વીં તારાં બૃહસ્પતેઃ ॥
અપહૃત્ય નિશાનાથસ્તવૈવ શરણાગતઃ

શમ્ભુર્ધર્મશ્ચ સૂર્ય્યશ્ચ શક્રોઽનન્તશ્ચ પુત્રક ॥
આદિત્યા વસવો રુદ્રા દિક્પાલાશ્ચ દિગીશ્વરાઃ

યુદ્ધાયાયાન્તિ સન્નદ્ધાસ્તિસ્રઃ કોટ્યશ્ચ દેવતાઃ ॥
નાગાઃ કિમ્પુરુષાશ્ચૈવ યક્ષરાક્ષસગુહ્યકાઃ

ભૂતાઃ પ્રેતાઃ પિશાચાશ્ચ કૂષ્માણ્ડા બ્રહ્મરાક્ષસાઃ ॥
કિરાતાશ્ચૈવ ગન્ધર્વાઃ સમુદ્રપુલિનેઽધુના

તારકામયસંગ્રામે મધ્યસ્થો ઽહં સુતૈઃ સહ ॥
દેહિ તારાં રણં કિં વા ત્યજ ચન્દ્રં ચ કામિનમ્

શુક્ર ઉવાચ ॥
આગચ્છન્તુ સુરાઃ સર્વે સન્નદ્ધા રણદુર્મદાઃ॥
યોત્સ્યે વિના મહેશં ચ સર્વેષાં ચ ગુરું પરમ્

દૈત્યા ઊચુઃ ॥ ઉભયેષાં ગુરુઃ શમ્ભુર્માન્યો વન્દ્યશ્ચ સર્વદા ॥
ધર્મશ્ચ સાક્ષી સર્વેષાં ત્વમેવ ચ પિતામહઃ

અન્યાંશ્ચ તૃણતુલ્યાંશ્ચ નહિ મન્યામહે વયમ્ ॥
આગચ્છન્તુ ચ યોત્સ્યામો વ્રજ બ્રૂહિ જગદ્ગુરો॥

કૃપયા ગુરુપુત્રસ્ય યદ્યાયાતિ મહેશ્વરઃ ॥
આગ્નેયાસ્ત્રં પ્રયોક્ષ્યામઃ પશ્ચાદ્યોત્સ્યામહે પ્રભો

બ્રહ્મોવાચ ॥
કાલાગ્નિરુદ્રઃ સંહર્ત્તા વિશ્વસ્ય બલિનાં વરઃ ॥
હે વત્સાસ્તેન સાર્દ્ધં ચ કો વા યુદ્ધં કરિષ્યતિ

ભદ્રકાલી જગન્માતા ખડ્ગખર્પર ધારિણી ॥
તયા દુર્દ્ધર્ષયા સાર્દ્ધં કો વા યુદ્ધં કરિષ્યતિ

સા સહસ્રભુજા દેવી મુણ્ડમાલાવિભૂષણા ॥
યોજનાયતવક્ત્રા ચ દશયોજનવિસ્તૃતા

સપ્તતાલપ્રમાણાશ્ચ યસ્યા દન્તા ભયાનકાઃ ॥
ક્રોશપ્રમાણજિહ્વા ચ માહાલોલા ભયઙ્કરી ॥

અતીવ રૌદ્રા સન્નદ્ધા ભીમાઃ શંકરકિંકરાઃ ॥
અતિભીમા ભૈરવાશ્ચ નન્દી ચ રણકર્કશઃ

શિવસ્ય પાર્ષદાઃ સર્વં મહાબલપરાક્રમાઃ ॥
વીરભદ્રાદયઃ શૂરાઃ કોટિસૂર્ય્યસમપ્રભાઃ

સહસ્રમૂર્ધ્નઃ શેષસ્ય ફણામણ્ડલભૂષણમ્ ॥
વિશ્વં સર્ષપતુલ્યં ચ કો વા યોદ્ધા ચ તત્સમઃ

કાલાગ્નિરુદ્રઃ સંહર્ત્તા યસ્ય શમ્ભોશ્ચ કિંકરઃ॥
શૂલિનસ્ત્રિપુરઘ્નસ્ય જ્વલતો બ્રહ્મતેજસા

યસ્ય પાશુપતાસ્ત્રેણ દુર્નિવાર્યેણ પુત્રકાઃ ॥
ભસ્મીભૂતં ભવેદ્વિશ્વં દૈત્યાનાં ચૈવ કા કથા ॥૪૮।
યસ્ય શૂલેન ભિન્નશ્ચ શઙ્ખચૂડઃ પ્રતાપવાન્ ॥
સુદામા પાર્ષદવરઃ કૃષ્ણસ્ય પરમાત્મનઃ

ત્રિકોટિસૂર્ય્યસદૃશસ્તેજસ્વી પરમાદ્ભુતઃ ॥
રાધાકવચકણ્ઠશ્ચ સર્વદૈત્યજનેશ્વરઃ

મધુકૈટભયોર્હન્તા હિરણ્યકશિપોશ્ચ યઃ ॥
સ ચ વિષ્ણુઃ સમાયાતિ શ્વેતદ્વીપાત્સ્વયં પ્રભુઃ

ઇત્યુક્ત્વા જગતાં ધાતા વિરરામ ચ સંસદિ ॥
પ્રહસ્યોવાચ દૈતેયો દાનવાનામધીશ્વરઃ

પ્રહ્રાદ ઉવાચ ॥
નમસ્તુભ્યં જગદ્ધાતઃ સર્વેષાં પ્રાક્તનેશ્વર ॥
સર્વપૂજ્યઃ સર્વનાથઃ કિં વક્ષ્યામિ તવાગ્રતઃ

હિરણ્યકશિપોર્હન્તા મધુકૈટભયોશ્ચ યઃ ॥
સા કલા યસ્ય કૃષ્ણસ્ય પરિપૂર્ણતમસ્ય ચ ॥

સર્વાન્તરાત્મનસ્તસ્ય ચક્રં નામ સુદર્શનમ્ ॥
અસ્માકં લોકમસ્માંશ્ચ તદ્દ્રાગ્ધક્ષ્યતિ દુસ્સહમ્

તતો ન બલવાઞ્છમ્ભુર્ન ચ પાશુપતં વિધે ॥
ન ચ કાલી ન શેષશ્ચ ન ચ રુદ્રાદયઃ સુરાઃ

યસ્ય લોમસુ વિશ્વાનિ નિખિલાનિ જગત્પતે ॥
સર્વાધારસ્ય ચ વિભોઃ સ્થૂલાત્સ્થૂલતરસ્ય ચ

ષોડશાંશો ભગવતઃ સ ચૈવ હિ મહાન્વિરાટ્ ॥
અનન્તો નહિ તત્સ્થૂલો ન કાલી બૃહતી તતઃ

આગચ્છન્તુ સુરાઃ સર્વે યુદ્ધં કુર્વન્તુ સામ્પ્રતમ્ ॥
ન બિભેમિ શરેભ્યશ્ચ ન ચ પાશુપતાદ્ધરાત્

નમસ્તસ્મૈ ભગવતે શિવાય શિવરૂપિણે ॥
નમોઽનન્તાય સાધુભ્યો વૈષ્ણવેભ્યઃ પ્રજાપતે

શ્રીકૃષ્ણસ્ય પ્રસાદેન નિર્ભયોઽહં નિરામયઃ ॥
ન મે સ્વાત્મબલં બ્રહ્મંસ્તદ્બલં યત્પ્રભોર્બલમ્

સ્વપાપેન મૃતસ્તાતો પુરા વૈ વિષ્ણુનિન્દયા ॥
નિર્બન્ધાચ્છઙ્ખચૂડશ્ચ દર્પાચ્ચ મધુકૈટભૌ

ત્રિપુરઃ કિઙ્કરોઽસ્માકં વીરત્વેન ન ગણ્યતે ॥
તથાઽપિ પ્રેરિતસ્તેન સ રથસ્થો મહેશ્વરઃ

ઇત્યુક્ત્વા દાનવશ્રેષ્ઠો વિરરામ ચ સંસદિ ॥
ઉવાચ જગતાં ધાતા પુનરેવ ચ નારદ

બ્રહ્મોવાચ ॥
વિનાશકારણં યુદ્ધમુભયોર્દૈત્યદેવયોઃ॥
સુપ્રીત્યા ચરણં વત્સ સર્વમઙ્ગલકારણમ્

તારાં ભિક્ષાં દેહિ મહ્યં ભિક્ષુકાય ચ વેધસે ॥
વિમુખે ભિક્ષુકે રાજન્ગૃહસ્થઃ સર્વપાપભાક્

સનત્કુમાર ઉવાચ ॥
સ્વકીર્તિં રક્ષ રાજેન્દ્ર સિંહસ્ત્વં સુરદૈત્યયોઃ ॥
યસ્ય ભિક્ષુર્જગદ્ધાતા તસ્ય કીર્તેશ્ચ કા કથા

સનાતન ઉવાચ ॥
ન જિતસ્ત્વં સુરેન્દ્રૈશ્ચ બ્રહ્મેશાનપુરોગમૈઃ ॥
રક્ષિતઃ કૃષ્ણચક્રેણ વૈષ્ણવઃ પુણ્યવાઞ્છુચિઃ

સનન્દન ઉવાચ ॥
યસ્યેષ્ટદેવઃ સર્વાત્મા શ્રીકૃષ્ણઃ પ્રકૃતેઃ પરઃ ॥
ગુરુશ્ચ વૈષ્ણવઃ શુક્રઃ સ ચ કેન જિતો મહાન્

સનક ઉવાચ ॥
પુણ્યવાન્ન જિતઃ કેન જિતઃ પાપી સ્વપાતકૈઃ ॥
પુણ્યદીપો ન નિર્વાતિ પાષણ્ડેનૈવ વાયુના

ઋષય ઊચુઃ ॥
દેહિ તારાં મહાભાગ ચન્દ્ર પ્રાણાધિકં ગુરોઃ ॥
સ્વકીર્તિં રક્ષ સુચિરં પ્રાર્થયામઃ પુનઃ પુનઃ

પ્રહ્રાદ ઉવાચ ॥
સ્થિતે મદીશ્વરે સાક્ષાન્નહિ ભૃત્યો વિરાજતે ॥
કર્ત્તારં બ્રૂહિ મન્નાથં ગુરું શુક્રં સતાં વરમ્

શિષ્યાણામાધિપત્યે ચ સાધૂનાં ગુરુરીશ્વરઃ ॥
ગુરૌ સમર્પિતં પૂર્વં સર્વૈશ્વર્ય્યં મુનીશ્વરં

વયં ભૃત્યાશ્ચ પોષ્યાશ્ચ સ્વગુરોઃ પરિચારકાઃ ॥
તે ચ શિષ્યાઃ કુશલિનો ગુર્વાજ્ઞાં પાલયન્તિ યે

પ્રહ્રાદસ્ય વચઃ શ્રુત્વા ચકાર પ્રાર્થનાં કવિમ્ ॥
દદૌ શુક્રશ્ચ તારાં તાં ચન્દ્રં ચ મલિનં મુને

દત્ત્વા તારાં વિધું શુક્રઃ પ્રણનામ વિધેઃ પદે ॥
નમસ્કૃત્ય મુનિભ્યશ્ચ પ્રણતઃ સ્વપુરં યયૌ

પ્રહ્લાદઃ સગણો ભક્ત્યા નમસ્કૃત્ય વિધેઃ પદે ॥
પ્રત્યેકં વૈ મુનિગણાન્પ્રણતઃ સ્વગૃહં યયૌ

બ્રહ્મા દદર્શ તારાં ચ પ્રણતાં સ્વપદે સતીમ્ ॥
લજ્જયા નમ્રવક્ત્રાં ચ રુદતીં ગુર્વિણીં મુને

ચન્દ્રં ચ પ્રણતં ધાતા ક્રોડે સંસ્થાપ્ય માયયા ॥
ઉવાચ મલિનાં તારાં કાતરાં ચ કૃપામયઃ

તારે ત્યજ ભયં મત્તઃ ભયં કિં તે મયિ સ્થિતે ॥
સૌભાગ્યયુક્તા સ્વપતૌ ભવિષ્યસિ વરેણ મે

દુર્બલા બલિના ગ્રસ્તા નિષ્કામા ન ચ્યુતા ભવેત્ ॥
પ્રાયશ્ચિત્તેન શુદ્ધા સા ન સ્ત્રી જારેણ દુષ્યતિ

સકામા કામતો જારં ભજતે સ્વસુખેન ચ ॥
પ્રાયશ્ચિત્તાન્ન શુદ્ધા સા સ્વામિના પરિવર્જિતા

કુમ્ભીપાકે પચ્યતે સા યાવચ્ચન્દ્રદિવાકરમ્ ॥
અન્નં વિષ્ઠા જલં મૂત્રં સ્પર્શનં સર્વપાપદમ્

પાપી યસ્યાશ્ચ તસ્યાશ્ચ સાધુભિઃ પરિવર્જિતમ્ ॥
કસ્ય ગર્ભં વદ શુભે ગચ્છ વત્સે ગુરોર્ગૃહમ્

ત્યજ લજ્જાં મહાભાગે સર્વં ચ પ્રાક્તનાદ્ભવેત્॥
બ્રહ્મણો વચનં શ્રુત્વા તમુવાચ સતી તદા

ચન્દ્રસ્ય ગર્ભં હે તાત બિભર્મ્યદ્ય સ્વકર્મણા ॥
સર્વે મે સાક્ષિણઃ સન્તિ દુર્બલાયાઃ પ્રજાપતે

યદા જગ્રાહ ચન્દ્રો માં દયાહીનશ્ચ દુર્મતિઃ॥
ઇત્યુક્ત્વા તારકા દેવી સુષાવ કનકપ્રભમ્

કુમારં સુન્દરં તત્ર જ્વલન્તં બ્રહ્મતેજસા ॥
ગૃહીત્વા તનયં ચન્દ્રો નત્વા બ્રહ્માણમીશ્વરમ્

જગામ સ સ્વભવનં બ્રહ્મા સિન્ધુતટં યયૌ ॥
સાધ્વીં તારાં ચ ગુરવે દેવેભ્યોઽપ્યભયં દદૌ

આશિષં શમ્ભુધર્માભ્યાં દત્ત્વા લોકં યયૌ વિધિઃ ॥
દેવા યયુઃ સ્વભવનં સ્વગૃહં ચ બૃહસ્પતિઃ

ભાવાનુરક્તવનિતાં પ્રાપ્ય સંહૃષ્ટમાનસઃ ॥
તારકાગર્ભસંભૂતઃ સ એવ ચ બુધઃ સ્વયમ્

તેજસ્વી સદ્ગ્રહો બ્રહ્મશ્ચન્દ્રસ્ય તનયો મહાન્ ॥
સ એવ નન્દનવને ચિત્રાં સંપ્રાપ્ય નિર્જને

ઘૃતાચ્યા ગર્ભસંભૂતાં કુબેરસ્ય ચ રેતસા ॥
દૃષ્ટ્વા ચ નિર્જને રમ્યાં કન્યાં કમલલોચનામ્

અતીવ યૌવનસ્થાં ચ બાલાં ષોડશવાર્ષિકીમ્ ॥
ગાન્ધર્વેણ વિવાહેન તાં જગ્રાહ વિધોઃ સુતઃ

તસ્યામથાયં રહસિ વીર્ય્યાધાનં ચકાર સઃ ॥
બભૂવ રાજા ચિત્રાયાં ચૈત્રો વૈ મણ્ડલેશ્વરઃ

સપ્તદ્વીપવતીં પૃથ્વીં શાસ્તિ વૈ ધાર્મિકો બલી ॥
શતં નદ્યો ઘૃતાનાં ચ દધ્નાં નદ્યઃ શતાનિ ચ

શતાનિ નદ્યો દુગ્ધાનાં મધુનદ્યશ્ચ ષોડશ ॥
દશ નદ્યશ્ચ તૈલાનાં શર્કરાલક્ષરાશયઃ

મિષ્ટાન્નાનાં સ્વસ્તિકાનાં લક્ષરાશિશ્ચ નિત્યશઃ ॥
પઞ્ચકોટિગવાં માંસં સાપૂપં સ્વન્નમેવ ચ ॥ ૯૮ ।
એતેષાં ચ નદીરાશીર્ભુઞ્જતે બ્રાહ્મણા મુને ॥
ગવાં લક્ષં ચ રત્નાનાં મણીનાં લક્ષમેવ ચ

શતલક્ષં સુવર્ણાનાં લક્ષં વૈ સૂક્ષ્મવાસસામ્ ॥
રત્નાનાં ભૂષણં પાત્રમતીવ સુમનોહરમ્

દદૌ દ્વિજાતયે રાજા નિત્યં વૈ જીવિતાવધિ ॥
તસ્ય ચૈત્રસ્ય પુત્રશ્ચ રાજાઽધિરથ એવ ચ

તસ્ય પુત્રશ્ચ સુરથશ્ચક્રવર્ત્તી બૃહચ્છ્રવાઃ ॥
મહાજ્ઞાનં ચ સંપ્રાપ્ય મેધસો મુનિસત્તમાત્

ભેજે પુરા વિષ્ણુમાયાં પુણ્યક્ષેત્રે ચ ભારતે ॥
શરત્કાલે મહાપૂજાં ચકાર સ સરિત્તટે

વૈશ્યેન સાર્ધં સ મહાઞ્જ્ઞાનિનાં મુનિસત્તમ॥
રાજા કલિઙ્ગદેશસ્ય વિરાધશ્ચ વિશાં વરઃ

તસ્ય પુત્રો મહાયોગી દ્રુમિણો જ્ઞાનિનાં વરઃ ॥
દ્રુમિણો વૈષ્ણવઃ પ્રાજ્ઞઃ પુષ્કરે દુષ્કરં તપઃ

કૃત્વા સમાધિં સંપ્રાપ જ્ઞાનિનાં વૈષ્ણવાગ્રણીઃ ॥
પુત્રૈર્દારૈર્નિરસ્તશ્ચ ધનલોભાદ્દુરાત્મભિઃ

સ ચ કોટિસુવર્ણં ચ નિત્યં દત્ત્વા જલં પપૌ ॥
મુક્તિં સંપ્રાપ સંસેવ્ય વિષ્ણુમાયાં સનાતનીમ્

રાજા લેભે મનુત્વં ચ રાજ્યં નિષ્કણ્ટકં મુને ॥
ઉવાચ મધુરં વાક્યં ધાતા ત્રિજગતાં પતિઃ

ઇતિ શ્રીબ્રહ્મવૈવર્ત્તે મહાપુરાણે દ્વિતીયે પ્રકૃતિખણ્ડે નારદનારાયણસંવાદે દુર્ગોપાખ્યાને ગુરોસ્તારાપ્રાપ્તિબુધોત્પત્ત્યાદિવર્ણનં નામૈકષષ્ટિતમોઽધ્યાયઃ