બ્રહ્મવૈવર્ત પુરાણ · અધ્યાય 2.60

નારદ ઉવાચ ॥
નારાયણ મહાભાગ વેદવેદાઙ્ગપારગ ॥
નિપીતં ચ મહાખ્યાનં ત્વન્મુખેન્દુવિનિસૃતમ્

અધુના શ્રોતુમિચ્છામિ કિમુવાચ બૃહસ્પતિઃ ॥
શિવં ચ ગત્વા કૈલાસં દાતારં સર્વસમ્પદામ્

જગત્કર્તા વિધાતા ચ કિં વા તં પ્રત્યુવાચ સઃ ॥
એતત્સર્વં સમાલોચ્ય વદ વેદવિદાં વર

નારાયણ ઉવાચ ॥
શીઘ્રં ગત્વા ચ કૈલાસં ભ્રષ્ટશ્રીઃ શંકરં ગુરુઃ ॥
પ્રણમ્ય તસ્થૌ પુરતો લજ્જાવનતકન્ધરઃ ॥

દૃષ્ટ્વા ગુરુસુતં શમ્ભુરુદતિષ્ઠત્કુશાસનાત્ ॥
આલિઙ્ગનં દદૌ તસ્મૈ શીઘ્રં માંગલિકાશિષઃ

સ્વાસને વાસયિત્વા વૈ પપ્રચ્છ કુશલં વચઃ ॥
ઉવાચ મધુરં વાક્યં ભીતં તં લજ્જિતં શિવઃ

શ્રીશઙ્કર ઉવાચ ॥
કથમેવંવિધસ્ત્વં ચ દુઃખી મલિન વિગ્રહઃ ॥
સાશ્રુનેત્રો લજ્જિતશ્ચ ભ્રાતસ્તત્કારણં વદ

કિં વા તપસ્યા હીના તે સન્ધ્યા હીનાઽથવા મુને ॥
કિં વા શ્રીકૃષ્ણસેવા સા વિહીના દૈવદોષતઃ

કિં વા ગુરૌ ભક્તિહીનોઽભીષ્ટદેવેઽથવા ગુરૌ ॥
કિં વા ન રક્ષિતું શક્તઃ પ્રપન્નં શરણાગતમ્

કિં વાઽતિથિસ્તે વિમુખઃ કિં વા પોષ્યા બુભુક્ષિતાઃ ॥
કિં વા સ્વતન્ત્રા સ્ત્રી વા તે કિં વા પુત્રોઽવચસ્કરઃ ॥2.60.૧ ૦॥
સુશાસિતો ન શિષ્યો વા કિં ભૃત્યાશ્ચોત્તરપ્રદાઃ ॥
કિં વા તે વિમુખા લક્ષ્મીઃ કિં વા રુષ્ટો ગુરુસ્તવ

ગરિષ્ઠશ્ચ વરિષ્ઠશ્ચ શશ્વત્સન્તુષ્ટ માનસ ॥
ગુરુસ્તવ વસિષ્ઠશ્ચ પ્રેષ્ઠઃ શ્રેષ્ઠઃ સતામહો

કિં વા રુષ્ટોઽભીષ્ટદેવઃ કિં વા રુષ્ટાશ્ચ વાડવાઃ ॥
કિં વા રુષ્ટા વૈષ્ણવાશ્ચ કિં વા તે પ્રબલો રિપુઃ

કિં વા તે બન્ધુવિચ્છેદો વિગ્રહો બલિના સહ ॥
કિં વા પદં પરગ્રસ્તં કિં વા બન્ધુધનં ચ વા

કેન તે વા કૃતા નિન્દા ખલૈર્વા પાપિભિર્મુને ॥
કેન વા ત્વં પરિત્યક્તો બાન્ધવેન પ્રિયેણ વા

બન્ધુસ્ત્યક્તસ્ત્વયા કિં વા વૈરાગ્યેણ ક્રુધાઽથવા ॥
કિં વા તીર્થે નહિ સ્નાતં ન દત્તં પુણ્યવાસરે

ગુરુનિન્દા બન્ધુનિન્દા ખલવક્ત્રાચ્છ્રુતાઽથવા ॥
ગુરુનિન્દા હિ સાધૂનાં મરણાદતિરિચ્યતે

અસદ્વંશપ્રજાતાનાં ખલાનાં નિન્દનં તથા ॥
દૌશ્શીલ્યમેવમસતાં શશ્વન્નારકિણામિહ

પરપ્રશંસકાઃ સન્તઃ પુણ્યવન્તો હિ ભારતે ॥
શશ્વન્મઙ્ગલયુક્તાશ્ચ રાજન્તે મનસા સદા

પુત્રે યશસિ તોયે ચ સમૃદ્ધે ચ પરાક્રમે ॥
ઐશ્વર્યે વા પ્રતાપે ચ પ્રજાભૂમિધનેષુ ચ

વચનેષુ ચ બુદ્ધૌ ચ સ્વભાવે ચ ચરિત્રતઃ ॥
આચારે વ્યવહારે ચ જાયતે હૃદયં નૃણામ્

યાદૃગ્યેષાં ચ હદયે તાદૃક્તેષાં ચ મંગલમ્ ॥
યાદૃગ્યેષાં પૂર્વપુણ્યં તાદૃક્તેષાં ચ માનસમ્

ઇત્યુક્ત્વા ચ મહાદેવો વિરરામ સ્વસંસદિ ॥
તમુવાચ મહાવક્તા સ્વયમેવ બૃહસ્પતિઃ

બૃહસ્પતિરુવાચ ॥
અકથ્યમેવ વૃત્તાન્તં કથયામિ કિમીશ્વર ॥
લોકાઃ કર્મવશાન્નિત્યં નાનાજન્મસુ યત્કૃતમ્

સ્વકર્મણાં ફલં ભુઙ્ક્તે જન્તુર્જન્મનિ જન્મનિ ॥
નહિ નષ્ટં ચ તત્કર્મ વિના ભોગાચ્ચ ભારતે

સુખં દુઃખં ભયં શોકો નરાણાં ભારતે પ્રભો ॥
કેચિદ્વદન્તિ હિ ભવેત્સ્વકૃતેન ચ કર્મણા

કેચિદ્વદન્તિ દૈવેન સ્વભાવેનેતિ કેચન ॥
ત્રિવિધા ગતયો હ્યસ્ય વેદવેદાઙ્ગપારગ

સ્વયં ચ કર્મજનકઃ કર્મ વૈ દૈવકારણમ્ ॥
સ્વભાવો જાયતે નૄણાં સ્વાત્મનઃ પૂર્વકર્મણઃ

સ્વકર્મણાં ચ સર્વેષાં જન્તૂનાં પ્રતિજન્મનિ ॥
સુખં દુઃખં ભયં શોકં સ્વાત્મનશ્ચ પ્રજાયતે

સ્વકર્મફલભોક્તા ચ જીવો હિ સગુણઃ સદા ॥
આત્મભોજયિતા સાક્ષી નિર્ગુણઃ પ્રકૃતેઃ પરઃ

સ એવાત્મા સર્વસેવ્યઃ સર્વેષાં ચ ફલપ્રદઃ ॥
સ વૈ સૃજતિ દૈવં ચ સ્વભાવં કર્મ ચૈવ હિ

કર્મણા ચ નૃણાં લજ્જા પ્રશંસા ચ પ્રફુલ્લતા ॥
લજ્જાબીજં ચ વૃત્તાન્તં તથાઽપિ કથયામિ તે

ઇત્યુક્ત્વા સર્વવૃત્તાન્તમવોચત્તં બૃહસ્પતિઃ ॥
શ્રુત્વા બભૂવ નમ્રાસ્યો ગૌરીશો લજ્જયા તદા

જપમાલા કરાદ્ભ્રષ્ટા કોપાવિષ્ટસ્ય શૂલિનઃ ॥
બભૂવ સદ્યઃકમ્પશ્ચ રક્તપંકજલોચને

સંહર્ત્તુરીશો રુદ્રસ્ય વિષ્ણોઃ પાતુઃ સખા શિવઃ ॥
સ્રષ્ટુઃ સ્તુત્યશ્ચ માન્યશ્ચ સ્વાત્મનઃ પરમાત્મનઃ

નિર્ગુણસ્ય ચ કૃષ્ણસ્ય પ્રકૃતીશસ્ય નારદ ॥
કોપાત્પ્રવક્તુમારેભે શુષ્કકણ્ઠૌષ્ઠતાલુકઃ

શિવ ઉવાચ ॥
શિવમસ્તુ ચ સાધૂનાં વૈષ્ણવાનાં સતામિહ ॥
અવૈષ્ણવાનામસતામશિવં ચ પદે પદે

દદાતિ વૈષ્ણવેભ્યશ્ચ યો દુઃખં સુસ્થિતો જનઃ ॥
શ્રીકૃષ્ણસ્તસ્ય સંહર્ત્તા વિઘ્નસ્તસ્ય પદે પદે

અવૈષ્ણવાનાં હૃદયં નહિ શુદ્ધં સદામલમ્ ॥
શ્રીકૃષ્ણમન્ત્રસ્મરણં મનોનૈર્મલ્યકારણમ્

ભિદ્યતે હદયગ્રન્થિશ્છિદ્યન્તે સર્વસંશયાઃ ॥
વિષ્ણુમન્ત્રોપાસનયા ક્ષીયતે કર્મ તન્નૃણામ્

અહો શ્રીકૃષ્ણદાસાનાં કઃ સ્વભાવઃ સુનિર્મલઃ ॥
હૃતભાર્ય્યં મૂર્ચ્છિતશ્ચ ન શશાપ રિપું ગુરુઃ

ગુરુર્યસ્ય વરિષ્ઠશ્ચ ક્રોધહીનશ્ચ ધાર્મિકઃ ॥
શતપુત્રઘ્નમપ્યેનં ન શશાપ રિપું મુનિઃ

નિશ્શ્વાસાદ્વૈ સુરગુરોર્ભ્રાતુર્મમ બૃહસ્પતેઃ ॥
ભસ્મીભૂતો નિમેષેણ શતચન્દ્રો ભવેદ્ધ્રુવમ્ ॥

તથાઽપિ તં નો શશાપ ધર્મ્મભઙ્ગભયેન ચ ॥
તપસ્યા હીયતે શપ્તુઃ કોપાવિષ્ટસ્ય નિત્યશઃ

અહો હ્યત્રેરસત્પુત્રઃ પરસ્ત્રીલુબ્ધકઃ શઠઃ ॥
તપસ્વિનો વૈષ્ણવસ્ય બ્રહ્મપુત્રસ્ય ધીમતઃ

ધર્મિષ્ઠા બ્રહ્મણઃ પુત્રા વૈષ્ણવા બ્રાહ્મણાસ્તથા ॥
કેચિદ્દેવા દ્વિજા દૈત્યાઃ પૌત્રાશ્ચ ત્રિવિધા મતાઃ

યે સાત્ત્વિકા બ્રાહ્મણાસ્તે દેવા રાજસિકાસ્તથા ॥
દૈત્યાસ્તામસિકા રૌદ્રા બલિષ્ઠાશ્ચોદ્ધતાઃ સદા

સ્વધર્મનિરતા વિપ્રા નારાયણપરાયણાઃ ॥
શૈવાઃ શાક્તાશ્ચ તે દેવા દૈત્યાઃ પૂજાવિવર્જિતાઃ

મુમુક્ષવો વિષ્ણુભક્તા બ્રાહ્મણા દાસ્યલિપ્સવઃ ॥
ઐશ્વર્ય્યલિપ્સવો દેવાશ્ચાસુરાસ્તામસાસ્તથા

બ્રાહ્મણાનાં સ્વધર્મશ્ચ કૃષ્ણસ્યાર્ચ્ચનમીપ્સિતમ્ ॥
નિષ્કામાનાં નિર્ગુણસ્ય પરસ્ય પ્રકૃતેરપિ

યે બ્રાહ્મણા વૈષ્ણવાશ્ચ સ્વતન્ત્રાઃ પરમં પદમ્ ॥
યાન્ત્યન્યોપાસકાશ્ચાન્યૈઃ સાર્દ્ધં ચ પ્રાકૃતે લયે

વર્ણાનાં બ્રાહ્મણાઃ શ્રેષ્ઠાઃ સાધવો વૈષ્ણવા યદિ ॥
વિષ્ણુમન્ત્રવિહીનેભ્યો દ્વિજેભ્યઃ શ્વપચો વરઃ

પરિપક્વા વિપક્વા વા વૈષ્ણવાઃ સાધવશ્ચ તે ॥
સતતં પાતિ તાંશ્ચૈવ વિષ્ણુચક્રં સુદર્શનમ્

યથા વહ્નૌ શુષ્કતૃણં ભસ્મીભૂતં ભવેત્સદા॥
તથા પાપં વૈષ્ણવેષુ કાષ્ઠાનીવ હુતાશને

ગુરુવક્ત્રાદ્વિષ્ણુમન્ત્રો યસ્ય કર્ણે પ્રવેક્ષ્યતિ ॥
તં વૈષ્ણવં મહાપૂતં પ્રવદન્તિ મનીષિણઃ

પુંસાં શતં પિતૄણાં ચ શતં માતામહસ્ય ચ ॥
સ્વસોદરાંશ્ચ જનનીમુદ્ધરન્ત્યેવ વૈષ્ણવાઃ

ગયાયાં પિણ્ડદાનેન પિણ્ડદાઃ પિણ્ડભોજિનમ્ ॥
સમુદ્ધરન્તિ પુંસાં ચ વૈષ્ણવાશ્ચ શતં શતમ્

મન્ત્રગ્રહણમાત્રેણ જીવન્મુક્તો ભવેન્નરઃ ॥
યમસ્તસ્માન્મહાભીતો વૈનતેયાદિવોરગઃ

પુનન્ત્યેવ હિ તીર્થાનિ ગઙ્ગાદીનિ ચ ભારતે ॥
કૃષ્ણમન્ત્રોપાસકાશ્ચ સ્પર્શમાત્રેણ વાક્પતે

પાપાનિ પાપિનાં તીર્થે યાવન્તિ પ્રભવન્તિ ચ ॥
નશ્યન્તિ તાનિ સર્વાણિ વૈષ્ણવસ્પર્શમાત્રતઃ

કૃષ્ણમન્ત્રોપાસકાનાં રજસા પાદપદ્મયોઃ ॥
સદ્યો મુક્તાઃ પાતકેભ્યઃ કૃત્સ્ના પૂતા વસુન્ધરા

વાયુશ્ચ પવનો વહ્નિઃ સૂર્ય્યઃ સર્વં પુનાતિ ચ ॥
એતે પૂતા વૈષ્ણવાનાં સ્પર્શમાત્રેણ લીલયા

અહં બ્રહ્મા ચ શેષશ્ચ ધર્મઃ સાક્ષી ચ કર્મ્મણામ્ ॥
એતે હૃષ્ટાશ્ચ વાઞ્છન્તિ વૈષ્ણવાનાં સમાગમમ્

ફલં કર્માનુરૂપેણ સર્વેષાં ભારતે ભવેત્ ॥
ન ભવેત્તદ્વૈષ્ણવે ચ સિદ્ધધાન્યે યથાંઽકુરમ્

હન્તિ તેષાં કર્મ પૂર્વં ભક્તાનાં ભક્તવત્સલઃ ॥
કૃપયા સ્વપદં તેભ્યો દદાત્યેવ કૃપાનિધિઃ

તેજસ્વિનાં ચ પ્રવરં વૈષ્ણવં ભૃગુનન્દનમ્ ॥
સ ચન્દ્રો દુર્બલો ભીતઃ શુક્રં ચ શરણં યયૌ

સુદર્શનો બલિષ્ઠં ચ શુક્રં જેતું ન શક્તિમાન્ ॥
તથાઽપિ ચોદ્ધરિષ્યામિ તારાં મન્ત્રેણ મદ્ગુરોઃ

ભજ સત્યં પરં બ્રહ્મ કૃષ્ણમાત્માનમીશ્વરમ્ ॥
સુપ્રસન્ને ભગવતિ પત્નીં પ્રાપ્સ્યસિ લીલયા

મન્ત્રં તસ્ય પ્રદાસ્યામિ ભ્રાતઃ કલ્પતરું પરમ્ ॥
કોટિજન્માઘનિઘ્નં ચ સર્વમંગલકારણમ્

બ્રહ્માદિસ્તંબપર્ય્યન્તં નશ્વરં જલબિમ્બવત્ ॥
શરણં યાહિ ગોવિન્દં પરમાત્માનમીશ્વરમ્ ॥
તાવદ્ભવેચ્છા ભોગેચ્છા સ્ત્રીસુખેચ્છા નૃણામિહ

યાવદ્ગુરુમુખામ્ભોજાન્ન પ્રાપ્નોતિ મનું હરેઃ ॥
સંપ્રાપ્ય દુર્લભં મન્ત્રં વિતૃષ્ણો હિ ભવેન્નરઃ

ઇન્દ્રત્વમમરત્વં ચ નહિ વાઞ્છન્તિ વૈષ્ણવાઃ ॥
નહિ વાઞ્છન્તિ મોક્ષં ચ દાસ્યં ભક્તિં વિના હરેઃ

ભક્તિ નિર્મથનં ભક્તો મોક્ષં નો વાઞ્છતિ પ્રભોઃ ॥
જ્ઞાનં મૃત્યુઞ્જયત્વં ચ સર્વસિદ્ધિં તદીપ્સિતમ્

વાક્સિદ્ધિં ચૈવ ધાતૃત્વં ભક્તાનાં નહિ વાઞ્છિતમ્ ॥
ભક્તિં વિહાય કૃષ્ણસ્ય વિષયં યો હિ વાઞ્છતિ ।

।
વિષમત્તિ સુધાં ત્યક્ત્વા વઞ્ચિતો વિષ્ણુમાયયા ॥
અહં બ્રહ્મા ચ વિષ્ણુશ્ચ ધર્મોઽનન્તશ્ચ કશ્યપઃ

કપિલશ્ચ કુમારશ્ચ નરનારાયણાવૃષી ॥
સ્વાયમ્ભુવો મનુશ્ચૈવ પ્રહ્લાદશ્ચ પરાશરઃ ॥

ભૃગુઃ શુક્રશ્ચ દુર્વાસા વસિષ્ઠઃ ક્રતુરંગિરાઃ ॥
બલિશ્ચ વાલખિલ્યાશ્ચ વરુણશ્ચ હુતાશનઃ

વાયુઃ સૂર્યશ્ચ ગરુડો દક્ષો ગણપતિઃ સ્વયમ્ ॥
એતે પરા ભક્તવરાઃ કૃષ્ણસ્ય પરમાત્મનઃ

યે ચ તસ્ય કલાઃ શ્રેષ્ઠાસ્તે તદ્ભક્તિપરાયણાઃ ॥
ઇત્યુક્ત્વા શઙ્કરસ્તસ્મૈ દદૌ કલ્પતરું મનુમ્

લક્ષ્મીમાયાકામબીજં ઙેન્તં કૃષ્ણપદં મુને ॥
પરં પૂજાવિધાનં ચ સ્તોત્રં ચ કવચં મુને ॥

તત્પુરશ્ચરણં ધ્યાનં શુદ્ધે મન્દાકિનીતટે ॥
ગુરુઃ સંપ્રાપ્ય તં મન્ત્રં શઙ્કરાચ્ચ જગદ્ગુરોઃ

વિષણ્ણો હિ ભવાબ્ધૌ ચ બભૂવ તમુવાચ હ

બૃહસ્પતિરુવાચ ॥
આજ્ઞાં કુરુ જગન્નાથ યામિ તપ્તું હરેસ્તપઃ ॥
તારા તિષ્ઠતુ તત્રૈવ ન તયા મે પ્રયોજનમ્

પશ્યામિ વિષતુલ્યં ચ સર્વં નશ્વરમીશ્વર ॥
શ્રીકૃષ્ણં શરણં યામિ સત્યં નિત્યં ચ નિર્ગુણમ્

શ્રીમહાદેવ ઉવાચ ॥
પરગ્રસ્તાં સ્ત્રિયં ત્યક્ત્વા ન પ્રશંસ્યં તપો મુને ॥
સમ્ભાવિતસ્ય દુશ્ચર્ચ્ચા મરણાદતિરિચ્યતે

પુરો ગચ્છ મહાભાગ તમેતં નર્મદાતટમ્ ॥
યત્ર બ્રહ્માદયો દેવાસ્તત્રાહં યામિ સત્વરમ્

શિવસ્ય વચનં શ્રુત્વા યયૌ સુરગુરુઃ સ્વયમ્ ॥
આયયૌ ચ મહાભાગઃ શઙ્કરો નર્મદાતટમ્

સગણં શઙ્કરં દૃષ્ટ્વા પ્રસન્નવદનેક્ષણમ્ ॥
પ્રણેમુર્દેવતાઃ સર્વા મનવો મુનયસ્તથા

નનામ શમ્ભુઃ શિરસા વિષ્ણું ચ કમલોદ્ભવમ્ ॥
દદૌ વિષ્ણુર્મહેશાય પ્રેમ્ણાઽઽલિઙ્ગનમાસનમ્

એતસ્મિન્નન્તરે તત્ર ચાગમચ્ચ બૃહસ્પતિઃ ॥
પ્રણનામ મહાદેવં વિષ્ણું ચ કમલોદ્ભવમ્

સૂર્ય્યં ધર્મમનન્તં ચ નરં માં ચ મુનીશ્વરાન્ ॥
સ્વગુરું પિતરં ભક્ત્યા ચાવસત્તત્ર સંસદિ

સઞ્ચિન્ત્ય મનસા યુક્તિમૂચે તત્ર ચ સંસદિ ॥
સ્વયં વિષ્ણુશ્ચ ભગવાન્બ્રહ્માણં ચન્દ્રશેખરમ્

વિષ્ણુરુવાચ॥
યુવાં ચ મુનયશ્ચૈવ સમુદ્રપુલિનં દ્રુતમ્॥
શુક્રં કઞ્ચિચ્ચ મધ્યસ્થં પ્રસ્થાપયિતુમર્હથ

વિગ્રહેણૈવ વિષમં ભવિષ્યતિ ન સંશયઃ ॥
મદાશિષા સુરગુરુસ્તારાં પ્રાપ્સ્યતિ નિશ્ચિતમ્

સુરૈઃ સ્તુતશ્ચ સન્તુષ્ટઃ શુક્રાચાર્ય્યો ભવિષ્યતિ ॥
સુરૈઃ શુક્રો હિ ન જિતઃ કૃષ્ણચક્રેણ રક્ષિતઃ

યુવાભ્યાં પ્રાર્થ્યમાનોઽહં યુવયોઃ સ્તવનેન ચ ॥
શ્વેતદ્વીપાદાગતોઽસ્મિ પરિતુષ્ટઃ સ્તવેન ચ

શુક્રાશ્રમમસીપર્ણં સર્વા ગચ્છન્તુ દેવતાઃ ॥
રિપુર્બલિષ્ઠઃ સ્તોત્રેણ વશીભૂત ઇતિ શ્રુતિઃ

ઇત્યુક્ત્વા જગતાં નાથસ્તત્રૈવાન્તર ધીયત ॥
સ્તુતો બ્રહ્માદિભિદેવૈઃ પ્રણતૈઃ પરિપૂજિતઃ

ગતે ચ જગતાં નાથે શ્વેતદ્વીપં ચ નારદ ॥
ચિન્તિતાશ્ચ સુરાઃ સર્વે વિષણ્ણમનસસ્તથા

મુનીન્દેવાંશ્ચ સંબોધ્ય બ્રહ્મા વૈ તત્ર સંસદિ ॥
ઉવાચ નીતિસારં તત્સમ્મતં શઙ્કરસ્ય સઃ

બ્રહ્મોવાચ ॥
મમ શમ્ભોશ્ચ ધર્મસ્ય વિષ્ણોર્વા સર્વસાક્ષિણઃ ॥
અસ્માકં ચ સમઃ સ્નેહો દૈત્યે દેવે ચ પુત્રકાઃ

દૈત્યાનાં ચ ગુરું શુક્રં પ્રપન્નશ્ચ નિશાકરઃ ॥
ન જિતશ્ચ સુરૈઃ શુક્રઃ પૂજિતો દિતિનન્દનૈઃ

તારાહેતોરહં યામિ શુક્રસ્ય ભવનં સુરાઃ ॥
સર્વે સમુદ્રપુલિનં યાન્તુ વિષ્ણોર્નિદેશતઃ

ઇત્યુક્ત્વા જગતાં ધાતા ચાગમચ્છુક્રસન્નિધિમ્ ॥
પ્રયયુર્દેવતા વિપ્રાઃ સમુદ્રપુલિનં મુને॥

ઇતિ શ્રીબ્રહ્મવૈવર્ત્તે મ૦દ્વિ૦પ્ર૦નારદનારાયણસંવાદે શ્રીકૃષ્ણોપદિષ્ટતારોદ્ધરણોપાયજ્ઞાનં નામ ષષ્ટિતમોઽધ્યાયઃ