બ્રહ્મ પુરાણ · અધ્યાય 219

પરલોકગતાનાં તુ સ્વકર્મસ્થાનવાસિનામ્
તેષાં શ્રાદ્ધં કથં જ્ઞેયં પુત્રૈશ્ ચાન્યૈશ્ ચ બન્ધુભિઃ ॥

નમસ્કૃત્ય જગન્નાથં વારાહં લોકભાવનમ્
શૃણુધ્વં સંપ્રવક્ષ્યામિ શ્રાદ્ધકલ્પં યથોદિતમ્ ॥

પુરા કોકાજલે મગ્નાન્ પિતૄન્ ઉદ્ધૃતવાન્ વિભુઃ
શ્રાદ્ધં કૃત્વા તદા દેવો યથા તત્ર દ્વિજોત્તમાઃ ॥

કિમર્થં તે તુ કોકાયાં નિમગ્નાઃ પિતરો ઽમ્ભસિ
કથં તેનોદ્ધૃતાસ્ તે વૈ વારાહેણ દ્વિજોત્તમ ॥

તસ્મિન્ કોકામુખે તીર્થે ભુક્તિમુક્તિફલપ્રદે
શ્રોતુમ્ ઇચ્છામહે બ્રૂહિ પરં કૌતૂહલં હિ નઃ ॥

ત્રેતાદ્વાપરયોઃ સંધૌ પિતરો દિવ્યમાનુષાઃ
પુરા મેરુગિરેઃ પૃષ્ઠે વિશ્વૈર્ દેવૈઃ સહ સ્થિતાઃ ॥

તેષાં સમુપવિષ્ટાનાં પિતૄણાં સોમસંભવા
કન્યા કાન્તિમતી દિવ્યા પુરતઃ પ્રાઞ્જલિઃ સ્થિતા
તામ્ ઊચુઃ પિતરો દિવ્યા યે તત્રાસન્ સમાગતાઃ ॥

કાસિ ભદ્રે પ્રભુઃ કો વા ભવત્યા વક્તુમ્ અર્હસિ ॥

સા પ્રોવાચ પિતૄન્ દેવાન્ કલા ચાન્દ્રમસીતિ હ
પ્રભુત્વે ભવતામ્ એવ વરયામિ યદીચ્છથ ॥

ઊર્જા નામાસ્તિ પ્રથમં સ્વધા ચ તદનન્તરમ્
ભવદ્ભિશ્ ચાદ્યૈવ કૃતં નામ કોકેતિ ભાવિતમ્ ॥

તે હિ તસ્યા વચઃ શ્રુત્વા પિતરો દિવ્યમાનુષાઃ
તસ્યા મુખં નિરીક્ષન્તો ન તૃપ્તિમ્ અધિજગ્મિરે ॥

વિશ્વેદેવાશ્ ચ તાઞ્ જ્ઞાત્વા કન્યામુખનિરીક્ષકાન્
યોગચ્યુતાન્ નિરીક્ષ્યૈવ વિહાય ત્રિદિવં ગતાઃ ॥

ભગવાન્ અપિ શીતાંશુર્ ઊર્જાં નાપશ્યદ્ આત્મજામ્
સમાકુલમના દધ્યૌ ક્વ ગતેતિ મહાયશાઃ ॥

સ વિવેદ તદા સોમઃ પ્રાપ્તાં પિતૄંશ્ ચ કામતઃ
તૈશ્ ચાવલોકિતાં હાર્દાત્ સ્વીકૃતાં ચ તપોબલાત્ ॥

તતઃ ક્રોધપરીતાત્મા પિતૄઞ્ શશધરો દ્વિજાઃ
શશાપ નિપતિષ્યધ્વં યોગભ્રષ્ટા વિચેતસઃ ॥

યસ્માદ્ અદત્તાં મત્કન્યાં કામયધ્વં સુબાલિશાઃ
યસ્માદ્ ધૃતવતી ચેયં પતીન્ પિતૃમતી સતી ॥

સ્વતન્ત્રા ધર્મમ્ ઉત્સૃજ્ય તસ્માદ્ ભવતુ નિમ્નગા
કોકેતિ પ્રથિતા લોકે શિશિરાદ્રિસમાશ્રિતા ॥

ઇત્થં શપ્તાશ્ ચન્દ્રમસા પિતરો દિવ્યમાનુષાઃ
યોગભ્રષ્ટા નિપતિતા હિમવત્પાદભૂતલે ॥

ઊર્જા તત્રૈવ પતિતા ગિરિરાજસ્ય વિસ્તૃતે
પ્રસ્થે તીર્થં સમાસાદ્ય સપ્તસામુદ્રમ્ ઉત્તમમ્ ॥

કોકા નામ તતો વેગાન્ નદી તીર્થશતાકુલા
પ્લાવયન્તી ગિરેઃ શૃઙ્ગં સર્પણાત્ તુ સરિત્ સ્મૃતા ॥

અથ તે પિતરો વિપ્રા યોગહીના મહાનદીમ્
દદૃશુઃ શીતસલિલાં ન વિદુસ્ તાં સુલોચનામ્ ॥

તતસ્ તુ ગિરિરાડ્ દૃષ્ટ્વા પિતૄંસ્ તાંસ્ તુ ક્ષુધાર્દિતાન્
બદરીમ્ આદિદેશાથ ધેનું ચૈકાં મધુસ્રવામ્ ॥

ક્ષીરં મધુ ચ તદ્ દિવ્યં કોકામ્ભો બદરીફલમ્
ઇદં ગિરિવરેણૈષાં પોષણાય નિરૂપિતમ્ ॥

તયા વૃત્ત્યા તુ વસતાં પિતૄણાં મુનિસત્તમાઃ
દશ વર્ષસહસ્રાણિ યયુર્ એકમ્ અહો યથા ॥

એવં લોકે વિપિતરિ તથૈવ વિગતસ્વધે
દૈત્યા બભૂવુર્ બલિનો યાતુધાનાશ્ ચ રાક્ષસાઃ ॥

તે તાન્ પિતૃગણાન્ દૈત્યા યાતુધાનાશ્ ચ વેગિતાઃ
વિશ્વૈર્ દેવૈર્ વિરહિતાન્ સર્વતઃ સમુપાદ્રવન્ ॥

દૈતેયાન્ યાતુધાનાંશ્ ચ દૃષ્ટ્વૈવાપતતો દ્વિજાઃ
કોકાતટસ્થામ્ ઉત્તુઙ્ગાં શિલાં તે જગૃહૂ રુષા ॥

ગૃહીતાયાં શિલાયાં તુ કોકા વેગવતી પિતૄન્
છાદયામ્ આસ તોયેન પ્લાવયન્તી હિમાચલમ્ ॥

પિતૄન્ અન્તર્હિતાન્ દૃષ્ટ્વા દૈતેયા રાક્ષસાસ્ તથા
વિભીતકં સમારુહ્ય નિરાહારાસ્ તિરોહિતાઃ ॥

સલિલેન વિષીદન્તઃ પિતરઃ ક્ષુદ્ભ્રમાતુરાઃ
વિષીદમાનમ્ આત્માનં સમીક્ષ્ય સલિલાશયાઃ
જગુર્ જનાર્દનં દેવં પિતરઃ શરણં હરિમ્ ॥

જયસ્વ ગોવિન્દ જગન્નિવાસ જયો ઽસ્તુ નઃ કેશવ તે પ્રસાદાત્
જનાર્દનાસ્માન્ સલિલાન્તરસ્થાન્ ઉદ્ધર્તુમ્ અર્હસ્ય્ અનઘપ્રતાપ

નિશાચરૈર્ દારુણદર્શનૈઃ પ્રભો વરેણ્ય વૈકુણ્ઠ વરાહ વિષ્ણો
નારાયણાશેષમહેશ્વરેશ પ્રયાહિ ભીતાઞ્ જય પદ્મનાભ

ઉપેન્દ્ર યોગિન્ મધુકૈટભઘ્ન વિષ્ણો અનન્તાચ્યુત વાસુદેવ
શ્રીશાર્ઙ્ગચક્રામ્બુજશઙ્ખપાણે રક્ષસ્વ દેવેશ્વર રાક્ષસેભ્યઃ

ત્વં પિતા જગતઃ શંભો નાન્યઃ શક્તઃ પ્રબાધિતુમ્
નિશાચરગણં ભીમમ્ અતસ્ ત્વાં શરણં ગતાઃ ॥

ત્વન્નામસંકીર્તનતો નિશાચરા દ્રવન્તિ ભૂતાન્ય્ અપયાન્તિ ચારયઃ
નાશં તથા સંપ્રતિ યાન્તિ વિષ્ણો ધર્માદિ સત્યં ભવતીહ મુખ્યમ્

ઇત્થં સ્તુતઃ સ પિતૃભિર્ ધરણીધરસ્ તુ તુષ્ટસ્ તદાવિષ્કૃતદિવ્યમૂર્તિઃ
કોકામુખે પિતૃગણં સલિલે નિમગ્નં દેવો દદર્શ શિરસાથ શિલાં વહન્તમ્

તં દૃષ્ટ્વા સલિલે મગ્નં ક્રોડરૂપી જનાર્દનઃ
ભીતં પિતૃગણં વિષ્ણુર્ ઉદ્ધર્તું મતિર્ આદધે ॥

દંષ્ટ્રાગ્રેણ સમાહત્ય શિલાં ચિક્ષેપ શૂકરઃ
પિતૄન્ આદાય ચ વિભુર્ ઉજ્જહાર શિલાતલાત્ ॥

વરાહદંષ્ટ્રાસંલગ્નાઃ પિતરઃ કનકોજ્જ્વલાઃ
કોકામુખે ગતભયાઃ કૃતા દેવેન વિષ્ણુના ॥

ઉદ્ધૃત્ય ચ પિતૄન્ દેવો વિષ્ણુતીર્થે તુ શૂકરઃ
દદૌ સમાહિતસ્ તેભ્યો વિષ્ણુર્ લોહાર્ગલે જલમ્ ॥

તતઃ સ્વરોમસંભૂતાન્ કુશાન્ આદાય કેશવઃ
સ્વેદોદ્ભવાંસ્ તિલાંશ્ ચૈવ ચક્રે ચોલ્મુકમ્ ઉત્તમમ્ ॥

જ્યોતિઃ સૂર્યપ્રભં કૃત્વા પાત્રં તીર્થં ચ કામિકમ્
સ્થિતઃ કોટિવટસ્યાધો વારિ ગઙ્ગાધરં શુચિ ॥

તુઙ્ગકૂટાત્ સમાદાય યજ્ઞીયાન્ ઓષધીરસાન્
મધુક્ષીરરસાન્ ગન્ધાન્ પુષ્પધૂપાનુલેપનાન્ ॥

આદાય ધેનું સરસો રત્નાન્ય્ આદાય ચાર્ણવાત્
દંષ્ટ્રયોલ્લિખ્ય ધરણીમ્ અભ્યુક્ષ્ય સલિલેન ચ ॥

ઘર્મોદ્ભવેનોપલિપ્ય કુશૈર્ ઉલ્લિખ્ય તાં પુનઃ
પરિણીયોલ્મુકેનૈનામ્ અભ્યુક્ષ્ય ચ પુનઃ પુનઃ ॥

કુશાન્ આદાય પ્રાગગ્રાંલ્ લોમકૂપાન્તરસ્થિતાન્
ઋષીન્ આહૂય પપ્રચ્છ કરિષ્યે પિતૃતર્પણમ્ ॥

તૈર્ અપ્ય્ ઉક્તે કુરુષ્વેતિ વિશ્વાન્ દેવાંસ્ તતો વિભુઃ
આહૂય મન્ત્રતસ્ તેષાં વિષ્ટરાણિ દદૌ પ્રભુઃ ॥

આહૂય મન્ત્રતસ્ તેષાં વેદોક્તવિધિના હરિઃ
અક્ષતૈર્ દૈવતારક્ષાં ચક્રે ચક્રગદાધરઃ ॥

અક્ષતાસ્ તુ યવૌષધ્યઃ સર્વદેવાંશસંભવાઃ
રક્ષન્તિ સર્વત્ર દિશો રક્ષાર્થં નિર્મિતા હિ તે ॥

દેવદાનવદૈત્યેષુ યક્ષરક્ષઃસુ ચૈવ હિ
નહિ કશ્ચિત્ ક્ષયં તેષાં કર્તું શક્તશ્ ચરાચરે ॥

ન કેનચિત્ કૃતં યસ્માત્ તસ્માત્ તે હ્ય્ અક્ષતાઃ કૃતાઃ
દેવાનાં તે હિ રક્ષાર્થં નિયુક્તા વિષ્ણુના પુરા ॥

કુશગન્ધયવૈઃ પુષ્પૈર્ અર્ઘ્યં કૃત્વા ચ શૂકરઃ
વિશ્વેભ્યો દેવેભ્ય ઇતિ તતસ્ તાન્ પર્યપૃચ્છત ॥

પિતૄન્ આવાહયિષ્યામિ યે દિવ્યા યે ચ માનુષાઃ
આવાહયસ્વેતિ ચ તૈર્ ઉક્તસ્ ત્વ્ આવાહયેચ્ છુચિઃ ॥

શ્લિષ્ટમૂલાગ્રદર્ભાંસ્ તુ સતિલાન્ વેદ વેદવિત્
જાનાવ્ આરોપ્ય હસ્તં તુ દદૌ સવ્યેન ચાસનમ્ ॥

તથૈવ જાનુસંસ્થેન કરેણૈકેન તાન્ પિતૄન્
વારાહઃ પિતૃવિપ્રાણામ્ આયાન્તુ ન ઇતીરયન્ ॥

અપહતેત્ય્ ઉવાચૈવ રક્ષણં ચાપસવ્યતઃ
કૃત્વા ચાવાહનં ચક્રે પિતૄણાં નામગોત્રતઃ ॥

તત્ પિતરો મનોજરાન્ આગચ્છત ઇતીરયન્
સંવત્સરૈર્ ઇત્ય્ ઉદીર્ય તતો ઽર્ઘ્યં તેષુ વિન્યસેત્ ॥

યાસ્ તિષ્ઠન્ત્ય્ અમૃતા વાચો યન્ મૈતિ ચ પિતુઃ પિતુઃ
યન્ મે પિતામહાઇત્ય્ એવં દદાવ્ અર્ઘ્યં પિતામહ ॥

યન્ મે પ્રપિતામહાઇતિ દદૌ ચ પ્રપિતામહે
કુશગન્ધતિલોન્મિશ્રં સપુષ્પમ્ અપસવ્યતઃ ॥

તદ્વન્ માતામહેભ્યસ્ તુ વિધિં ચક્રે જનાર્દનઃ
તાન્ અર્ચ્ય ભૂયો ગન્ધાદ્યૈર્ ધૂપં દત્ત્વા તુ ભક્તિતઃ ॥

આદિત્યા વસવો રુદ્રા ઇત્ય્ ઉચ્ચાર્ય જગત્પ્રભુઃ
તતશ્ ચાન્નં સમાદાય સર્પિસ્તિલકુશાકુલમ્ ॥

વિધાય પાત્રે તચ્ ચૈવ પર્યપૃચ્છત્ તતો મુનીન્
અગ્નૌ કરિષ્ય ઇતિ તૈઃ કુરુષ્વેતિ ચ ચોદિતઃ ॥

આહુતિત્રિતયં દદ્યાત્ સોમાયાગ્નેર્ યમાય ચ
યે મામકાઇતિ ચ જપેદ્ યજુઃસપ્તકમ્ અચ્યુતમ્ ॥

હુતાવશિષ્ટં ચ દદૌ નામગોત્રસમન્વિતમ્
ત્રિર્ આહુતિકમ્ એકૈકં પિતરં તુ પ્રતિ દ્વિજાઃ ॥

અતો ઽવશિષ્ટમ્ અન્નાદ્યં પિણ્ડપાત્રે તુ નિક્ષિપેત્
તતો ઽન્નં સરસં સ્વાદુ દદૌ પાયસપૂર્વકમ્ ॥

પ્રત્યગ્રમ્ એકદા સ્વિન્નમ્ અપર્યુષિતમ્ ઉત્તમમ્
અલ્પશાકં બહુફલં ષડ્રસમ્ અમૃતોપમમ્ ॥

યદ્ બ્રાહ્મણેષુ પ્રદદૌ પિણ્ડપાત્રે પિતૄંસ્ તથા
વેદપૂર્વં પિતૃસ્વન્નમ્ આજ્યપ્લુતં મધૂક્ષિતમ્ ॥

મન્ત્રિતં પૃથિવીત્ય્ એવં મધુવાતાતૃચં જગૌ
ભુઞ્જાનેષુ તુ વિપ્રેષુ જપન્ વૈ મન્ત્રપઞ્ચકમ્ ॥

યત્ તે પ્રકારમ્ આરભ્ય નાધિકં તે તતો જગૌ
ત્રિમધુ ત્રિસુપર્ણં ચ બૃહદારણ્યકં તથા ॥

જજાપ વૈષાં જાપ્યં તુ સૂક્તં સૌરં સપૌરુષમ્
ભુક્તવત્સુ ચ વિપ્રેષુ પૃષ્ટ્વા તૃપ્તા સ્થ ઇત્ય્ ઉત ॥

તૃપ્તાઃ સ્મેતિ સકૃત્ તોયં દદૌ મૌનવિમોચનમ્
પિણ્ડપાત્રં સમાદાય ચ્છાયાયૈ પ્રદદૌ તતઃ ॥

સા તદ્ અન્નં દ્વિધા કૃત્વા ત્રિધૈકૈકમ્ અથાકરોત્
વારાહો ભૂમ્ અથોલ્લિખ્ય સમાચ્છાદ્ય કુશૈર્ અપિ ॥

દક્ષિણાગ્રાન્ કુશાન્ કૃત્વા તેષામ્ ઉપરિ ચાસનમ્
સતિલેષુ સમૂલેષુ કુશેષ્વ્ એવ તુ સંશ્રયઃ ॥

ગન્ધપુષ્પાદિકં કૃત્વા તતઃ પિણ્ડં તુ ભક્તિતઃ
પૃથિવી દધીર્ ઇત્ય્ ઉક્ત્વા તતઃ પિણ્ડં પ્રદત્તવાન્ ॥

પિતામહાઃ પ્રપિતામહાસ્ તથેતિ ચાન્તરિક્ષતઃ
માતામહાનામ્ અપ્ય્ એવં દદૌ પિણ્ડાન્ સ શૂકરઃ ॥

પિણ્ડનિર્વાપણોચ્છિષ્ટમ્ અન્નં લેપભુજેષ્વ્ અદાત્
એતદ્ વઃ પિતર્ ઇત્ય્ ઉક્ત્વા દદૌ વાસાંસિ ભક્તિતઃ ॥

દ્વ્યઙ્ગુલજાનિ શુક્લાનિ ધૌતાન્ય્ અભિનવાનિ ચ
ગન્ધપુષ્પાદિકં દત્ત્વા કૃત્વા ચૈષાં પ્રદક્ષિણામ્ ॥

આચમ્યાચામયેદ્ વિપ્રાન્ પૈત્રાન્ આદૌ તતઃ સુરાન્
તતસ્ ત્વ્ અભ્યુક્ષ્ય તાં ભૂમિં દત્ત્વાપઃ સુમનોક્ષતાન્ ॥

સતિલામ્બુ પિતૃષ્વ્ આદૌ દત્ત્વા દેવેષુ સાક્ષતમ્
અક્ષય્યં નસ્ ત્વ્ ઇતિ પિતૄન્ પ્રીયતામ્ ઇતિ દેવતાઃ ॥

પ્રીણયિત્વા પરાવૃત્ય ત્રિર્ જપેચ્ ચાઘમર્ષણમ્
તતો નિવૃત્ય તુ જપેદ્ યન્ મે નામ ઇતીરયન્ ॥

ગૃહાન્ નઃ પિતરો દત્ત ધનધાન્યપ્રપૂરિતાન્
અર્ઘ્યપાત્રાણિ પિણ્ડાનામ્ અન્તરે સ પવિત્રકાન્ ॥

નિક્ષિપ્યોર્જં વહન્તીતિ કોકાતોયમ્ અથો ઽજપત્
હિમક્ષીરં મધુતિલાન્ પિતૄણાં તર્પણં દદૌ ॥

સ્વસ્તીત્ય્ ઉક્તે પૈતૃકૈસ્ તુ સોરાહ્ને પ્નાવતર્પયન્
રજતં દક્ષિણાં દત્ત્વા વિપ્રાન્ દેવો ગદાધરઃ ॥

સંવિભાગં મનુષ્યેભ્યો દદૌ સ્વદ્ ઇતિ ચાબ્રુવન્
કશ્ચિત્ સંપન્નમ્ ઇત્ય્ ઉક્ત્વા પ્રત્યુક્તસ્ તૈર્ દ્વિજોત્તમાઃ ॥

અભિરમ્યતામ્ ઇત્ય્ ઉવાચ પ્રોચુસ્ તે ઽભિરતાઃ સ્મ વૈ
શિષ્ટમ્ અન્નં ચ પપ્રચ્છ તૈર્ ઇષ્ટૈઃ સહ ચોદિતઃ ॥

પાણાવ્ આદાય તાન્ વિપ્રાન્ કુર્યાદ્ અનુગતસ્ તદા
વાજે વાજે ઇતિ પઠન્ બહિર્ વેદિ વિનિર્ગતઃ ॥

કોટિતીર્થજલેનાસાવ્ અપસવ્યં સમુત્ક્ષિપન્
અલગ્નાન્ વિપુલાન્ વાલાન્ પ્રાર્થયામ્ આસ ચાશિષમ્ ॥

દાતારો નો ઽભિવર્ધન્તાં તૈસ્ તથેતિ સમીરિતઃ
પ્રદક્ષિણમ્ ઉપાવૃત્ય કૃત્વા પાદાભિવાદનમ્ ॥

આસનાનિ દદૌ ચૈષાં છાદયામ્ આસ શૂકરઃ
વિશ્રામ્યતાં પ્રવિશ્યાથ પિણ્ડં જગ્રાહ મધ્યમમ્ ॥

છાયામયી મહી પત્ની તસ્યૈ પિણ્ડમ્ અદાત્ પ્રભુઃ
આધત્ત પિતરો ગર્ભમ્ ઇત્ય્ ઉક્ત્વા સાપિ રૂપિણી ॥

પિણ્ડં ગૃહીત્વા વિપ્રાણાં ચક્રે પાદાભિવન્દનમ્
વિસર્જનં પિતૄણાં સ કર્તુકામશ્ ચ શૂકરઃ ॥

કોકા ચ પિતરશ્ ચૈવ પ્રોચુઃ સ્વાર્થકરં વચઃ
શપ્તાશ્ ચ ભગવન્ પૂર્વં દિવસ્થા હિમભાનુના ॥

યોગભ્રષ્ટા ભવિષ્યધ્વં સર્વ એવ દિવશ્ ચ્યુતાઃ
તદ્ એવં ભવતા ત્રાતાઃ પ્રવિશન્તો રસાતલમ્ ॥

યોગભ્રષ્ટાંશ્ ચ વિશ્વેશાસ્ તત્યજુર્ યોગરક્ષિણઃ
તત્ તે ભૂયો ઽભિરક્ષન્તુ વિશ્વે દેવા હિ નઃ સદા ॥

સ્વર્ગં યાસ્યામશ્ ચ વિભો પ્રસાદાત્ તવ શૂકર
સોમો ઽધિદેવો ઽસ્માકં ચ ભવત્વ્ અચ્યુત યોગધૃક્ ॥

યોગાધારસ્ તથા સોમસ્ ત્રાયતે ન કદાચન
દિવિ ભૂમૌ સદા વાસો ભવત્વ્ અસ્માસુ યોગતઃ ॥

અન્તરિક્ષે ચ કેષાંચિન્ માસં પુષ્ટિસ્ તથાસ્તુ નઃ
ઊર્જા ચેયં હિ નઃ પત્ની સ્વધાનામ્ના તુ વિશ્રુતા ॥

ભવત્વ્ એષૈવ યોગાઢ્યા યોગમાતા ચ ખેચરી
ઇત્ય્ એવમ્ ઉક્તઃ પિતૃભિર્ વારાહો ભૂતભાવનઃ ॥

પ્રોવાચાથ પિતૄન્ વિષ્ણુસ્ તાં ચ કોકાં મહાનદીમ્
યદ્ ઉક્તં તુ ભવદ્ભિર્ મે સર્વમ્ એતદ્ ભવિષ્યતિ ॥

યમો ઽધિદેવો ભવતાં સોમઃ સ્વાધ્યાય ઈરિતઃ
અધિયજ્ઞસ્ તથૈવાગ્નિર્ ભવતાં કલ્પના ત્વ્ ઇયમ્ ॥

અગ્નિર્ વાયુશ્ ચ સૂર્યશ્ ચ સ્થાનં હિ ભવતામ્ ઇતિ
બ્રહ્મા વિષ્ણુશ્ ચ રુદ્રશ્ ચ ભવતામ્ અધિપૂરુષાઃ ॥

આદિત્યા વસવો રુદ્રા ભવતાં મૂર્તયસ્ ત્વ્ ઇમાઃ
યોગિનો યોગદેહાશ્ ચ યોગધારાશ્ ચ સુવ્રતાઃ ॥

કામતો વિચરિષ્યધ્વં ફલદાઃ સર્વજન્તુષુ
સ્વર્ગસ્થાન્ નરકસ્થાંશ્ ચ ભૂમિસ્થાંશ્ ચ ચરાચરાન્ ॥

નિજયોગબલેનૈવા પ્યાયયિષ્યધ્વમ્ ઉત્તમાઃ
ઇયમ્ ઊર્જા શશિસુતા કીલાલમધુવિગ્રહા ॥

ભવિષ્યતિ મહાભાગા દક્ષસ્ય દુહિતા સ્વધા
તત્રેયં ભવતાં પત્ની ભવિષ્યતિ વરાનના ॥

કોકાનદીતિ વિખ્યાતા ગિરિરાજસમાશ્રિતા
તીર્થકોટિમહાપુણ્યા મદ્રૂપપરિપાલિતા ॥

અસ્યામ્ અદ્ય પ્રભૃતિ વૈ નિવત્સ્યામ્ય્ અઘનાશકૃત્
વરાહદર્શનં પુણ્યં પૂજનં ભુક્તિમુક્તિદમ્ ॥

કોકાસલિલપાનં ચ મહાપાતકનાશનમ્
તીર્થેષ્વ્ આપ્લવનં પુણ્યમ્ ઉપવાસશ્ ચ સ્વર્ગદઃ ॥

દાનમ્ અક્ષય્યમ્ ઉદિતં જન્મમૃત્યુજરાપહમ્
માઘે માસ્ય્ અસિતે પક્ષે ભવદ્ભિર્ ઉડુપક્ષયે ॥

કોકામુખમ્ ઉપાગમ્ય સ્થાતવ્યં દિનપઞ્ચકમ્
તસ્મિન્ કાલે તુ યઃ શ્રાદ્ધં પિતૄણાં નિર્વપિષ્યતિ ॥

પ્રાગુક્તફલભાગી સ ભવિષ્યતિ ન સંશયઃ
એકાદશીં દ્વાદશીં ચ સ્થેયમ્ અત્ર મયા સદા ॥

યસ્ તત્રોપવસેદ્ ધીમાન્ સ પ્રાગુક્તફલં લભેત્
તદ્ વ્રજધ્વં મહાભાગાઃ સ્થાનમ્ ઇષ્ટં યથેષ્ટતઃ ॥

અહમ્ અપ્ય્ અત્ર વત્સ્યામીત્ય્ ઉક્ત્વા સો ઽન્તરધીયત
ગતે વરાહે પિતરઃ કોકામ્ આમન્ત્ર્ય તે યયુઃ ॥

કોકાપિ તીર્થસહિતા સંસ્થિતા ગિરિરાજનિ
છાયા મહીમયી ક્રોડી પિણ્ડપ્રાશનબૃંહિતા ॥

ગર્ભમ્ આદાય સશ્રદ્ધા વારાહસ્યૈવ સુન્દરી
તતો ઽસ્યાઃ પ્રાભવત્ પુત્રો ભૌમસ્ તુ નરકાસુરઃ
પ્રાગ્જ્યોતિષં ચ નગરમ્ અસ્ય દત્તં ચ વિષ્ણુના ॥

એવં મયોક્તં વરદસ્ય વિષ્ણોઃ કોકામુખે દિવ્યવરાહરૂપમ્
શ્રુત્વા નરસ્ ત્યક્તમલો વિપાપ્મા દશાશ્વમેધેષ્ટિફલં લભેત