બ્રહ્મ પુરાણ · અધ્યાય 13

પુરોર્ વંશં વયં સૂત શ્રોતુમ્ ઇચ્છામ તત્ત્વતઃ
દ્રુહ્યસ્યાનોર્ યદોશ્ ચૈવ તુર્વસોશ્ ચ પૃથક્ પૃથક્ ॥

શૃણુધ્વં મુનિશાર્દૂલાઃ પુરોર્ વંશં મહાત્મનઃ
વિસ્તરેણાનુપૂર્વ્યા ચ પ્રથમં વદતો મમ ॥

પુરોઃ પુત્રઃ સુવીરો ઽભૂન્ મનસ્યુસ્ તસ્ય ચાત્મજઃ
રાજા ચાભયદો નામ મનસ્યોર્ અભવત્ સુતઃ ॥

તથૈવાભયદસ્યાસીત્ સુધન્વા નામ પાર્થિવઃ
સુધન્વનઃ સુબાહુશ્ ચ રૌદ્રાશ્વસ્ તસ્ય ચાત્મજઃ ॥

રૌદ્રાશ્વસ્ય દશાર્ણેયુઃ કૃકણેયુસ્ તથૈવ ચ
કક્ષેયુસ્થણ્ડિલેયુશ્ ચ સન્નતેયુસ્ તથૈવ ચ ॥

ઋચેયુશ્ ચ જલેયુશ્ ચ સ્થલેયુશ્ ચ મહાબલઃ
ધનેયુશ્ ચ વનેયુશ્ ચ પુત્રકાશ્ ચ દશ સ્ત્રિયઃ ॥

ભદ્રા શૂદ્રા ચ મદ્રા ચ શલદા મલદા તથા
ખલદા ચ તતો વિપ્રા નલદા સુરસાપિ ચ ॥

તથા ગોચપલા ચ સ્ત્રી રત્નકૂટા ચ તા દશ
ઋષિર્ જાતો ઽત્રિવંશે ચ તાસાં ભર્તા પ્રભાકરઃ ॥

ભદ્રાયાં જનયામ્ આસ સુતં સોમં યશસ્વિનમ્
સ્વર્ભાનુના હતે સૂર્યે પતમાને દિવો મહીમ્ ॥

તમોભિભૂતે લોકે ચ પ્રભા યેન પ્રવર્તિતા
સ્વસ્તિ તે ઽસ્ત્વ્ ઇતિ ચોક્ત્વા વૈ પતમાનો દિવાકરઃ ॥

વચનાત્ તસ્ય વિપ્રર્ષેર્ ન પપાત દિવો મહીમ્
અત્રિશ્રેષ્ઠાનિ ગોત્રાણિ યશ્ ચકાર મહાતપાઃ ॥

યજ્ઞેષ્વ્ અત્રેર્ બલં ચૈવ દેવૈર્ યસ્ય પ્રતિષ્ઠિતમ્
સ તાસુ જનયામ્ આસ પુત્રિકાસ્વ્ આત્મકામજાન્ ॥

દશ પુત્રાન્ મહાસત્ત્વાંસ્ તપસ્ય્ ઉગ્રે રતાંસ્ તથા
તે તુ ગોત્રકરા વિપ્રા ઋષયો વેદપારગાઃ ॥

સ્વસ્ત્યાત્રેયા ઇતિ ખ્યાતાઃ કિંચ ત્રિધનવર્જિતાઃ
કક્ષેયોસ્ તનયાસ્ ત્વ્ આસંસ્ ત્રય એવ મહારથાઃ ॥

સભાનરશ્ ચાક્ષુષશ્ ચ પરમન્યુસ્ તથૈવ ચ
સભાનરસ્ય પુત્રસ્ તુ વિદ્વાન્ કાલાનલો નૃપઃ ॥

કાલાનલસ્ય ધર્મજ્ઞઃ સૃઞ્જયો નામ વૈ સુતઃ
સૃઞ્જયસ્યાભવત્ પુત્રો વીરો રાજા પુરંજયઃ ॥

જનમેજયો મુનિશ્રેષ્ઠાઃ પુરંજયસુતો ઽભવત્
જનમેજયસ્ય રાજર્ષેર્ મહાશાલો ઽભવત્ સુતઃ ॥

દેવેષુ સ પરિજ્ઞાતઃ પ્રતિષ્ઠિતયશા ભુવિ
મહામના નામ સુતો મહાશાલસ્ય વિશ્રુતઃ ॥

જજ્ઞે વીરઃ સુરગણૈઃ પૂજિતઃ સુમહામનાઃ
મહામનાસ્ તુ પુત્રૌ દ્વૌ જનયામ્ આસ ભો દ્વિજાઃ ॥

ઉશીનરં ચ ધર્મજ્ઞં તિતિક્ષું ચ મહાબલમ્
ઉશીનરસ્ય પત્ન્યસ્ તુ પઞ્ચ રાજર્ષિવંશજાઃ ॥

નૃગા કૃમિર્ નવા દર્વા પઞ્ચમી ચ દૃષદ્વતી
ઉશીનરસ્ય પુત્રાસ્ તુ પઞ્ચ તાસુ કુલોદ્વહાઃ ॥

તપસા ચૈવ મહતા જાતા વૃદ્ધસ્ય ચાત્મજાઃ
નૃગાયાસ્ તુ નૃગઃ પુત્રઃ કૃમ્યાં કૃમિર્ અજાયત ॥

નવાયાસ્ તુ નવઃ પુત્રો દર્વાયાઃ સુવ્રતો ઽભવત્
દૃષદ્વત્યાસ્ તુ સંજજ્ઞે શિબિર્ ઔશીનરો નૃપઃ ॥

શિબેસ્ તુ શિબયો વિપ્રા યૌધેયાસ્ તુ નૃગસ્ય હ
નવસ્ય નવરાષ્ટ્રં તુ કૃમેસ્ તુ કૃમિલા પુરી ॥

સુવ્રતસ્ય તથામ્બષ્ઠાઃ શિબિપુત્રાન્ નિબોધત
શિબેસ્ તુ શિબયઃ પુત્રાશ્ ચત્વારો લોકવિશ્રુતાઃ ॥

વૃષદર્ભઃ સુવીરશ્ ચ કેકયો મદ્રકસ્ તથા
તેષાં જનપદાઃ સ્ફીતા કેકયા મદ્રકાસ્ તથા ॥

વૃષદર્ભાઃ સુવીરાશ્ ચ તિતિક્ષોસ્ તુ પ્રજાસ્ ત્વ્ ઇમાઃ
તિતિક્ષુર્ અભવદ્ રાજા પૂર્વસ્યાં દિશિ ભો દ્વિજાઃ ॥

ઉષદ્રથો મહાવીર્યઃ ફેનસ્ તસ્ય સુતો ઽભવત્
ફેનસ્ય સુતપા જજ્ઞે તતઃ સુતપસો બલિઃ ॥

જાતો માનુષયોનૌ તુ સ રાજા કાઞ્ચનેષુધિઃ
મહાયોગી સ તુ બલિર્ બભૂવ નૃપતિઃ પુરા ॥

પુત્રાન્ ઉત્પાદયામ્ આસ પઞ્ચ વંશકરાન્ ભુવિ
અઙ્ગઃ પ્રથમતો જજ્ઞે વઙ્ગઃ સુહ્મસ્ તથૈવ ચ ॥

પુણ્ડ્રઃ કલિઙ્ગશ્ ચ તથા બાલેયં ક્ષત્રમ્ ઉચ્યતે
બાલેયા બ્રાહ્મણાશ્ ચૈવ તસ્ય વંશકરા ભુવિ ॥

બલેશ્ ચ બ્રહ્મણા દત્તો વરઃ પ્રીતેન ભો દ્વિજાઃ
મહાયોગિત્વમ્ આયુશ્ ચ કલ્પસ્ય પરિમાણતઃ ॥

બલે ચાપ્રતિમત્વં વૈ ધર્મતત્ત્વાર્થદર્શનમ્
સંગ્રામે ચાપ્ય્ અજેયત્વં ધર્મે ચૈવ પ્રધાનતામ્ ॥

ત્રૈલોક્યદર્શનં ચાપિ પ્રાધાન્યં પ્રસવે તથા
ચતુરો નિયતાન્ વર્ણાંસ્ ત્વં ચ સ્થાપયિતેતિ ચ ॥

ઇત્ય્ ઉક્તો વિભુના રાજા બલિઃ શાન્તિં પરાં યયૌ
કાલેન મહતા વિપ્રાઃ સ્વં ચ સ્થાનમ્ ઉપાગમત્ ॥

તેષાં જનપદાઃ પઞ્ચ અઙ્ગા વઙ્ગાઃ સસુહ્મકાઃ
કલિઙ્ગાઃ પુણ્ડ્રકાશ્ ચૈવ પ્રજાસ્ ત્વ્ અઙ્ગસ્ય સાંપ્રતમ્ ॥

અઙ્ગપુત્રો મહાન્ આસીદ્ રાજેન્દ્રો દધિવાહનઃ
દધિવાહનપુત્રસ્ તુ રાજા દિવિરથો ઽભવત્ ॥

પુત્રો દિવિરથસ્યાસીચ્ છક્રતુલ્યપરાક્રમઃ
વિદ્વાન્ ધર્મરથો નામ તસ્ય ચિત્રરથઃ સુતઃ ॥

તેન ધર્મરથેનાથ તદા કાલઞ્જરે ગિરૌ
યજતા સહ શક્રેણ સોમઃ પીતો મહાત્મના ॥

અથ ચિત્રરથસ્યાપિ પુત્રો દશરથો ઽભવત્
લોમપાદ ઇતિ ખ્યાતો યસ્ય શાન્તા સુતાભવત્ ॥

તસ્ય દાશરથિર્ વીરશ્ ચતુરઙ્ગો મહાયશાઃ
ઋષ્યશૃઙ્ગપ્રસાદેન જજ્ઞે વંશવિવર્ધનઃ ॥

ચતુરઙ્ગસ્ય પુત્રસ્ તુ પૃથુલાક્ષ ઇતિ સ્મૃતઃ
પૃથુલાક્ષસુતો રાજા ચમ્પો નામ મહાયશાઃ ॥

ચમ્પસ્ય તુ પુરી ચમ્પા યા માલિન્ય્ અભવત્ પુરા
પૂર્ણભદ્રપ્રસાદેન હર્યઙ્ગો ઽસ્ય સુતો ઽભવત્ ॥

તતો વૈભાણ્ડકિસ્ તસ્ય વારણં શક્રવારણમ્
અવતારયામ્ આસ મહીં મન્ત્રૈર્ વાહનમ્ ઉત્તમમ્ ॥

હર્યઙ્ગસ્ય સુતસ્ તત્ર રાજા ભદ્રરથઃ સ્મૃતઃ
પુત્રો ભદ્રરથસ્યાસીદ્ બૃહત્કર્મા પ્રજેશ્વરઃ ॥

બૃહદ્દર્ભઃ સુતસ્ તસ્ય યસ્માજ્ જજ્ઞે બૃહન્મનાઃ
બૃહન્મનાસ્ તુ રાજેન્દ્રો જનયામ્ આસ વૈ સુતમ્ ॥

નામ્ના જયદ્રથં નામ યસ્માદ્ દૃઢરથો નૃપઃ
આસીદ્ દૃઢરથસ્યાપિ વિશ્વજિજ્ જનમેજયી ॥

દાયાદસ્ તસ્ય વૈકર્ણો વિકર્ણસ્ તસ્ય ચાત્મજઃ
તસ્ય પુત્રશતં ત્વ્ આસીદ્ અઙ્ગાનાં કુલવર્ધનમ્ ॥

એતે ઽઙ્ગવંશજાઃ સર્વે રાજાનઃ કીર્તિતા મયા
સત્યવ્રતા મહાત્માનઃ પ્રજાવન્તો મહારથાઃ ॥

ઋચેયોસ્ તુ મુનિશ્રેષ્ઠા રૌદ્રાશ્વતનયસ્ય વૈ
શૃણુધ્વં સંપ્રવક્ષ્યામિ વંશં રાજ્ઞસ્ તુ ભો દ્વિજાઃ ॥

ઋચેયોસ્ તનયો રાજા મતિનારો મહીપતિઃ
મતિનારસુતાસ્ ત્વ્ આસંસ્ ત્રયઃ પરમધાર્મિકાઃ ॥

વસુરોધઃ પ્રતિરથઃ સુબાહુશ્ ચૈવ ધાર્મિકઃ
સર્વે વેદવિદશ્ ચૈવ બ્રહ્મણ્યાઃ સત્યવાદિનઃ ॥

ઇલા નામ તુ યસ્યાસીત્ કન્યા વૈ મુનિસત્તમાઃ
બ્રહ્મવાદિન્ય્ અધિસ્ત્રી સા તંસુસ્ તામ્ અભ્યગચ્છત ॥

તંસોઃ સુતો ઽથ રાજર્ષિર્ ધર્મનેત્રઃ પ્રતાપવાન્
બ્રહ્મવાદી પરાક્રાન્તસ્ તસ્ય ભાર્યોપદાનવી ॥

ઉપદાનવી તતઃ પુત્રાંશ્ ચતુરો ઽજનયચ્ છુબાન્
દુષ્યન્તમ્ અથ સુષ્મન્તં પ્રવીરમ્ અનઘં તથા ॥

દુષ્યન્તસ્ય તુ દાયાદો ભરતો નામ વીર્યવાન્
સ સર્વદમનો નામ નાગાયુતબલો મહાન્ ॥

ચક્રવર્તી સુતો જજ્ઞે દુષ્યન્તસ્ય મહાત્મનઃ
શકુન્તલાયાં ભરતો યસ્ય નામ્ના તુ ભારતાઃ ॥

ભરતસ્ય વિનષ્ટેષુ તનયેષુ મહીપતેઃ
માતૄણાં તુ પ્રકોપેણ મયા તત્ કથિતં પુરા ॥

બૃહસ્પતેર્ અઙ્ગિરસઃ પુત્રો વિપ્રો મહામુનિઃ
અયાજયદ્ ભરદ્વાજો મહદ્ભિઃ ક્રતુભિર્ વિભુઃ ॥

પૂર્વં તુ વિતથે તસ્ય કૃતે વૈ પુત્રજન્મનિ
તતો ઽથ વિતથો નામ ભરદ્વાજાત્ સુતો ઽભવત્ ॥

તતો ઽથ વિતથે જાતે ભરતસ્ તુ દિવં યયૌ
વિતથં ચાભિષિચ્યાથ ભરદ્વાજો વનં યયૌ ॥

સ ચાપિ વિતથઃ પુત્રાઞ્ જનયામ્ આસ પઞ્ચ વૈ
સુહોત્રં ચ સુહોતારં ગયં ગર્ગં તથૈવ ચ ॥

કપિલં ચ મહાત્માનં સુહોત્રસ્ય સુતદ્વયમ્
કાશિકં ચ મહાસત્યં તથા ગૃત્સમતિં નૃપમ્ ॥

તથા ગૃત્સમતેઃ પુત્રા બ્રાહ્મણાઃ ક્ષત્રિયા વિશઃ
કાશિકસ્ય તુ કાશેયઃ પુત્રો દીર્ઘતપાસ્ તથા ॥

બભૂવ દીર્ઘતપસો વિદ્વાન્ ધન્વન્તરિઃ સુતઃ
ધન્વન્તરેસ્ તુ તનયઃ કેતુમાન્ ઇતિ વિશ્રુતઃ ॥

તથા કેતુમતઃ પુત્રો વિદ્વાન્ ભીમરથઃ સ્મૃતઃ
પુત્રો ભીમરથસ્યાપિ વારાણસ્યધિપો ઽભવત્ ॥

દિવોદાસ ઇતિ ખ્યાતઃ સર્વક્ષત્રપ્રણાશનઃ
દિવોદાસસ્ય પુત્રસ્ તુ વીરો રાજા પ્રતર્દનઃ ॥

પ્રતર્દનસ્ય પુત્રૌ દ્વૌ વત્સો ભાર્ગવ એવ ચ
અલર્કો રાજપુત્રસ્ તુ રાજા સન્મતિમાન્ ભુવિ ॥

હૈહયસ્ય તુ દાયાદ્યં હૃતવાન્ વૈ મહીપતિઃ
આજહ્રે પિતૃદાયાદ્યં દિવોદાસહૃતં બલાત્ ॥

ભદ્રશ્રેણ્યસ્ય પુત્રેણ દુર્દમેન મહાત્મના
દિવોદાસેન બાલેતિ ઘૃણયાસૌ વિસર્જિતઃ ॥

અષ્ટારથો નામ નૃપઃ સુતો ભીમરથસ્ય વૈ
તેન પુત્રેણ બાલસ્ય પ્રહૃતં તસ્ય ભો દ્વિજાઃ ॥

વૈરસ્યાન્તં મુનિશ્રેષ્ઠાઃ ક્ષત્રિયેણ વિધિત્સતા
અલર્કઃ કાશિરાજસ્ તુ બ્રહ્મણ્યઃ સત્યસંગરઃ ॥

ષષ્ટિં વર્ષસહસ્રાણિ ષષ્ટિં વર્ષશતાનિ ચ
યુવા રૂપેણ સંપન્ન આસીત્ કાશિકુલોદ્વહઃ ॥

લોપામુદ્રાપ્રસાદેન પરમાયુર્ અવાપ સઃ
વયસો ઽન્તે મુનિશ્રેષ્ઠા હત્વા ક્ષેમકરાક્ષસમ્ ॥

રમ્યાં નિવેશયામ્ આસ પુરીં વારાણસીં નૃપઃ
અલર્કસ્ય તુ દાયાદઃ ક્ષેમકો નામ પાર્થિવઃ ॥

ક્ષેમકસ્ય તુ પુત્રો વૈ વર્ષકેતુસ્ તતો ઽભવત્
વર્ષકેતોશ્ ચ દાયાદો વિભુર્ નામ પ્રજેશ્વરઃ ॥

આનર્તસ્ તુ વિભોઃ પુત્રઃ સુકુમારસ્ તતો ઽભવત્
સુકુમારસ્ય પુત્રસ્ તુ સત્યકેતુર્ મહારથઃ ॥

સુતો ઽભવન્ મહાતેજા રાજા પરમધાર્મિકઃ
વત્સસ્ય વત્સભૂમિસ્ તુ ભર્ગભૂમિસ્ તુ ભાર્ગવાત્ ॥

એતે ત્વ્ અઙ્ગિરસઃ પુત્રા જાતા વંશે ઽથ ભાર્ગવે
બ્રાહ્મણાઃ ક્ષત્રિયા વૈશ્યાઃ શૂદ્રાશ્ ચ મુનિસત્તમાઃ ॥

આજમીઢો ઽપરો વંશઃ શ્રૂયતાં દ્વિજસત્તમાઃ
સુહોત્રસ્ય બૃહત્ પુત્રો બૃહતસ્ તનયાસ્ ત્રયઃ ॥

અજમીઢો દ્વિમીઢશ્ ચ પુરુમીઢશ્ ચ વીર્યવાન્
અજમીઢસ્ય પત્ન્યસ્ તુ તિસ્રો વૈ યશસાન્વિતાઃ ॥

નીલી ચ કેશિની ચૈવ ધૂમિની ચ વરાઙ્ગનાઃ
અજમીઢસ્ય કેશિન્યાં જજ્ઞે જહ્નુઃ પ્રતાપવાન્ ॥

આજહ્રે યો મહાસત્ત્રં સર્વમેધમખં વિભુમ્
પતિલોભેન યં ગઙ્ગા વિનીતેવ સસાર હ ॥

નેચ્છતઃ પ્લાવયામ્ આસ તસ્ય ગઙ્ગા ચ તત્ સદઃ
તત્ તયા પ્લાવિતં દૃષ્ટ્વા યજ્ઞવાટં સમન્તતઃ ॥

જહ્નુર્ અપ્ય્ અબ્રવીદ્ ગઙ્ગાં ક્રુદ્ધો વિપ્રાસ્ તદા નૃપઃ
એષ તે ત્રિષુ લોકેષુ સંક્ષિપ્યાપઃ પિબામ્ય્ અહમ્
અસ્ય ગઙ્ગે ઽવલેપસ્ય સદ્યઃ ફલમ્ અવાપ્નુહિ ॥

તતઃ પીતાં મહાત્માનો દૃષ્ટ્વા ગઙ્ગાં મહર્ષયઃ
ઉપનિન્યુર્ મહાભાગા દુહિતૃત્વેન જાહ્નવીમ્ ॥

યુવનાશ્વસ્ય પુત્રીં તુ કાવેરીં જહ્નુર્ આવહત્
ગઙ્ગાશાપેન દેહાર્ધં યસ્યાઃ પશ્ચાન્ નદીકૃતમ્ ॥

જહ્નોસ્ તુ દયિતઃ પુત્રો અજકો નામ વીર્યવાન્
અજકસ્ય તુ દાયાદો બલાકાશ્વો મહીપતિઃ ॥

બભૂવ મૃગયાશીલઃ કુશિકસ્ તસ્ય ચાત્મજઃ
પહ્નવૈઃ સહ સંવૃદ્ધો રાજા વનચરૈઃ સહ ॥

કુશિકસ્ તુ તપસ્ તેપે પુત્રમ્ ઇન્દ્રસમં વિભુમ્
લભેયમ્ ઇતિ તં શક્રસ્ ત્રાસાદ્ અભ્યેત્ય જજ્ઞિવાન્ ॥

સ ગાધિર્ અભવદ્ રાજા મઘવા કૌશિકઃ સ્વયમ્
વિશ્વામિત્રસ્ તુ ગાધેયો વિશ્વામિત્રાત્ તથાષ્ટકઃ ॥

અષ્ટકસ્ય સુતો લૌહિઃ પ્રોક્તો જહ્નુગણો મયા
આજમીઢો ઽપરો વંશઃ શ્રૂયતાં મુનિસત્તમાઃ ॥

અજમીઢાત્ તુ નીલ્યાં વૈ સુશાન્તિર્ ઉદપદ્યત
પુરુજાતિઃ સુશાન્તેશ્ ચ બાહ્યાશ્વઃ પુરુજાતિતઃ ॥

બાહ્યાશ્વતનયાઃ પઞ્ચ સ્ફીતા જનપદાવૃતાઃ
મુદ્ગલઃ સૃઞ્જયશ્ ચૈવ રાજા બૃહદિષુસ્ તદા ॥

યવીનરશ્ ચ વિક્રાન્તઃ કૃમિલાશ્વશ્ ચ પઞ્ચમઃ
પઞ્ચૈતે રક્ષણાયાલં દેશાનામ્ ઇતિ વિશ્રુતાઃ ॥

પઞ્ચાનાં તે તુ પઞ્ચાલાઃ સ્ફીતા જનપદાવૃતાઃ
અલં સંરક્ષણે તેષાં પઞ્ચાલા ઇતિ વિશ્રુતાઃ ॥

મુદ્ગલસ્ય તુ દાયાદો મૌદ્ગલ્યઃ સુમહાયશાઃ
ઇન્દ્રસેના યતો ગર્ભં વધ્ન્યં ચ પ્રત્યપદ્યત ॥

આસીત્ પઞ્ચજનઃ પુત્રઃ સૃઞ્જયસ્ય મહાત્મનઃ
સુતઃ પઞ્ચજનસ્યાપિ સોમદત્તો મહીપતિઃ ॥

સોમદત્તસ્ય દાયાદઃ સહદેવો મહાયશાઃ
સહદેવસુતશ્ ચાપિ સોમકો નામ વિશ્રુતઃ ॥

અજમીઢસુતો જાતઃ ક્ષીણે વંશે તુ સોમકઃ
સોમકસ્ય સુતો જન્તુર્ યસ્ય પુત્રશતં બભૌ ॥

તેષાં યવીયાન્ પૃષતો દ્રુપદસ્ય પિતા પ્રભુઃ
આજમીઢાઃ સ્મૃતાશ્ ચૈતે મહાત્માનસ્ તુ સોમકાઃ ॥

મહિષી ત્વ્ અજમીઢસ્ય ધૂમિની પુત્રગૃદ્ધિની
પતિવ્રતા મહાભાગા કુલજા મુનિસત્તમાઃ ॥

સા ચ પુત્રાર્થિની દેવી વ્રતચર્યાસમન્વિતા
તતો વર્ષાયુતં તપ્ત્વા તપઃ પરમદુશ્ચરમ્ ॥

હુત્વાગ્નિં વિધિવત્ સા તુ પવિત્રા મિતભોજના
અગ્નિહોત્રકુશેષ્વ્ એવ સુષ્વાપ મુનિસત્તમાઃ ॥

ધૂમિન્યા સ તયા દેવ્યા ત્વ્ અજમીઢઃ સમીયિવાન્
ઋક્ષં સંજનયામ્ આસ ધૂમ્રવર્ણં સુદર્શનમ્ ॥

ઋક્ષાત્ સંવરણો જજ્ઞે કુરુઃ સંવરણાત્ તથા
યઃ પ્રયાગાદ્ અતિક્રમ્ય કુરુક્ષેત્રં ચકાર હ ॥

પુણ્યં ચ રમણીયં ચ પુણ્યકૃદ્ભિર્ નિષેવિતમ્
તસ્યાન્વવાયઃ સુમહાન્ યસ્ય નામ્નાથ કૌરવાઃ ॥

કુરોશ્ ચ પુત્રાશ્ ચત્વારઃ સુધન્વા સુધનુસ્ તથા
પરીક્ષિચ્ ચ મહાબાહુઃ પ્રવરશ્ ચારિમેજયઃ ॥

પરીક્ષિતસ્ તુ દાયાદો ધાર્મિકો જનમેજયઃ
શ્રુતસેનો ઽગ્રસેનશ્ ચ ભીમસેનશ્ ચ નામતઃ ॥

એતે સર્વે મહાભાગા વિક્રાન્તા બલશાલિનઃ
જનમેજયસ્ય પુત્રસ્ તુ સુરથો મતિમાંસ્ તથા ॥

સુરથસ્ય તુ વિક્રાન્તઃ પુત્રો જજ્ઞે વિદૂરથઃ
વિદૂરથસ્ય દાયાદ ઋક્ષ એવ મહારથઃ ॥

દ્વિતીયસ્ તુ ભરદ્વાજાન્ નામ્ના તેનૈવ વિશ્રુતઃ
દ્વાવ્ ઋક્ષૌ સોમવંશે ઽસ્મિન્ દ્વાવ્ એવ ચ પરીક્ષિતૌ ॥

ભીમસેનાસ્ ત્રયો વિપ્રા દ્વૌ ચાપિ જનમેજયૌ
ઋક્ષસ્ય તુ દ્વિતીયસ્ય ભીમસેનો ઽભવત્ સુતઃ ॥

પ્રતીપો ભીમસેનાત્ તુ પ્રતીપસ્ય તુ શાંતનુઃ
દેવાપિર્ બાહ્લિકશ્ ચૈવ ત્રય એવ મહારથાઃ ॥

શાંતનોસ્ ત્વ્ અભવદ્ ભીષ્મસ્ તસ્મિન્ વંશે દ્વિજોત્તમાઃ
બાહ્લિકસ્ય તુ રાજર્ષેર્ વંશં શૃણુત ભો દ્વિજાઃ ॥

બાહ્લિકસ્ય સુતશ્ ચૈવ સોમદત્તો મહાયશાઃ
જજ્ઞિરે સોમદત્તાત્ તુ ભૂરિર્ ભૂરિશ્રવાઃ શલઃ ॥

ઉપાધ્યાયસ્ તુ દેવાનાં દેવાપિર્ અભવન્ મુનિઃ
ચ્યવનપુત્રઃ કૃતક ઇષ્ટ આસીન્ મહાત્મનઃ ॥

શાંતનુસ્ ત્વ્ અભવદ્ રાજા કૌરવાણાં ધુરંધરઃ
શાંતનોઃ સંપ્રવક્ષ્યામિ વંશં ત્રૈલોક્યવિશ્રુતમ્ ॥

ગાઙ્ગં દેવવ્રતં નામ પુત્રં સો ઽજનયત્ પ્રભુઃ
સ તુ ભીષ્મ ઇતિ ખ્યાતઃ પાણ્ડવાનાં પિતામહઃ ॥

કાલી વિચિત્રવીર્યં તુ જનયામ્ આસ ભો દ્વિજાઃ
શાંતનોર્ દયિતં પુત્રં ધર્માત્માનમ્ અકલ્મષમ્ ॥

કૃષ્ણદ્વૈપાયનાચ્ ચૈવ ક્ષેત્રે વૈચિત્રવીર્યકે
ધૃતરાષ્ટ્રં ચ પાણ્ડું ચ વિદુરં ચાપ્ય્ અજીજનત્ ॥

ધૃતરાષ્ટ્રસ્ તુ ગાન્ધાર્યાં પુત્રાન્ ઉત્પાદયચ્ છતમ્
તેષાં દુર્યોધનઃ શ્રેષ્ઠઃ સર્વેષામ્ અપિ સ પ્રભુઃ ॥

પાણ્ડોર્ ધનંજયઃ પુત્રઃ સૌભદ્રસ્ તસ્ય ચાત્મજઃ
અભિમન્યોઃ પરીક્ષિત્ તુ પિતા પારીક્ષિતસ્ય હ ॥

પારીક્ષિતસ્ય કાશ્યાયાં દ્વૌ પુત્રૌ સંબભૂવતુઃ
ચન્દ્રાપીડસ્ તુ નૃપતિઃ સૂર્યાપીડશ્ ચ મોક્ષવિત્ ॥

ચન્દ્રાપીડસ્ય પુત્રાણાં શતમ્ ઉત્તમધન્વિનામ્
જાનમેજયમ્ ઇત્ય્ એવં ક્ષાત્રં ભુવિ પરિશ્રુતમ્ ॥

તેષાં જ્યેષ્ઠસ્ તુ તત્રાસીત્ પુરે વારણસાહ્વયે
સત્યકર્ણો મહાબાહુર્ યજ્વા વિપુલદક્ષિણઃ ॥

સત્યકર્ણસ્ય દાયાદઃ શ્વેતકર્ણઃ પ્રતાપવાન્
અપુત્રઃ સ તુ ધર્માત્મા પ્રવિવેશ તપોવનમ્ ॥

તસ્માદ્ વનગતા ગર્ભં યાદવી પ્રત્યપદ્યત
સુચારોર્ દુહિતા સુભ્રૂર્ માલિની ગ્રાહમાલિની ॥

સંભૂતે સ ચ ગર્ભે ચ શ્વેતકર્ણઃ પ્રજેશ્વરઃ
અન્વગચ્છત્ કૃતં પૂર્વં મહાપ્રસ્થાનમ્ અચ્યુતમ્ ॥

સા તુ દૃષ્ટ્વા પ્રિયં તં તુ માલિની પૃષ્ઠતો ઽન્વગાત્
સુચારોર્ દુહિતા સાધ્વી વને રાજીવલોચના ॥

પથિ સા સુષુવે બાલા સુકુમારં કુમારકમ્
તમ્ અપાસ્યાથ તત્રૈવ રાજાનં સાન્વગચ્છત ॥

પતિવ્રતા મહાભાગા દ્રૌપદીવ પુરા સતી
કુમારઃ સુકુમારો ઽસૌ ગિરિપૃષ્ઠે રુરોદ હ ॥

દયાર્થં તસ્ય મેઘાસ્ તુ પ્રાદુરાસન્ મહાત્મનઃ
શ્રવિષ્ઠાયાસ્ તુ પુત્રૌ દ્વૌ પૈપ્પલાદિશ્ ચ કૌશિકઃ ॥

દૃષ્ટ્વા કૃપાન્વિતૌ ગૃહ્ય તૌ પ્રાક્ષાલયતાં જલે
નિઘૃષ્ટૌ તસ્ય પાર્શ્વૌ તુ શિલાયાં રુધિરપ્લુતૌ ॥

અજશ્યામઃ સ પાર્શ્વાભ્યાં ઘૃષ્ટાભ્યાં સુસમાહિતઃ
અજશ્યામૌ તુ તત્પાર્શ્વૌ દેવેન સંબભૂવતુઃ ॥

અથાજપાર્શ્વ ઇતિ વૈ ચક્રાતે નામ તસ્ય તૌ
સ તુ રેમકશાલાયાં દ્વિજાભ્યામ્ અભિવર્ધિતઃ ॥

રેમકસ્ય તુ ભાર્યા તમ્ ઉદ્વહત્ પુત્રકારણાત્
રેમત્યાઃ સ તુ પુત્રો ઽભૂદ્ બ્રાહ્મણૌ સચિવૌ તુ તૌ ॥

તેષાં પુત્રાશ્ ચ પૌત્રાશ્ ચ યુગપત્તુલ્યજીવિનઃ
સ એષ પૌરવો વંશઃ પાણ્ડવાનાં મહાત્મનામ્ ॥

શ્લોકો ઽપિ ચાત્ર ગીતો ઽયં નાહુષેણ યયાતિના
જરાસંક્રમણે પૂર્વં તદા પ્રીતેન ધીમતા ॥

અચન્દ્રાર્કગ્રહા ભૂમિર્ ભવેદ્ ઇયમ્ અસંશયમ્
અપૌરવા મહી નૈવ ભવિષ્યતિ કદાચન ॥

એષ વઃ પૌરવો વંશો વિખ્યાતઃ કથિતો મયા
તુર્વસોસ્ તુ પ્રવક્ષ્યામિ દ્રુહ્યોશ્ ચાનોર્ યદોસ્ તથા ॥

તુર્વસોસ્ તુ સુતો વહ્નિર્ ગોભાનુસ્ તસ્ય ચાત્મજઃ
ગોભાનોસ્ તુ સુતો રાજા ઐશાનુર્ અપરાજિતઃ ॥

કરંધમસ્ તુ ઐશાનોર્ મરુત્તસ્ તસ્ય ચાત્મજઃ
અન્યસ્ ત્વ્ આવિક્ષિતો રાજા મરુત્તઃ કથિતો મયા ॥

અનપત્યો ઽભવદ્ રાજા યજ્વા વિપુલદક્ષિણઃ
દુહિતા સંયતા નામ તસ્યાસીત્ પૃથિવીપતેઃ ॥

દક્ષિણાર્થં તુ સા દત્તા સંવર્તાય મહાત્મને
દુષ્યન્તં પૌરવં ચાપિ લેભે પુત્રમ્ અકલ્મષમ્ ॥

એવં યયાતિશાપેન જરાસંક્રમણે તદા
પૌરવં તુર્વસોર્ વંશં પ્રવિવેશ દ્વિજોત્તમાઃ ॥

દુષ્યન્તસ્ય તુ દાયાદઃ કરૂરોમઃ પ્રજેશ્વરઃ
કરૂરોમાદ્ અથાહ્રીદશ્ ચત્વારસ્ તસ્ય ચાત્મજાઃ ॥

પાણ્ડ્યશ્ ચ કેરલશ્ ચૈવ કાલશ્ ચોલશ્ ચ પાર્થિવઃ
દ્રુહ્યોશ્ ચ તનયો રાજન્ બભ્રુસેતુશ્ ચ પાર્થિવઃ ॥

અઙ્ગારસેતુસ્ તત્પુત્રો મરુતાં પતિર્ ઉચ્યતે
યૌવનાશ્વેન સમરે કૃચ્છ્રેણ નિહતો બલી ॥

યુદ્ધં સુમહદ્ અપ્ય્ આસીન્ માસાન્ પરિચરદ્ દશ
અઙ્ગારસેતોર્ દાયાદો ગાન્ધારો નામ પાર્થિવઃ ॥

ખ્યાયતે યસ્ય નામ્ના વૈ ગાન્ધારવિષયો મહાન્
ગાન્ધારદેશજાશ્ ચૈવ તુરગા વાજિનાં વરાઃ ॥

અનોસ્ તુ પુત્રો ધર્મો ઽભૂદ્ દ્યૂતસ્ તસ્યાત્મજો ઽભવત્
દ્યૂતાદ્ વનદુહો જજ્ઞે પ્રચેતાસ્ તસ્ય ચાત્મજઃ ॥

પ્રચેતસઃ સુચેતાસ્ તુ કીર્તિતાસ્ ત્વ્ અનવો મયા
બભૂવુસ્ તુ યદોઃ પુત્રાઃ પઞ્ચ દેવસુતોપમાઃ ॥

સહસ્રાદઃ પયોદશ્ ચ ક્રોષ્ટા નીલો ઽઞ્જિકસ્ તથા
સહસ્રાદસ્ય દાયાદાસ્ ત્રયઃ પરમધાર્મિકાઃ ॥

હૈહયશ્ ચ હયશ્ ચૈવ રાજા વેણુહયસ્ તથા
હૈહયસ્યાભવત્ પુત્રો ધર્મનેત્ર ઇતિ શ્રુતઃ ॥

ધર્મનેત્રસ્ય કાર્તસ્ તુ સાહઞ્જસ્ તસ્ય ચાત્મજઃ
સાહઞ્જની નામ પુરી તેન રાજ્ઞા નિવેશિતા ॥

આસીન્ મહિષ્મતઃ પુત્રો ભદ્રશ્રેણ્યઃ પ્રતાપવાન્
ભદ્રશ્રેણ્યસ્ય દાયાદો દુર્દમો નામ વિશ્રુતઃ ॥

દુર્દમસ્ય સુતો ધીમાન્ કનકો નામ નામતઃ
કનકસ્ય તુ દાયાદાશ્ ચત્વારો લોકવિશ્રુતાઃ ॥

કૃતવીર્યઃ કૃતૌજાશ્ ચ કૃતધન્વા તથૈવ ચ
કૃતાગ્નિસ્ તુ ચતુર્થો ઽભૂત્ કૃતવીર્યાદ્ અથાર્જુનઃ ॥

યો ઽસૌ બાહુસહસ્રેણ સપ્તદ્વીપેશ્વરો ઽભવત્
જિગાય પૃથિવીમ્ એકો રથેનાદિત્યવર્ચસા ॥

સ હિ વર્ષાયુતં તપ્ત્વા તપઃ પરમદુશ્ચરમ્
દત્તમ્ આરાધયામ્ આસ કાર્તવીર્યો ઽત્રિસંભવમ્ ॥

તસ્મૈ દત્તો વરાન્ પ્રાદાચ્ ચતુરો ભૂરિતેજસઃ
પૂર્વં બાહુસહસ્રં તુ પ્રાર્થિતં સુમહદ્ વરમ્ ॥

અધર્મે ઽધીયમાનસ્ય સદ્ભિસ્ તત્ર નિવારણમ્
ઉગ્રેણ પૃથિવીં જિત્વા ધર્મેણૈવાનુરઞ્જનમ્ ॥

સંગ્રામાન્ સુબહૂઞ્ જિત્વા હત્વા ચારીન્ સહસ્રશઃ
સંગ્રામે વર્તમાનસ્ય વધં ચાભ્યધિકાદ્ રણે ॥

તસ્ય બાહુસહસ્રં તુ યુધ્યતઃ કિલ ભો દ્વિજાઃ
યોગાદ્ યોગીશ્વરસ્યેવ પ્રાદુર્ભવતિ માયયા ॥

તેનેયં પૃથિવી સર્વા સપ્તદ્વીપા સપત્તના
સસમુદ્રા સનગરા ઉગ્રેણ વિધિના જિતા ॥

તેન સપ્તસુ દ્વીપેષુ સપ્ત યજ્ઞશતાનિ ચ
પ્રાપ્તાનિ વિધિના રાજ્ઞા શ્રૂયન્તે મુનિસત્તમાઃ ॥

સર્વે યજ્ઞા મુનિશ્રેષ્ઠાઃ સહસ્રશતદક્ષિણાઃ
સર્વે કાઞ્ચનયૂપાશ્ ચ સર્વે કાઞ્ચનવેદયઃ ॥

સર્વે દેવૈર્ મુનિશ્રેષ્ઠા વિમાનસ્થૈર્ અલંકૃતૈઃ
ગન્ધર્વૈર્ અપ્સરોભિશ્ ચ નિત્યમ્ એવોપશોભિતાઃ ॥

યસ્ય યજ્ઞે જગૌ ગાથાં ગન્ધર્વો નારદસ્ તથા
વરીદાસાત્મજો વિદ્વાન્ મહિમ્ના તસ્ય વિસ્મિતઃ ॥

ન નૂનં કાર્તવીર્યસ્ય ગતિં યાસ્યન્તિ પાર્થિવાઃ
યજ્ઞૈર્ દાનૈસ્ તપોભિશ્ ચ વિક્રમેણ શ્રુતેન ચ ॥

સ હિ સપ્તસુ દ્વીપેષુ ચર્મી ખડ્ગી શરાસની
રથી દ્વીપાન્ અનુચરન્ યોગી સંદૃશ્યતે નૃભિઃ ॥

અનષ્ટદ્રવ્યતા ચૈવ ન શોકો ન ચ વિભ્રમઃ
પ્રભાવેણ મહારાજ્ઞઃ પ્રજા ધર્મેણ રક્ષતઃ ॥

સ સર્વરત્નભાક્ સમ્રાટ્ ચક્રવર્તી બભૂવ હ
સ એવ પશુપાલો ઽભૂત્ ક્ષેત્રપાલઃ સ એવ ચ ॥

સ એવ વૃષ્ટ્યા પર્જન્યો યોગિત્વાદ્ અર્જુનો ઽભવત્
સ વૈ બાહુસહસ્રેણ જ્યાઘાતકઠિનત્વચા ॥

ભાતિ રશ્મિસહસ્રેણ શરદીવ ચ ભાસ્કરઃ
સ હિ નાગાન્ મનુષ્યેષુ માહિષ્મત્યાં મહાદ્યુતિઃ ॥

કર્કોટકસુતાઞ્ જિત્વા પુર્યાં તસ્યાં ન્યવેશયત્
સ વૈ વેગં સમુદ્રસ્ય પ્રાવૃટ્કાલે ઽમ્બુજેક્ષણઃ ॥

ક્રીડન્ન્ ઇવ ભુજોદ્ભિન્નં પ્રતિસ્રોતશ્ ચકાર હ
લુણ્ઠિતા ક્રીડતા તેન નદી તદ્ગ્રામમાલિની ॥

ચલદૂર્મિસહસ્રેણ શઙ્કિતાભ્યેતિ નર્મદા
તસ્ય બાહુસહસ્રેણ ક્ષિપ્યમાણે મહોદધૌ ॥

ભયાન્ નિલીના નિશ્ચેષ્ઠાઃ પાતાલસ્થા મહીસુરાઃ
ચૂર્ણીકૃતમહાવીચિં ચલન્મીનમહાતિમિમ્ ॥

મારુતાવિદ્ધફેનૌઘમ્ આવર્તક્ષોભસંકુલમ્
પ્રાવર્તયત્ તદા રાજા સહસ્રેણ ચ બાહુના ॥

દેવાસુરસમાક્ષિપ્તઃ ક્ષીરોદમ્ ઇવ મન્દરઃ
મન્દરક્ષોભચકિતા અમૃતોત્પાદશઙ્કિતાઃ ॥

સહસોત્પતિતા ભીતા ભીમં દૃષ્ટ્વા નૃપોત્તમમ્
નતા નિશ્ચલમૂર્ધાનો બભૂવુસ્ તે મહોરગાઃ ॥

સાયાહ્ને કદલીખણ્ડાઃ કમ્પિતા ઇવ વાયુના
સ વૈ બદ્ધ્વા ધનુર્ જ્યાભિર્ ઉત્સિક્તં પઞ્ચભિઃ શરૈઃ ॥

લઙ્કેશં મોહયિત્વા તુ સબલં રાવણં બલાત્
નિર્જિત્ય વશમ્ આનીય માહિષ્મત્યાં બબન્ધ તમ્ ॥

શ્રુત્વા તુ બદ્ધં પૌલસ્ત્યં રાવણં ત્વ્ અર્જુનેન ચ
તતો ગત્વા પુલસ્ત્યસ્ તમ્ અર્જુનં દદૃશે સ્વયમ્ ॥

મુમોચ રક્ષઃ પૌલસ્ત્યં પુલસ્ત્યેનાભિયાચિતઃ
યસ્ય બાહુસહસ્રસ્ય બભૂવ જ્યાતલસ્વનઃ ॥

યુગાન્તે તોયદસ્યેવ સ્ફુટતો હ્ય્ અશનેર્ ઇવ
અહો બત મૃધે વીર્યં ભાર્ગવસ્ય યદ્ અચ્છિનત્ ॥

રાજ્ઞો બાહુસહસ્રસ્ય હૈમં તાલવનં યથા
તૃષિતેન કદાચિત્ સ ભિક્ષિતશ્ ચિત્રભાનુના ॥

સ ભિક્ષામ્ અદદાદ્ વીરઃ સપ્ત દ્વીપાન્ વિભાવસોઃ
પુરાણિ ગ્રામઘોષાંશ્ ચ વિષયાંશ્ ચૈવ સર્વશઃ ॥

જજ્વાલ તસ્ય સર્વાણિ ચિત્રભાનુર્ દિધૃક્ષયા
સ તસ્ય પુરુષેન્દ્રસ્ય પ્રભાવેણ મહાત્મનઃ ॥

દદાહ કાર્તવીર્યસ્ય શૈલાંશ્ ચૈષ વનાનિ ચ
સ શૂન્યમ્ આશ્રમં રમ્યં વરુણસ્યાત્મજસ્ય વૈ ॥

દદાહ બલવદ્ભીતશ્ ચિત્રભાનુઃ સ હૈહયઃ
યં લેભે વરુણઃ પુત્રં પુરા ભાસ્વન્તમ્ ઉત્તમમ્ ॥

વસિષ્ઠં નામ સ મુનિઃ ખ્યાત આપવ ઇત્ય્ ઉત
યત્રાપવસ્ તુ તં ક્રોધાચ્ છપ્તવાન્ અર્જુનં વિભુઃ ॥

યસ્માન્ ન વર્જિતમ્ ઇદં વનં તે મમ હૈહય
તસ્માત્ તે દુષ્કરં કર્મ કૃતમ્ અન્યો હનિષ્યતિ ॥

રામો નામ મહાબાહુર્ જામદગ્ન્યઃ પ્રતાપવાન્
છિત્ત્વા બાહુસહસ્રં તે પ્રમથ્ય તરસા બલી ॥

તપસ્વી બ્રાહ્મણસ્ ત્વાં તુ હનિષ્યતિ સ ભાર્ગવઃ
અનષ્ટદ્રવ્યતા યસ્ય બભૂવામિત્રકર્ષિણઃ ॥

પ્રતાપેન નરેન્દ્રસ્ય પ્રજા ધર્મેણ રક્ષતઃ
પ્રાપ્તસ્ તતો ઽસ્ય મૃત્યુર્ વૈ તસ્ય શાપાન્ મહામુનેઃ ॥

વરસ્ તથૈવ ભો વિપ્રાઃ સ્વયમ્ એવ વૃતઃ પુરા
તસ્ય પુત્રશતં ત્વ્ આસીત્ પઞ્ચ શેષા મહાત્મનઃ ॥

કૃતાસ્ત્રા બલિનઃ શૂરા ધર્માત્માનો યશસ્વિનઃ
શૂરસેનશ્ ચ શૂરશ્ ચ વૃષણો મધુપધ્વજઃ ॥

જયધ્વજશ્ ચ નામ્નાસીદ્ આવન્ત્યો નૃપતિર્ મહાન્
કાર્તવીર્યસ્ય તનયા વીર્યવન્તો મહાબલાઃ ॥

જયધ્વજસ્ય પુત્રસ્ તુ તાલજઙ્ઘો મહાબલઃ
તસ્ય પુત્રશતં ખ્યાતાસ્ તાલજઙ્ઘા ઇતિ સ્મૃતાઃ ॥

તેષાં કુલે મુનિશ્રેષ્ઠા હૈહયાનાં મહાત્મનામ્
વીતિહોત્રાઃ સુજાતાશ્ ચ ભોજાશ્ ચાવન્તયઃ સ્મૃતાઃ ॥

તૌણ્ડિકેરાશ્ ચ વિખ્યાતાસ્ તાલજઙ્ઘાસ્ તથૈવ ચ
ભરતાશ્ ચ સુજાતાશ્ ચ બહુત્વાન્ નાનુકીર્તિતાઃ ॥

વૃષપ્રભૃતયો વિપ્રા યાદવાઃ પુણ્યકર્મિણઃ
વૃષો વંશધરસ્ તત્ર તસ્ય પુત્રો ઽભવન્ મધુઃ ॥

મધોઃ પુત્રશતં ત્વ્ આસીદ્ વૃષણસ્ તસ્ય વંશકૃત્
વૃષણાદ્ વૃષ્ણયઃ સર્વે મધોસ્ તુ માધવાઃ સ્મૃતાઃ ॥

યાદવા યદુનામ્ના તે નિરુચ્યન્તે ચ હૈહયાઃ
ન તસ્ય વિત્તનાશઃ સ્યાન્ નષ્ટં પ્રતિ લભેચ્ ચ સઃ ॥

કાર્તવીર્યસ્ય યો જન્મ કથયેદ્ ઇહ નિત્યશઃ
એતે યયાતિપુત્રાણાં પઞ્ચ વંશા દ્વિજોત્તમાઃ ॥

કીર્તિતા લોકવીરાણાં યે લોકાન્ ધારયન્તિ વૈ
ભૂતાનીવ મુનિશ્રેષ્ઠાઃ પઞ્ચ સ્થાવરજઙ્ગમાન્ ॥

શ્રુત્વા પઞ્ચ વિસર્ગાંસ્ તુ રાજા ધર્માર્થકોવિદઃ
વશી ભવતિ પઞ્ચાનામ્ આત્મજાનાં તથેશ્વરઃ ॥

લભેત્ પઞ્ચ વરાંશ્ ચૈવ દુર્લભાન્ ઇહ લૌકિકાન્
આયુઃ કીર્તિં તથા પુત્રાન્ ઐશ્વર્યં ભૂતિમ્ એવ ચ ॥

ધારણાચ્ છ્રવણાચ્ ચૈવ પઞ્ચવર્ગસ્ય ભો દ્વિજાઃ
ક્રોષ્ટોર્ વંશં મુનિશ્રેષ્ઠાઃ શૃણુધ્વં ગદતો મમ ॥

યદોર્ વંશધરસ્યાથ યજ્વિનઃ પુણ્યકર્મિણઃ
ક્રોષ્ટોર્ વંશં હિ શ્રુત્વૈવ સર્વપાપૈઃ પ્રમુચ્યતે
યસ્યાન્વવાયજો વિષ્ણુર્ હરિર્ વૃષ્ણિકુલોદ્વહઃ ॥