ભાગવત પુરાણ · અધ્યાય 09.22

ભ્પ્_09.22.001।0 શ્રીશુક ઉવાચ
મિત્રાયુશ્ચ દિવોદાસાચ્ ચ્યવનસ્તત્સુતો નૃપ ।
સુદાસઃ સહદેવો ઽથ સોમકો જન્તુજન્મકૃત્

તસ્ય પુત્રશતં તેષાં યવીયાન્ પૃષતઃ સુતઃ ।
સ તસ્માદ્દ્રુપદો જજ્ઞે સર્વસમ્પત્સમન્વિતઃ ।
દ્રુપદાદ્દ્રૌપદી તસ્ય ધૃષ્ટદ્યુમ્નાદયઃ સુતાઃ

ધૃષ્ટદ્યુમ્નાદ્ધૃષ્ટકેતુર્ભાર્મ્યાઃ પાઞ્ચાલકા ઇમે ।
યો ઽજમીઢસુતો હ્યન્ય ઋક્ષઃ સંવરણસ્તતઃ

તપત્યાં સૂર્યકન્યાયાં કુરુક્ષેત્રપતિઃ કુરુઃ ।
પરીક્ષિઃ સુધનુર્જહ્નુર્નિષધશ્ચ કુરોઃ સુતાઃ

સુહોત્રો ઽભૂત્ સુધનુષશ્ચ્યવનો ઽથ તતઃ કૃતી ।
વસુસ્તસ્યોપરિચરો બૃહદ્રથમુખાસ્તતઃ

કુશામ્બમત્સ્યપ્રત્યગ્ર ચેદિપાદ્યાશ્ચ ચેદિપાઃ ।
બૃહદ્રથાત્ કુશાગ્રો ઽભૂદૃષભસ્તસ્ય તત્સુતઃ

જજ્ઞે સત્યહિતો ઽપત્યં પુષ્પવાંસ્તત્સુતો જહુઃ ।
અન્યસ્યામપિ ભાર્યાયાં શકલે દ્વે બૃહદ્રથાત્

યે માત્રા બહિરુત્સૃષ્ટે જરયા ચાભિસન્ધિતે ।
જીવ જીવેતિ ક્રીડન્ત્યા જરાસન્ધો ઽભવત્ સુતઃ

તતશ્ચ સહદેવો ઽભૂત્ સોમાપિર્યચ્ છ્રુતશ્રવાઃ ।
પરીક્ષિરનપત્યો ઽભૂત્ સુરથો નામ જાહ્નવઃ

તતો વિદૂરથસ્તસ્માત્ સાર્વભૌમસ્તતો ઽભવત્ ।
જયસેનસ્તત્તનયો રાધિકો ઽતો ઽયુતાય્વ્ અભૂત્

તતશ્ચાક્રોધનસ્તસ્માદ્દેવાતિથિરમુષ્ય ચ ।
ઋક્ષસ્તસ્ય દિલીપો ઽભૂત્ પ્રતીપસ્તસ્ય ચાત્મજઃ

દેવાપિઃ શાન્તનુસ્તસ્ય બાહ્લીક ઇતિ ચાત્મજાઃ ।
પિતૃરાજ્યં પરિત્યજ્ય દેવાપિસ્તુ વનં ગતઃ

અભવચ્ છાન્તનૂ રાજા પ્રાઙ્ મહાભિષસંજ્ઞિતઃ ।
યં યં કરાભ્યાં સ્પૃશતિ જીર્ણં યૌવનમેતિ સઃ

શાન્તિમાપ્નોતિ ચૈવાગ્ર્યાં કર્મણા તેન શાન્તનુઃ ।
સમા દ્વાદશ તદ્રાજ્યે ન વવર્ષ યદા વિભુઃ

શાન્તનુર્બ્રાહ્મણૈરુક્તઃ પરિવેત્તાયમગ્રભુક્ ।
રાજ્યં દેહ્યગ્રજાયાશુ પુરરાષ્ટ્રવિવૃદ્ધયે

એવમુક્તો દ્વિજૈર્જ્યેષ્ઠં છન્દયામાસ સો ઽબ્રવીત્ ।
તન્મન્ત્રિપ્રહિતૈર્વિપ્રૈર્વેદાદ્વિભ્રંશિતો ગિરા

વેદવાદાતિવાદાન્ વૈ તદા દેવો વવર્ષ હ ।
દેવાપિર્યોગમાસ્થાય કલાપગ્રામમાશ્રિતઃ

સોમવંશે કલૌ નષ્ટે કૃતાદૌ સ્થાપયિષ્યતિ ।
બાહ્લીકાત્ સોમદત્તો ઽભૂદ્ભૂરિર્ભૂરિશ્રવાસ્તતઃ

શલશ્ચ શાન્તનોરાસીદ્ગઙ્ગાયાં ભીષ્મ આત્મવાન્ ।
સર્વધર્મવિદાં શ્રેષ્ઠો મહાભાગવતઃ કવિઃ

વીરયૂથાગ્રણીર્યેન રામો ઽપિ યુધિ તોષિતઃ ।
શાન્તનોર્દાસકન્યાયાં જજ્ઞે ચિત્રાઙ્ગદઃ સુતઃ

વિચિત્રવીર્યશ્ચાવરજો નામ્ના ચિત્રાઙ્ગદો હતઃ ।
યસ્યાં પરાશરાત્ સાક્ષાદવતીર્ણો હરેઃ કલા

વેદગુપ્તો મુનિઃ કૃષ્ણો યતો ઽહમિદમધ્યગામ્ ।
હિત્વા સ્વશિષ્યાન્ પૈલાદીન્ ભગવાન્ બાદરાયણઃ

મહ્યં પુત્રાય શાન્તાય પરં ગુહ્યમિદં જગૌ ।
વિચિત્રવીર્યો ઽથોવાહ કાશીરાજસુતે બલાત્

સ્વયંવરાદુપાનીતે અમ્બિકામ્બાલિકે ઉભે ।
તયોરાસક્તહૃદયો ગૃહીતો યક્ષ્મણા મૃતઃ

ક્ષેત્રે ઽપ્રજસ્ય વૈ ભ્રાતુર્માત્રોક્તો બાદરાયણઃ ।
ધૃતરાષ્ટ્રં ચ પાણ્ડું ચ વિદુરં ચાપ્યજીજનત્

ગાન્ધાર્યાં ધૃતરાષ્ટ્રસ્ય જજ્ઞે પુત્રશતં નૃપ ।
તત્ર દુર્યોધનો જ્યેષ્ઠો દુઃશલા ચાપિ કન્યકા

શાપાન્ મૈથુનરુદ્ધસ્ય પાણ્ડોઃ કુન્ત્યાં મહારથાઃ ।
જાતા ધર્માનિલેન્દ્રેભ્યો યુધિષ્ઠિરમુખાસ્ત્રયઃ

નકુલઃ સહદેવશ્ચ માદ્ર્યાં નાસત્યદસ્રયોઃ ।
દ્રૌપદ્યાં પઞ્ચ પઞ્ચભ્યઃ પુત્રાસ્તે પિતરો ઽભવન્

યુધિષ્ઠિરાત્ પ્રતિવિન્ધ્યઃ શ્રુતસેનો વૃકોદરાત્ ।
અર્જુનાચ્ છ્રુતકીર્તિસ્તુ શતાનીકસ્તુ નાકુલિઃ

સહદેવસુતો રાજન્ છ્રુતકર્મા તથાપરે ।
યુધિષ્ઠિરાત્ તુ પૌરવ્યાં દેવકો ઽથ ઘટોત્કચઃ

ભીમસેનાદ્ધિડિમ્બાયાં કાલ્યાં સર્વગતસ્તતઃ ।
સહદેવાત્ સુહોત્રં તુ વિજયાસૂત પાર્વતી

કરેણુમત્યાં નકુલો નરમિત્રં તથાર્જુનઃ ।
ઇરાવન્તમુલુપ્યાં વૈ સુતાયાં બભ્રુવાહનમ્ ।
મણિપુરપતેઃ સો ઽપિ તત્પુત્રઃ પુત્રિકાસુતઃ

તવ તાતઃ સુભદ્રાયામભિમન્યુરજાયત ।
સર્વાતિરથજિદ્વીર ઉત્તરાયાં તતો ભવાન્

પરિક્ષીણેષુ કુરુષુ દ્રૌણેર્બ્રહ્માસ્ત્રતેજસા ।
ત્વં ચ કૃષ્ણાનુભાવેન સજીવો મોચિતો ઽન્તકાત્

તવેમે તનયાસ્તાત જનમેજયપૂર્વકાઃ ।
શ્રુતસેનો ભીમસેન ઉગ્રસેનશ્ચ વીર્યવાન્

જનમેજયસ્ત્વાં વિદિત્વા તક્ષકાન્ નિધનં ગતમ્ ।
સર્પાન્ વૈ સર્પયાગાગ્નૌ સ હોષ્યતિ રુષાન્વિતઃ

કાલષેયં પુરોધાય તુરં તુરગમેધષાટ્ ।
સમન્તાત્ પૃથિવીં સર્વાં જિત્વા યક્ષ્યતિ ચાધ્વરૈઃ

તસ્ય પુત્રઃ શતાનીકો યાજ્ઞવલ્ક્યાત્ ત્રયીં પઠન્ ।
અસ્ત્રજ્ઞાનં ક્રિયાજ્ઞાનં શૌનકાત્ પરમેષ્યતિ

સહસ્રાનીકસ્તત્પુત્રસ્તતશ્ચૈવાશ્વમેધજઃ ।
અસીમકૃષ્ણસ્તસ્યાપિ નેમિચક્રસ્તુ તત્સુતઃ

ગજાહ્વયે હૃતે નદ્યા કૌશામ્બ્યાં સાધુ વત્સ્યતિ ।
ઉક્તસ્તતશ્ચિત્રરથસ્તસ્માચ્ છુચિરથઃ સુતઃ

તસ્માચ્ ચ વૃષ્ટિમાંસ્તસ્ય સુષેણો ઽથ મહીપતિઃ ।
સુનીથસ્તસ્ય ભવિતા નૃચક્ષુર્યત્ સુખીનલઃ

પરિપ્લવઃ સુતસ્તસ્માન્ મેધાવી સુનયાત્મજઃ ।
નૃપઞ્જયસ્તતો દૂર્વસ્તિમિસ્તસ્માજ્ જનિષ્યતિ

તિમેર્બૃહદ્રથસ્તસ્માચ્ છતાનીકઃ સુદાસજઃ ।
શતાનીકાદ્દુર્દમનસ્તસ્યાપત્યં મહીનરઃ

દણ્ડપાણિર્નિમિસ્તસ્ય ક્ષેમકો ભવિતા યતઃ ।
બ્રહ્મક્ષત્રસ્ય વૈ યોનિર્વંશો દેવર્ષિસત્કૃતઃ

ક્ષેમકં પ્રાપ્ય રાજાનં સંસ્થાં પ્રાપ્સ્યતિ વૈ કલૌ ।
અથ માગધરાજાનો ભાવિનો યે વદામિ તે

ભવિતા સહદેવસ્ય માર્જારિર્યચ્ છ્રુતશ્રવાઃ ।
તતો યુતાયુસ્તસ્યાપિ નિરમિત્રો ઽથ તત્સુતઃ

સુનક્ષત્રઃ સુનક્ષત્રાદ્બૃહત્સેનો ઽથ કર્મજિત્ ।
તતઃ સુતઞ્જયાદ્વિપ્રઃ શુચિસ્તસ્ય ભવિષ્યતિ

ક્ષેમો ઽથ સુવ્રતસ્તસ્માદ્ધર્મસૂત્રઃ સમસ્તતઃ ।
દ્યુમત્સેનો ઽથ સુમતિઃ સુબલો જનિતા તતઃ

સુનીથઃ સત્યજિદથ વિશ્વજિદ્યદ્રિપુઞ્જયઃ ।
બાર્હદ્રથાશ્ચ ભૂપાલા ભાવ્યાઃ સાહસ્રવત્સરમ્