ભગવદ્ગીતા · અધ્યાય 58

મધુસૂદનઃ -
યદ્-ભક્તિં ન વિના મુક્તિર્ યઃ સેવ્યઃ સર્વ-યોગિનામ્ ।
તં વન્દે પરમાનન્દ-ઘનં શ્રી-નન્દ-નન્દનમ્ ॥
એવં કર્મ-સંન્યાસાત્મક-સાધન-પ્રધાનેન પ્રથમ-ષટ્કેન જ્ઞેયં ત્વં-પદ-લક્ષ્યં સ-યોગં વ્યાખ્યાયાધુના ધ્યેય-બ્રહ્મ-પ્રતિપાદન-પ્રધાનેન મધ્યમેન ષટ્કેન તત્-પદાર્થો વ્યાખ્યાતવ્યઃ । તત્રાપિ --
યોગિનામ્ અપિ સર્વેષાં મદ્ગતેનાન્તરાત્મના ।
શ્રદ્ધાવાન્ ભજતે યો માં સ મે યુક્તતમો મતઃ ॥ [ગીતા 6.47]
ઇતિ પ્રાગ્-ઉક્તસ્ય ભગવદ્-ભજનસ્ય વ્યાખ્યાનાય સપ્તમો ઽધ્યાય આરભ્યતે । તત્ર કીદૃશં ભગવતો રૂપં ભજનીયં કથં વા તદ્-ગતો ઽન્તરાત્મા સ્યાદ્ ઇત્ય્ એતદ્-દ્વયં પ્રષ્ટવ્યમ્ અર્જુનેનાપૃષ્ટમ્ અપિ પરમ-કારુણિકતયા સ્વયમ્ એવ વિવક્ષુઃ શ્રી-ભગવાન્ ઉવાચ મયીતિ ।
મયિ પરમેશ્વરે સકલ-જગદ્-આયતનત્વાદિવિવિધ-વિભૂતિ-ભાગિનિ આસક્તં વિષયાન્તર-પરિહારેણ સર્વદા નિવિષ્ટં મનો યસ્ય તવ સ ત્વમ્ । અતએવ મદ્-આશ્રયો મદ્-એક-શરણઃ । રાજાશ્રયો ભાર્યાદ્ય્-આસક્ત-મનાશ્ ચ રાજ-ભૃત્યઃ પ્રસિદ્ધો મુમુક્ષુસ્ તુ મદ્-આશ્રયો મદ્-આસક્ત-મનાશ્ ચ । ત્વં ત્વદ્-વિધો વા યોગં યુઞ્જન્ મનઃ-સમાધાનં ષષ્ઠોક્ત-પ્રકારેણ કુર્વન્ । અસંશયં યથા ભવત્ય્ એવં સમગ્રં સર્વ-વિભૂતિ-બલ-શક્ત્યૈશ્વર્યાદિ-સમ્પન્નં માં યથા યેન પ્રકારેણ જ્ઞાસ્યસિ તચ્ છૃણૂચ્યમાનં મયા