અષ્ટાઙ્ગસંગ્રહ · અધ્યાય 6.6

અથાતઃ પ્રત્યેકગ્રહપ્રતિષેધં નામાધ્યાયં વ્યાખ્યાસ્યામઃ ।
ઇતિ હ સ્માહુરાત્રેયાદયો મહર્ષયઃ ॥

સ્કન્દગ્રહે ગુગ્ગુલ્વેલવાલુકમનશ્શિલાહરિતાલમઞ્જિષ્ઠોશીરરાસ્નાગરુદેવદારુશ્રીવેષ્ટકહરેણૂગિરિકદમ્બકચન્દનૈઃ શ્લક્ષ્ણપિષ્ટૈઃ પ્રદેહો વાતહરવૃક્ષપત્રક્વાથેન કવોષ્ણેન પરિષેકસ્તેષામેવ ચ મૂલક્વાથે સર્વગન્ધસુરામણ્ડકૈડર્યાવાપવત્તૈલં વિપક્વમભ્યઙ્ગઃ ॥

બૃંહતીદ્વયદ્વિપુર્નનવરેણુકોપકુલ્યામુસ્તખદિરવચાશઙ્ખનાભિસરલસર્પસુગન્ધાસુરાહ્વકલ્કવિપક્વંવા ॥

ક્ષીરિવૃક્ષકષાયેણ ક્ષીરેણ ચ સિદ્ધમર્ધપલિકૈશ્ચ પિષ્ટૈઃ સારિવાદ્વિકાકોલીદ્વિબલાંશુમતીદ્વયહસ્તિકર્ણપર્ણૈર્ઘૃતપ્રસ્થં પાનમ્ ॥

રાસ્નાદેવદાર્વન્યતરકલ્કેન વા સક્ષીરં સાધિતં સર્પિઃ ॥

વચાકાકાદનીસર્પકઞ્ચુકસર્ષપૈરુષ્ટ્રાજાવ્યશ્વગોરોમભિશ્ચ સઘૃતૈર્ધૂપૈઃ ।
સિદ્ધાર્થકસર્જરસકુષ્ઠહિઙ્ગુગુગ્ગુલુભિર્વા ॥

સોમવલ્લીન્દ્રવલ્લીશમીબિલ્વવૃન્દાકમૃગાદિનીમૂલાનિ સૂત્રેણ ગ્રથિતાનિ કણ્ઠેન શિરસા વા ધારયેત્ ॥

રક્તમાલ્યાનુલેપનવસ્ત્રપતાકામણિબીજૈર્વિવિધૈશ્ચ ભક્ષ્યૈઃ સદધિઘૃતમધુલાજકુલ્માષમાંસમત્સ્યસુરાસવં સમયૂરકુક્કુટં સઘણ્ટાકં સશૂર્પવ્યજનં ચ કુમારગ્રહે રક્તૌદનેન બલિમુપોષિતો નિવેદયેત્ ॥

તત્ર ચ રાત્રાવગ્નિં જ્વાલયિત્વા મન્ત્રમિમં પઠન્ મધુસર્પિષા જુહુયાત્ ॥

અગ્નયે કૃત્તિકાભ્યશ્ચ સ્વાહા સ્વાહેતિ ચાન્તતઃ ।
નમઃ સ્કન્દાય દેવાય ગ્રહાધિપતયે નમઃ ॥

શિરસા ત્વાભિવન્દેહં પ્રતિગૃહ્ણીષ્વ મે બલિમ્ ।
નીરુજો નિર્વિકારશ્ચ શિશુર્ભવતુ સર્વદા ॥

સર્વેષ્વેવ ગ્રહેષુ ત્રિકાલમગ્નિં પૂજયેત્તર્પયેચ્ચ ।
વિશેષતઃ સ્કન્દગ્રહે ત્રિરાત્રં ચ રાત્રૌ રાત્રૌ ગાયત્ર્યભિમન્ત્રિતોદકેન ચત્વરે ધાત્રીકુમારયોઃ સ્નપનમાચરેત્ ॥

ત્રિકાલં ચ મન્ત્રેણાનેન બાલમપમાર્જયેત્ પ્રતિસરાં ચ બધ્નીયાત્ ॥

તપસાં તેજસાં ચૈવ યશસાં વપુષાં તથા ।
વિધાતા યો ઽવ્યયો દેવઃ સ તે સ્કન્દઃ પ્રસીદતુ ॥

ગ્રહસેનાપતિર્દેવો દેવસેનાપતિર્વિભુઃ ।
દેવસેનારિપુહરઃ પાતુ ત્વા ભગવાન્ ગુહઃ ॥

દેવદેવસ્ય મહતઃ પાવકસ્ય ચ યઃ સુતઃ ।
ગઙ્ગોમાકૃત્તિકાનાં ચ સ તે શર્મ પ્રયચ્છુતુ ॥

રક્તમાલ્યામ્બરઃ શ્રીમાન્ રક્તચન્દનભૂષિતઃ ।
રક્તાદિત્યવપુર્દેવઃ પાતુ ત્વા ક્રૌઞ્ચસૂદન ઇતિ ॥

વિશાખે સ્કન્દગ્રહોક્તો વચાકુષ્ઠાન્વિતઃ પ્રદેહો ગોલોમીબિલ્વશિરીષમુસ્તસુરસાદિક્વાથેન પરિષેકઃ ।
સર્પસુગન્ધાદેવદારુકુષ્ઠમુસ્તાકલ્કેન સગોમૂત્રબસ્તમૂત્રેણ સિદ્ધં તૈલમભ્યઙ્ગઃ ॥

ક્ષીરિવૃક્ષકષાયેણ જીવનીયગર્ભં સપયસ્કં સર્પિઃ સિદ્ધં પાનમ્ ।
જીવકર્ષભક્ષીરિણીબૃહતીહરિદ્રાંશુમતીદ્વયમધુકૈર્વા વિદારીદ્વયતવક્ષીરીમૃદ્વીકામધુકરાસ્નાનીલોત્પલકન્દવચાવ્યોષૈર્વા ॥

ગૃદ્ધ્રોલૂકપુરીષવૃષભરોમકેશહસ્તિનખૈર્ઘૃતાક્તૈર્ધૂપઃ ।
અનન્તાકુક્કુટીમર્કટીબિમ્બીસમઙ્ગાશ્વેતગિરિકર્ણીકાઃ પૂર્વોક્તાનિ ચ પૂર્વવદ્ધારયેત્ ॥

પક્વામમાંસરુધિરદધિવારુણીયુક્તો વટવૃક્ષે બલિશ્ચતુષ્પથે સ્નાનમ્ ।
મન્ત્રશ્ચ ॥

સ્કન્દાપસ્મારસંજ્ઞો યઃ સ્કન્દસ્ય દયિતઃ સખા ।
વિશાખસંજ્ઞઃ સ શિશોઃ શિવોસ્તુ વિકૃતાનનઃ ॥

નૈગમેષે વિશાખોક્તઃ પ્રદેહોગ્નિમન્થવરુણનલરોહિષપૂતીકપારિભદ્રકૈઃ પરિષેકો ધાન્યામ્લેન સબીજેન ગુગ્ગુલ્વશ્વગન્ધાસર્ષપોશીરશ્વેતાકુષ્ઠશતાહ્વાવિપક્વં તૈલમભ્યઙ્ગઃ ॥

દશમૂલક્વાથે મધુરસ્કન્ધગર્ભં સક્ષીરં સર્પિઃ પાનમ્ ।
સર્પગન્ધાબસ્તનખરોમભિર્ધૂપઃ ।
સર્પગન્ધાબસ્તગન્ધાતુમ્બીમૃગોર્વારુશતાવરીસહદેવાપુનર્નવબીજાનિ ધારયેત્ ॥

વિચિત્રમાલ્યફલશુક્લવિલેપનૌદનદધિઘૃતગુડક્ષીરૈર્મહાપથે ક્ષીરિદ્રુમે વા બલિઃ ।
નદીતીરે સ્નાનમ્ મન્ત્રશ્ચ ॥

અજાનનશ્ચલાક્ષિભ્રૂઃ કામરૂપી મહાયશાઃ ।
બાલં બાલહિતો દેવો નૈગમેષો ઽભિરક્ષતુ ॥

સ્વાહા ।
શ્વગ્રહે ગવાક્ષીબ્રહ્મદત્તાબૃહતીદ્વયસારિવાદ્દ્રીવેરકુષ્ઠભૂમિકદમ્બસુરસમઞ્જરીકરવીરપુષ્પૈઃ પ્રદેહઃ ।
મયૂરો લૂકાશ્વમહિષીપુરીષરોમભિશ્ચ ।
બિલ્વૈરણ્ડનક્તમાલારલુકપત્રક્વાથઃ પરિષેકઃ ॥

વયસ્થાશતાવરીસારિવાપયસ્યૈરણ્ડસહદેવાત્રિકટુકકલ્કક્ષીરસિદ્ધં તૈલમભ્યઙ્ગઃ ।
તથૈવ ચ ઘૃતં પાનમ્ ।
ગોબસ્તમૂત્રભાવિતશુષ્કમત્સ્યચૂર્ણો નિશીથે ધૂપઃ ॥

વચાવયસ્થાબ્રાહ્મીજટિલાગોલોમીલમ્બાપૂતનાકેશીગિરિકદમ્બકેકૈષીકાસહદેવીર્ધારયેત્ ॥

સઘૃતસુરામાંસદધિરુધિરપલલશ્ચત્વરે બલિઃ ।
સઙ્કરકૂટે સ્નાનમ્ ।
મન્ત્રશ્ચ ॥

રક્ષાર્થં કાર્તિકેયસ્ય કૃત્તિકોમાગ્નિશૂલિભિઃ ।
યોસૌ શ્વવિગ્રહઃ સૃષ્ટઃ સ દેવસ્ત્વાભિરક્ષતુ ॥

સ્વાહા ।
પિતૃગ્રહે પૂર્વોક્તઃ પ્રદેહો વચાવયસ્થાજીવન્તીધાતકીપ્રિયઙ્ગુગુગ્ગુલુરાસ્નામનશ્શિલાલૈર્વા ।
વચાદિભિરેવ સિદ્ધં તૈલમભ્યઙ્ગઃ ॥

બિલ્વકપિત્થકરઞ્જતર્કારીસુરસપાટલીવરણપારિભદ્રકપારિજાતમાતુલુઙ્ગપત્રક્વાથેન રાત્રૌ પરિષેકો બિલ્વાદિભિરેવ ચ તૈલં સુરાબસ્તમૂત્રયુક્તં સાધિતમભ્યઙ્ગઃ ॥

ત્રિફલાંશુમતીદ્વયપયસ્યામધુકકલ્કેન દશમૂલનિર્યૂહે સક્ષીરં સર્પિઃ પક્વં પાનમ્ ।
દેવદારુભાર્ઙ્ગીવિડઙ્ગ ચન્દનકાકોલીદ્વયજીવકર્ષભકૈર્વા સક્ષારૈઃ ॥

લક્ષ્મીપુરકુષ્ઠગોલોમીજટિલોગ્રગન્ધાભિઃ સિદ્ધં તૈલં નાવનમ્ ।
એભિરેવ ચ સુરાપિષ્ટૈર્લેપઃ ॥

ગૃદ્ધ્રોલૂકવાનરરોમાણિ સઘૃતાનિ તત્પુરીષં વા સુપ્તજને ધૂપો વચાદિભિર્વા પ્રદેહોક્તૈઃ પૂર્વોક્તો વા ।
પૂર્વોક્તા એવ ચ ધારયેત્ ॥

સુરાસવગુડાપૂપપિષ્ટતિલકૃતભક્ષો વૃક્ષમૂલે સવૃષભઃ કાઞ્ચનાક્ષિયુગયુક્તઃ સ્વયં પિત્રા કુમારસ્ય નિર્વાપણીયો બલિઃ ।
ક્ષીરિવૃક્ષસમીપે સ્નાનમ્ ।
મન્ત્રશ્વ ॥

યઃ પિતા સર્વબાલાનાં ગ્રહાણાં પૂજિતો વરઃ ।
વૃક્ષમૂલે કૃતાવાસઃ સ ત્વાં પાતુ પિતા સદા ॥
સ્વાહા ॥

શકુન્યાં મધુકદ્રીબેરોશીરસારિવાપદ્મકોત્પલમઞ્જિષ્ટાલોદ્ધ્રપ્રિયઙ્ગુગૈરિકૈઃ પ્રદેહઃ ।
સુરામૂત્રપિષ્ટૈર્વા લોધ્રયષ્ટીમધુકમઞ્જિષ્ઠાહરીતકીદેવદારુભિર્વ્રણોક્તાશ્ચ પ્રદેહાઃ ।
વેતસામ્લકપિત્થૈઃ સપઞ્ચમૂલૈર્વા ।
શુક્તિશઙ્ખશમ્બૂકભસ્મમઞ્જિષ્ઠાભયામધુકૈસ્તૈલં પક્વં વ્રણરોપણમ્ ॥

ક્ષીરિતરુભિઃ પરિષેકો માર્કવમૂલકામલકીત્વક્પત્રપ્રિયઙ્ગુમનશ્શિલાલૈલાદ્વયયષ્ટીક્રમુકલોધ્રધાતકીસારિવાઞ્જનોત્પલપતઙ્ગસમઙ્ગાદ્વિહરિદ્રામાંસીમઞ્જિષ્ઠાચન્દનપદ્મકસુવર્ણગૌરિકૈસ્તૈલં સપયસ્કં પક્વમભ્યઙ્ગો ગ્રહહા વ્રણરોપણશ્ચ ॥

અર્જુનફલલોધ્રમધુકોદુમ્બરવચાચૂર્ણં ક્ષૌદ્રયુક્તો મુખપાકે મુખોદ્ઘર્ષઃ ।
વિશાખોક્તં સાપઃ પાનમ્ ।
સ્કન્દોક્તો ધૂપઃ ।
કાકપિચ્છેન વા ગોબાલોગ્રગન્ધારક્ષોઘ્નઘૃતમયૂરચન્દ્રકૈર્વા ॥

કટમ્ભરાકુક્કુટીમર્કટીલમ્બાસહદેવીહ્રીબેરોશીરાણિ ધારયેત્ ।
નાગદન્તી લક્ષ્મણાબૃહતીદ્વયમૃગોર્વારુશતાવરીસહદેવ્યો વા ॥

તિલતણ્ડુલમત્સ્યમનશિશલાહરિતાલસમ્પૃક્તસ્તિલપિષ્ટકૃતશકુનિકૈઃ કરઞ્જે બલિર્નિષ્કુટે સ્નાનમ્ ।
મન્ત્રશ્ચ ॥

અન્તરિક્ષચરા દેવી સર્વાલઙ્કારભૂષિતા ।
અયોમુખી તીક્ષ્ણતુણ્ડા શકુની તે પ્રસીદતુ ॥

દુર્દર્શના મહાકાયા પિઙ્ગાક્ષી ભૈરવસ્વરા ।
લમ્બોદરી શઙ્કુકર્ણી શકુની તે પ્રસીદતુ ॥

પૂતનાયાં હિઙ્ગુવચાગિરિકદમ્બકુષ્ઠૈલાદ્વયસુરાહ્વૈઃ પ્રદેહઃ ।
કપિત્થશિરીષન્યગ્રોધબિલ્વૈરણ્ડબકુલધવ વંશાગ્નિમન્થપત્રક્વાથઃ સર્વગન્ધોદકયુક્તઃ પરિષેકો વરણકટ્વઙ્ગાસ્ફોતકપોતવઙ્કાપારિભદ્રદૈર્વા ॥

કુષ્ઠસર્જરસવચાગોલોમીવયસ્થામનશ્શિલાલૈસ્તૈલં સાધિતમભ્યઙ્ગઃ ।
મધુરૌષધૈઃ સાધિતં સર્પિઃ પાનમ્ ।
એલાદ્વયકુષ્ઠવચાહિઙ્ગુદેવદારુગિરિકદમ્બકૈર્ધૂપઃ ।
બિમ્બીગુઞ્જાકાકાદનીનદ્રવારુણીચિત્રપલા ધારયેત્ ॥

વિચિત્રમાલ્યમત્સ્યોદનકૃસરપલલવાન્ બલિઃ સઙ્કરકૂટે ।
તદ્વચ્છરાવસમ્પુટસ્થઃ શૂન્યગ્રહે ચતુર્દિશં પ્રક્ષેપ્યઃ ।
તત્ર ચોચ્છિષ્ટેન સ્રપનમ્ ।
મન્ત્રશ્ચ ॥

મલિનામ્બરસંવીતા મલિના રૂક્ષમૂર્ધજા ।
શૂન્યાગારાશ્રયા દેવી દારકં પાતુ પૂતના ॥

દુર્દર્શના મહાકાયા કરાલા મેઘકાલિકા ।
ભિન્નાગારાશ્રયા દેવી દારકં પાતુ પૂતના ॥

શીતપૂતનાયાં પૂતનોક્તઃ પ્રદેહો ધારણીયાનિ ચ ।
વરણકપિત્થતુલસીપાશિકાવંશીબિલ્વપાટલીનન્દીભલ્લાતકપત્રનિર્યૂહેણ પરિષેકઃ ॥

મુસ્તામરદારુકુષ્ઠસર્પગન્ધૈર્ગોબસ્તમૂત્રયુક્તં તૈલં વિપક્વમભ્યઙ્ગઃ ।
કાશ્મર્યપૃશ્નિપર્ણીલોધ્રમધુકૈર્મધુરવર્ગેણ ચ સમક્ષીરં સર્પિઃ શૃતં પ્રાશ્યમાનં શીતપૂતનાં છર્દિહિધ્માકાસશ્વાસાંશ્ચ શમયતિ ॥

સાતિસારાયાં તુ ખદિરપલાશસર્જાર્જુનરોહિણીત્વક્ક્વાથેન તુલ્યપયઃ સર્પિઃ ।
ગૃધ્રોલૂકવિડ્બસ્તગન્ધાહિનિર્મોકનિમ્બપત્રૈર્ધૂપઃ ।
જીર્ણગોચર્મસર્ષપભિક્ષુસઙ્ઘાટીસર્પકઞ્ચુકૈર્વા ॥

મુદ્ગૌદનપ્રાયો જલાશયસમીપે બલિસ્તત્રૈવ ચ સ્નાનમ્ ।
મન્ત્રશ્ચ ॥

મુદ્ગૌદનાશના દેવી સુરાશોણિતપાયિની ।
જલાશયાલયરતા પાતુ ત્વા શીતપૂતના ॥

અન્ધપૂતનાયાં સર્વગન્ધૈઃ સશિરોવક્ત્રસ્ય પ્રદેહઃ ।
વરુણાસ્ફોતપારિભદ્રકવૃક્ષાદનીનાગબલાગૈરિકશતાવરીભિઃ પરિષેકઃ ।
હરિતાલમનશ્શિલાકુષ્ઠસર્જરસસુરાસૌવીરકસંસ્કૃતં તૈલમભ્યઙ્ગઃ ॥

સ્યન્દનસ્યોનાકકાશ્મર્યખદિરકુષ્ઠૈર્મધુરવર્ગેણ ચ ક્ષીરિવૃક્ષકષાયે સક્ષીરં શૃતં ઘૃતં મધુયુક્તં ચક્ષુઃકામોપસૃષ્ટાનાં પ્રાશઃ ।
છર્દિકાસાતીસારવતાં તુ તદેવ પિપ્પલીપિપ્પલીમૂલસાલપર્ણીબૃહતીકલ્કોપેતમ્ ॥

રક્ષોઘ્રરુષ્કરસર્જરસમધુભિર્ધૂપઃ ।
જીર્ણાભિક્ષુસઙ્ઘાટીકૃકવાકુપુરીષાહિત્વક્કેશચર્મભિર્વા ॥

અનન્તા કુક્કુટી મર્કટી બિમ્બીર્ધારયેત્ ।
તુમ્બી ચિત્રફલામૃગોર્વારુજાલિનીકાકાદનીર્વા ॥

પક્વામમાંસશોણિતૈશ્ચતુષ્પથે બલિર્ગૃહે સ્નાનમ્ ।
મન્ત્રશ્ચ ॥

કરાલા પિઙ્ગલા મુણ્ડા કષાયામ્બરવાસિની ।
દેવી બાલમિમં પ્રીતા પાલયત્વન્ધપૂતના ॥

મુખમણ્ડિતિકાયાં વારુણ્યા શ્લક્ષ્ણપિષ્ટૈઃ સર્વગન્ધૈર્લેપઃ ।
બિલ્વૈરણ્ડકપિત્થાગ્નિમન્થવંશીકુબેરાક્ષીપત્રક્વાથેન પરિષેકસ્તેષામેવ ચ સ્વરસેન મધુકવાજિગન્ધાગર્ભમૈકધ્યં તૈલં વસા ચ પક્વમભ્યઙ્ગઃ ॥

હ્રસ્વપઞ્ચમૂલમધુરવર્ગસિદ્ધં ઘૃતં સમધુશર્કરં પ્રાશઃ ।
પાઠાકેતકસૂચીનિમ્બફલપિપ્પલીવિડઙ્ગહરીતકીભસ્મવચાચોરકચૂર્ણો વા મધુસર્પિર્ભ્યામ્ ।
ઋક્ષરોમમષીપાઠામરિચપિપ્પલીચૂર્ણો વા દેવદારુભસ્મયુક્તો મૂર્વાવ્યોષમુસ્તરાસ્નાગિરિકદમ્બકાશ્વગન્ધાચૂર્ણો વાશોકરોહિણીચૂર્ણો વા ।
એભિરેવ ચ વિપક્વમાજં ઘૃતં પયો વા પિબેત્ ॥

એભિરેવ ચ યોગૈર્ધૂપોપદેહાભ્યઙ્ગનસ્યતૈલાક્ષિપૂરણપરિષેકાન્ કુર્યાત્ ।
યવકુષ્ઠસર્જરસૈર્ધૂપઃ ।
સર્પચાષકીરરલ્લકજિહ્વા ધારયેત્ ।
માતુશ્ચાસ્ય શ્લેષ્મહરમૌષધં પાને સ્તનોદ્વર્તને ચ યુઞ્જ્યાત્ ॥

વિવિધગન્ધધૂપમાલ્યાઞ્જનપારદમનશ્શિલાયુક્તો ગોષ્ઠમધ્યે બલિર્ગવાં મધ્યે સ્નાનમ્ ।
મન્ત્રશ્ચ ॥

અલઙ્કૃતા રૂપવતી સુભગા કામરૂપિણી ।
ગોષ્ઠમધ્યાલયરતા પાતુ ત્વા મુખમણ્ડિતા ॥

રેવત્યાં સર્વગન્ધૈઃ કુલત્થમાષચૂર્ણેન ચ પ્રદેહઃ ।
અશ્વગન્ધાજશૃઙ્ગીસારિવાદ્વિપુનર્નવદ્વિસહાવિદારીભિઃ પરિષેકઃ ॥

કુષ્ઠસર્જરસસાંધિતં તૈલમભ્યઙ્ગઃ ।
ધવાશ્વકર્ણધાતકીકકુભતિન્દુકૈર્જીવનીયૈશ્ચ પિષ્ટૈર્ઘૃતં શૃતં પ્રાશઃ ।
યવયવફલોલૂકગૃધ્રશકૃદ્ભિઃ સઘૃતૈર્ધૂપઃ ।
વરણારિષ્ટસિન્દુકાન્વિતશ્ચાવિકમૂત્રેણ કણ્ડકો લેપઃ ॥

શુક્લમાલ્યવિલેપનલાજૌદનપાયસૈર્ગોતીર્થે બલિઃ ।
નદીસઙ્ગમે ક્ષીરિવૃક્ષસમીપે વા સ્નપનમ્ ।
મન્ત્રશ્ચ ॥

નાનાવસ્ત્રધરાદેવી ચિત્રમાલ્યાનુલેપના ।
ચલત્કુણ્ડલિની શ્યામા રેવતી તે પ્રસીદતુ ॥

શુષ્કરેવત્યાં ધૂપવર્જ્યઃ સ્કન્દગ્રહોક્તો વિધિઃ ।
વચાશ્વગન્ધાહિઙ્ગુલાજસિદ્ધાર્થકૈરુદ્વર્તનમ્ ।
સર્ષપતૈલં વચાસિદ્ધં નેત્રપૂરણમ્ ॥

કાકગૃધ્રગર્દભશકૃદ્ભિર્લેપઃ ।
કુલીરકપાલશલ્યકશુક્તિમેષશૃઙ્ગહયખરજાહકહસ્તિનખનકુલરોમભિર્ધૂપઃ સર્વગ્રહઘ્નઃ ॥

કુલ્માષૈર્મદ્યેન શુષ્કમાંસેન ચ શુષ્કવૃક્ષે બલિઃ ।
તત્રૈવ ચ સ્નાનમ્ ।
મન્ત્રશ્ચ ॥

ઉપાસતે યા સતતં દેવ્યો વિવિધભૂષણાઃ ।
લમ્બા કરાલા વિનતા તથૈવ બહુપુત્રિકા ।
રેવતી શુષ્કનામા ચ સા તે દેવી પ્રસીદતુ ઇતિ ॥

ભવતિ ચાત્ર ।
અનુબન્ધાન્યથાકૃચ્છ્રં ગ્રહાપાયેપ્યુપદ્રવાન્ ।
બાલામયનિષેધોક્તભેષજૈઃ સમુપાચરેત્ ॥