આર્યાસપ્તશતી · શ્લોક 61-80

અઙ્કે સ્તનન્ધયસ્ તવ ચરણે પરિચારિકા પ્રિયઃ પૃષ્ઠે ।
અસ્તિ કિમ્ ઉ લભ્યમ્ અધિકં ગૃહિણિ યદા શઙ્કસે બાલામ્

અધર ઉદસ્તઃ કૂજિતમ્ આમીલિતમ્ અક્ષિ લોલિતો મૌલિઃ ।
આસાદિતમ્ ઇવ ચુમ્બન-સુખમ્ અસ્પર્શેઽપિ તરુણાભ્યામ્

અતિરભસેન ભુજો ઽયં વૃતિ-વિવરેણ પ્રવેશિતઃ સદનમ્ ।
દયિતાસ્પર્શોલ્લસિતો નાગચ્છતિ વર્ત્મના તેન

અમ્બર-મધ્ય-નિવિષ્ટં તવેદમ્ અતિચપલમ્ અલઘુ જઘન-તટમ્ ।
ચાતક ઇવ નવમ્ અભ્રં નિરીક્ષમાણો ન તૃપ્યામિ

અયમ્ અન્ધકાર-સિન્ધુર-ભારાક્રાન્તાવની-ભરાક્રાન્તઃ ।
ઉન્નત-પૂર્વાદ્રિ-મુખઃ કૂર્મઃ સન્ધ્યાસ્રમ્ ઉદ્વમતિ

અન્તર્ભૂતો નિવસતિ જડે જડઃ શિશિર-મહસિ હરિણ ઇવ ।
અજડે શશીવ તપને સ તુ પ્રવિષ્ટો ઽપિ નિઃસરતિ

અગણિત-જનાપવાદા ત્વત્-પાણિ-સ્પર્શ-હર્ષ-તરલેયમ્ ।
આયાસ્યતો વરાકી જ્વરસ્ય તલ્પં પ્રકલ્પયતિ

અપ્ય્ એક-વંશ-જનુષોઃ પશ્યત પૂર્ણત્વ-તુચ્છતા-ભાજોઃ ।
જ્યા-કાર્મુકયોઃ કશ્ચિદ્ ગુણ-ભૂતઃ કશ્ચિદ્ અપિ ભર્તા

અભિનવ-કેલિ-ક્લાન્તા કલયતિ બાલા ક્રમેણ ઘર્મામ્ભઃ ।
જ્યામ્ અર્પયિતું નમિતા કુસુમાસ્ત્ર-ધનુર્ લતેવ મધુ

અસતી કુલજા ધીરા પ્રૌઢા પ્રતિવેશિની યદ્ આસક્તિમ્ ।
કુરુતે સરસા ચ તદા બ્રહ્માનન્દં તૃણં મન્યે

અવિરલ-પતિતાશ્રુ વપુઃ પાણ્ડુ સ્નિગ્ધં તવોપનીતમ્ ઇદમ્ ।
શત-ધૌતમ્ આજ્યમ્ ઇવ મે સ્મર-શર-દાહ-વ્યથાં હરતિ

અન્તર્ નિપતિત-ગુઞ્જા-ગુણ-રમણીયશ્ ચકાસ્તિ કેદારઃ ।
નિજ-ગોપી-વિનય-વ્યય-ખેદેન વિદીર્ણ-હૃદય ઇવ

અમુના હતમ્ ઇદમ્ ઇદમ્ ઇતિ રુદતી પ્રતિવેશિનેઽઙ્ગમ્ અઙ્ગમ્ ઇયમ્ ।
રોષ-મિષ-દલિત-લજ્જા ગૃહિણી દર્શયતિ પતિ-પુરતઃ

ઇતિ વિભાવ્યાખ્યા-સમેતા અ-કાર-વ્રજ્યા ॥
આ-કાર-વ્રજ્યા
આન્તરમ્ અપિ બહિરિ વ હિ વ્યઞ્જયિતું રસમ્ અશેષતઃ સતતમ્ ।
અસતી સત્-કવિ-સૂક્તિઃ કાચ-ઘટીતિ ત્રયં વેદ

આલોક એવ વિમુખી ક્વચિદ્ અપિ દિવસે ન દક્ષિણા ભવસિ ।
છાયેવ તદ્ અપિ તાપં ત્વમ્ એવ મે હરસિ માનવતિ

આજ્ઞા કાકુર્ યાચ્ઞા-ક્ષેપો હસિતં ચ શુષ્ક-રુદિતં ચ ।
ઇતિ નિધુવન-પાણ્ડિત્યં ધ્યાયંસ્ તસ્યા ન તૃપ્યામિ

આજ્ઞાપયિષ્યસિ પદં દાસ્યસિ દયિતસ્ય શિરસિ કિં ત્વરસે ।
અસમય-માનિનિ મુગ્ધે મા કુરુ ભગ્નાઙ્કુરં પ્રેમ

આસાદ્ય ભઙ્ગમ્ અનયા દ્યૂતે વિહિતાભિરુચિત-કેલિ-પણે ।
નિઃસારયતાક્ષાનિતિ કપટ-રુષોત્સારિતાઃ સખ્યઃ

આદરણીય-ગુણા સખિ મહતા નિહિતાસિ તેન શિરસિ ત્વમ્ ।
તવ લાઘવ-દોષો ઽયં સૌધ-પતાકેવ યચ્ ચલસિ

આર્દ્રમ્ અપિ સ્તન-જઘનાન્ નિરસ્ય સુતનુ ત્વયૈતદ્ ઉન્મુક્તમ્ ।
ખ-સ્થમ્ અવાપ્તુમ્ ઇવ ત્વાં તપનાંશૂન્ અંશુકં પિબતિ