આઙ્ગિરસસ્મૃતિ · અધ્યાય 2.2

અત ઊર્ધ્વં પ્રવક્ષ્યામિ ચોપસ્થાનસ્ય લક્ષણમ્ ।
ઉપસ્થિતો હિ ન્યાયેન વ્રતાદેશનમર્હતિ ॥

સદ્યો નિઃસંશયઃ પાપો ન ભુઞ્જીતાનુપસ્થિતઃ ।
ભુઞ્જાનો વર્ધયેત્ પાપં પરિષદ્યત્ર વર્તતે ॥

સંશયે ન તુ ભોક્તવ્યં યાવત્કાર્યવિનિશ્ચયઃ ।
પ્રમાણેનૈવ કર્તવ્યં યાવદાશાસનં તથા ॥

કૃત્વા પાપં ન ગૂહેત ગૂહ્યમાનં તુ વર્ધતે ।
સ્વલ્પં વાથ પ્રભૂતં વા ધર્મવિદ્ભ્યો નિવેદયેત્ ॥

તે હિ પાપકૃતાં વૈદ્યા બોદ્ધારશ્ચૈવ પાપ્મનામ્ ।
દુઃખસ્યૈવ યથા વૈદ્યાઃ સિદ્ધિમન્તો રુજાયતામ્ ॥

પ્રાયશ્ચિત્તે સમુત્પન્ને શ્રીમાન્ સત્યપરાયણઃ ।
મૃદુરાર્જવસંપન્નઃ શુદ્ધિં યાયાદ્દ્વિજઃ સદા ॥

સચેલં વાગ્યતઃ સ્નાત્વા ક્લિન્નવાસાઃ સમાહિતઃ ।
ક્ષત્રિયો વાથ વૈશ્યો વા તતઃ પરિષદં વ્રજેત્ ॥

ઉપસ્થાનં તતઃ શીઘ્રમ્ અર્તિમાન્ ધરણીં વ્રજન્ ।
ગાત્રૈશ્ચ શિરસા ચૈવ ન ચ કિંચિદુદાહરેત્ ॥

તતસ્તે પ્રણિપાતેન દૃષ્ટ્વા તં સમુપસ્થિતમ્ ।
વિપ્રાઃ પૃચ્છન્તિ યત્કાર્યમ્ ઉપવેશ્યાસને શુભે ॥

કિં તે કાર્યં કિમર્થં વા કિં વા મૃગયસે દ્વિજ ।
પર્ષદિ બ્રૂહિ તત્સર્વં યત્કાર્યં હિતમાત્મનઃ ॥