આઙ્ગિરસસ્મૃતિ · અધ્યાય 2.3

સત્યેન દ્યોતતે રાજા સત્યેન દ્યોતતે રવિઃ ।
સત્યેન દ્યોતતે વહ્નિઃ સત્યે સર્વં પ્રતિષ્ઠિતમ્ ॥

ભૂર્ભુવઃસ્વસ્ત્રયોલોકાસ્ તે ઽપિ સત્યે પ્રતિષ્ઠિતાઃ ।
અસ્માકં ચૈવ સર્વેષાં સત્યમેવ પરા ગતિઃ ॥

યદિ ચેદ્વક્ષ્યતે સત્યં નિયતં પ્રાપ્યતે સુખમ્ ।
યદ્ગૃહીતો હ્યસત્યેન ન ચ શુધ્યેત કર્હિચિત્ ॥

સત્યેનૈવ વિશુધ્યન્તિ શુદ્ધિકામાશ્ચ માનવાઃ ।
તસ્માત્પ્રબ્રૂહિ યત્સત્યમ્ આદિમધ્યાવસાનકમ્ ॥

એવં તૈઃ સમનુજ્ઞાતઃ સત્યં બ્રૂયાદશેષતઃ ।
તસ્મિન્નિવેદિતે કાર્યે ઽપસાર્યો યસ્તુ કાર્યવાન્ ॥

તસ્મિન્નુત્સારિતે પાપે યથાવદ્ધર્મપાઠકાઃ ।
તે તથા તત્ર કલ્પેયુર્ વિમૃશન્તઃ પરસ્પરમ્ ॥

આપ્તધર્મેષુ યત્પ્રોક્તં યચ્ચ સાનુગ્રહં ભવેત્ ।
પરિષત્ સંપદશ્ચૈવ કાર્યાણાં ચ બલાબલમ્ ॥

પ્રાપ્ય દેશં ચ કાલં ચ યચ્ચ કાર્યાન્તરં ભવેત્ ।
પરિષચ્ચિન્ત્ય તત્સર્વં પ્રાયશ્ચિત્તં વિનિર્દિશેત્ ॥

સર્વેષાં નિશ્ચિતં યત્સ્યાદ્ યચ્ચ પ્રાણાન્ન પાતયેત્ ।
આહૂય શ્રાવયેદેકો યઃ પરિષન્નિયોજિતઃ ॥

શૃણુષ્વ ભો ઇદં વિપ્ર યત્ત આદિશ્યતે વ્રતમ્ ।
તત્તદ્યત્નેન કર્તવ્યમ્ અન્યથા તે વૃથા ભવેત્ ॥

યદા ચ તે ભવેચ્ચીર્ણં તદા શુદ્ધિપ્રકાશનમ્ ।
કાર્યં સર્વપ્રયત્નેન ન શક્ત્યા વિપ્રપૂજિતમ્ ॥