આઙ્ગિરસસ્મૃતિ · અધ્યાય 2.1

વિશ્વરૂપં નમસ્કૃત્ય દેવં ત્રિભુવનેશ્વરમ્ ।
ધર્મસ્ય દર્શનાર્થાય અઙ્ગિરા ઇદમબ્રવીત્ ॥

અથ ત્રયાણાં વક્ષ્યામિ પ્રમાણં વિધિમાદિતઃ ।
ધર્મસ્ય પર્ષદશ્ચૈવ પ્રાયશ્ચિત્તક્રમસ્ય ચ ॥

પ્રાયશ્ચિત્તં ચતુષ્પાદં વિહિતં ધર્મકર્તૃભિઃ ।
પરિષદ્દશધા પ્રોક્તા ત્રિવિધા વા સમાસતઃ ॥

પ્રમાણાભિહિતં યત્તુ સર્વમઙ્ગિરસા તદા ।
અપ્રમેયપ્રમાણસ્ય દુઃખેનાધિગમો ભવેત્ ॥

તસ્માદઙ્ગિરસા પુણ્યં ધર્મશાસ્ત્રમિદં કૃતમ્ ।
ઉપસ્થાનવ્રનાદેશ ચર્યાશુદ્ધિપ્રકાશનમ્ ॥

સ ધર્મસ્તુ કૃતો જ્ઞેયઃ સ્વાધિષ્ઠાનક એવ વૈ ।
ચતુર્ભિઃ સાધનૈશ્ચૈવ ધર્મઃ પ્રોક્તઃ સનાતનઃ ॥

કૃત્વા પૂર્વમુદાહાર્ય યથોક્તં ધર્મકર્તૃભિઃ ।
પશ્ચાત્કાર્યાનુસારેણ શક્ત્યા કુર્યુરનુગ્રહમ્ ॥

યત્પૂર્વમૃષિભિઃ પ્રોક્તં ધર્મશાસ્ત્રમનુત્તમમ્ ।
તત્પ્રમાણં તુ સર્વેષાં લોકધર્માનુવર્ણનમ્ ॥

ન હિ તેષામતિક્રમ્ય વચનાનિ મહાત્મનામ્ ।
પ્રજ્ઞાનૈરપિ વિદ્વદ્ભિઃ શક્યમન્યત્પ્રભાષિતુમ્ ॥

સ્વાભિપ્રાયકૃતં કર્મ વિધિવિજ્ઞાનવર્જિતમ્ ।
ક્રીડાકર્મેવ બાલાનાં તત્સર્વં સ્યાન્નિરર્થકમ્ ॥