અહોરાત્રવ્રતચૈત્યસેવાનુશંસાવદાન · શ્લોક 242-261

પુણ્યૈર્ વિના ન માનુષ્યે જન્મ સંપ્રપ્સ્યતે ક્વ ચિત્ ।
માનુષ્યે ઽલભ્યમાને તુ કુત્ર ધર્મે મતિશ્ ચરેત્

વિના ધર્મમતિં ભદ્રે ચરિતુમ્ ઉત્સહેત્ કથમ્ ।
વિના ભદ્રચરિં લોકે સદ્ગતિં કથમ્ આપ્નુયાત્

સુગતૌ ચ સદા સૌખ્યં વિના ધર્મૈર્ ન લપ્સ્યતે ।
તસ્માદ્ ધર્મે મતિં ધૃત્વા ચરિતવ્યં શુભે સદા

શુભેન સદ્ગતિં યાતાઃ પાપેન દુર્ગતિં ગતાઃ ।
સુખદુઃખાનિ સંભુક્ત્વ ભ્રમન્તિ જન્તવો ભવે ।
તદ્ ઇતઃ સદ્ગતિં પ્રાપ્તું ચરેમહિ શુભે સદા

કિં ચાપ્ય્ એતા વયં સર્વાશ્ ચણ્ડાલકુલસંભવાઃ ।
તત્ કથં કુલવૃત્તિં નુ ત્યક્ત્વા ચરેમહિ શુભે

યદ્ વયં પ્રેરિતા માત્રા મત્સ્યાન્ વિક્રયિતું ખલુ ।
તસ્માન્ માતુર્ વચો ઽશ્રુત્વા ચરેમહ્ય્ અન્યથા કથમ્

યદ્ય્ અત્રૈતાન્ અવિક્રીય પ્રક્ષિપ્ત્વા ચ જલાશયે ।
રિક્તહસ્તાઃ કથં ગેહે માતુઃ પુરો વ્રજેમહિ

યદ્ ભોગ્યં નો ગૃહે નાસ્ત્ય્ એતદ્ એવ હિ જીવનમ્ ।
તત્ કિં સા જનની ભુઞ્જ્યાદ્ વિનાહારં ન જીવતિ

તદ્ અત્ર કિં કરિષ્યામો ધિગ્ જન્મ માનુષે ઽપિ નઃ ।
વરં પ્રાણપરિત્યાગં ન તુ પાપાર્થસાધનમ્

સર્વેષામ્ અપિ જન્તૂનામ્ અવશ્યં મરણં ભવે ।
ઇતિ મત્વાત્ર સમ્સારે વર્તયેમ શુભે સદા

તદ્ અત્ર જીવિનો મત્સ્યાન્ પ્રક્ષિપ્યૈતાઞ્ જલાશ્રયે ।
નિર્જીવાન્ એવ વિક્રીય મૂલ્યં માતુર્ દદીમહિ

યદ્ય્ એવં ક્રિયતે ઽસ્માભિઃ પપં નો વિદ્યતે ન હિ ।
કિં ચિત્ પુણ્યં તુ વિદ્યેત તસ્માત્ કુર્યામહે તથા

ઇત્ય્ અત્ર મે વચઃ શ્રુત્વા તત્ કર્તુમ્ અનુમોદત ।
માત્ર શરિકાવિષાદત્વં કર્તુમ્ અર્હામહે ખલુ

એતત્ તયા સમાખ્યાતં શ્રુત્વા તાઃ પરિબોધિતાઃ ।
તથેત્ય્ અભ્યનુમોદિત્વા તદ્ અનુકર્તુમ્ ઈષિરે

તતસ્ તાઃ કન્યકઃ સર્વાસ્ તેષાં યે જીવિનો ઝષાઃ ।
તાન્ સર્વાન્ સહસાદાય પ્રાક્ષિપંસ્ તત્સરિજ્જલે

યાવન્તો નિર્ગતપ્રાણાસ્ તાન્ એવ સકલાન્ અપિ ।
આદાય તાઃ પુરે ગત્વા વ્યક્રીણન્ત યથોચિતમ્

તતસ્ તત્ પણમ્ આદાય સર્વાસ્ તાઃ કન્યકા મુદા ।
ગૃહમ્ આગત્ય તન્ મૂલ્યં સર્વં માતુઃ સમર્પયન્

એવં તયા જનન્યા તાઃ કન્યકાઃ પ્રેરિતાસ્ તથા ।
સજીવાંસ્ તાઞ્ જલે ક્ષિપ્ત્વા નિર્જીવૈઃ પણમ્ આદદુઃ

એવં તાઃ સર્વદા નિત્યં કૃત્વા ભુક્ત્વા વિનોદિતાઃ ।
તદ્વૃત્તિસંપરિત્રસ્તાઃ પાપશઙ્કા વિષેદિરે

કસ્મિંશ્ ચિદ્ દિવસે સર્વા માત્રા તાઃ પ્રેરિતાસ્ તથા ।
મીનાન્ વિક્રેતુમ્ આદાય નિગમે સમુપાચરન્