108 Buddhist stotras · અધ્યાય 53

જિતમારકલિં જગદેકગુરું સુરયક્ષમહોરગદૈત્યનતમ્ ।
ચતુસત્યસુદેશિતમાર્ગમિમં ગુણમેઘમહં પ્રણમામિ સદા ॥

ભવભીમમહોદધિમધ્યગતં કૃપણાર્તરવં સમવેક્ષ્ય જનમ્ ।
પરિમોચયિતું ય ઇહ પ્રણિધિં પ્રચકાર વિભું તમહં પ્રણતઃ ॥

ગિરિરાજનિભં શરદિન્દુધિયં સુમુખં સુભુજં વરરૂપધરમ્ ।
સુગતં ગતમપ્રતિમં સુગતં પ્રણતો ઽસ્મિ સદા જગદર્થકરમ્ ॥

કનકપ્રભયા પરિપીતતનું વરદુન્દુભિતોયદવલ્ગુરુતમ્ ।
ગજહંસવિલમ્બિતધીરગતં શિરસા ઽભિનતો ઽસ્મિ ગુણૈકનિધિમ્ ॥

તરુણાર્કસમૈરચલૈર્નયનૈઃ સ્ફુરદુગ્રમહાશનિભીમરવૈઃ ।
નમુચિપ્રહરૈરસિશક્તિધરૈશ્ચલિતો ઽસિ વિભો ન હિ ત્વં વિકૃતૈઃ ॥

લવલીફલપાણ્ડુરકર્ણપુટાઃ કુચભારવિનામિતગાત્રલતાઃ ।
નહિ ત્વામશકન્ ખલુ નાગસુતાઃ શ્વસિતૈઃ સ્ખલિતૈરપિ કમ્પયિતુમ્ ॥

તરવઃ કુસુમસ્તબકાભરણા બહુરત્નસહસ્રચિતાશ્ચ નગાઃ ।
ન તથાભિરતિં જનયન્તિ સતાં જનયન્તિ યથા તવ વીરગુણાઃ ॥

સ્ફુટચિત્રપદં બહુયુક્તિયુતં ગમકં વચનં તવ કર્ણસુખમ્ ।
શુભમાર્ગફલં પ્રસમીક્ષ્યજના ન ગૃણન્તિ પુનસ્ત્વદૃતે ઽન્યવચઃ ॥

ઇતિ વઃ શરણં સમવેક્ષ્ય જના ન પતન્ત્યપિ કલ્પશતૈર્નિરયે ।
વિનિહત્ય ચ દોષરિપૂન્ બહુલાન્ પરિયન્તિ શુભં વરમોક્ષપુરમ્ ॥

તવ સૌમ્યતયા ઽપ્યભિભૂતતમો ન વિરાજતિ શીતકરો ગગને ।
તવ કાઞ્ચનકુઙ્કુમસપ્રભયા પ્રભયા ઽભિહતો ન વિભાતિ રવિઃ ॥

તવ નાથ શુભે વદનામ્બુરૂહે નયનભ્રમરા નિપતન્તિ નૃણામ્ ।
પ્રતિબુદ્ધદલે કમલે વિમલે ભ્રમરા ઇવ પુષ્પશતાકુલિતાઃ ॥

ઇતિ તોટકમન્ત્રવરૈરતુલૈઃ પરિકીર્ત્ય મયા તવ વર્ણલવાન્ ।
યદુપાર્જિતમદ્ય શુભં વિપુલં શિવમસ્તુ તતો ભુવિ દેવનૃણામ્ ॥