108 Buddhist stotras · Chapter 53

jitamārakaliṃ jagadekaguruṃ surayakṣamahoragadaityanatam /
catusatyasudeśitamārgamimaṃ guṇameghamahaṃ praṇamāmi sadā //

bhavabhīmamahodadhimadhyagataṃ kṛpaṇārtaravaṃ samavekṣya janam /
parimocayituṃ ya iha praṇidhiṃ pracakāra vibhuṃ tamahaṃ praṇataḥ //

girirājanibhaṃ śaradindudhiyaṃ sumukhaṃ subhujaṃ vararūpadharam /
sugataṃ gatamapratimaṃ sugataṃ praṇato 'smi sadā jagadarthakaram //

kanakaprabhayā paripītatanuṃ varadundubhitoyadavalgurutam /
gajahaṃsavilambitadhīragataṃ śirasā 'bhinato 'smi guṇaikanidhim //

taruṇārkasamairacalairnayanaiḥ sphuradugramahāśanibhīmaravaiḥ /
namucipraharairasiśaktidharaiścalito 'si vibho na hi tvaṃ vikṛtaiḥ //

lavalīphalapāṇḍurakarṇapuṭāḥ kucabhāravināmitagātralatāḥ /
nahi tvāmaśakan khalu nāgasutāḥ śvasitaiḥ skhalitairapi kampayitum //

taravaḥ kusumastabakābharaṇā bahuratnasahasracitāśca nagāḥ /
na tathābhiratiṃ janayanti satāṃ janayanti yathā tava vīraguṇāḥ //

sphuṭacitrapadaṃ bahuyuktiyutaṃ gamakaṃ vacanaṃ tava karṇasukham /
śubhamārgaphalaṃ prasamīkṣyajanā na gṛṇanti punastvadṛte 'nyavacaḥ //

iti vaḥ śaraṇaṃ samavekṣya janā na patantyapi kalpaśatairniraye /
vinihatya ca doṣaripūn bahulān pariyanti śubhaṃ varamokṣapuram //

tava saumyatayā 'pyabhibhūtatamo na virājati śītakaro gagane /
tava kāñcanakuṅkumasaprabhayā prabhayā 'bhihato na vibhāti raviḥ //

tava nātha śubhe vadanāmburūhe nayanabhramarā nipatanti nṛṇām /
pratibuddhadale kamale vimale bhramarā iva puṣpaśatākulitāḥ //

iti toṭakamantravarairatulaiḥ parikīrtya mayā tava varṇalavān /
yadupārjitamadya śubhaṃ vipulaṃ śivamastu tato bhuvi devanṛṇām //