Yoga Vasistha · Verses 6.70-2

saptatitamaḥ sargaḥ

śrīvasiṣṭha uvāca /
jīvo'jīvo bhavatyāśu yāti cittamacittatām /
vicārādityavidyānto mokṣa ityabhidhīyate

mṛgatṛṣṇājalamiva mano'haṃtādi dṛśyate /
asadeva manāgeva tadvicārātpralīyate

saṃsṛtisvapnavibhrāntau vetālodāhṛtānimān /
praśnānākarṇaya śubhānprasaṅgātsmṛtimāgatān

asti vindhyamahāṭavyāṃ vetālo vipulākṛtiḥ /
sa kiṃcinmaṇḍalaṃ garvādājagāma jighāṃsayā

sa vetālo'vasatpūrvaṃ kasmiṃścitsajjanāspade /
bahubalyupahāreṇa nityatṛptatayā sukhī

nirnimittaṃ nirāgaskaṃ puro'pyabhyāgataṃ na saḥ /
kṣudhito'pi naraṃ hanti santo hi nyāyadarśakāḥ

sa kālenāṭavīgeho jagāma nagarāntaram /
nyāyayuktyā janaṃ bhoktuṃ kṣudhā samabhicoditaḥ

tatra prāpa sa bhūpālaṃ rātricaryāvinirgatam /
tamāha ghanaghoreṇa śabdenograniśācaraḥ

vetāla uvāca /
rājam̐llabdho'si bhīmena vetālena mayādhunā /
kva gacchasi vinaṣṭo'si bhava bhojanamadya me

rājovāca /
he rātricara nirnyāyyaṃ māṃ cedatsi balādiha /
tatte sahasradhā mūrdhā sphuṭiṣyati na saṃśayaḥ

vetāla uvāca /
na tvāmadmyahamanyāyaṃ nyāyo'yaṃ hi mayocyate /
rājāsi sakalāśāśca pūraṇīyāstvayārthinām

mamaitāmarthitāṃ rājansaṃbhavārthāṃ prapūraya /
praśnānimānmayoktāṃstvaṃ samyagākhyātumarhasi

kasya sūryasya raśmīnāṃ brahmāṇḍānyaṇavaḥ kṛśāḥ /
kasminsphuranti pavane mahāgaganareṇavaḥ

svapnātsvapnāntaraṃ gacchañchataśo'tha sahasraśaḥ /
tyajanna tyajati svacchaṃ kaḥ svarūpaṃ prabhāsvaram

rambhāstambho yathā patramātramevaṃ punaḥpunaḥ /
antarantastathāntaśca tathā ko'ṇuḥ sa eva hi

brahmāṇḍākāśabhūtaughasūryamaṇḍalameravaḥ /
aparityajato'ṇutvaṃ kasyāṇoḥ paramāṇavaḥ

kasyānavayavasyaiva paramāṇumahāgireḥ /
śilāntarniviḍaikāntarūpamajjā jagattrayī

iti kathayasi cenna me durātmaṃ-
stadiha nigīrya bhavantamātmaghātin /
phalamiva tava maṇḍalaṃ graseyaṃ
prasabhamupetya jagadyathā kṛtāntaḥ

ityārṣe śrīvāsiṣṭhamahārāmāyaṇe vālmīkīye de० mokṣopāyeṣu nirvāṇaprakaraṇe pū० vetālapraśno nāma saptatitamaḥ sargaḥ