યોગવાસિષ્ઠ · શ્લોક 6.70-2

સપ્તતિતમઃ સર્ગઃ

શ્રીવસિષ્ઠ ઉવાચ ।
જીવોઽજીવો ભવત્યાશુ યાતિ ચિત્તમચિત્તતામ્ ।
વિચારાદિત્યવિદ્યાન્તો મોક્ષ ઇત્યભિધીયતે

મૃગતૃષ્ણાજલમિવ મનોઽહંતાદિ દૃશ્યતે ।
અસદેવ મનાગેવ તદ્વિચારાત્પ્રલીયતે

સંસૃતિસ્વપ્નવિભ્રાન્તૌ વેતાલોદાહૃતાનિમાન્ ।
પ્રશ્નાનાકર્ણય શુભાન્પ્રસઙ્ગાત્સ્મૃતિમાગતાન્

અસ્તિ વિન્ધ્યમહાટવ્યાં વેતાલો વિપુલાકૃતિઃ ।
સ કિંચિન્મણ્ડલં ગર્વાદાજગામ જિઘાંસયા

સ વેતાલોઽવસત્પૂર્વં કસ્મિંશ્ચિત્સજ્જનાસ્પદે ।
બહુબલ્યુપહારેણ નિત્યતૃપ્તતયા સુખી

નિર્નિમિત્તં નિરાગસ્કં પુરોઽપ્યભ્યાગતં ન સઃ ।
ક્ષુધિતોઽપિ નરં હન્તિ સન્તો હિ ન્યાયદર્શકાઃ

સ કાલેનાટવીગેહો જગામ નગરાન્તરમ્ ।
ન્યાયયુક્ત્યા જનં ભોક્તું ક્ષુધા સમભિચોદિતઃ

તત્ર પ્રાપ સ ભૂપાલં રાત્રિચર્યાવિનિર્ગતમ્ ।
તમાહ ઘનઘોરેણ શબ્દેનોગ્રનિશાચરઃ

વેતાલ ઉવાચ ।
રાજઁલ્લબ્ધોઽસિ ભીમેન વેતાલેન મયાધુના ।
ક્વ ગચ્છસિ વિનષ્ટોઽસિ ભવ ભોજનમદ્ય મે

રાજોવાચ ।
હે રાત્રિચર નિર્ન્યાય્યં માં ચેદત્સિ બલાદિહ ।
તત્તે સહસ્રધા મૂર્ધા સ્ફુટિષ્યતિ ન સંશયઃ

વેતાલ ઉવાચ ।
ન ત્વામદ્મ્યહમન્યાયં ન્યાયોઽયં હિ મયોચ્યતે ।
રાજાસિ સકલાશાશ્ચ પૂરણીયાસ્ત્વયાર્થિનામ્

મમૈતામર્થિતાં રાજન્સંભવાર્થાં પ્રપૂરય ।
પ્રશ્નાનિમાન્મયોક્તાંસ્ત્વં સમ્યગાખ્યાતુમર્હસિ

કસ્ય સૂર્યસ્ય રશ્મીનાં બ્રહ્માણ્ડાન્યણવઃ કૃશાઃ ।
કસ્મિન્સ્ફુરન્તિ પવને મહાગગનરેણવઃ

સ્વપ્નાત્સ્વપ્નાન્તરં ગચ્છઞ્છતશોઽથ સહસ્રશઃ ।
ત્યજન્ન ત્યજતિ સ્વચ્છં કઃ સ્વરૂપં પ્રભાસ્વરમ્

રમ્ભાસ્તમ્ભો યથા પત્રમાત્રમેવં પુનઃપુનઃ ।
અન્તરન્તસ્તથાન્તશ્ચ તથા કોઽણુઃ સ એવ હિ

બ્રહ્માણ્ડાકાશભૂતૌઘસૂર્યમણ્ડલમેરવઃ ।
અપરિત્યજતોઽણુત્વં કસ્યાણોઃ પરમાણવઃ

કસ્યાનવયવસ્યૈવ પરમાણુમહાગિરેઃ ।
શિલાન્તર્નિવિડૈકાન્તરૂપમજ્જા જગત્ત્રયી

ઇતિ કથયસિ ચેન્ન મે દુરાત્મં-
સ્તદિહ નિગીર્ય ભવન્તમાત્મઘાતિન્ ।
ફલમિવ તવ મણ્ડલં ગ્રસેયં
પ્રસભમુપેત્ય જગદ્યથા કૃતાન્તઃ

ઇત્યાર્ષે શ્રીવાસિષ્ઠમહારામાયણે વાલ્મીકીયે દે૦ મોક્ષોપાયેષુ નિર્વાણપ્રકરણે પૂ૦ વેતાલપ્રશ્નો નામ સપ્તતિતમઃ સર્ગઃ