Yoga Vasistha · Verses 6.69-2

ekonasaptatitamaḥ sargaḥ

śrīrāma uvāca /
kutaḥ śatatvamāyātaṃ rudrāṇāṃ munināyaka /
ye gaṇāste tu ye rudrā uta neti vadāśu me

śrīvasiṣṭha uvāca /
svapnānāṃ bhikṣuṇā dṛṣṭaṃ śataṃ śataśarīrakam /
sarvamuddeśato jñātaṃ tata uktaṃ na tanmayā

ya ākārāśca te svapne tattadgaṇaśataṃ smṛtam /
tadetadrudraśatakaṃ rudrā api gaṇā vidhau

śrīrāma uvāca /
ekasmādbhagavaṃścittātkathaṃ cittaśataṃ kṛtam /
tatsvapnakṛtarudreṇa dīpāddīpaśataṃ yathā

śrīvasiṣṭha uvāca /
nirāvaraṇasadbhāvā yadyathā kalpayanti hi /
tattathānubhavantyeva rasāvaraṇasaṃvidaḥ

sarvātmanaḥ sarvagatvādyadyathā yatra bhāvyate /
tathānubhūyate tatra tattathā jñatayā dhiyā

śrīrāma uvāca /
kapālamālābharaṇo bhasmaśālī digambaraḥ /
śmaśānanilayo brahmankāmukaśca kimīśvaraḥ

śrīvasiṣṭha uvāca /
maheśvarāṇāṃ siddhānāṃ jīvanmuktaśarīriṇām /
na kriyāniyamo'stīha sa hyajñasyaiva kalpitaḥ

ajñastu ditacittatvātkriyāniyamanaṃ vinā /
gacchannyāyena mātsyena paraṃ duḥkhaṃ prayāti hi

sujñāstviṣṭeṣvaniṣṭeṣu na nimajjanti vastuṣu /
yatendriyatvādbuddhatvānnirvāsanatayā tathā

kākatālīyavadrūḍhāṃ kriyāṃ kurvanti te sadā /
na kurvantyapi vai kiṃcinnaiṣāṃ kvacidapi grahaḥ

kākatālīyato viṣṇurevaṃkarmoditaḥ purā /
evaṃkarmā trinayana evaṃkarmāmbujodbhavaḥ

na nindyamasti nānindyaṃ nopādeyaṃ na heyatā /
na cātmīyaṃ na ca paraṃ karma jñaviṣayaṃ kvacit

agnyādīnāṃ yathauṣṇyādi sargādau rūḍhimāgatam /
harādīnāṃ tathā karma dvijātīnāṃ ca jātayaḥ

sarge prarūḍhimāyāte saṃketavaśataḥ pṛthak /
anubhūtiphalāścaryāḥ kalpitāḥ kalpitāḥ svayam

videhamuktaviṣayaṃ turyamaunamato mayā /
noktaṃ tava paraṃ maunaṃ sadehasya raghūdvaha

khādapyatitarāmacchamātmākāśaṃ cidātmakam /
tattāprāptiḥ paraṃ śreyaḥ sā kathaṃ prāpyate śrṛṇu

samyagjñānāvabodhena nityamekasamādhinā /
saṃkhyayaivāvabuddhā ye te smṛtāḥ sāṃkhyayoginaḥ

prāṇādyanilasaṃśāntau yuktyā ye padamāgatāḥ /
anāmayamanādyantaṃ te smṛtā yogayoginaḥ

upādeyaṃ tu sarveṣāṃ śāntaṃ padamakṛtrimam /
tatkecitsaṃkhyayā prāptāḥ kecidyogena dehataḥ

ekaṃ sāṃkhyaṃ ca yogaṃ ca yaḥ paśyati sa paśyati /
yatsāṃkhyaiḥ prāpyate sthānaṃ paraṃ yogaistadeva hi

yatra prāṇamanovṛttiratyantaṃ nopalabhyate /
vāsanāvāgurotkrāntā tadviddhi paramaṃ padam

vāsanāṃ cittamevāhuḥ kāraṇaṃ taddhi saṃsṛteḥ /
tadakāraṇatāmeti vilīyobhayakarmasu

manaḥ paśyati vai dehaṃ bālo vetālakaṃ yathā /
svātmānaṃ vilayaṃ nītvā na bhūyastaṃ prapaśyati

mano mudhaivābhyuditamasadevānavekṣaṇāt /
svapne svamaraṇākāraṃ prekṣyamāṇaṃ na vidyate

manobhavastu saṃsāraḥ kva mamāhaṃ kva saṃtatiḥ /
upadeśyopadeśādibandhamokṣau ca tatkutaḥ

ekatattvaghanābhyāsaḥ prāṇānāṃ vilayastathā /
manovinigrahaśceti mokṣaśabdārthasaṃgrahaḥ

śrīrāma uvāca /
yadi hi prāṇavilayo mune mokṣasya kāraṇam /
mṛtā eva vimucyante tanmanye sarvajantavaḥ

śrīvasiṣṭha uvāca /
triṣveteṣu prayogeṣu manaḥpraśamanaṃ varam /
sādhyaṃ viddhi tadevāśu yathā bhavati tacchivam

yadā nirvāṇanaṃ prāṇāstyajantīdaṃ śarīrakam /
tadānubhūya tanmātrairyānti vyomani saṃgamam

vāsanāsātmakānyeva viddhi tanmātrakāṇi vai /
tadātmakairmanovadbhiḥ prāṇaiḥ śliṣyanti netaraiḥ

savāsanāstūtpadyante prāṇā muñcanti dehakam /
tadvyomavāyusaṃśleṣaṃ yānti duḥkhāya gandhavat

manaḥ sāmburivāmbhodhau na śāmyati savāsanam /
nāmanaskāḥ saṃbhavanti prāṇāḥ sūrya iva tviṣaḥ

na jahāti manaḥ prāṇānvinā jñānena karhicit /
tṛṇāntareṇaiva vinā tṛṇāṅgamiva tittiriḥ

jñānādavāsanībhāvaṃ svanāśaṃ prāpnuyānmanaḥ /
prāṇātspadaṃ ca nādatte tataḥ śāntirhi śiṣyate

jñānātsarvapadārthānāmasattvaṃ samudetyalam /
tato'ṅga vāsanānāśādviyogaḥ prāṇacetasoḥ

tato na paśyati manaḥ praśāntaṃ dehatāṃ punaḥ /
svanāśena padaṃ prāptaṃ vāsanaiva mano viduḥ

ceto hi vāsanāmātraṃ tadabhāve paraṃ padam /
tattvaṃ saṃpadyate jñānaṃ jñānamāhurvicāraṇam

ityasyāḥ saṃsṛte rāma paryantaḥ saṃpravartate /
svayaṃ vivekamātreṇa rajjusarpabhramākṛteḥ

ekārthābhyasanaprāṇarodhacetaḥparikṣayāḥ /
ekasminneva saṃsiddhe saṃsiddhyanti parasparam

tālavṛntasya saṃspande śānte śānto yathānilaḥ /
prāṇānilaparispande śānte śāntaṃ tathā manaḥ

prāṇaḥ śarīravilaye prayāti vyomavāyutām /
yathā vāsitamevedaṃ sarvaṃ paśyati tatra vā

yathā videhāḥ paśyanti prāṇā vyomani dehakam /
samanaskāstathācāraṃ sarvaṃ cānubhavanti te

śānte vātaparispande yathā gandhaḥ praśāmyati /
tathā śānte manaḥspande śāmyanti prāṇavāyavaḥ

avinābhāvinī nityaṃ jantūnāṃ prāṇacetasī /
kusumāmodavanmiśre tilataile iva sthite

manasaḥ spandanaṃ prāṇaḥ prāṇasya spandanaṃ manaḥ /
etau viharato nityamanyonyaṃ rathasārathī

ādhārādheyavaccaitāvekābhāve vinaśyataḥ /
kurutaśca svanāśena kāryaṃ mokṣākhyamuttamam

ekatattvaghanābhyāsācchāntaṃ śāmyatyalaṃ manaḥ /
tallīnatvātsvabhāvasya tena prāṇo'pi śāmyati

vicārya yadanantātmatattvaṃ tanmayatāṃ naya /
manastatastallayena tadeva bhavati sthiram

yadevātitarāṃ śreyo'nupalambhopalambhayoḥ /
dvayorapyasatostatra śeṣe vāpi sthiro bhava

ekasminsudṛḍhe tattve tāvadbhāvaṃ vibhāvayet /
bhāvo'bhāvatvamāyāti svabhyāsādyāvadātatam

pratyāhāravatāṃ cetaḥ svayaṃ bhogyakṣayādiva /
vilīyate saha prāṇaiḥ paramevāvaśiṣyate

yadekatānaṃ bhavati cetastadbhavati kṣaṇāt /
śāntāśeṣaviśeṣaughaṃ cirābhyāsasvabhāvataḥ

avidyeyaṃ tu nāstīti buddhvā yuktiyutaṃ dhiyā /
jñānādeva parāvāptistadabhyāsastataḥ param

citte śānte śāmyatīyaṃ saṃsāramṛgatṛṣṇikā /
jarāmupagate meghe mihikā tanmayī yathā

cittamātramavidyeti kuru tenaiva tatkṣayam /
tadrūpaṃ rāma cittātmā nābhāvo hi paraṃ padam

muhūrtameva nirvāṇaṃ yadi cetaḥ pare pade /
tattatpariṇataṃ viddhi tatraivāsvādamāgatam

yadi sāṃkhyena viśrāntaṃ ceto yogena vāpi te /
kṣaṇaṃ tatsattvatāṃ yātaṃ na bhūya iha jāyate

ceto vigalitāvidyaṃ sattvaśabdena kathyate /
dagdhasaṃsārabījaṃ tanna dadātyantaraṃ punaḥ

kaścidvigalitāvidyaḥ sattvasthaḥ śāntavāsanaḥ /
paraṃ śūnyopamaṃ sadyo jyotiḥ paśyati śāmyati

vigalitātmapadaṃ vigalanmanaḥ
subhaga sattvamitīha hi kathyate /
na punareti kalāmalinaṃ padaṃ
kanakatāmiva tāmramupāgatam

ityārṣe śrīvāsiṣṭhamahārāmāyaṇe vā० de० mo० nirvā० pū० prāṇamanaḥsaṃyogavicāraṇaṃ nāmaikonasaptatitamaḥ sargaḥ