Yoga Vasistha · Chapter 6.40

catvāriṃśaḥ sargaḥ

śrīvasiṣṭha uvāca /
rūpālokamanaskārabuddhyādīndriyavedanam /
svarūpaṃ viduramlānamasvabhāvasya vastunaḥ

asvabhāvatanutvena svabhāvasthitirātatā /
yadodeti tadā sargo bhramābhaḥ pratibhāsate

yadā svabhāvaviśrāntiḥ sthitimeti śamātmikā /
jagaddṛśyaṃ tadā svapnaḥ suṣupta iva śāmyati

bhogā bhavamahārogā bandhavo dṛḍhabandhanam /
anarthāyārthasaṃpattirātmanātmani śāmyatām

/
asvabhāvātmatā sargaḥ svabhāvaikātmatā śivaḥ /
bhūyatāṃ paramavyomnā śāmyatāṃ meha tāmyatām

nātmānamavagacchāmi na dṛśyaṃ ca jagadbhramam /
brahma śāntaṃ praviṣṭo'smi brahmaivāsmi nirāmayaḥ

tvameva paśyasi tvantvaṃ sattvaṃ śabdārthajṛmbhitam /
paśyāmi śāntamevāhaṃ kevalaṃ paramaṃ nabhaḥ

brahmaṇyeva parākāśe rūpālokamanomayāḥ /
vibhramāstava saṃjātakalpāḥ spandā ivānile

brahmātmā vetti no sargaṃ sargātmā brahma vetti no /
suṣupto vetti no svapnaṃ svapnastho na suṣuptakam

prabuddho brahmajagatorjāgratsvapnadṛśoriva /
rūpaṃ jānāti bhārūpaṃ jīvanmuktaḥ praśāntadhīḥ

yathābhūtamidaṃ sarvaṃ parijānāti bodhavān /
saṃśāmyati ca śuddhātmā śaradīva payodharaḥ

smṛtisthaḥ kalpanastho vā yathākhyātaśca saṃgaraḥ /
sadasadbhrāntatāmātrastathāhaṃtvajagadbhramaḥ

ātmanyapi nāsti hi yā
draṣṭā yasyā na vidyate kaścit /
na ca śūnyaṃ nāśūnyaṃ
bhrāntiriyaṃ bhāsate seti

ityārṣe śrīvāsiṣṭhamahārāmāyaṇe vā० de० mo० nirvāṇaprakaraṇe u० vasiṣṭhagītāsu ātmaviśrāntikathanaṃ nāma catvāriṃśaḥ sargaḥ