Yoga Vasistha · Chapter 6.215

pañcadaśādhikadviśatatamaḥ sargaḥ

śrīvālmīkiruvāca /
bharadvāja mahābuddhe mama śiṣyādhināyaka /
iti rāmādayo jñātajñeyā niḥśokatāṃ gatāḥ

etāmeva dṛśaṃ kāntāmavaṣṭabhya yathāsukham /
nīrāgastiṣṭha niḥśaṅko jīvanmuktaḥ praśāntadhīḥ

dhīranabhyastasaṅgā hi rāmādīnāmivānagha /
ghanamohanimagnāpi vimūḍhāpi na muhyati

evamete mahāsattvā jīvanmuktapadaṃ gatāḥ /
rājaputrā rāghavādyā rājā daśarathādayaḥ

tvaṃ ca putra bharadvāja svayamevāsi muktadhīḥ /
satyaṃ muktataro'syadya śrutvemāṃ mokṣasaṃhitām

mokṣopāyānimānpuṇyānpratyakṣānubhavārthadān /
bālopyākarṇya tajjñatvaṃ yāti kā tvādṛśe kathā

yathā padaṃ puṇyamanuprayātā
mahānubhāvā raghavo viśokāḥ /
vasiṣṭhavākyaprasareṇa sādho
gantavyamādyaṃ padamevameva

satāṃ nayenottamasevayā ca
praśnena codārakathāgatena /
vindanti vedyaṃ sudhiyo'pramattā
vasiṣṭhasaṅgādiva rāghavādyāḥ

tṛṣṇāvaratrādṛḍhabandhabaddhā
ye granthayo'jñasya hṛdi prarūḍhāḥ /
sarve hi te mokṣakathāvicārā-
dbālā hyabālā iva yāntyabhedam

mokṣābhyupāyānsumahānubhāvān
jñāsyanti ye tattvavidāṃ variṣṭhāḥ /
punaḥ sameṣyanti na saṃsṛtiṃ te
ko'rthaḥ sutā'nyena bahūditena

bahuśrutā ye pravicārya samya-
kprabodhitārthe kathayā janāya /
santo vadiṣyanti punaḥ śiśutvaṃ
na te prayāsyanti kimanyavākyaiḥ

ye vācayiṣyantyanapekṣitārthā
ye lekhayiṣyanti ca pustakaṃ vā /
ye kārayiṣyantyapi vācakaṃ vā
vyākhyātṛyuktaṃ śubhamāryadeśe

te rājasūyasya phalena yuktā
muhurmuhuḥ svargamudārasattvāḥ /
mokṣaṃ prayāsyanti tṛtīyajanma-
lābhena lakṣmīmiva puṇyavantaḥ

imāṃ purā mokṣamayīṃ vicārya
susaṃhitāṃ sadvacanādviriñcaḥ /
prayuktavānetadacintyarūpo
bhavantyasatyāśca na tasya vācaḥ

mokṣābhyupāyākhyakathāprabandhe
yāte samāptiṃ sudhiyā prayatnāt /
suveśma dattvābhimatānnapāna-
dānena viprāḥ paripūjanīyāḥ

deyaṃ ca tebhyaḥ khalu dakṣiṇādi
cittepsitaṃ svasya dhanasya śaktyā /
matvānurūpaṃ kṛtameva saṅga-
puṇyaṃ yathāśāstramupaityasau tat

etatte kathitaṃ kathākramaśatairbodhāya buddhairvṛha-
cchāstraṃ bṛṃhitabrahmatattvamamalaṃ dṛṣṭāntayuktyāñcitam /
śrutvaitacciranirvṛtiṃ bhaja bhṛśaṃ jīvadvimuktāśayo
lakṣmīṃ jñānatapaḥkriyākramayutāṃ bhuktvā'kṣayāmakṣayaḥ
ityārṣe śrīvāsiṣṭhamahārāmāyaṇe vā० de० mo० ni० u० granthapraśaṃsātadvācanādividhirnāma pañcadaśādhikadviśatatamaḥ sargaḥ