Yoga Vasistha · Chapter 6.194

caturnavatyadhikaśatatamaḥ sargaḥ

śrīrāma uvāca /
sarvātmasarvabhāveṣu yena yena yadā yadā /
yathā bhāti svayaṃbodhastathānubhavati svayam

svabhāva eva tiṣṭhanti sargāḥ saṃmilitā api /
atrāpi svīkṛtā eva nānāratnāṃśavo yathā

atra dṛṣṭamadṛṣṭaṃ ca mitho viśati gacchati /
jagadraśmighanaṃ ratnaṃ nānāratnaghanaṃ yathā

dīpānāmiva sargāṇāṃ bahūnāṃ jvalatāṃ param /
keṣāṃcidastyanubhavo mithaḥ keṣāṃcideva no

apsvapsviva raso'mbhodhāvāvartaramaṇāvanau /
sarge'sti pratyaṇuṃ tasminnāpi sargāstathā kramaḥ

sarvatra sarvato nityaṃ ciddhanasyāmbuvedanam /
saṃkhyātuṃ kena śakyante sargādhāraparamparāḥ

yathāvayavitā bhinnā naivāvayavinaḥ kvacit /
śabdabhedādṛte bhinnā na tathā sargatā pare

ekasyānantarūpasya kāraṇābhāvataḥ svayam /
nodeti na ca yātyastaṃ jagadādiḥ svabhāvataḥ

tapantī jñaptireveyamakhaṇḍajñeyatāmimām /
karotyakartṛrūpaiva samālokamivārkabhāḥ

vaitṛṣṇyātsarvabhāvānāṃ samāptyaivākṣayaṃ svayam /
saṃpadyate samādhānaṃ yattannirvāṇamucyate

na buddhyā buddhyate bodho bodhābuddherna bodhyate /
na buddhyate vā tenāpi bodhyo bodhaḥ kathaṃ bhavet

prabuddha eva suptābhaḥ svayaṃbodho vibudhyate /
deśakālādyabhāve'pi madhyāhne'rkātapo yathā

sarvakarmavitṛṣṇānāṃ śāntecchānāṃ prabodhataḥ /
satāmanicchatāmeva nirvāṇaṃ saṃpravartate

prabuddhabodho dhyānasthaḥ svabhāve kevale sthitaḥ /
na kiṃcidapi gṛhṇāti na kiṃcidapi cojjhati

yo yathāsthita evāste paśyandīpa ivākriyaḥ /
amanomānamanano manomananavānapi

vyutthāne viśvarūpākhyamanyatra brahmasaṃjñitam /
sargāsargātma cinmātraṃ satyaṃ sarvatra bhāsate

abhinnabodhasadrūpasvarūpānubhave sthitaḥ /
vyutthitaḥ sanniruddhaśca yaḥ paśyati sa śāmyati

jagatpadārthasārthānāṃ bodhamātraikaniṣṭhatām /
vinā nāstyaparā sattā vyomnaḥ śūnyetarā yathā

śiṣyate sphītabodhānāṃ kevalānantabodhatā /
sāpi svapariṇāmena pareṇāyātyavācyatām

tadviśrāntau parā sattā śiṣyate vā na śiṣyate /
yā kāpyatyantaśāntānāṃ na vāggocarameti sā

yā samasya parākāṣṭhā saiva bodhasya sanmayī /
sargastanmaya evātaḥ sakalaṃ śāntamavyayam

nirvāṇāya vitṛṣṇāya svacchaśītalasaṃvide /
spṛhayanti sadā sattāṃ brahmaviṣṇuharā api

sarvārthātmaiva sarvatra sarvadā sarvathoditam /
cetanaṃ śuddhamevāsti nāśo nāsyopapadyate

atyantataptaḥ saṃsāro nirvāṇamatiśītalam /
atiśītalamevāsti taptastveva na vidyate

saṃcetanti śilāntasthā yathālaṃ śālabhañjikāḥ /
anutkīrṇāstathā brahma cetatīdamakhaṇḍitam

yathā cetati saumyāmbukośasthaṃ vīcimaṇḍalam /
tathā cetati kośasya mahāciccetyamavyayam

avibhakto vibhāgasthairiva śāntairanantakaiḥ /
paramārthāmbarābhogaistvabodhātmatvamantharaiḥ

yairyairyathāsva ātmāntarbhāvitaścetitaściram /
bhogamokṣaprabhedeṣu teṣāṃ teṣāṃ tathoditaḥ

mṛte vāpyamṛte bandhau svapne svapnavibodhinaḥ /
na yathodeti satyākhyā tathā dṛśyeṣu tadvidaḥ

yadidaṃ kila dṛśyādi tacchāntamakhilaṃ śivam /
bhāvite'vagate'ṣyantīrati bhrānteḥ ka udbhavaḥ

sarvathā dehasaṃkhyeṣu vaitṛṣṇyamupajāyate /
samyagbodhe sati svapna ivāpi svārthakādiṣu

vaitṛṣṇāvṛdhete bodho vodhādvaitṛṣṇyavardhanam /
paraspareṇa prakaṭe ete kuḍyaprakāśavat

yena bodhena vaitṛṣṇyaṃ dhanadārasutādi vā /
svanūnamapi saṃpannaṃ jāḍyaṃ tatsaṃsthitaṃ tathā

etāvadeva bodhasya bodhatvaṃ yadvitṛṣṇatā /
pāṇḍityaṃ nāma tanmaurkhya yatra nāsti vitṛṣṇatā

na tu vaitṛṣṇyavodhāḍhyau na parasparavardhitau /
asatyāveva tau nāma naṣṭau citrahutāśavat

paramā bodhavaitṛṣṇyasaṃpattirmokṣa ucyate /
tatrānante pade śānte vasatā ca naśocyate

gataṃ gamyaṃ kṛtaṃ kāyaṃ dṛṣṭaṃ dṛśyamaśeṣataḥ /
yāvatsarve śivaṃ śāntamekamādyamanāmayam

ātmārāmasya śāntasya vaitṛṣṇyasyānahakṛteḥ /
asaṃkalpaiva bhavati sthitiḥ svasyeva nirmalā

sahasrebhyaḥ sahasrebhyaḥ kaścidutthāya vīryavān /
bhinatti vāsanājālaṃ pañjaraṃ kesarī yathā

prāptajyotirbodhaśuddhiḥ paramantaḥprakāśavān /
nīhāraḥ śaradīvāśu svayamevopaśāmyati

jñātajñeyastvasaṃkalpaḥ saṃkalpātiśayāśayaḥ /
avāsano vyavahṛtau vātavatspandate na vā

āsīddhīrānmanaskārairbhrāntimātraikaniścayāt /
yaḥ sarvatra khavadbhāvastadavāsanamāsitam

nirvāsane bhāva udārasattve
brahmākhilaṃ dṛśyamiti prabuddhe /
sthiraikanirvāṇamatāvananto
mokṣābhidhānaḥ praśamo'bhyudeti

ityārṣe śrīvatsiṣṭhamahārāmāyaṇe vālmī० de० mo० nirvā- u० rāmaviśrānayupagamo nāma caturnavatyadhikaśatatamaḥ sargaḥ