Yoga Vasistha · Chapter 6.192

dvinavatyadhikaśatatamaḥ sargaḥ

śrīrāma uvāca /
aho nu suciraṃ kālaṃ saṃbhrāntā vayamantare /
aparijñātamātreṇa saṃsāraparamāmbare

buddhe yāvadiyaṃ nāma jagadbhrāntirna kiṃcana /
na cābhūnna ca vāstīyaṃ na ca nāma bhaviṣyati

sarvaṃ śāntaṃ nirālambaṃ vijñānaṃ kevalaṃ sthitam /
anantaṃ ciddhanaṃ vyoma nīrāgamapakalpanam

paramākāśamevedamaparijñātamātrakam /
saṃsāratāmivāsmākaṃ gataṃ citramaho nu bhoḥ

itthaṃ dvaitamidaṃ bhātamime lokā ime'drayaḥ /
paramākāśamityacchamevānacchamiva sthitam

sargādau paralokādau svapnādau kalpanādike /
cideva cetyavadbhāti kuto'nyā kila dṛśyadhīḥ

svarge vā narake vāpi sthito'smīti matiryadi /
tattasyā narakasyānto dṛśyaṃ saṃvinmayātmakam

nedaṃ dṛśyaṃ na ca draṣṭā na sargo na jaganna cit /
na jāgratsvapnasiddhādi kimapīdaṃ tadapyasat

kuto'syāḥ saṃbhavo bhrānteriti ceddṛśyate mune /
tadetadapi no yuktaṃ bhrāntyabhāvānubhūtitaḥ

bhrāntirna saṃbhavatyeva nirvikāre jñatāpade /
yattvidaṃ bhrāntitājñānaṃ tattadevetaranna tat

nirantare nirādyante vyomni śailodare'thavā /
kuto'nyatākalpakaṃ syājjñapade cāvikāriṇi

mithyaivānubhavo bhrānteḥ svapne svamaraṇopamaḥ /
yadanālokanaṃ nāma śāmyatīdaṃ vilokanāt

mṛgatṛṣṇāmbugandharvanagaradvīnduvibhramaḥ /
tathā'vidyābhramaścāyaṃ vicārānnopalabhyate

bālavetālavadbhrāntirna vidyā jāgragāpi hi /
avicāreṇa saṃrūḍhā vicāreṇopaśāmyati

kuta āsīditi mune nātra praśno virājate /
sata eva vicāreṇa lābho bhavati nāsataḥ

prāmāṇikavicāreṇa prekṣitaṃ yanna labhyate /
tadetadasadevādi tattarhyanubhavo bhramaḥ

yannāstīti paricchinnaṃ pramāṇaiḥ suvicāritam /
khapuṣpaśaśaśṛṅgābhaṃ tatkathaṃ labhyate sataḥ

sarvataḥ prekṣyamāṇo'pi yaḥ kutaścinna labhyate /
tasya syātkīdṛśī sattā vandhyātanayarūpiṇaḥ

bhrāntirna saṃbhavatyeva tasmātkācitkadācana /
nirāvaraṇavijñānaghanamevedamātatam

yatkiṃcijjagadadyātra bhātīdaṃ parameva tat /
paraṃ pare parāpūrṇe pūrṇamevāvatiṣṭhate

na bhātaṃ na ca nābhātamiha kiṃcitkadācana /
idamitthaṃ sthitaṃ svacchaṃ śāntameva jagadvapuḥ

ajamamaramahāryamāryajuṣṭaṃ
paramavikāri nirāmayaṃ samantāt /
padamahamuditaṃ tataṃ hi śuddhaṃ
nirahamanekamathādvayaṃ vikāsi

ityārṣe śrīvāsiṣṭhamahārāmāyaṇe vā० de० mo० ni० u० viśrāntyupagamavarṇanaṃ nāma dvinavatyadhikaśatatamaḥ sargaḥ