Yoga Vasistha · Chapter 6.152

dvipañcāśadadhikaśatatamaḥ sargaḥ

muniruvāca /
ityuktvā sa munistatra tūṣṇīṃ svaśayane niśi /
āsīdvismayataścāhamathā''saṃ prohyamānavat

tataścireṇa kālena mayoktaṃ tasya sanmune /
evaṃ svapno vibho sarvaḥ sadrūpa iti me matiḥ

anyamuniruvāca /
satsaṃbhavati yatrānyattatredaṃ saditi smayaḥ /
yukto yatra tvetadeva sattālpaṃ tatra kā pramā

yathā svapnastathaivāyamādau sargo'vabhāsate /
pṛthvyādirahito'pyeṣa pṛthvyādibhiravasthitaḥ

itthamadyatanātsvapnātsargasvapno'malātmakaḥ /
śrṛṇu puṣkarapatrākṣa mune vyādha mahāguro

adya dṛṣṭapadārthābhyāṃ svapnaṃ svapnavato'bhavat /
sargasvapnastu dṛṣṭārtha evādau khe virājate

evaṃ satsvapna ityeva saṃdigdhamiva vakṣi kim /
sphuṭamapyanubhūtaṃ satsvapnadhyānodyamaḥ katham

idamitthaṃ yadābhogi sphuṭaṃ svapnajaganmune /
sadevānubhavatyeva tatra saṃdigdhatā katham

athevaṃvādinastasya vākyamākṣiptavānaham /
pṛṣṭavānvyādhagurutā kāsau me kathyatāmiti

anyamuniruvāca /
śrūyatāmidamākhyānamaparaṃ kathayāmi te /
saṃkṣepeṇa mahāprājña nāstyanto vistarasya me

asmyahaṃ tāvadādīrghatapāstvamatidhārmikaḥ /
śrutvedaṃ madvacaḥ satyamihaiva ratimeṣyasi

ihasthaṃ māmimaṃ tvaṃ ca na tyakṣyasi saparyayā /
ahaṃ bhavadbhiḥ sahito nivatsyāmīti niścayaḥ

sādho yāteṣu varṣeṣu tataḥ katipayeṣviha /
sarvabandhuvināśaste durbhikṣeṇa bhaviṣyati

mattasīmāntasāmantavigraheṇa tadaiva ca /
sarvo gṛhāttanuprāṇirgrāmako'yaṃ vinaṅkṣyati

tato duḥkhamajānantau ciramāśvasitau mithaḥ /
śāntau viditavedyatsamau sarvārthanispṛhau

ihaivaikatra kasmiṃścittarukhaṇḍakajālake /
samācārau nivatsyāvaḥ śūnye candraravī yathā

utpatsyate tvaraṇye'sminkālena vanamuttamam /
śālatālalatājālavalitākhilabhūtalam

tālītamāladalatāṇḍavamaṇḍitāśaṃ
vyākośapadmavanavandyavikāsivṛkṣam /
kūjaccakoracayacārulatānikuñja-
mudbhāsi nandanamivāgatamantarikṣāt

ityārṣe śrīvāsiṣṭhamahā० vā० de० mo० ni० u० a० vi० śa० munirātrisaṃkathāvarṇanaṃ nāma dvipañcāśadadhikaśatatamaḥ sargaḥ