Yoga Vasistha · Verses 6.123-2

trayoviṃśatyadhikaśatatamaḥ sargaḥ

śrīrāma uvāca /
evaṃ sthite hi bhagavañjīvanmuktasya sanmateḥ /
apūrvo'tiśayaḥ ko'sau bhavatyātmavidāṃ vara

śrīvasiṣṭha uvāca /
jñasya kasmiṃścidevāṃśe bhavatyatiśayena dhīḥ /
nityatṛptaḥ praśāntātmā sa ātmanyeva tiṣṭhati

mantrasiddhaistapaḥsiddhaistantrasiddhaiśca bhūriśaḥ /
kṛtamākāśayānādi kā tatra syādapūrvatā

aṇimādyapi saṃprāptaṃ tādṛśaireva bhūriśaḥ /
yatnena sādhitatvāttairnetareṇātmadarśinā

eṣa eva viśeṣo'sya na samo mūḍhabuddhibhiḥ /
sarvatrāsthāparityāgānnīrāgamamalaṃ manaḥ /
bhavettasya mahābuddhernāsau vastuṣu majjati

etāvadeva khalu liṃgamaliṃgamūrteḥ
saṃśāntasaṃsṛticirabhramanirvṛtasya /
tajjñasya yanmadanakopaviṣādamoha-
lobhāpadāmanudinaṃ nipuṇaṃ tanutvam

ityārṣe śrīvāsiṣṭhamahārāmāyaṇe vā० de० mo० nirvāṇa० pū० ajñāderjñasya viśeṣakathanaṃ nāma trayoviṃśatyuttaraśatatamaḥ sargaḥ