યોગવાસિષ્ઠ · શ્લોક 6.123-2

ત્રયોવિંશત્યધિકશતતમઃ સર્ગઃ

શ્રીરામ ઉવાચ ।
એવં સ્થિતે હિ ભગવઞ્જીવન્મુક્તસ્ય સન્મતેઃ ।
અપૂર્વોઽતિશયઃ કોઽસૌ ભવત્યાત્મવિદાં વર

શ્રીવસિષ્ઠ ઉવાચ ।
જ્ઞસ્ય કસ્મિંશ્ચિદેવાંશે ભવત્યતિશયેન ધીઃ ।
નિત્યતૃપ્તઃ પ્રશાન્તાત્મા સ આત્મન્યેવ તિષ્ઠતિ

મન્ત્રસિદ્ધૈસ્તપઃસિદ્ધૈસ્તન્ત્રસિદ્ધૈશ્ચ ભૂરિશઃ ।
કૃતમાકાશયાનાદિ કા તત્ર સ્યાદપૂર્વતા

અણિમાદ્યપિ સંપ્રાપ્તં તાદૃશૈરેવ ભૂરિશઃ ।
યત્નેન સાધિતત્વાત્તૈર્નેતરેણાત્મદર્શિના

એષ એવ વિશેષોઽસ્ય ન સમો મૂઢબુદ્ધિભિઃ ।
સર્વત્રાસ્થાપરિત્યાગાન્નીરાગમમલં મનઃ ।
ભવેત્તસ્ય મહાબુદ્ધેર્નાસૌ વસ્તુષુ મજ્જતિ

એતાવદેવ ખલુ લિંગમલિંગમૂર્તેઃ
સંશાન્તસંસૃતિચિરભ્રમનિર્વૃતસ્ય ।
તજ્જ્ઞસ્ય યન્મદનકોપવિષાદમોહ-
લોભાપદામનુદિનં નિપુણં તનુત્વમ્

ઇત્યાર્ષે શ્રીવાસિષ્ઠમહારામાયણે વા૦ દે૦ મો૦ નિર્વાણ૦ પૂ૦ અજ્ઞાદેર્જ્ઞસ્ય વિશેષકથનં નામ ત્રયોવિંશત્યુત્તરશતતમઃ સર્ગઃ