Yoga Vasistha · Chapter 6.123

trayoviṃśādhikaśatatamaḥ sargaḥ

śrīvasiṣṭha uvāca /
ityete dṛśyarūpāyā avidyāyā vicāraṇe /
pravṛttāḥ pādacāreṇa samudradvīpagāminaḥ

abdherdvīpaṃ punardvīpādabdhiṃ dvīpaṃ giriṃ vanam /
lāghavāllaṅghayāmāsuśchedabhedavivarjitāḥ

pīto vipaścitpāścātyo mīnenāmaramāninā /
viṣṇumīnakulotthena vitastāvāhanaujasā

kṣīrodaṃ prāpya matsyena tenodgīrṇaḥ sudurjaraḥ /
tena kṣīrodamullaṅghya gato dūraṃ digantaram

dakṣiṇo yakṣanagare saṃprekṣyekṣurasārṇave /
śikṣādakṣiṇayākṣipya yakṣiṇyā kāmukīkṛtaḥ

pūrvo makaramākramya yadā gaṅgāṃ nikṛttavān /
gaṅgayā sa tadānīya kānyakubje samujjhitaḥ

uttarastūttarakurūnārādhya prāptavāñśriyam /
taṃ tayainaṃ na bādhante digante mṛtabhītayaḥ

tayā makaramātaṅganigīrṇodgīrṇamūrtimān /
aticakrāma subahūndvīpāntarakulācalān

paścimaḥ pṛṣṭhamāropya hemacūḍena pakṣiṇā /
kuśadvīpe kuśāṅgaśrīstarasā tārato'rṇavān

krauñcadvīpācale pūrvo nigīrṇo rakṣasā vane /
tadrakṣaḥ pāṭitaṃ tena hṛdaye'ntravikartanaiḥ

dakṣiṇo dakṣaśāpena yakṣatāmāgataḥ kṣaṇāt /
śākadvīpe śatenāsau varṣāṇāṃ mokṣamāgataḥ

uttarastarasottīrṇatārāvarataraṅgiṇaḥ /
mahārṇavasuvarṇorvyāṃ siddhaśāpācchilāṃ gataḥ

tato varṣaśatenāsau prasādājjātavedasaḥ /
tenaivonmocitastatra siddhena ratimāptavān

varṣāṇyaṣṭāvabhūdrājā nālikeranivāsinām /
pūrvaḥ paramadharmiṣṭhaḥ prāptavānprāksmṛtiṃ tataḥ

kalpavṛkṣavane meroruttare'psarasā saha /
uvāsa daśavarṣāṇi nālikeraphalāśanaḥ

vihagāśvāsatattvajñaḥ śālmalidvīpaśālmalau /
paścimaḥ pakṣiṇīnīḍe krīḍayā nyavasatsamāḥ

mandarādrau mṛdutale mandāratarumandire /
kinnarī mandarīnāmnī dinamekamasevata

kṣīrodavelāvanakalpavṛkṣa-
vanāvalīnandanadevatābhiḥ /
sārdhaṃ samāḥ saptatimapsarobhi-
rnināya kāmākulito'tha pūrvaḥ

ityārṣe śrīvāsiṣṭhamahārāmāyaṇe vālmī० de० mo० ni० u० avi० vi० digviharaṇaṃ nāma trayoviṃśādhikaśatatamaḥ sargaḥ