Yoga Vasistha · Chapter 6.107

saptādhikaśatatamaḥ sargaḥ

śrīvasiṣṭha uvāca /
acetyacinmayaṃ viśvaṃ viṣvagābhāti cinnabhaḥ /
atra ciccetanaṃ cedaṃ cetyamapyevamātmakam

ato jīvannapi mṛta iva sarvo'vatiṣṭhate /
asāvahaṃ ca tvaṃ ceti jīvanto'pi mṛtā iva

kāṣṭhamaunamṛtā eva vyavahāragatā api /
khagamā eva vā sarve bhāvāḥ sthāvarajaṅgamāḥ

ākāśakācakacyātma yadidaṃ kiṃcidātatam /
na kiṃcideva tadviddhi kiṃcidvyomni kuto bhavet

keśoṇḍrakanadīvāhadhūmālīmauktikādivat /
yatnaṃ kacati tatrāsti nānubhūte'pi vastutā

tathaivāsmiñjagannāmni cidvyomni kacane cite /
anubhūte'pi niḥśūnye kāsthāsthābhāvakaśca kaḥ

cidvālakalpanājāle śūnyātmani nirarthake /
avastubhūte pṛthvyādau bhrāntimātrāmbarodaye

kimāsthā bālakā brūta mamedamahamityalam /
ā jñātaṃ ramate bālasaṃkalpe bāla eva ca

pṛthvyādyasadvicārairvā vyarthaṃ yāsyati jīvitam /
kiṃcicca na jñāsyati bhorākāśakṣālanodyataḥ

sahakāryādipūrvāṇāṃ kāraṇānāmabhāvataḥ /
yadādāveva notpannaṃ tannāmādya bhavetkutaḥ

ajātenāsatārthena khena vyavaharanti ye /
mūḍhā mṛtamajātaṃ vā tanayaṃ pālayanti te

kutaḥ pṛthvyādayaḥ kena ke nāma kathamutthitāḥ /
cidvyometthamidaṃ śāntaṃ prakacatyātmanātmani

kāryakāraṇakālādikalpanākulacetasām /
evaṃ pṛthvyādayaḥ santi tairbālairalamastu naḥ

apṛthvyādi jagannāma sapṛthvyādi ca khātmakam /
kacatītthaṃ nabhorūpaṃ svapnādiṣviva cinmaṇiḥ

aṅgaṃ yadetasya cidambarasya
nirākṛti svānubhavānumānam /
tadetadābhāti mahītalādi-
rūpeṇa vedyetikṛtābhidhānam

०ityārṣe śrīvāsiṣṭhamahārāmāyaṇe vālmīkīye de० mo० ni० uttarārdhe avidyābhāvapratipādanaṃ nāma saptādhikaśatatamaḥ sargaḥ