Yoga Vasistha · Chapter 5.70

saptatitamaḥ sarga

śrīvasiṣṭha uvāca /
asaṃsaṅgasukhābhyāsasaṃsthitairvitatātmabhiḥ /
vyavahāribhirapyantarvītaśokabhayaiḥ sthitam

prakṣubdhākṣubdhadehasyāvisaṃvādena saṃvidaḥ /
antaḥpūrṇasya vadane śrīrindoriva lakṣyate

cetyahīnaṃ cidālambaṃ mano yasya gatajvaram /
tenāmbu katakeneva janatā saṃprasīdati

nityamātmadṛśā līno jñaḥ svasthaścañcalo'pi san /
kṣubdho dṛśyata evāsau pratibimbārkavanmudhā

ātmārāmā mahātmānaḥ prabuddhāḥ paramodayāḥ /
bahiḥ picchāgrataralā antarmerurivācalāḥ

cittamātmatvamāyātaṃ sukhaduḥkhānurañjanam /
nopaiti raṅgasaṃyukto masṛṇaḥ sphaṭiko yathā

saṃsāradṛṣṭiruditaṃ jñātalokaparāvaram /
na rañjayati saccittaṃ jalalekhā yathāmbujam

ātmadhyānamayo'dhyāne prabodhaṃ paramātmanaḥ /
kalanāmalanirmuktaḥ svasakta iti kathyate

ātmārāmatayā jīvo yātyasaṃsaṅgatāmiha /
ātmajñānena saṃsaṅgastanutāmeti nānyathā

jāgratyeva suṣuptastho jīvo bhavati rāghava /
asyāṃ dṛśi gato'dvandvo nityānastamayodayaḥ

atra prauḍhimupāyātaḥ sūryatāmeti pāvanīm /
pariṇāmavaśādinduramāvāsyārkatāmiva

citte cittadaśāhīne yā sthitiḥ kṣīṇacetasām /
socyate śāntakalanā jāgratyeva suṣuptatā

tāṃ suṣuptadaśāmetya jīvanvyavaharannaraḥ /
sukhaduḥkhavaratrābhirna kadācana kṛṣyate

jāgratyeva suṣuptastho yaḥ karoti jagatkriyām /
taṃ yantraputrakamiva nāyāti sukhaduḥkhadṛk

cittasya bādhikā śaktirbhāvābhāvopatāpadā /
ātmatāmāgate citte tasya kiṃ bādhate katham

suṣuptabuddhiḥ karmāṇi pūrvamevāvahelayā /
kurvanna badhyate jīvo jīvanmuktatayā sthitaḥ

sauṣuptīṃ vṛttimāśritya kuru mā kuru vānagha /
karma prakṛtijaṃ pākavaśādupagataṃ sthitam

nādānaṃ na parityāgaḥ karmaṇo'jñāya rocate /
tiṣṭhantyavagatātmāno yathāprāptānuvartinaḥ

kurvannapi na kartāsi suṣuptyaikasthayā dhiyā /
akartāpi ca kartāsi yathecchasi tathā kuru

yathā na kiṃcitkalayanmañcake spandate śiśuḥ /
tathā phalānyakalayankuru karmāṇi rāghava

acetyacitpadasvastho jāgratyapi suṣuptadhīḥ /
yadyatkaroti labdhātmā tasmiṃstasya na kartṛtā

daśāmāsādya sauṣuptīṃ svacitte ca vivāsanaḥ /
antaḥ śītalatāmeti jño rasena yathā śaśī

suṣuptastho mahātejāḥ pūrṇaḥ pūrṇendubimbavat /
samaḥ sarvāsvavasthāsu bhavatyadriryathartuṣu

suṣuptasaṃstho dhīrātmā bahirāyāti lolatām /
kriyāsu no bhavatkampaḥ praspandita ivācalaḥ

suṣuptāvasthito bhūtvā dehaṃ vigatakalmaṣaḥ /
pātayāśvatha vā dīrghaṃ kālaṃ dhāraya śailavat

eṣaiva rāma sauṣuptī sthitirabhyāsayogataḥ /
prauḍhā satī turyamiti kathitā tattvakovidaiḥ

ānandamaya evāntaḥ prakṣīṇasakalāmayaḥ /
atyantāstaṃ gatamanā bhavati jño mahodayaḥ

tatrastho jñaḥ pramuditaḥ paramānandaghūrṇitaḥ /
līlāmivemāṃ racanāṃ sadā samanupaśyati

vītaśokabhayāyāso gatasaṃsārasaṃbhramaḥ /
turyāvasthāmupārūḍho bhūyaḥ patati nātmavān

prāpya svāṃ padavīṃ puṇyāṃ yathedaṃ bhramitaṃ jagat /
śailasaṃstha ivādhaḥsthaṃ hasanpaśyati dhīradhīḥ

asyāṃ tu turyāvasthāyāṃ sthitiṃ prāpyāvināśinīm /
ānandaikāntalīnatvādanānandapadaṃ gataḥ

anānandamahānandakalātītastato'pi hi /
mukta ityucyate yogī turyātītaṃ padaṃ gataḥ

parigalitasamastajanmapāśaḥ
sakalavilīnatamomayābhimānaḥ /
paramarasamayīṃ prayāti sattāṃ
jalagatasaindhavakhaṇḍavanmahātmā

ityārṣe śrīvāsiṣṭhamahārāmāyaṇe vālmīkīye de० mokṣopāyeṣūpaśamaprakaraṇe asaṃsaṅgavikalpopadeśo nāma saptatitamaḥ sargaḥ