Yoga Vasistha · Chapter 5.38

aṣṭatriṃśaḥ sargaḥ

śrīvasiṣṭha uvāca
athākhilajagajjālakramapālanadevanaḥ /
kṣīrodanagare śeṣaśayyāsanagato hariḥ

prāvṛṇnidrāvyuparame devārthamarisūdanaḥ /
dhiyā vilokayāmāsa kadācijjāgatīṃ gatim

triviṣṭapaṃ svamanasā pārthivaṃ cāvalokya saḥ /
ācāramājagāmāśu pātālamaripālitam

tatra sthirasamādhāne sthite prahlādadānave /
dṛṣṭvā saṃpadamindrasya pure prauḍhimupāgatām

vyālatalpatalasthasya kṣīrodārṇavaśāyinaḥ /
śaṅkhacakragadāpāṇerdehasyāntaracāriṇaḥ

padmāsanasthasya manaḥ śarīreṇātibhāsvatā /
idaṃ saṃcintayāmāsa trailokyālamahālinā

prahlāde padaviśrānte pātāle gatanāyake /
kaṣṭaṃ sṛṣṭiriyaṃ prāyo nirdaityatvamupāgatā

daityābhāve suraśreṇī nirjigīṣupadaṃ gatā /
śamameṣyatyadṛṣṭābdapaṭaleṣu saridyathā

mokṣākhyaṃ nirgatadvandvaṃ tato yāsyati tatpadam /
kṣīṇābhimānavirasā lateva praviśuṣkatām

devaughe śāntimāyāte bhuvi yajñatapaḥkriyāḥ /
adevatvaphalāḥ sarvāḥ śamameṣyantyasaṃśayam

kriyāsvathopaśāntāsu bhūrloko'stamupaiṣyati /
asaṃsāraprasaṅgo'tha tasya nāśe bhaviṣyati

ākalpāntaṃ tribhuvanaṃ yadidaṃ kalpitaṃ mayā /
nāśameṣyatyakālena tāpe himakaṇo yathā

kimevamasminnābhoge vilīya kṣayamāgate /
kṛtaṃ mayeha bhavati svalīlākṣayakāriṇā

tato'hamapi śūnye'sminnaṣṭacandrārkatārake /
vapuḥpraśāntimādhāya sthitimeṣyāmi tatpade

akāṇḍa evamevaṃ hi jagatyupaśamaṃ gate /
neha śreyo na paśyāmi manye jīvantu dānavāḥ

daityodyogena vibudhāstato yajñatapaḥkriyāḥ /
tena saṃsārasaṃsthānaṃ na saṃsārakramo'nyathā

tasmādrasātalaṃ gatvā yathāvatsthāpayāmyaham /
sve krame dānavādhīśamṛtuḥ punariva drumam

vinā prahlādamatha ceditaraṃ dānaveśvaram /
karomi tadasau manye devānāsādayiṣyati

prahlādasya tvayaṃ dehaḥ paścimaḥ pāvano mahān /
ākalpamiha vastavyaṃ dehenānena tena ca

evaṃ hi niyatirdevī niścitā pārameśvarī /
prahlādena yathākalpaṃ sthātavyamiha dehinā

tasmāttameva gatvā tu daityendraṃ bodhayāmyaham /
garjangirinadīsuptaṃ mayūramiva vāridaḥ

jīvanamuktasamādhisthaḥ karotvasuranāthatām /
maṇirmuktamanaskāraḥ pratibimbakriyāmiva

nahi naśyati sargo'yamevaṃ saha surāsuraiḥ /
bhaviṣyati ca taddvandvaṃ tanme krīḍā bhaviṣyati

sargakṣayodayāvetau susamau mama yadyapi /
tathāpīdaṃ yathāsaṃsthaṃ bhavatvanyena kiṃ mama // २४ '
bhāvābhāveṣu yattulyaṃ tannāśe tatsthitau ca vā /
yaḥ prayatnastvabuddhitvāttadyogagamanaṃ bhavet

tasmātprayāmi pātālaṃ bodhayāmyasureśvaram /
sthairyaṃ yāmi na saṃsāralīlāṃ saṃpādayāmyaham

asurapuramavāpya proddhatācāraghoraṃ
kamalamiva vivasvāndaityamudbodhayāmaḥ /
jagadidamakhilaṃ svasthairyamabhyānayāmo
ghanavidhiriva śaile cañcalaṃ meghajālam

ityārṣe śrīvāsiṣṭhamahārāmāyaṇe vālmīkīye de० mokṣopāyeṣūpaśamaprakaraṇe parameśvaravitarko nāmāṣṭātriṃśaḥ sargaḥ