યોગવાસિષ્ઠ · અધ્યાય 5.26

ષડ્વિંશઃ સર્ગઃ

શ્રીવસિષ્ઠ ઉવાચ ।
ઇતિ સંચિન્ત્ય બલવાન્બલિરામીલિતેક્ષણઃ ।
દધ્યૌ કમલપત્રાક્ષં શુક્રમાકાશમન્દિરમ્

સર્વસ્થં ચિન્તયાનં તુ નિત્યધ્યાનોઽથ ભાર્ગવઃ ।
ચેતઃસ્થં જ્ઞાતવાન્ શિષ્યં બલિં ગુર્વર્થિનં પુરે

અથ સર્વગતાનન્તચિદાત્મા ભાર્ગવઃ પ્રભુઃ ।
આનિનાય સ દેહં સ્વં રત્નવાતાયનં બલેઃ

ગુરુદેહપ્રભાજાલપરિમૃષ્ટતનુર્બલિઃ ।
બુબુધે પ્રાતરર્કાંશુસંબોધિતમિવામ્બુજમ્

તત્ર રત્નાર્ઘ્યદાનેન મન્દારકુસુમોત્કરૈઃ ।
પાદાભિવન્દનૈરેનં પૂજયામાસ ભાર્ગવમ્

રત્નાર્ઘ્યપરિપૂર્ણાઙ્ગં કૃતમન્દારશેખરમ્ ।
મહાર્હાસનવિશ્રાન્તમથોવાચ ગુરું બલિઃ

બલિરુવાચ ।
ભગવંસ્ત્વત્પ્રસાદોત્થા પ્રતિભેયં પુરસ્તવ ।
નિયોજયતિ માં વક્તું કાર્યં કર્તુમિવાર્કભાઃ

ભોગાન્પ્રતિ વિરક્તોઽસ્મિ મહાસંમોહદાયિનઃ ।
તત્તત્ત્વં જ્ઞાતુમિચ્છામિ મહાસંમોહહારિ યત્

કિયન્માત્રમિદં ભોગજાલં કિમયમેવ વા ।
કોઽહં કસ્ત્વં કિમેતે વા લોકા ઇતિ વદાશુ મે

શુક્ર ઉવાચ ।
બહુનાત્ર કિમુક્તેન ખં ગન્તું યત્નવાનહમ્ ।
સર્વદાનવરાજેન્દ્ર સારં સંક્ષેપતઃ શૃણુ

ચિદિહાસ્તિ હિ ચિન્માત્રમિદં ચિન્મયમેવ ચ ।
ચિત્ત્વં ચિદહમેતે ચ લોકાશ્ચિદિતિ સંગ્રહઃ

ભવ્યોઽસિ ચેત્તદેતસ્માત્સર્વમાપ્નોષિ નિશ્ચયાત્ ।
નો ચેત્તદ્વહ્વપિ પ્રોક્તં ત્વયિ ભસ્મનિ હૂયતે

ચિચ્ચેત્યકલનાબન્ધસ્તન્મુક્તિર્મુક્તિરુચ્યતે ।
ચિદચેત્યાખિલાત્મેતિ સર્વસિદ્ધાન્તસંગ્રહઃ

એનં નિશ્ચયમાદાય વિલોકયસિ હેલયા ।
સ્વયમેવાત્મનાત્માનમનન્તં પદમાપ્સ્યસિ

ખં વ્રજામ્યહમત્રૈવ મુનયઃ સપ્ત સંગતાઃ ।
કેનાપિ સુરકાર્યેણ વસ્તવ્યં તત્ર વૈ મયા

રાજન્યાવદયં દેહસ્તાવન્મુક્તધિયામપિ ।
યથાપ્રાપ્તક્રિયાત્યાગો રોચતે ન સ્વભાવતઃ

ઇતિ કથિતવતાથ ભાર્ગવેણ
સ્ફુટજલરાશિપથા મહાજવેન ।
પ્લુતમલિશબલે નભોન્તરાલે
તરલતરઙ્ગવદાકુલે ગ્રહૌઘૈઃ

ઇત્યાર્ષે શ્રીવાસિષ્ઠમહારામાયણે વાલ્મીકીયે દે૦ મોક્ષોપાયેષૂપશમપ્રકરણે બલ્યુપદેશયોગો નામ ષડ્વિંશઃ સર્ગઃ