Yoga Vasistha · Chapter 5.2

dvitīyaḥ sargaḥ

śrīvālmīkiruvāca /
te sametya gṛhaṃ gatvā rājaputrāḥ śaśitviṣaḥ /
cakruḥ sarvamaśeṣeṇa svasadmasu dinakramam

vasiṣṭho rāghavaścaiva rājāno munayo dvijāḥ /
iti cakruḥ svakāryāṇi tathā svagṛhavīthiṣu

sasnuḥ kamalakahlārakumudotpalahāriṣu /
jalāśayeṣu cakrāhvahaṃsasārasarājiṣu

gobhūtilahiraṇyāni śayanānyāsanāni ca /
dadurdānāni viprebhyo bhājanānyaṃśukāni ca

hemaratnavicitreṣu sveṣu cāmarasadmasu /
ānarcuracyuteśānahutāśārkādikānsurān

putrapautrasuhṛdbhṛtyabandhumitragaṇaiḥ saha /
tata āsvādayāmāsurbhojanānyucitāni vai

etasminsamaye cāsminnagare divaso'bhavat /
tanuraṣṭāṅgaśeṣatvāddṛṣṭo na ca manoharaḥ

sāyantanadināntaṃ te tatkālocitaceṣṭayā /
anayannaṃśubhiḥ sārdhaṃ yāvadastaṃ yayau raviḥ

saṃdhyāṃ vavandire suṣṭu jepuścaivāghamarṣaṇam /
peṭhuḥ stotrāṇi puṇyāni jagurgāthā manoharāḥ

tataścābhyuditā śyāmā kāminīśokahāriṇī /
kṣīrodādiva māhendrī candrāvaśyāyadāyinī

śanairāstīrṇapuṣpeṣu kīrṇakarpūramuṣṭiṣu /
dīrghendubimbaramyeṣu tasthustalpeṣu rāghavāḥ

atha rāmādṛte'nyeṣāṃ tatra tadvyavahāriṇī /
vyatīyāya śanaiḥ śyāmā muhūrta iva śobhanā

tasthau rāmastu tāmeva vāsiṣṭhīṃ vacanāvalīm /
cintayanmadhurodārāṃ kariṇīṃ kalabho yathā

kimidaṃ nāma saṃsārabhramaṇaṃ kimime janāḥ /
bhūtāni ca vicitrāṇi kimāyānti prayānti kiṃ

manasaḥ kīdṛśaṃ rūpaṃ kathaṃ caitatpraśāmyati /
māyeyaṃ sā kimutthā syātkathaṃ caiva nivartate

nivṛttayānayā kaḥ syādguṇo doṣo'tha vā bhavet /
kathamātmani caivāyaṃ tate saṃkoca āgataḥ

kimuktaṃ syādbhagavatā muninā manasaḥ kṣaye /
kiṃ cendriyajaye proktaṃ kimuktamathavātmani

jīvaścittaṃ mano māyetyevamādibhirātataiḥ /
rūpairātmaiva saṃsāraṃ tanotīmamasanmayam

ebhirevaṃ manomātratantubaddhaiḥ kṣayaṃ gataiḥ /
duḥkhopaśāntiretāni sucikitsyāni naḥ katham

bhogābhramālāvalayāṃ dhībalākāmimāṃ katham /
pṛthakkaromi payaso dhārāṃ haṃsa ivāmbhasaḥ

bhogāstyaktuṃ na śakyante tattyāgena vinā vayam /
prabhavāmo na vipadāmaho saṃkaṭamāgatam

manomātramidaṃ prāpyaṃ tathaivedaṃ prayojanam /
saṃpannaṃ no giriguru maurkhyādyakṣaḥ śiśoriva

paramāṃ śāntimāgatya gatasaṃsārasaṃbhramā /
bāleva labdhadayitā kaṃcitprāpsyati no matiḥ

kadopaśāntasaṃrambhaṃ vigatāśeṣakautukam /
apāpamātmaviśrāntaṃ mama syātpāvanaṃ manaḥ

kalākalāpasaṃpūrṇācchaśāṅkādapi śītale /
pade surūḍhaṃ viśramya bhramiṣyāmi kadā jagat

kalanāpelavaṃ rūpamutsṛjyālīnamātmani /
kadaiṣyati manaḥ śāntimambhasīva taraṅgakaḥ

tṛṣṇātaraṅgākulitamāśāmakaramālinam /
kadā saṃsārajaladhiṃ tīrtvā syāmahamajvaraḥ

kadopaśamaśuddhāsu padavīṣu vicakṣaṇāḥ /
mumukṣūṇāṃ nivatsyāmo niḥśokaṃ samadarśanāḥ

saṃtāpitasamastāṅgaḥ sarvadhātubhayaṃkaraḥ /
saṃsṛtijvara ādīrghaḥ kadā nāśamupaiṣyati

nirvātadīpalekheva kadā cittaṃ gatavyatham /
śamameṣyati he buddhe suprakāśaghanāntaram

kadendriyāṇi duḥkhebhyaḥ saṃtariṣyanti helayā /
durīhādagdhadehāni garutmanta ivārṇavān

ayaṃ so'haṃ rudanmūḍha iti vyarthāhito bhramaḥ /
śaradīvāsito meghaḥ kadā nāśamupaiṣyati

mandāravanalekhāsu yā matiḥ sā tṛṇāyate /
yāce tatpadamātmīyaṃ saṃprāpsyāmaḥ kadā vayam

vītarāgajanaproktā nirmalā jñānadṛṣṭayaḥ /
kaccitpadaṃ tvayi manaḥ kariṣyantīti me vada

hā tāta mātaḥ putreti girāmāsāmahaṃ punaḥ /
bhājanaṃ citta mābhūvaṃ bhojanaṃ duḥkhabhoginām

he buddhe bhagini bhrāturarthitāṃ pūrayāśu me /
āvayorduḥkhamokṣāya vicāraya munergiraḥ

tvāṃ pādapatitaḥ prītyā yāce sati sute mate /
tena bhavye bhavocchedabhūtaye susthirā bhava

vasiṣṭhamuninā proktā viraktāḥ prathamaṃ giraḥ /
tato mumukṣorācāra utpattīnāṃ kramastataḥ

tataḥ sthitiprakaraṇaṃ samaṃ dṛṣṭāntasundaram /
vijñānagarbhasulabhaṃ yathāvatsmara he mate

kṛtamatiṃ śataśo vicāritaṃ yadyadi tadupaiti na mānasasya buddhiḥ /
bhavati tadaphalaṃ śaraddhanābhaṃ satatamato matireva kāryasāraḥ

ityārṣe śrīvāsiṣṭhamahārāmāyaṇe vālmīkīye de० mokṣopāyeṣūpaśamaprakaraṇe upadeśānuvarṇanaṃ nāma dvitīyaḥ sargaḥ