Yoga Vasistha · Chapter 3.68

aṣṭaṣaṣṭitamaḥ sargaḥ

śrīvasiṣṭha uvāca /
atraivodāharantīmamitihāsaṃ purātanam /
rākṣasyoktaṃ mahāpraśnajālamāvalitākhilam

asti kajjalapaṅkādrerivogrā śālabhañjikā /
himādreruttare pārśve karkaṭī nāma rākṣasī

viṣūcikābhidhānā ca nāmnāpyanyāyavādhikā /
vindhyāṭavīva dehena śuṣkā kārśyamupāgatā

mahābalāgninayanā rodorandhrārdhapūraṇī /
nīlāmbaradharā kṛṣṇā dehabaddheva yāminī

nīhāravasanacchannā medurābhraśiraḥpaṭā /
lambābhrabimbollasitā nityotthatimirordhvajā

sthiravidyullatānetrā tamālatarujānukā /
vaidūryaśūrpāgranakhī bhasmanīhārahāsinī

nirmāṃsanaradehaughapuṣpasragdāmabhūṣitā /
sarvāṅgodāttasaṃprotaśavamālāvirājitā

vetālāveśavicalatkālakaṅkālakuṇḍalā /
arkādānotkadīrghāgrabhīmograbhujamaṇḍalā

tasyā vipulakāyatvāddurlabhatvānnijāndhasaḥ /
atṛpto'rṇavalekhāyā ivābhūjjāṭharo'nalaḥ

na kadācana sā tṛptimupayātā mahodarī /
vaḍavānalajihveva cintayāmāsa caikadā

jambūdvīpagatānsarvānnigirāmi janānyadi /
anāratamanuśvāsaṃ jalarāśimivārṇavaḥ

meghena mṛgatṛṣṇeva tanme kṣudupaśāmyati /
aviruddhaiva sā yuktiryayāpadi hi jīvyate

mantrauṣadhatapodānadevapūjādirakṣitam /
samameva janaṃ sarvaṃ nirbādhaṃ kaḥ prabādhate

tapaḥ karomi paramamakhinnenaiva cetasā /
tapasaiva mahogreṇa yaddurāpaṃ tadāpyate

iti saṃcintya sā sarvajantujātajighāṃsayā /
taporthamatha sasmāra parvataṃ bhūtadurgamam

āruroha ca tacchṛṅgaṃ sthiravidyudvilocanā /
hastapādādimaddehā śyāmalevābhramaṇḍalī

tatra gatvātha sā snātvā tapaḥ kartuṃ kṛtasthitiḥ /
atiṣṭhadekapādena candrārkāspandalocanā

krameṇa divasāḥ pakṣāstasyā māsartavo yayuḥ /
śītātapeṣu līnāyāḥ kṛtāyā iva śailataḥ

sā babhūvābhramālāyāḥ samāsaṃ stambhitākṛtiḥ /
kṛṣṇordhvagordhvakeśī ca khamāhartumivodgatā

ālokya tāṃ pavanajarjaritāṅgakatvak
cīrāṅgaṇākṛtiraṇatpavanāvadhūtaiḥ /
ūrdhvasthamūrdhajatamaḥpaṭalairdadhānāṃ
tāroghamauktikamajaḥ samupājagāma

ityārṣe śrīvāsiṣṭhamahārāmāyaṇe vālmīkīye utpattiprakaraṇe līlopākhyāne rākṣasīvarṇanaṃ nāmāṣṭaṣaṣṭitamaḥ sargaḥ