Scripture Library

Yoga Vasistha · Chapter 3.38

3.38.38

aṣṭatriṃśaḥ sargaḥ

3.38.1

śrīvasiṣṭha uvāca /
evamatyākule yuddhe sāsphoṭabhayasaṃkule /
āditye tamasā vṛddhe caṭatkaṭhinakaṅkaṭe

3.38.2

vahatyambūtpatantīṣu patantīṣvaśmavṛṣṭiṣu /
nadīṣu kṣepaṇācchāsu varakeṣvabjapaṅktiṣu

3.38.3

mithaḥ phalāgrakāṭotthavahnisīkariṇīṣu ca /
āyāntīṣu prayāntīṣu dūraṃ śaranadīṣu ca

3.38.4

vahallūnaśiraḥpadmacakrāvartaistaraṅgitaiḥ /
khārṇave pūrite hetivṛndamandākinīgaṇaiḥ

3.38.5

samīraṇaraṇatkvāṇaśastrapūrṇaghanairghanaiḥ /
saṃdehānteṣu siddheṣu kapikacchavyathāpradaiḥ

3.38.6

aṣṭabhāgadaśāśeṣapratāpamadhurākṛti /
śastraghātaujasā vīra ivāhastanutāṃ yayau

3.38.7

śrāntāśvebhāḥ prabhagnāśca hetisaṃghātadīptayaḥ /
divasena samaṃ senā yayurmandapratāpatām

3.38.8

athasenādhināthābhyāṃ vicārya sahamantribhiḥ /
dūtāḥ parasparaṃ vṛttā yuddhaṃ saṃhriyatāmiti

3.38.9

tatra śramavaśānmandayantraśastraparākramaiḥ /
raṇasaṃharaṇaṃ kāle sarvairevorarīkṛtam

3.38.10

tato mahārathottuṅgaketuprāntakṛtāspadam /
balayorāruhohaika eko yodho dhruvo yathā

3.38.11

soṃ'śukaṃ bhrāmayāmāsa sarvadiṅmaṇḍale sitam /
śyāmeva dīrghaśuddhāṃśuṃ yuddhaṃ saṃhriyatāmiti

3.38.12

tato dundubhayo neduḥ pratidhvanitadiṅmukhāḥ /
mahāpralayasaṃśāntau puṣkarāvartakā iva

3.38.13

śarādihetisarito vistīrṇe gagane sthite /
pravṛttāḥ sukhamāgantuṃ sarasaḥ sarito yathā

3.38.14

yodhadordrumasaṃcārastanutāmāyayau śanaiḥ /
bhūkampānte vanaspanda ivābhrānta ivārṇavaḥ

3.38.15

vinirgantuṃ pravavṛte raṇādatha baladvayam /
vāripūraścaturdikṣu pralayaikārṇavādiva

3.38.16

utkṣiptamandarakṣīrasamudravadanākulam /
sainyaṃ praśāmyadāvartaṃ śanaiḥ sāmyamupāyayau

3.38.17

krameṇāsīnmuhūrtena vikaṭodarabhīṣaṇam /
agastyapītārṇavavacchūnyameva raṇāṅgaṇam

3.38.18

śavasantatisaṃpūrṇaṃ vahadraktanadākulam /
parikūjanajhaṅkārapūrṇajhillivanopamam

3.38.19

bahadraktasaritsrotastaraṅgāravaghargharam /
sākrandārdhamṛtāhūtasaprāṇavyagramānavam

3.38.20

mṛtārdhamṛtadehaughasṛtāsṛkplutanirjharam /
sajīvanarapṛṣṭhasthaśavaspandanabhrāntidam

3.38.21

karīndraśavarāśyagraviśrāntāmbudakhaṇḍakam /
viśīrṇarathasaṃghātaṃ vātacchinnamahāvanam

3.38.22

vahadraktanadīraṃhaḥprohyamānahayadvipam /
śaraśaktyṛṣṭimusalagadāprāsāsisaṃkulam

3.38.23

paryāṇāvanasaṃnāhakavacāvṛtabhūtalam /
ketucāmarapaṭṭaughaguptaṃ śavaśarīrakam

3.38.24

phaṇāsphuṭakatūṇīrakuñjakūjatsamīraṇam /
śavarāśipalālaughatalpasuptapiśācakam

3.38.25

maulihārāṅgadadyotaśakracāpavanāvṛtam /
śvaśṛgālakarākṛṣṭasāndrāntrādīrgharajjukam

3.38.26

raktakṣetrakvaṇatkiṃciccheṣajīvanṛdanturam /
raktakardamanirmagnasajīvanaradarduram

3.38.27

varāṅgakavacaprakhyanirgatākṣiśatoccayam /
vahadbhujorukāṣṭhaughaghoraraktasaricchatam

3.38.28

sākrandavandhuvalitaṃ mṛtārdhamṛtamānavam /
śarāyudharathāśvebhaparyāṇāsaṃvarāntaram

3.38.29

nṛtyatkabandhadordaṇḍamaṇḍalānamitāmbaram /
madamedovasāgandhapīḍārdraghrāṇakoṭaram

3.38.30

uttālvardhamṛtebhāśvavāryamāṇālpajīvitam /
vahadraktanadīvīciprahārahatadundubhi

3.38.31

uhyamānamṛtebhāśvamakarāsṛksaricchatam /
mriyamāṇanarānīkaphūtkṛtāsṛkpraṇālikam

3.38.32

svalpajīvaśarāpūrṇamukhadṛkkāntitasvanam /
piṇḍabhāryāvasāgandhavātāntotpīṭhalohitam

3.38.33

unnāsārdhamṛtebhendrakarākrāntakabandhakam /
niradhiṣṭhitahastyaśvapātitoccakabandhakam

3.38.34

rudatkrandatparibhraṣṭaśavakṣubdhāsṛguddhati /
mṛtabhartṛgale śastratyaktaprāṇakulāṅganam

3.38.35

senotkrāntatatakṣiprabahupānthaparīkṣaṇam /
śavahārakarākṛṣṭasaprāṇānucarākulam

3.38.36

keśaśaivālavakrābjacakrāvartanadīśatam /
tarattuṅgataraṅgāḍhyavahadraktamahānadam

3.38.30

aṅgalagnāyudhoddhāravyagrārdhamṛtamānavam /
videśamṛtasākrandahutāṅgagajavājinam

3.38.38

prāṇāntasmṛtaputreṣṭamātṛdevaparābhidham /
hāhāhīhītikathitamarmacchedanavedanam

3.38.39

mriyamāṇamathaujiṣṭhadviṣṭaprārabdhasaṃcayam /
dantiyuddhāsamarthāgramṛtadeheṣṭadaivatam

3.38.40

mriyamāṇamahāvajñāśūrāśritapalāyanam /
aśaṅkitāsṛgāvartabhīmāspadagamotsukam

3.38.41

marmacchedaśarāghātavyathāviditaduṣkṛti /
kabandhabandhaprārabdhavetālavadanākramam

3.38.42

uhyamānadhvajacchatracārucāmarapaṅkajam /
kiratsaṃdhyāruṇaṃ dikṣu tejaskaṃ raktapaṅkajam

3.38.43

rathacakradharāvartaṃ raktārṇavamivāṣṭamam /
patākāphenapuñjāḍhyaṃ cārucāmarabudbudam

3.38.44

viparyastarathaṃ bhūmipaṅkamagnapuropamam /
utpātavātanirdhūtadrumaṃ vanamivātatam

3.38.45

kalpadagdhajagatprakhyaṃ munipītārṇavopamam /
ativṛṣṭihataṃ deśamiva projjhitamānavam

3.38.46

kalāpakuntavalitaṃ bhuśuṇḍīmaṇḍalākulam /
mattanāgaśatākāraśavatomaramudgaram

3.38.47

śilāśikharasaṃjātatālajālamivātatam /
taradraktanadītīrajātakuntonnatadrumam

3.38.48

nāgāṃsasyūtahetyoghavṛkṣāṃśukusumākulam /
kaṅkakṛṣṭāntrarasanāvṛndajālakitāmbaram

3.38.49

asṛksarittīrajātakuntonnatavanadrumam /
asṛksarovarordhvasthapatākānalinīgaṇam

3.38.50

raktakardamanirmagnanarāhūtasuhṛjjanam /
karīndrakuṇapāpātaniryadbhagnajanekṣitam

3.38.51

hetilūnalatairvṛkṣaiḥ saṃdigdhārdhakabandhakam /
asṛṅgadīvahaddhastikaṭakarpaṭanaugaṇam

3.38.52

raktasrotaḥsphuracchuklavastraḍiṇḍīrapiṇḍakam /
saṃcāraniyatakṣiprabhṛtyavicchinnamānavam

3.38.53

itaścetaśca nipatatkabandharavadānavam /
ūrdhvasthūlākṣacakraughacchinnasainyadravajjanam

3.38.54

raktaniḥsvanabhāṅkāraphetkārārdhamṛtāravam /
śilāmukhalaladraktadhārādhūtarajaḥkhagam

3.38.55

sutālottālavetālatālatāṇḍavasaṃkaṭam /
paryastarathadārvantarardhāntaritasadbhaṭam

3.38.56

antasthasajjīvabhaṭaspandispandanabhītidam /
raktakardamapūrṇāsyakiṃcijjīvakṛpācchavam

3.38.57

kiṃcijjīvanarodgrīvaduḥkhadṛṣṭaśvavāyasam /
ekāmiṣotkakravyādayuddhakolāhalākulam /
ekāmiṣārthayuddhehāmṛtakravyādasaṃkulam

3.38.58

vivṛttāsaṃkhyāśvadviradapuruṣādhīśvararatha-
prakṛttoṣṭragrīvāprasṛtarudhirodgārasusarit /
raṇodyānaṃ mṛtyostadabhavadaśuṣkāyudhalataṃ
saśailaṃ kalpānte jagadiva viparyastamakhilam

3.38.38

ityārṣe śrīvāsiṣṭhamahārāmāyaṇe mokṣopāye utpattiprakaraṇe līlo० āhavavarṇanaṃ nāmāṣṭatriṃśaḥ sargaḥ

Original text: yogavāsiṣṭhaḥ · Sanskrit Wikisource contributors · Sanskrit Wikisource · CC BY-SA 4.0