Yoga Vasistha · Chapter 3.25

śrīvasiṣṭha uvāca /
nabhaḥsthalādgirigrāmaṃ gacchantyau kaṃcideva te /
jñapticittasthitaṃ bhūmitalaṃ dadṛśatuḥ striyau

brahmāṇḍanarahṛtpadmaṃ digaṣṭakadalaṃ bṛhat /
girikesarasaṃbādhaṃ svāmodabharasundaram

saritkesarikānālamadhye'vaśyāyabindukam /
śarvaribhramarībhrāntaṃ bhūtaughamaśakākulam

antarguṇagaṇākīrṇaṃ surandhraiḥ suṣirairvṛtam /
uhyamānapayaḥpūrairdivasālokakāntimat

rasārdraṃ khe bhramaddhaṃsaṃ rātrisaṃkocabhājanam /
pātālapaṅkanirmagnanāganāthamṛṇālakam

kadācidāspadāmbhodhikampakampitadigdalam /
adhonālagatānantadaityadānavakaṇṭakam

asurastraiṇavallaryā saṃbhogasukumārayā /
prāpyabhūbhṛnmahābījahṛdayaṃ bhūtabījayā //
jambūdvīpa iti khyātāṃ vipulāṃ tatra karṇikām /
saritkesarikānālā nagaragrāmakesarām

kulaśaileśvarottuṅgabījasaptakasundarīm /
madhyasthoccamahāmerubījākrāntanabhasthalīm

saraḥprāleyakaṇikāṃ vanajaṅgaladhūlikām /
sthaleṣvāmaṇḍalāntasthajanajālālimaṇḍalām

tāṃ yojanaśatākāraiḥ pratirākaṃ prabodhibhiḥ /
sāgarairbhramarairvyāptā dikvatuṣṭayaśālibhiḥ

digdalāṣṭakaviśrāntasasurāmbhodhiṣaṭpadām /
bhrātṛbhirnavabhirbhūpairnavadhā parikalpitām

lakṣayojanavistīrṇāmākīrṇāṃ ca rajolavaiḥ /
nānājanapadavyūhasthirāvaśyāyasīkarām

dvīpāttu dviguṇaṃ mānaṃ lavaṇārṇavalekhayā /
dadhatyā valitāṃ bāhye prakoṣṭhamiva kambunā

tato'pi dviguṇaṃ dehaṃ dadhatyā valayākṛtim /
jagadbhūtalatāvyāptāṃ śākākhyadvīpalekhayā // १ '
tato'pi dviguṇākāraṃ dhārayantyā ca veṣṭitām /
pratyagrakṣīrapūrṇābdhilekhayā svāduśītayā

tato'pi dviguṇākāraṃ dhārayantyopaveṣṭitām /
nānājanālaṃkṛtayā kuśākhyadvīpalekhayā

tato'pi dviguṇākāraṃ dhārayantyā ca veṣṭitām /
dadhyabdhilekhayā nityasaṃtarpitasuraughayā

tataḥ krauñcābhidhadvīpalekhayaivaṃ pramāṇayā /
veṣṭitāṃ khātaracayā navāṃ nṛpapurīmiva

tato'pi ca ghṛtāmbhodhilekhayaivaṃ pramāṇayā /
tato'pi śālmalīdvīpalekhayā malapūrṇayā

tataḥ surāmahāmbhodhilekhayā puṣpaśubhrayā /
śeṣasya dehalatayā harimūrtimivāvṛtām

tato gomedakadvīpalekhayaivapramāṇayā /
ikṣvabdhilekhayāpyevaṃ himavatsānuśuddhayā //
tato'pi puṣkaradvīpalekhayā dviguṇasthayā /
ante svādūdakāmbhodhilekhayaivaṃ pramāṇayā

tato daśaguṇenātha pātālatalagāminā /
nikhātavalayenoccaiḥ śvabhrasaṃbhārarūpiṇā

pātālagāmimārgeṇa valitāṃ bhayadātmanā /
etasmātkhalu sarvasmāttato daśaguṇoccayā

āvyomasu caturdikṣu śvabhrasaṃbhārabhīṣayā /
ardhonmlānatamorūpalagnanīlotpalasrajā

nānāmāṇikyaśikharakahlārakumudābjayā /
lokālokācalottālavipuloddāmamālayā

valitāṃ trijagallakṣmīdhammillavalanāmiva / /
etasmādeva sarvasmāttato daśaguṇātmanā

ajñātabhūtasaṃcāranāmnāraṇyena mālitām /
etasmādeva sarvasmāttato daśaguṇātmanā

nabhaseva caturdikkaṃ vyāptāmatulavāriṇā /
etasmādeva sarvasmāttato daśaguṇātmanā

mervādidrāvaṇotkena jvālājālena mālitām /
etasmādatha sarvasmāttato daśaguṇātmanā

mervādyacalasaṅghātaṃ nayatā tṛṇapāṃsuvat /
vahatādrīndravisphoṭakāriṇā javahāriṇā

niḥśūnyatvādaśabdena marutā parito vṛtam /
etasmādatha sarvasmāttato daśaguṇātmanā

parito valitaṃ vyomnā niḥśūnyenaikarūpiṇā /
atha yojanakoṭīnāṃ śatena ghanarūṇiṇā /
vyāptaṃ brahmāṇḍakuḍyena haimenāpi dviparvaṇā

iti jaladhimahādrilokapālatridaśapurāmbarabhūtalaiḥ parītam /
jagadudaramavekṣya mānuṣī drāgbhuvi nijamandirakoṭaraṃ dadarśa

ityārṣe śrīvāsiṣṭhamahārāmāyaṇe vālmīkīye utpattiprakaraṇe līlo० bhūlokavarṇanaṃ nāma pañcaviṃśaḥ sargaḥ