Yoga Vasistha · Chapter 3.23

śrīvasiṣṭha uvāca /
iti saṃkathanaṃ kṛtvā tasyāṃ niśi varāṅgane /
supte parijane nūnamathāntaḥpuramaṇḍape

dṛḍhākhilārgaladvāragavākṣe dakṣacetasi /
puṣpaprakaraniṣṭhayūtamāṃsalāmodamanthare

amlānamālāvasanaśavapārśvāsanasthite /
sakalāmalapūrṇenduvadanadyotitāspade

samāthisthānakaṃ gatvā tasthaturniścalāṅgike /
ratnastambhādivotkīrṇe citre bhittāvivārpite

sarvāstatyajatuścintāḥ saṃkocaṃ samupāgate /
divasānta ivābjinyau prasṛtāmodalekhike //
babhūvaturbhṛśaṃ śānte śuddhe spandavivarjite /
girau śaradi nirvāta iva bhraṣṭābhramālike

nirvikalpasamādhānājjahaturbāhyasaṃvidam/
yathā kalpalate kānte pūrvamṛtvantare rasam

ahaṃ jagaditi bhrāntidṛśyasyādāvanudbhavaḥ /
yadā tābhyāmavagatasyavatyantābhāvanātmakaḥ

tadā dṛśyapiśāco'yamalamastaṃ gato dvayoḥ /
asattvādeva cāsmākaṃ śaśaśṛṅgamivānagha

ādāveva hi yannāsti vartamāne'pi tattathā /
bhātaṃ vā'bhātamevāto mṛgatṛṣṇāmbuvajjagat

svabhāvakevalaṃ śāntaṃ strīdvayaṃ tadbabhūva ha /
candrārkādipadārthaughairdūramuktamivāmbaram

tenaiva jñānadehena cacāra jñaptidevatā /
mānuṣī tvitareṇāśu dhyānajñānānurūpiṇā

gehāntareva prādeśamātramāruhya saṃvidā /
babhūvatuścidākāśarūpiṇyau vyomagākṛtī

atha te lalane līlālole lalitalocane /
svabhāvāccetyasaṃvitternabho dūramito gate

tatrasthe vātha cidvṛttyā pupluvāte nabhasthalam /
koṭiyojanavistīrṇaṃ dūrāddūratarāntaram

dṛśyānusandhānanijasvabhāvā-
dākāśadehe api te mitho'tra /
parasparākāravilokanena
babhūvatuḥ snehapare vayasye

ityārṣe śrīvāsiṣṭhamahārāmāyaṇe vālmīkīye utpattiprakaraṇe līlāprajñādevyorjñānadehākāśagamanaṃ nāma trayoviṃśaḥ sargaḥ