Yoga Vasistha · Chapter 3.1

utpattiprakaraṇaṃ tṛtīyam
prathamaḥ sargaḥ

vāgbhābhirbrahmavidbrahma bhāti svapna ivātmani /
yadidaṃtatsvaśabdotthairyo yadvetti sa vetti tat

nyāyenānena loke'sminsarge brahmāmbare sati /
kimidaṃ kasya kutreti codyamūce nirākṛtam

ahaṃ tāvadyathājñānaṃ yathāvastu yathākramam /
yathāsvabhāvaṃ tatsarvaṃ vacmīdaṃ śrūyatāṃ budha

svapnavatpaśyati jagaccinnabhodehavitsvayam /
svapnasaṃsāradṛṣṭānta evāhaṃ tvaṃ samanvitam

mumukṣuvyavahāroktimayātprakaraṇātparam /
athotpattiprakaraṇaṃ mayedaṃ parikathyate

bandho'yaṃ dṛśyasadbhāvāddṛśyābhāvena bandhanam /
na saṃbhavati dṛśyaṃ tu yathedaṃ tacchraṇu kramāt

utpadyate yo jagati sa eva kila vardhate /
sa eva mokṣamāpnoti svargaṃ vā narakaṃ ca vā

ataste svāvabodhārthaṃ tattāvatkathayāmyaham /
utpattiḥ saṃsṛtāveti pūrvameva hi yo yathā

idaṃ prakaraṇārthaṃ tvaṃ saṃkṣepācchṛṇu rāghava /
tataḥ saṃkathayiṣyāmi vistaraṃ te yathepsitam

yadidaṃ dṛśyate sarvaṃ jagatsthāvarajaṃgamam /
tatsuṣuptāviva svapnaḥ kalpānte pravinaśyati

tataḥ stimitagambhīraṃ na tejo na tamastatam /
anākhyamanabhivyaktaṃ satkiṃcidavaśiṣyate

ṛtamātmā paraṃ brahma satyamityādikā budhaiḥ /
kalpitā vyavahārārthaṃ tasya saṃjñā mahātmanaḥ

sa tathābhūta evātmā svayamanya ivollasan /
jīvatāmupayātīva bhāvināmnā kadarthitām

tataḥ sa jīvaśabdārthakalanākulatāṃ gataḥ /
mano bhavati bhūtātmā mananānmantharībhavan

manaḥ saṃpadyate tena mahataḥ paramātmanaḥ /
susthirādasthirākārastaraṅga iva vāridheḥ

tatsvayaṃ svairamevāśu saṃkalpayati nityaśaḥ /
tenetthamindrajālaśrīrvitateyaṃ vitanyate

yathā kaṭakaśabdārthaḥ pṛthaktvārho na kāñcanāt /
na hema kaṭakāttadvajjagacchabdārthatā pare

brahmaṇyevāstyanantātma yathāsthitamidaṃ jagat /
na jagacchabdakārthe'sti hemnīva kaṭakātmatā

satī vāpyasatī tāpanadyeva laharī calā /
manasehendrajālaśrīrjāgatī pravitanyate

avidyā saṃsṛtirbandho māyā moho mahattamaḥ /
kalpitānīti nāmāni yasyāḥ sakalavedibhiḥ

bandhasya tāvadrūpaṃ tvaṃ kathyamānamidaṃ śrṛṇu /
tataḥ svarūpaṃ mokṣasya jñāsyasīndunibhānana

draṣṭurdṛśyasya sattāṅga bandha ityabhidhīyate /
draṣṭā dṛśyabalādbaddho dṛśyābhāve vimucyate

jagattvamahamityādirmithyātmā dṛśyamucyate /
yāvadetatsaṃbhavati tāvanmokṣo na vidyate

nedaṃ nedamiti vyarthapralāpairnopaśāmyati /
saṃkalpajanakairdṛśyavyādhiḥ pratyuta vardhate

na ca tarkabharakṣodairna tīrthaniyamādibhiḥ /
sato dṛśyasya jagato yasmādeti vicārakāḥ

jagaddṛśyaṃ tu yadyasti na śāmyatyeva kasyacit /
nāsato vidyate bhāvo nābhāvo vidyate sataḥ

acetyacitsvarūpātmā yatra yatraiva tiṣṭhati /
draṣṭā tatrāsya dṛśyaśrīḥ samudetyapyaṇūdare

tasmādasti jagaddṛśyaṃ tatpramṛṣṭamidaṃ mayā /
tyaktaṃ tapodhyānajapairiti kāñjikatṛptivat

yadi rāma jagaddṛśyamasti tatpratibimbati /
paramāṇūdare'pyasmiṃścidādarśe tathaiva hi

yatra tatra sthite yadvaddarpaṇe pratibimbati /
adyabdhyurvīnadīvāri cidādarśe tathaiva hi

tatastatra punarduḥkhaṃ jarā maraṇajanmanī /
bhāvābhāvagrahotsargaḥ sthūlasūkṣmacalācalaḥ

idaṃ pramārjitaṃ dṛśyaṃ mayā cātrāhamāsthitaḥ /
etadevākṣayaṃ bījaṃ samādhau saṃsṛtismṛteḥ

sati tvasminkuto dṛśye nirvikalpasamādhitā /
samādhau cetanatvaṃ tu turyaṃ cāpyupapadyate

vyutthāne hi samādhānātsuṣuptānta ivākhilam /
jagadduḥkhamidaṃ bhāti yathāsthitamakhaṇḍitam

prāptaṃ bhavati he rāma tatkiṃ nāma samādhibhiḥ /
bhūyo'narthanipāte hi kṣaṇasāmye hi kiṃ sukham

yadi vāpi samādhāne nirvikalpe sthitiṃ vrajet /
tadakṣayasuṣuptābhaṃ tanmanyetāmalaṃ padam

prāpyate sati dṛśye'sminna ca kiṃnāma kenacit /
yatra yatra kilāyāti cittatāsya jagadbhramaḥ

draṣṭātha yadi pāṣāṇarūpatāṃ bhāvayanbalāt /
kilāste tattadante'pi bhūyo'syodeti dṛśyatā

na ca pāṣāṇatātulyā nirvikalpasamādhayaḥ /
keṣāṃcitsthitimāyānti sarvairityanubhūyate

na ca pāṣāṇatātulyā rūḍhiṃ yātāḥ samādhayaḥ /
bhavantyagrapadaṃ śāntaṃ cidrūpamajamakṣayam

tasmādyadīdaṃ saddṛśyaṃ tanna śāmyetkadācana /
śāmyettapojapadhyānairdṛśyamityajñakalpanā

ālīnavallarīrūpaṃ yathā padmākṣakoṭare /
āste kamalinībījaṃ tathā draṣṭari dṛśyadhīḥ

yathā rasaḥ padārtheṣu yathā tailaṃ tilādiṣu /
kusumeṣu yathā''modastathā draṣṭari dṛśyadhīḥ

yatra tatra sthitasyāpi karpūrādeḥ sugandhitā /
yathodeti tathā dṛśyaṃ ciddhātorudare jagat

yathā cātra tava svapnaḥ saṃkalpaścittarājyadhīḥ /
svānubhūtyaiva dṛṣṭāntastathā hṛdyasti dṛśyabhūḥ

tasmāccittavikalpasthapiśāco bālakaṃ yathā /
vinihantyevamapyetaṃ draṣṭāraṃ dṛśyarūpikā

yathāṅkuro'ntarbījasya saṃsthito deśakālataḥ /
karoti bhāsuraṃ dehaṃ tanotyevaṃ hi dṛśyadhīḥ

dravyasya hṛdyeva camatkṛtiryathā
sadoditāstyastamitojjhitodare /
dravyasya cinmātraśarīriṇastathā
svabhāvabhūtāstyudare jagatsthitiḥ

ityārṣe śrīvāsiṣṭhamahārāmāyaṇe vālmīkīye utpattiprakaraṇe bandhahetuvarṇanaṃ nāma prathamaḥ sargaḥ