Viṣṇusmṛti · Chapter 99

dṛṣṭvā śriyaṃ devadevasya viṣṇor gṛhītapādāṃ tapasā jvalantīm
sutaptajāmbūnadacāruvarṇāṃ papraccha devīṃ vasudhā prahṛṣṭā //

unnidrakokanadacārukare vareṇye unnidrakokanadanābhigṛhītapāde
unnidrakokanadasadmasadāsthitīte unnidrakokanadamadhyasamānavarṇe //

nīlābjanetre tapanīyavarṇe śuklāmbare ratnavibhūṣitāṅgi
candrānane sūryasamānabhāse mahāprabhāve jagataḥ pradhāne //

tvam eva nidrā jagataḥ pradhānā lakṣmīr dhṛtiḥ śrīr viratir jayā ca
kāntiḥ prabhā kīrtir atho vibhūtiḥ sarasvatī vāg atha pāvanī ca //

svadhā titikṣā vasudhā pratiṣṭhā sthitiḥ sudīkṣā ca tathā sunītiḥ
khyātir viśālā ca tathānasūyā svāhā ca medhā ca tathaiva buddhiḥ //

ākramya sarvaṃ tu yathā trilokīṃ tiṣṭhaty ayaṃ devavaro 'sitākṣi
tathā sthitā tvaṃ varade tathāpi pṛcchāmy ahaṃ te vasatiṃ vibhūteḥ //

ity evam uktā vasudhāṃ babhāṣe lakṣmīs tadā devavarāgrataḥsthā
sadā sthitāhaṃ madhusūdanasya devasya pārśve tapanīyavarṇe //

asyājñayā yaṃ manasā smarāmi śriyā yutaṃ taṃ pravadanti santaḥ
saṃsmāraṇe cāpy atha yatra cāhaṃ sthitā sadā tac chṛṇu lokadhātri //

vasāmy athārke ca niśākare ca tārāgaṇāḍhye gagane vimeghe
meghe tathā lambapayodhare ca śakrāyudhāḍhye ca taḍitprakāśe //

tathā suvarṇe vimale ca rūpye ratneṣu vastreṣv amaleṣu bhūme
prāsādamālāsu ca pāṇḍurāsu devālayeṣu dhvajabhūṣiteṣu //

sadyaḥ kṛte cāpy atha gomaye ca matte gajendre turage prahṛṣṭe
vṛṣe tathā darpasamanvite ca vipre tathaivādhyayanaprapanne //

siṃhāsane cāmalake ca bilve chatre ca śaṅkhe ca tathaiva padme
dīpte hutāśe vimale ca khḍga ādarśabimbe ca tathā sthitāham //

pūrṇodakumbheṣu sacāmareṣu satālavṛnteṣu vibhūṣiteṣu
bhṛṅgārapātreṣu manohareṣu mṛdi sthitāhaṃ ca navoddhṛtāyām //

kṣīre tathā sarpiṣi śādbale ca kṣaudre tathā dadhni puraṃdhrigātre
dehe kumāryāś ca tathā surāṇāṃ tapasvināṃ yajñahutāṃ ca dehe //

śare ca saṃgrāmavinirgate ca sthitā mṛte svargasadaḥprayāte
vedadhvanau cāpy atha śaṅkhaśabde svāhāsvadhāyām atha vādyaśabde //

rājyābhiṣeke ca tathā vivāhe yajñe vare snātaśirasy athāpi
puṣpeṣu śukleṣu ca parvateṣu phaleṣu ramyeṣu saridvarāsu //

saraḥsu pūrṇeṣu tathā jaleṣu saśādvalāyāṃ bhuvi padmakhaṇḍe
vane ca vatse ca śiśau prahṛṣṭe sādhau nare dharmaparāyaṇe ca //

ācāraseviny atha śāstranitye vinītaveṣe ca tathā suveṣe
suśuddhadānte malavarjite ca mṛṣṭāśane cātithipūjake ca //

svadāratuṣṭe nirate ca dharme dharmotkaṭe cātyaśanād vimukte
sadā sapuṣpe sasugandhigātre sugandhalipte ca vibhūṣite ca //

satye sthite bhūtahite niviṣṭe kṣamānvite krodhavivarjite ca
svakāryadakṣe parakāryadakṣe kalyāṇacitte ca sadā vinīte //

nārīṣu nityaṃ suvibhūṣitāsu pativratāsu priyavādinīṣu
amuktahastāsu sutānvitāsu suguptabhāṇḍāsu balipriyāsu //

saṃmṛṣṭaveśmāsu jitendriyāsu kalivyapetāsv avilolupāsu
dharmavyapekṣāsu dayānvitāsu sthitā sadāhaṃ madhusūdane ca //

nimeṣamātraṃ ca vinā kṛtāhaṃ na jātu tiṣṭhe puruṣottamena //