Viṣṇusmṛti · Chapter 97
puram ākramya sakalaṃ śete yasmān mahāprabhuḥ
tasmāt puruṣa ity evaṃ procyate tattvacintakaiḥ //
prāgrātrāpararātreṣu yogī nityam atandritaḥ
dhyāyeta puruṣaṃ viṣṇuṃ nirguṇaṃ pañcaviṃśakam //
tattvātmānam agamyaṃ ca sarvatattvavivarjitam
aśaktaṃ sarvabhṛc caiva nirguṇaṃ guṇabhoktṛ ca //
bahir antaś ca bhūtānām acaraṃ caram eva ca
sūkṣmatvāt tadavijñeyaṃ dūrasthaṃ cāntike ca tat //
avibhaktaṃ ca bhūtena vibhaktam iva ca sthitam
bhūtabhavyabhavadrūpaṃ grasiṣṇu prabhaviṣṇu ca //
jyotiṣām api tajjyotis tamasaḥ param ucyate
jñānaṃ jñeyaṃ jñānagamyaṃ hṛdi sarvasya dhiṣṭhitam //
iti kṣetraṃ tathā jñānaṃ jñeyaṃ coktaṃ samāsataḥ
madbhakta etadvijñāya madbhāvāyopapadyate //
Original text: Viṣṇusmṛti · Edition: V. Krishnamacharya Viṣṇusmṛti with the commentary of Keśavavaijayantī of Nandapaṇḍita Madras The Adyar Library and Research Centre 2 The Adyar Library Series 93,1-2 · Data entry I. Shima · GRETIL (Göttingen) · CC BY-NC-SA 4.0