Viṣṇusmṛti · Chapter 93
na vāry api prayaccheta baiḍālavratike dvije
na bakavratike pāpe nāvedavidi dharmavit //
dharmadhvajī sadā lubdhaś chādmiko lokadāmbhikaḥ
baiḍālavratiko jñeyo hiṃsraḥ sarvābhisaṃdhakaḥ //
adhodṛṣṭir naikṛtikaḥ svārthasādhanatatparaḥ
śaṭho mithyāvinītaś ca bakavrataparo dvijaḥ //
ye bakavratino loke ye ca mārjāraliṅginaḥ
te patanty andhatāmisre tena pāpena karmaṇā //
na dharmasyāpadeśena pāpaṃ kṛtvā vrataṃ caret
vratena pāpaṃ pracchādya kurvan strīśūdradambhanam //
pretyeha cedṛśo vipro garhyate brahmavādibhiḥ
chadmanācaritaṃ yac ca vrataṃ rakṣāṃsi gacchati //
aliṅgī liṅgiveṣeṇa yo vṛttim upajīvati
sa liṅgināṃ haraty enas tiryagyonau prajāyate //
na dānaṃ yaśase dadyān na bhayān nopakāriṇe
na nṛtyagītaśīlebhyo dharmārtham iti niścitam //
Original text: Viṣṇusmṛti · Edition: V. Krishnamacharya Viṣṇusmṛti with the commentary of Keśavavaijayantī of Nandapaṇḍita Madras The Adyar Library and Research Centre 2 The Adyar Library Series 93,1-2 · Data entry I. Shima · GRETIL (Göttingen) · CC BY-NC-SA 4.0