Viṣṇusmṛti · Chapter 8
aśvamedhasahasraṃ ca satyaṃ ca tulayā dhṛtam
aśvamedhasahasrād dhi satyam eva viśiṣyate //
jānanto 'pi hi ye sākṣye tūṣṇīṃbhūtā udāsate
te kūṭasākṣiṇāṃ pāpais tulyā daṇḍena cāpy atha //
evaṃ hi sākṣiṇaḥ pṛcched varṇānukramato nṛpaḥ //
yasyocuḥ sākṣiṇaḥ satyāṃ pratijñāṃ sa jayī bhavet
anyathā vādino yasya dhruvas tasya parājayaḥ //
bahutvaṃ pratigṛhṇīyāt sākṣidvaidhe narādhipaḥ
sameṣu ca guṇotkṛṣṭān guṇidvaidhe dvijottamān //
yasmin yasmin vivāde tu kūṭasākṣy anṛtaṃ vadet
tattatkāryaṃ nivarteta kṛtaṃ cāpy akṛtaṃ bhavet //
Original text: Viṣṇusmṛti · Edition: V. Krishnamacharya Viṣṇusmṛti with the commentary of Keśavavaijayantī of Nandapaṇḍita Madras The Adyar Library and Research Centre 2 The Adyar Library Series 93,1-2 · Data entry I. Shima · GRETIL (Göttingen) · CC BY-NC-SA 4.0