વિષ્ણુસ્મૃતિ · અધ્યાય 8

અશ્વમેધસહસ્રં ચ સત્યં ચ તુલયા ધૃતમ્
અશ્વમેધસહસ્રાદ્ ધિ સત્યમ્ એવ વિશિષ્યતે ॥

જાનન્તો ઽપિ હિ યે સાક્ષ્યે તૂષ્ણીંભૂતા ઉદાસતે
તે કૂટસાક્ષિણાં પાપૈસ્ તુલ્યા દણ્ડેન ચાપ્ય્ અથ ॥

એવં હિ સાક્ષિણઃ પૃચ્છેદ્ વર્ણાનુક્રમતો નૃપઃ ॥

યસ્યોચુઃ સાક્ષિણઃ સત્યાં પ્રતિજ્ઞાં સ જયી ભવેત્
અન્યથા વાદિનો યસ્ય ધ્રુવસ્ તસ્ય પરાજયઃ ॥

બહુત્વં પ્રતિગૃહ્ણીયાત્ સાક્ષિદ્વૈધે નરાધિપઃ
સમેષુ ચ ગુણોત્કૃષ્ટાન્ ગુણિદ્વૈધે દ્વિજોત્તમાન્ ॥

યસ્મિન્ યસ્મિન્ વિવાદે તુ કૂટસાક્ષ્ય્ અનૃતં વદેત્
તત્તત્કાર્યં નિવર્તેત કૃતં ચાપ્ય્ અકૃતં ભવેત્ ॥