Viṣṇusmṛti · Chapter 67

atithir yasya bhagnāśo gṛhāt pratinivartate
tasmāt sukṛtam ādāya duṣkṛtaṃ tu prayacchati //

ekarātraṃ hi nivasann atithir brāhmaṇaḥ smṛtaḥ
anityaṃ hi sthito yasmāt tasmād atithir ucyate //

naikagrāmīṇam atithiṃ vipraṃ sāṃgatikaṃ tathā
upasthitaṃ gṛhe vindyād bhāryā yatrāgnayo 'pi vā //

yadi tv atithidharmeṇa kṣatriyo gṛham āgataḥ
bhuktavatsu ca vipresu kāmaṃ tam api bhojayet //

vaiśyaśūdrāv api prāptau kuṭumbe 'tithidharmiṇau
bhojayet saha bhṛtyais tāv ānṛśaṃsyaṃ prayojayan //

itarān api sakhyādīn saṃprītyā gṛham āgatān
prakṛtānnaṃ yathāśakti bhojayet saha bhāryayā //

svavāsinīṃ kumārīṃ ca rogiṇīṃ gurviṇīṃ tathā
atithibhyo 'gra evaitān bhojayed avicārayan //

adattvā yas tu etebhyaḥ pūrvaṃ bhuṅkte 'vicakṣaṇaḥ
bhuñjāno na sa jānāti śvagṛdhrair jagdhim ātmanaḥ //

bhuktavatsu ca vipreṣu sveṣu bhṛtyeṣu caiva hi
bhuñjīyātāṃ tataḥ paścād avaśiṣṭaṃ tu daṃpatī //

devān pitṝn manuṣyāṃś ca bhṛtyān gṛhyāś ca devatāḥ
pūjayitvā tataḥ paścād gṛhasthaḥ śeṣabhug bhavet //

aghaṃ sa kevalaṃ bhuṅkte yaḥ pacaty ātmakāraṇāt
yajñaśiṣṭāśanaṃ hy etat satām annaṃ vidhīyate //

svādhyāyenāgnihotreṇa yajñena tapasā tathā
na cāpnoti gṛhī lokān yathā tv atithipūjanāt //

sāyaṃ prātas tv atithaye pradadyād āsanodake
annaṃ caiva yathāśaktyā satkṛtya vidhipūrvakam //

pratiśrayaṃ tathā śayyāṃ pādābhyaṅgaṃ sadīpakam
pratyekadānenāpnoti gopradānasamaṃ phalam //