Viṣṇusmṛti · Chapter 48
brahmā devānāṃ padavīḥ kavīnām ṛṣir viprāṇāṃ mahiṣo mṛgāṇām
śyeno gṛdhrāṇāṃ svadhitir vanānāṃ somaḥ pavitram atyeti rebhan //
yavo 'si dhānyarājo 'si vāruṇo madhusaṃyutaḥ
nirṇodaḥ sarvapāpānāṃ pavitram ṛṣibhir dhṛtam //
ghṛtaṃ yavā madhu yavā āpo vā amṛtaṃ yavāḥ
sarve punīta me pāpaṃ yan me kiṃcana duṣkṛtam //
vācā kṛtaṃ karmakṛtaṃ manasā durvicintitam
alakṣmīṃ kālakarṇīṃ ca nāśayadhvaṃ yavā mama //
śvasūkarāvalīḍhaṃ ca ucchiṣṭopahataṃ ca yat
mātāpitror aśuśrūṣāṃ tat punīdhvaṃ yavā mama //
gaṇānnaṃ gaṇikānnaṃ ca śūdrānnaṃ śrāddhasūtakam
caurasyānnaṃ navaśrāddhaṃ punīdhvaṃ ca yavā mama //
bāladhūrtam adharmaṃ ca rājadvārakṛtaṃ ca yat
suvarṇastainyam avrātyam ayājyasya ca yājanam
brāhmaṇānāṃ parīvādaṃ punīdhvaṃ ca yavā mama //
Original text: Viṣṇusmṛti · Edition: V. Krishnamacharya Viṣṇusmṛti with the commentary of Keśavavaijayantī of Nandapaṇḍita Madras The Adyar Library and Research Centre 2 The Adyar Library Series 93,1-2 · Data entry I. Shima · GRETIL (Göttingen) · CC BY-NC-SA 4.0