વિષ્ણુસ્મૃતિ · અધ્યાય 48

બ્રહ્મા દેવાનાં પદવીઃ કવીનામ્ ઋષિર્ વિપ્રાણાં મહિષો મૃગાણામ્
શ્યેનો ગૃધ્રાણાં સ્વધિતિર્ વનાનાં સોમઃ પવિત્રમ્ અત્યેતિ રેભન્ ॥

યવો ઽસિ ધાન્યરાજો ઽસિ વારુણો મધુસંયુતઃ
નિર્ણોદઃ સર્વપાપાનાં પવિત્રમ્ ઋષિભિર્ ધૃતમ્ ॥

ઘૃતં યવા મધુ યવા આપો વા અમૃતં યવાઃ
સર્વે પુનીત મે પાપં યન્ મે કિંચન દુષ્કૃતમ્ ॥

વાચા કૃતં કર્મકૃતં મનસા દુર્વિચિન્તિતમ્
અલક્ષ્મીં કાલકર્ણીં ચ નાશયધ્વં યવા મમ ॥

શ્વસૂકરાવલીઢં ચ ઉચ્છિષ્ટોપહતં ચ યત્
માતાપિત્રોર્ અશુશ્રૂષાં તત્ પુનીધ્વં યવા મમ ॥

ગણાન્નં ગણિકાન્નં ચ શૂદ્રાન્નં શ્રાદ્ધસૂતકમ્
ચૌરસ્યાન્નં નવશ્રાદ્ધં પુનીધ્વં ચ યવા મમ ॥

બાલધૂર્તમ્ અધર્મં ચ રાજદ્વારકૃતં ચ યત્
સુવર્ણસ્તૈન્યમ્ અવ્રાત્યમ્ અયાજ્યસ્ય ચ યાજનમ્
બ્રાહ્મણાનાં પરીવાદં પુનીધ્વં ચ યવા મમ ॥